Romans 12

Hu'mamofihi lili'na lilata nohune

1Nalalu'nigitabe. Hu'mau sipi ginaga fi limi'ehina'mu nani lenoloka hoto buka tilube. Lenali lenugufatini Hu'mamofitoga molo emilo luto, hetofa kuguhi legi huto mino kosaba'natini emite li molo etalo. Lenugufatini ya emilenogo Hu'mau ai lenali kumu fokehi lilibe. Ya hu'ehina'mu lenali Hu'mamofitoga agoya hu emite to gi'amo liyafa hilata nehana yamofihi lusiga mono ka ni'ibe. 2To lenali asaga melugu bona'magihi hapa'ani mege'i memalalo. Hu'mau komopatini li gelehe hu lepololenogo lenegekesa kehelise yuhufana lolo hilina'mu yabe. Ya hulenogo Hu'mamofihi hetofa hapa'amu kehelite to ai bita nohina'mu to ekesa kehelina bati nohina'mu hiti asaga hetofanamofihi ai'a fokehi luse'na'amu lenali keheliya ilabe.

3To Hu'mau nele'mo hetofa hu'ehina bo noho lifi'ehigo nani ma kaga mone lu nolepube. Hu'mau keheli ule'ale huse'i fato fato'i guna ito lepi'ehina. Ya'mu lenali lenugufatini limo titi mehilo. Lenalitini be ligite kehelinogo mone'a hiti metilo. Hu'mau mono ka limi'ehinamofihi keheliya ite minete hapatini le'mo eto eto hite minalabe. 4Lali moneko bomofihi gufa'a suhi luto nominone. Gufa'a moneko'na ni'inaya aku fato fato kegi'a to fato fato foya nelibe. 5Ya huto lali yege yege bona'i fato fato nohuta li nupa huto Kilisitotoga hepito moneko'na nohune. To gufa'a moneko'isi suhi huto kegi'a moneko moneko li nupa huto hepi'ohune. Ai'a gufa'a legi huto nominone. 6Ya hu'ehina'mu Hu'mau lehe'moto fato fato lili'na limi'ehina. Ya huto limi'ehina'mu kehelise'natilo lili'na liluta bati hilibe. To folaganuguti kene'i moneuba mono ka lu yege hose lili'nalo minoto'a Hu'mau emi'ehina keheli ule'ale huse'nalo yamofihi mono kaga lu yege hoto minalibe. 7To bo moneuba Hu'mamofihi lili'na lenali kumu lilube luto bati huto amuya moloto ana lili'na lilata nohibe. To moneuba Hu'mamofihi ka enelepilube luto babafi bo hilina, ya bati huto amuya moloto ka'a enelepilinamofihi lili'na lilibe. 8To bo moneuba boana'i komopa'anigu keta hi'ahanamagihi enele'mo amuya malalina yamofihi lili'na lilibe. To bo moneuba ana'ina'a babu luto ni'igo guna ito epilube luto ligo, ana bo komopa'agu beyaga neinogo fato bona'i fa'mene epilata huto minalibe.To moneuba Hu'mamofihi bona'a kaba hulata nohina ai ana lili'nalo amuya moloto kosele'i mehenogo lili'na lilibe. To mone bouba bona'magihi ginaga fito enehe'malube luto ai ana lili'nalo bati huto liloto fokehi lito minalibe.

9Lenali leniginaga fise'namu fato bona'mofihi leniginaga fi emite lusiga lite komopatini emilo. Foipa faipa huse'namofihi hapa'a lagati melebesibe lite lenemegesa hu emilo. Ya hite, asaga lamana huse'namofihi li pili kete mineme bite minalo. 10Lenali ai ginaga fi eminogo ai ginaga fi eminogo hite koguna ite minalo. Ya hite minete lenigitini liyafa mehise bonatinimo le'mo hofa tete minalo. 11Lenali Hu'mamofihi lili'na amuya melete lilo. Fa'mene fuli meminese lenegelo bite Sipi Botimofihi lili'na'amu lite komopatinigu babahi hinogo minalo. 12Lenali Hu'mamofihi bu galana yupahi mineme bite geba hilananauba lenele'mo amuya melenogo lenofokehi lilo. To keta huse'nauba lenalitoga huto nohinogomo komopatinigu fulu huse'na'mu Hu'mau lenehe'malinamofihi geba hite minalo. To asaga yupahi kosele'i melenehenogo Hu'mamofihi loka hete nunumu hilo. 13Lenali Hu'mamofihi bona'a enumuhi meni'ina'amagihi fe'nohatini fuku lite li epilo. To bonoho bona'i elenogomo nohatinigu enele'mo melenogo tilenogo nose'na epite malo kalo lite, ya lu epilo.

14To bona'i mone'amagi lenegene mane neinogo Hu'mamofihi loka hete ana bona kumu gumi'i enohobo melise li hetofa hu epolobo lite ya'ma loka halo. 15To bona'i moneuba gelo binogomo ana hite aitoga lenegelo bilo. To bona'i moneuba yibi bena nohinogomo lenali aitoga bite yibi hite keke'i lu etalo. 16To lenali moneko hepatoga neminana bona'magihi fulu hite minete komopatini moneko babeyafa hite minalo. Lenali bona'i enubulo hutu hata hilata to sipi bonako yaga foya bonako enele'mo fulu hilata mehilo. Lenali laba hite bona'magihi suhi hite neminanamofihi ya hite minalo. To lenali asaga'na keheli baga i'ohuta bona'i nohune lite ya lenekesa mekehelilo.

17To bona'i moneuba lenele'mo sibina nohinogomo lenali foipana nona'a meemilo. Aku'i bona'magi bebe sose hapa'amu nelanamofihi ya'ma lenali mege'i melete minalo. 18Lenali asaga yupahi yege yege bona'i hiti fulu hite minalo. Lenali luba ka genaga le'mo huto mehilo. 19Nalalu'nigitabe, bona'i moneuba lenele'mo sibina hulenogomo ipakafa mehete to ana bona'mofihi li pa salune lite ya melilo. Ya'ma Hu'mau ita bise'nauba enahalinamo ni'ibe. Ya hu'ehina'mu mono bukugu fayahi ma ge'ahana:Nani foipa bona'mofihi nona'a epilube luto, Sipi Botiu ya lu'ehina. Foipana'ani'mu osahi epito i pa saluna ya'ma nani foya'ni yabe. Yanana'mu mono bukugu mone hiti fayahi ge'ahanagi lenali kehelilo: 20Fatehaka kau'na nohenogo kai nose'na li emibo. Ai nagami kumu nobesinogo kai hefito emibo. Kai ya huletogo ai hu'ehinana'mu buya hilibe. Ya lite keye'ahanamofihi ka'a mege'i malalo. 21Lenali ya hite hetofa suhi hite hilenogomo foipa hapa'auba lenele'mo laba mehilina'mu yabe. Lenali hetofa hapatiniuba foipana bege ligilina'mu yabe.

Copyright information for `BEF