Revelation of John 4

Kokulumagu Hu'mamofihi fokehi lilata nehana ka'a

1Nani ana'ina ya hu tegi huto bu goloto nubu ego saga huto bu go'ohuna. Kokulumagu kafe mone hokolo hu'ehigo bu go'ohuna ya'ma nogo'a yata'a huto higo keheli'ohuna ya'ma pikuli ya suhi huto huto huloto ma luto lu nimi'ehina: Kai malo tito minoto ana'ina huto hilina'a ya'ma kelepinogo'ni bu galatagihe. 2Ya luto lulago ana'asi Sikalafu'uba limito nele'mo saga tigo kokulumagu sekele mamu'a hiti kefa hisalo mino'ehinamofihi gupisalo bo moneuba nohigo bu go'ohuna. 3To sekele mamu'a hiti kefalo mino'ehina ai okaba'a mina'a minomo tito mino'ehina efahi gi'a yasipa efahi, ya suhi huto konilia efahi safa'na ya suhi huto besa besa loto mino'ehina. To kefa hisa nekisa'aga bego bego huto ya'ma mone figenefamofihi kifiya'nalogo'na efahi ya suhi huto fi bego huto ni'igo bu go'ohuna. 4To sekele mamu'a hiti kefa hisa napa'a fi bego hite ya'ma fato kefa hisa mone kegi'a 24 kefa ni'igo bu go'ohuna. Kefamofihi gupisalo olopa kaba bona'i luga'a 24 enali koholi gukete'ani fayaha'a hiti lite hekelete mine lite bite mine'ahana to kakili'mofihi sekele mamu'a golitu lolo hi'ahana ya'ma lataha'aniga ni'igo bu go'ohuna. 5To sekele mamu'a hiti sipi kefa hisaloti ya suhi huto kopisi'na sipi li melebeya nohigo nogo'a kokililika hiti luto mino'ehina. To sekele mamu'a hiti kefa gobisa'aga ya'ma logo libi'i 7 loto mino'ehina ya'ma Hu'mamofihi meha'amofihi amuyalo 7 ni'igo meha'amofihi libi'a mino'ehina. 6To sekele mamu'a hiti kefa hisamofihi okaba'aga ya'ma gapo gapo'i ya suhi hite lolo hi'ahana ya'ma nagami hefuhi suhi huto minoto botolo li'ahana'a ya'ma mino'ehina.

To sekele mamu'a hiti kefa hisa luga luga'aga ya'ma kene'i amuya'a nasana loebe loebe mine lite bite mine'ahana. Enali enubu'aga to enemegesaga enubu bai toto mino'ehina.
7To mone kene'i ai laeoni luba kala ya suhi huto to mone'i bulumaka yaga nala'a ya suhi huto to mone'i ai okaba'alo bona'magihi suhi huto to moya suhi huto to mone'i ai okaba'alo bona'magihi suhi huto to mone'i ya'ma lupahi koke'na'a ya suhi huto li su toloto mino'ehina. 8Kene'i amuya'a nasana loebe loebe enokoke'na 6 to koke'na ifo'aga to afetoga enubu'a babu luto ni'igo to sinihi gito go'i luto higo kehe ite ma lite nama lilata nehabe: Sipi Boti Hu'ma, hetofa hapa hapa'a bo nohibe. Amuya'a sipinamo li su ho'ehina bo. Ai koyapa'i mino'ehina to yatai nohuna bo. Ai minomo buto minalina bo nohinagihe.

9To kene'i amuya'a loebe loebe enali sekele mamu'a hiti kefa hisalo minolata nohina kumu nama lite yege filete minete ai'a gi'a le'mo ho tite ya'ma minoba minoba nohina aitoga fokehi hete enegelo bi emite nehabe. 10To olopa bona'i luga'a 24 sekele mamu'a hiti kefalo minolata nohinaga bite enalapusa fi emite ya'ma minoba minoba nohina aitoga foke ka lu emite sekele mamu'a hiti kakili'ani ya'ma sigitete nemelete ma lite lilata nehabe: 11Sipi Boti Hu'ma laliti nohane. Kaisigo ana'ina silaga'i li huto huto molo'ahata to kai kagakalo ana'ina li huto hu su holoto nohane. Ya'mu kai hetofanaka ni'igi lali yagapanakamagita fana mehaka le'mo saga hino luto Kigikalo to amuyakalo le'mo ho tite le'mo bati hinogo minalina'a huto nohane.

Copyright information for `BEF