Revelation of John 7

Isilaeli bona'i 144 tauseni enogobisalo Hu'mamofihi omiha'a mino'ehina

Ya hulago nani nubu bu golago buto agelo loeyagi loeyagi nehago bu enogo'ohuna. Enali me'i nekisa'a loebe loebe ni'ina yalo mine lite bi'ahago bu enogo'ohuna. Melugu yasi loebe loebe lite mine'ahana yamofihi metoga to hege nagamilugu to yafa yasi mone melilibe lite lila lila hite mine'ahana. Ya hilago yege notinagati agelo mone notigo bu go'ohuna. Ai amuya moloto minoba minoba Hu'mamofihi omiha'a lito mino'ehina. Ai ya'ma agelo loeyagi loeyagi ya'ma metoga to hege nagamilugu bauna fi lalabe luto yamofihi amuya'a epi'ehina'a kehe sipi ito ma luto lu epito lu'ehina: Lenali melugu to hege nagamilugu to yafa mele'isi bauna mefilo. Lali kohe toto Hu'mamofihi yagapana'a enogobisalo ya'ma omiha'a molo epalaluta'mu yabe. Ya luto ligo bona'i enogobisalo Hu'mamofihi omiha'a mino'ehina'a enali li nupa hite napa'ani ya luto ligo keheli'ohuna: Isilaeli bona'magihi naga'ani fato fato'i silaga'i 144 tauseni enali enogobisalo Hu'mamofihi omiha'a mino'ehina. Yutahi naga'i 12 tauseni omiha'a hiti mino'ehina, Lubenihi naga'i 12 tauseni, Gatehi naga'i 12 tauseni. Asehi naga'i 12 tauseni ana huto omiha'a hiti mino'ehina, Nafatalihi naga'i 12 tauseni, Manasehi naga'i 12 tauseni. Simionihi naga'i 12 tauseni ana huto omiha'a mino'ehina, Libaihi naga'i 12 tauseni, Isakahi naga'i 12 tauseni. Sebulunihi naga'i 12 tauseni ana huto omiha'a hiti mino'ehina, Yosefehi naga'i 12 tauseni, to Beyaminihi naga'i 12 tauseni yabe. Ya'amagihi Hu'mamofihi omiha'a ya'ma enogobisalo mino'ehina.

Fato fato metoga naga'i babu luto mino'ehinamofihi ka'a

Ya hulago nubu egolago buto mana bu go'ohuna: Noto noto bona'i luga'amagihi babeyafa'a fato fato enugufa hiti to fato fato naga'i hiti to kaga'ani fato fato'i to naga'i babu lite ya'ma bo moneuba leka so su mehose suhi enali sekele mamu'a hiti kefa hisamofihi gobisalo to sipisipi nala'a ai maha'aga ho tite nehago bu enogo'ohuna. Enali ya'ma koholi kata li hekelete lose lose'na fekilite enayanugu ya'ma lose lose'na hekele ite lila lila hite mine'ahana. 10 Lila lila nehite ka sipi kaguti ma lite li'ahana: Lubuto bilata nasana ya'ma sekele mamu'a hiti kefa hisalo minolata nohina afotifu Hu'mamofihi aitogati to sipisipi nala'a aitogati ni'ibe. 11 To agelo asaga'i to olopa kaba bona'i luga'a to kene'i amuya moloto minolata loebe loebe enali ho tite fi bego hite sekele mamu'a hiti kefa hisalo li melete mine'ahana'a enali sekele mamu'a hiti kefamofihi maha'aluga lapusa fi emite Hu'mamofihi fokehi hete ma lite nelite li'ahana: 12 Lama'na ka lusa gilata to ai fana meha'a bati hulata to keheli fe lulata to fokehi lulata to gi'a liyafa hulata to kaba huse nasana to amuya nasana Hu'mamofitoga yabe lulata nasana mino'ehina ya'ma mino lito buto mino baga ito minalina'mu yabe. Ma'naka.

13 Ya lite li nehe'migo olopa kaba bona'i enalitogati moneuba loka ho netoto lu'ehina: Ki'afu ki'afu hapa'a hiti koholi kata hekelelata nehana'a ya'ma hiyagati nehabe? 14 Ya luto noloka hago nona'a ma luto lu emi'ohuna: Kibina bo'nimaka ya'ma kaika keheli'ahatigi lu menonimine. Ya luto lugo ai lu'ehina: Enali kalana'i mele ketelata nehanamofihi komopa'aguti enabaga hiti e'ahanamo ni'ibe. Enali gukete'ani ya'ma sipisipi nala'amofihi golaha'atu okala hite lite hapa'a li lolo hite li'ahabe. 15 Ya'mu Hu'mamofihi sekele mamu'a hiti kefa hisamofihi maha'aluga nehite utehe etehi sipi mono nonugu agoya hi etete minelata nehabe. Ya nehago sekele mamu'a hiti kefa hisalo minolata nohina ai'a kaba hu epoloto minalube'mu hibe. 16 Ya nehite nose'na'ani'mu kau'na mehalana'mu yabe. To nagami kumu kau'na meenahalina'mu yabe. To yegeuba meenalalina'mu yabe. To mukoho nasana moneuba enugufa'ani laga mehilina'mu yabe. 17 Kefa hisa folagaha'agu sipisipi nala'a nohina ai'a ya'ma kaba hu epalalina'mu yabe. Ya hinogo minoba minoba nasanamofihi ipi opohi notilina nagamitoga enele'moto bilube'mu hibe. Ya hulenogo Hu'mau ai'a enubu nogoya kele li epalalina'mu yabe luto enali aku'i yibi mehilana'mu lu nimi'ehina yabe.

Copyright information for `BEF