Romans 3

To ya hu'ehina Yuta bona'magi fegutoga bona'i enebe ligi'ahanafiye? To Yuta bona'magi enugufa laga hi'ahanamoya enali kumu bati hu'ehinafihe? O'yo, bati hu'ehibe. Hena'mube? Hu'mau yata'a kaga'a Yuta bonatoga molo epolo'ehina. Yuta bona'magi Hu'mamofihi hapa'a akehelite agoya hu emi'ahana yabe. To ana Yuta bona'i mone'amagi mono kaga mege'i memele'ahago Hu'mau kaga lu molo'ehinana asaga'i huto mehilifihe? O'e, ya huto meni'ibe. Fato fato bona'magi mi'i malalinafi, faga faga lilanaya aku'i Hu'mau ai'asigo ma'naka lulata bo nohinagihe. Mono bukugu Hu'mamofi kumu fayahi ge'ahana:

  • Asaga kagaka fotogo huto ni'ibe.
  • Ya hu'ehinago
  • kai ka foyalo enele'mo ho tilata,
  • kai kagauba enahalube'mu hibe.
  • Enebe ligilina suhi huto ni'ibe.

Nani bomagi enekesa yigilata nehana suhi luto kaga nolube. Lali foipa faipa hapatiuba Hu'mamofihi bebe sana hapa'alo huto hilina lali henabe luto liluta ni'ibe? Hu'mau lali'i osahi noliminogo bati mehina suhi nohibe luto liluta ni'ifiye? Lali foipa faipa hapatiuba Hu'mamofihi bebe sana hapa'alo huto hilina lali henabe luto liluta ni'ibe? Hu'mamofihi hapa'auba lali foipanatilo nona'amofihi mina'a limilina ai ya bati huto menifihe? Ya huto meni'ibe. Hu'mamofihi hapa'a bati mehitita asaga melugu bona'i kaga'ani loko mehitine.

To nani faga luse'na'niuba Hu'mamofihi bebe sanalo huto hinogomo fana tose'na'a mone hiti tilina ni'ifiye? Ya hinogomo henabe luto foipa bo nohane luto nifisa ilibe? Nani ma kaga lilufi? Lali babu foipanati liloto nohutagi aku hetofana huto hilina'amu ya'ma hiluta ni'ifiye? O'e, ya huto meni'ibe. Bona'i luga'amagi lemege ka leli'ali hite ma lite li'ahana: Ai Polu ma luto lu'ehina: Lali foipanati linogomo Hu'mamofihi bebe sose'na'a huto hilina'mu yabe, lite li'ahana. Faga nelago nani ya'ma kaga melu'ohuna. Yamofihi nelana bona'i nehinogomo Hu'mau osahi epilina ya bati huto ni'ibe.

Lamana bona'i moneko'isi menohibe.

Ya'mu henana ni'ibe? Lali Yuta bona'magita fegutoga bona'i enebe ligi'ohupi? O'e, ya huto meni'ibe. Foipanauba lali asaga Yuta bona'i hiti fegutoga bona'i hiti ifito leto'ehigo lali moneko suhi huto nohune. 10 Mono bukugu ma kaga fayahi keye'ahanamo ni'ibe:

  • Lamana bo melugu mone menohibe.
11 
  • To Hu'mamofihi kaga
  • keheli bebe sose bo mone menohibe.
  • Ana huto ai kumu kehe ito
  • sa sa hilata bo menohibe.
  • 12 
  • Asaga bona'magi Hu'mamofitoga he'mite
  • sibi sabana hite
  • enemegesa hu emi'ahana.
  • Mone bati huse bo menohibe.
  • Ya'ma yege yege bonaluguti
  • bati bo mone menohibe.
  • 13 
  • Enali kene keliguti hokolo hu'ehinaguti
  • tu nobina suhi huto kaga'ani ni'ibe.
  • Kenetufa'ani i gelehe hite
  • faga ilata nehabe.
  • Kaga'ani osifa'mofihi nalisa'a suhi huto,
  • enabaga kosaloti lilata nehabe.
  • 14 
  • Enabagaguti kenasabo nebina ka
  • to huli ka hiti nelana bai toto ni'ibe.
  • 15 
  • Enipa'anigu sipi logo nobigo,
  • mele'isi bona'i enoho fililata nehabe.
  • 16 
  • Enali fato fato hepatoga bite,
  • li sibina sabana hite
  • ketana li enugufalo nemalabe.
  • 17 
  • Enali koguna ito minose'mofihi hapa'a
  • keheli bati menehabe.
  • 18 
  • Enali Hu'mamofi kumu enegekesa neyigite,
  • koli menehabe.
  • 19 Lali mana keheli'ohune. Bona'i moneuba keya kaloga mege'i nomelenogo ana keya kauba le'malibe. Ya hu'ehigo ana bouba nani lamana bo nohube luto ekesa kehelilina meni'ibe. Ya'ma keya kauba melugu bona'i yege yege'magihi hapa'ani bati mehu'ehina yabe luto enabaga'ani yanauba hekini lo'ehigo Hu'mau kaga'ani loko hilina'mu yabe. 20 To bona'i moneuba keya kalo mege'i moloba moloba nohigo keya kauba ana bomo Hu'mamofihi bulo le'mo bati mehilina'mu yabe. Ya'ma keya kauba ana bomofihi foipana'a lepilube'mu nohigo kehelilibe.

