Romans 7

Alobole li'ahana suhi ka

Nalalu'nigitabe, lenali Yuta bona'magi asaga keya kamu'i keheli keheli bati hi'ahana. Bona'i mone mefilise nomina kanagu keya kauba hu eto'ehina keheli'ahabe. Mone ka nesi'a ni'igi. A'i moneuba baha'a mefilise nohigo aitoga minalibe luto keya kalugu fayahi ge'ahana. To baha'a fililenogomo ya'ma keya ka alobole minala'ibe lu'ehina ka ya'ma a'i kumu su hoto fa'mene nohibe. To ana a'mouba baha'a mefilise nohigo fato bologa buto minalina ai moko hilibe. To baha'a filinogomo fato bologa kata helenogo keya kamofihi ligofa mehilinagi to mokolo a'i meminalibe. Nalalu'nigitabe, lenali yana suhi hite nehabe. Lenali yatai Kilisito bomofihi gufa'a hepite nehana bona'magita keya kaloga fili'ahabe. Ya'mu keya kauba kaba hu meepololata nohibe. To ya'ma ai fili'ehinagati ho ti'ehina bo, Yesu, ai'a bona'a lolo hilete ai kumu Hu'mamofihi foya hetofa'a lilata hilabe. To lali yata'a komopatimofihi hapa'a mege'i moloto mino'ohutaya keya kauba komopatigu foipa faipana li huto higo lugufatiuba ana suhi mege'i moloto filisemofihi nagalugu mino'ohuta yabe. To yatai keya ka nagaluguti Hu'mau gulu ho leto'ehina. Lali koyapa hapa'a keya kalugu koyo'ehinamofihi hapa'amu fili'ohuto yuhufa hapati li moloto nohune. Koyapa keya kamofihi foya'amo melise nohuta yuhufasi Sikalafu'i mege'i moloto foya'a nolune.

Keya ka to foipana hiti hapa'atiti yabe

Ya'mu lali hena ka lilune? Ya'ma keya ka sibina hu'ehifiye? O'e, ya mehu'ehibe. Keya kauba nani foipana'ni li huto hu neto'ehigo keheli'ohube. To keya ka mone'mofihi kaga lu'ehina:Kai bomofihi ana'ina'a ni'inogo bu goloto kubunaga'i mehobo lu'ehina. Ya melutita nani foipanamofihi hapa'a mekehelutita'mu yabe. To keya kauba foipanamofihi hapa'a nelepi'ehigo ana foipanauba bona'i nasana'ani fato fato'i lilane luto nele'mo keheli keheli hibe. To keya ka meni'inogomo foipanauba amuya meminago legeso huto mino'ehina. Koyapa'i nani keya kamoya mekehelise fa'mene mino'ohuna. To keya ka nanitoga huto hu'ehigo foipana'niuba hekele luto amuya molo'ehibe. Ya higo nani filise kapolo hapi fito moloto fililuta bu'ohube. 10 To ya'ma keya kamoya kehe'moto mino kosaba'na hu ketalibe nolina ya'ma keheliloto'ni keya kauba li tiligi soto noho fililata suhi lolo hu'ehina yabe. 11 Hena'mube? Foipana'niuba keya kamofihi nelepito nimi'i moloto komopa'nigu noho filigo mino'ohube.

12 Ya'ma Hu'mau keya ka lu molo'ehina'amoya to lu laga hu'ehina kagaya ya'ma ni'ina, to ana keya ka moneko moneko'isi asaga'na hetofana ni'inagi, bebe sose kaga to lamana kaga ni'inagihe. 13 To ana hetofa kagauba nani'i noho fili kapogu nele'mo molo'ehifiye? O'e, ya mehu'ehibe. Foipana'niuba ya'ma hetofa keya ka li tiligi soto filise kapogu nele'mo molo'ehibe. Ya huto hetofa keya kauba foipanamofihi hapa'a nelepilibe luto ana hapa'a le'mo huto hu'ehibe. Ya'mu keya kauba foipana le'mo hofa tago nani ya'ma foipana mone hiti be ligi'ehinana sipi'a huto hilibe.

Bona'mofihi hapa'a loe lae ni'ina

14 To ya'ma keya ka Hu'mamofihi nasana ni'ibe. Ya'ma lali keheli'ohune. Ana kaga bati huto ni'igo nani mege'i malalube'mu nohube luto aku'i foipanamofihi koko pana'a nohuto'ni ana keya kamofihi kapolo menomolobe. 15 Nani hulata nohunamofihi hapa'ni menokehelube. Nani hetofana hilube luto lulata nohunamofihi ya menohube. To hetofana kumu laga'ni nebesi'ehina suhi hilube'mu nohunaya mehulata nohube. To foipanamofi kumu laga'ni menebesibe lula suhi ya hulata nohube. 16 To nani foipanamofi kumu laga'ni menebesibe luto aku'i yanamofihi mege'i mololatamo ni'inogo yanauba keya kamoya lamana ka ni'ina'mu yabe luto nelepigo anamofihi anokehelube. 17 Ya nohigo nani ya hulata nohunamoya nani'ni meni'ibe. Foipana komopa'nigu nohinauba ai'a amuya moloto nele'mo sibina higo foipana lilata nohube. 18 To komopa'nigu to fegutoga nugufagu hiti hetofa hapa'a menominabe luto keheli fe nolube. To hetofana suhi hilunamofihi komopa'nigu ya ni'igo yana suhi hilube'mu nohube luto'ni amuya'ni bati mehu'ehigo hetofana mehulata nohube. 19 Nani hetofana hilube luto lulata nohunamofihi ana suhi mehulata nohube. To ya hu'ehinaya foipana mehilube luto keheliloto aku foipanamofihi mege'i mololata nohube. 20 Ya huto ni'igo foipana kumu laga'ni menebesina suhi ni'ina ya hulata nohunamofihi hapa'a henana ni'ibe? Nani'nisigo ya menohube. Foipanauba komopa'nigu minoto nele'mo foipa nohibe.

21 Ya huto nohigo hapa'a moneuba nele'mo lolo hulata nohina ya'ma bu goloto akeheluto ma ni'ibe. Nani hetofana hilube luto nohugo foipa kapofi lamana kapofi loe lae ni'igo foipanauba ai'a kapolo nele'moto bulata nohibe. 22 Nani Hu'mamofihi keya ka'amu komopa'nigu laga hina ni'ibe luto negelo nobube. 23 To komopa'nigu ya nohugo nugufa'niuba fato hapa'a lolo huba huba nohibe. Ana hapa'auba hetofa negekesa'ni keheli'ohunamofihi luba nohibe. Keya kamu'i hetofana ni'ibe luto negekesa akeheli'ohuna yamofihi fato hapa'auba laba hu eto'ehina. Ya nohugo nugufa'nilo foipanauba le'mo sibina huto nugufa'nimofihi naga'i emilata nohibe. 24 Ke, nubuya'ni nohibe. Bati mehina bo nohube. Nugufa'niuba foipana nohuto filise kapogu nomalanaya kiyi'afu nehe'malina bo nohibe? 25 Lali Sipi Boti Yesu Kilisitou nehe'malina bo ai'asigo nohibe. Ai foipanamofihi hapa'auba amuya moloto he'mi netabe. Ya'mu Hu'mamofitoga negelo nobube.

To nani ma huto nominobe. Nani Hu'mamofihi keya ka mege'i malalube luto keheli'ohuna nipa nohibe. To aku'i tafa komopa'niuba foipa hapa'alo mege'i moloto kele kele hu etolata nohibe.

Copyright information for `BEF