Revelation of John 20

Kufu kana'a mone tauseni yanamofihi ka'a

Ya hulago nani nubu egolago kokulumaguti agelo mone limigo bu go'ohuna. Ya'ma yatama kelimofihi foloke'a to seni naga'i sipi'a mone liloto mino'ehina. Ai ya'ma hagulu osifa'i koyapa'i ema afenuga mino'ehina, Satahi fato gi'a Foipa Fele ai'a ya'ma gilo yato liloto kufu moneko tauseni ya'ma naga nonugu minalibe luto lu eto'ehina. Agelouba ya hu etoto keli yatama ya'ma fitu fo he'migo limi'ehina. Limilago kafe ya'ma giloto keya'i moloto li hetofa hu'ehina. Noto noto bona'magihi komopa'ani aku'i le'mo sibina mehu epolose fa'mene mino lito buto nehitogo kufu moneko tauseni ya'ma su holenogo gulu he ketenogo ya'ma tito kana'a hupamone'isi minalane luto lu eto'ehina.

To nani sekele mamu'a hiti kefa hisa babu luto ni'igo bu go'ohuna. Bu nogogo bona'i ya'ma heneti su hete kefalo ya'ma minete bila ela he'ahana enali lube laga hibe foya lilabe luto lu epolo'ehina. To Yesu luto lu'ehina ka'a hiti Hu'mamofihi ka'a enelesa meligo lu yege he'ahago lubaha'ani emitatu laga hi'ahana enali enemeha'ani bu go'ohuna. Enali akafu yagakafa ai'a to meha'a enalapusa fite enofokehi mehana'a to ai omiha'a ya'ma enogobisalo to li enayanugu memele'ahana'a bu go'ohuna. Enali'i lubaha'ani laga hi'ahanaguti aku'i ho tite minete Kilisito hiti enigihiti bo foya nelinogo kufu moneko tauseni bilina'mu yabe. Filite bi'ahana luga'amagi enali ya'ma ho meti'ehinogo kufu moneko tauseni ya'ma su halibe lite yamofihi geba hite fa'mene mine'ahana. Fili'ahanaguti ho tilatana bu go'ohunaya ho tilatanamofihi yata'a kohe toto moneko'isi ni'ibe. Ana fili'ahanaguti ho ti'ahana'a bu go'ohuna ya'ma molo emilata nehana bona'i enegelo bite enali komopa'anigu laga'a kehelilatamofihi gupisalo ba'nesabe. Bona'i ya hi'ahana'amagi enali fililana napa 2 yanauba ya'ma enugufa pata mesilube'mu hibe. Enali Hu'mamofihi to Kilisitohi mamufa gi emilata bona'i lolo hite minalune'mu habe. Ya nehinogo ai hiti enigihiti bo foya lelite biba biba hite kufu moneko tauseni bu enebe ligilina'mu yabe.

Kilisitou Satahi le'mo laba hugo limilina'mu

To kufu moneko tauseni su nehenogo Satahi ya'ma yatama keliguti gulu he etenogo aku'i ya'ma henetilube'mu hibe. Henetiloto noto noto bona'i melugu nekisa bokisa'aga ya'ma Gogo metogati to Magogo metogati bona'i komopa'ani le'mo sibina hu epoloto enele'mo negi nagi noloto bona'i enogo'na henogo luba li huto hilabe'mu enele'mo nupa hilube'mu hibe. Enali napa'ani ya'ma kehe'i ya suhi hite leka soto leka soto su mehose suhi huto nehabe. Ya'ma Satahi luba bona'amagi henetite me'i kelehi sipi'a moneto ya'ma bite Hu'mamofihi lamana'a bona'a li gehesa nehanaga to Hu'ma bita hulata nohina hepa'i Yelusale hepatoga biba biba hite kofohi malalune'mu le'mo bi yigilune'mu habe. Ya nehinogo kokulumaguti logo lolito limito logouba enolo pululu halina'mu yabe. 10 Ya nehinogo Satahi ya'ma afetoga bona'i enimi'i molo'ehina bo ai hiti fela logomofihi hefuha'agu kala efahi logogu loto ni'inagu fi felu ho he'minogo limi'ehina yabe. Koyapa'i akafu yagakafa ai hiti to faga faga mono ka leli'ali bo ai hiti anagu fi felu ho he'minogo limi'aha'inagu ya'ma Sata hiti limi'ehina. Enali ya'ma ufeha'a hiti nasana kofi epelelenogo kana'amu kana'amu utehi etehi enagabu kumu kalafa hite minalune'mu habe.

Aliha'a ka foya sipi huto hilina yupahi

11 To nani sekele mamu'a hiti kefa hisa sipilo koholi nasana mone bu go'ohube. Gupisa'alo mino'ehina ai gobisa bu go'ohuna ya'ma kokuluma hiti me'i hiti gobisaloti koli hilete aku'i huto mehite'atiti minigi'aha'ina. 12 Ya neha'igo fili'ahana bona'i tite minana'a limite minana'a sekele mamu'a hiti kefa hisamofihi gobisalo ho tite nehago bu go'ohuna. Kefa hisalo minana bouba buku mone li paka soloto mino'ehina. To mone buku li paka sago bu go'ohuna ya'ma amuya minoba minoba nehana bona'magihi enigi'ani koyo molo'ehina buku mino'ehina. To filite bi'ahana'amagi enali hite melete hi'ahana suhi ka lamana'a ya'ma bukugu keye mele'ahana ya'ma Hu'mau bu goloto kaga'ani libe sibi hifi bati hifi loko huto mino'ehina. 13 To ana kanalo hege nagami'mofihi komopa'agu filite ke'ahana'a enali'i enele'mo tiligi so'ehina. To fililata nasanamofihi to kene mala malamofihi komopa'agu filite bite mine'ahana'a enali hiti enele'mo tiligi so'ehina. To ka foya li kehelise bouba filite bi'ahana'a bona'i asaga'i enali lite melete hi'ahanamofihi hapa'a li nupa huto ka'ani loko huto pa sose'na epi'ehina. 14 Ya hulago filise'na hiti kene mala mala hiti etali logomofihi hefuha'agu kala efahi logogu loto ni'inagu etefelu ho he'migo limi'aha'ina. Yanauba filise'na napa 2 lolo hu'ehibe. 15 To ana bona'i ya'ma enigi'ani amuya minoba minoba nehana bona'magihi enigi koyo molo'ehina bukugu meni'ina'a enali ya'ma logomofihi hefuha'agu kala efahi logogu loto ni'inagu fitu fo he'migo limite mine'ahana.

Copyright information for `BEF