    Hu'mau bona'i komopa'ani le'mo bati huse hapa'a

    21 To yatai lali keya kauba lele'mo bati mehigo bu go'ohuna yabe. Hu'mau yuhufa lele'mo bati husemofihi hapa'a lelepi'ehina. Koyapa'i Moseu hiti to kaga lu yege hose bona'magi hiti anana'mu fayahi keye'ahana. 22 Bona'i moneuba komopa'a Yesu Kilisitotoga molo emigo Hu'mau ana bomo le'mo bati hilibe. Ai asaga bona'i komopa'ani Kilisitotoga mele emi'ahanamagihi enele'mo bati hilibe. Hu'mamofihi bulo silaga bona'i moneko babeyafa hite nehago bu golata nohibe. 23 Hiya huto moneko babeyafa nehabe? Lali asaga bona'magita foipana li'ohutogo Hu'mamofihi fana mehena'a meliluta'mu ana'alo i fetaga hu'ohune. 24 To Hu'mau ai pana'a Yesu Kilisito kumu lele'mo bati hu'ehina yalo nona'a emilutana'a meni'ibe. Ai fa'mene lele'mo bati huto foipanamofihi nagaluguti gulu fo leto'ehibe. 25 Hu'mau pana'a Yesu Kilisito ho lifigo malipu yafalo fili'ehinamo'mu bona'magi aitoga komopa'ani neeminogo ai enele'mo bati hilina'mu yabe. Koyapa'i Hu'mau foipa bona'i enegeba huto foipana'ani bu go falaga falaga moloto osahi meepise fa'mene mino'ehina. 26 Yatai kana'alo Hu'mau bona'magihi foipana'ani he'mi epoloto enele'mo bati nohibe. Ya nohuto hapa'a bati huse'na ni'inamofihi lelepi'ehibe. To ana huto bona'magi komopa'ani Yesuhi keheli ule'ale hi'ahana'mu Hu'mau enele'mo bati hulata nohibe.

    27 Lali ya'ma keheli'ohuto lugufa limo titi hilupi? O'e, ya huto meni'ibe. Mone bouba keya kagalo mege'i mololenogo le'mo bati hilifi? O'e, Ai Yesuhi keheli ule'ale higo yananasiuba le'mo bati nohibe. 28 Ya'ma ka hapa'amu lali keheli su ho'ohune. Bo moneuba Yesutoga keheli ule'ale nohinalo Hu'mau ai'ago ana bo le'mo bati nohinagi to keya kauba yana bo le'mo bati mehilina'mu yabe. 29 To Hu'mau lali Yuta bona'magitalogako nominafi? O'e, ya huse'i meni'ibe. Ai fegutoga bona'magitoga hiti minolata nohibe. 30 Hu'mau loe lae nohina bo menohibe. Yuta bona'magi aitoga agoya hu neeminogo enele'mo bati hilibe. To ana huto fegutoga bona'magi aitoga agoya hu neeminogo enele'mo bati hilibe. To ana huto fegutoga bona'magi aitoga agoya hu neeminogo enele'mo bati hilibe. To ana huto fegutoga bona'magi aitoga agoya hu neeminogo ai enali hiti enele'mo bati hilina'mu yabe. 31 Ya nohina'mu lali agoya hu emiloto keya kamofihi lu laga hilupi? O'e, ya huto meni'ibe. Lali Hu'mamofihi agoya hu emiluta ni'igo to keya kamofihi le'mo ho ti fefe lilune.

    Copyright information for `BEF