Romans 8

Hu'mau Sikalafu'a ho lifigo bona'i komopa'anigu limito mino'ehina

Yatai bona'magi Yesu Kilisitotoga hiti hepite minago moneko'na nehana yanamofihi Hu'mau enifisa meilina to osahi meepilibe. Henabe lutobe? Sikalafu'mofihi kagauba lali'i Yesu Kilisitotoga lele'mo hepiloto foipana nagaluguti hiti to filise'na kapoluguti ahe'mi leto'ehigo mino kosaba husemofihi lilata nohune. Bona'magihi komopa'ani amuya memolo'ehinagi keya kauba lehe'mo'ehina bati mehu'ehibe. Hu'mau aigo lehe'mo'ehina. Yata'a ai bona'i foipa hapa'animu ka epekito enifisa i'ehina. Ya huto ai'a pana'a melugu ho lifigo bona'i enugufa amuya memolo'ehina suhi lolo huto minoto lali foipanatimofihi nona'a li pa salibe luto fili'ehina yabe. To lamana ka molo'ehinamofihi liyafa hite mege'i malalabe luto lu'ehina. Hena'mugope lali koyapa'i mino'ohuta suhi huto yatai menohune. Lali kosaba kapolo mege'i nomolone. Sikalafu'mofihi kapolo nomolonogo keya kauba lamana suhi hilo lulata ya'ma hetofa kamofihi lali kehelito ya huto nominone. To enali enugufa'aniuba nohinalo mege'i nemalanamagi enali enugufa'aniuba kehelise'na'animofihi kaba hu epoloto naga'i epi'ehina. To enali Hu'mamofihi Sikalafu'uba lu noepinalo mege'i nemalanamagi Sikalafu besise'namofihi kehelite neminago ai enegekesa kehelise'na'animofihi kaba huto enele'molata nohina yabe. To Sikalafu laga lebesise'nalo lali mege'i nomolota bona'magita Hu'mamofihi fuluna'a litoti to hetofa mino kosaba husemofihi lilata nohune. To enali enugufa'aniuba laga enebesise'nalo mege'i nemalana bona'magi filise kapogu bilata nehabe. To bona'i enugufa'aniuba laga besise'nalo mege'i nemalanamagi nehago kehelise'na'aniuba kaba hu epalago enali Hu'mamofihi fateha'a nehana yabe. Henabe lutobe? Enali Hu'mau kaga lu molo'ehina'amofihi keheli he'mite pelesa i'ahana. Ya'ma Hu'mamofihi kaga'a amuya'anitu mekehelite to analo mege'i memelelata nehabe. To enali ya hite enugufa'anilo mege'i nemalanaya Hu'mau bu enogoto fokehi melilina'mu yabe.

Lenali ya hite meneminabe. Hu'mamofihi Sikalafu'uba yuhufa komopatinigu nominago lenali ka'a kehelite agoya hu emilata nehabe. To bona'i moneuba Yesu Kilisitohi meha'auba komopa'agu menohinogomo ana bona'i Yesuhi bona'i menohibe. 10 To Kilisitou komopatinigu nominenogo to lenugufatinimofihi foipanamu fili'ehinaya lenemehatini minoba minoba hilibe. Hena'mube? Hu'mau komopatini lenele'mo bati hu'ehinogomo Sikalafu'uba komopatinigu limito minago mino kosaba huse'i lilabe. 11 To Hu'mamofihi Sikalafu'i Yesu fili'ehinaguti le'mo ho ti'ehinauba lenali komopatinigu nominenogomo ya'ma Kilisito le'mo ho ti'ehinauba komopatinigu minoto lenugufatini fililinalo kosaba'i le'mo huto hilina'mu yabe.

12 Nalalu'nigitabe, tafa hapatini foipa hapatiniuba kefefe hu nolepelenogo yamofihi mekehelise foipanamofihi mege'i memalalo. 13 Lenali analoga komopatini mololenogo lenele'mo sibina hinogo fililana'mu yabe. To lenali Hu'mamofihi Sikalafu'uba lenele'mo amuya melenogo ana foipa hapatini keye linogo minoba minoba hilabe. 14 Asaga bona'i Hu'mamofihi sikalafu'uba enele'moto bulata nohina enali Hu'mamofihi lusi panana'a nehabe. 15 To ya'ma Hu'mau lepi'ehina Sikalafu'uba koko pana'a lenele'mo lolo huto lenelesa melu'ehibe. Lenali Hu'mamofihi lusi pana'amagita li tifito logogose'namagi neminete ai kumu: Apaobe, Apaobe, lite kehe neibe. 16 Hu'mamofihi Sikalafu'uba lali lemehati hiti li hepito'a moneko legege nohuto'a Hu'mamofihi pana'amagita nehabe luto nolimibe. 17 Yalo'i lali pana'amagita nohunogo ai'a bona'amofihi lusa gi epalalina'a lali hiti limilinagihe. To Hu'mau Kilisitohi hetofa nasana li molo emilina'a ya'ma ana huto limilenogo lilune. To lali Kilisito gabu gise'na'a hiti ya'ma ana huto kofiloto nohunogo ai'a fana meha'a hiti limilenogo liloto aitoga hepito minalune.

Fana talina yupahi

18 Nani mana keheli hokolo hu lepoloto Yesu kumu lagabu'i nogigo minaluta yamofihi alihi fana meha'a sipi'a moneuba lalitoga huto hilina be ligilina'mu ya'ma lilune luto lu nolepube. 19 To Hu'mau asaga melugu lolo hu'ehina'a yanagu neminanamagi ai pana'amagihi enele'mo ho tilina yupahi geba hite amuya melelata nehabe. 20 To Hu'mau melugu lolo hu'ehinana asaga'namofihi komopa'a pata silibe luto Hu'mau ka epekito lu molo'ehina. Ya'ma ana'ina'a asaga'i ai'a sibina huto hilibe melu'ehina. Hu'mau ai pata silibe luto kaga molo'ehina. To mone'i lali bu megose'namofihi geba hilutamo ma ni'ibe. 21 Hu'mau asaga melugu neminanamagihi aku'i le'mo bati hulenogo alihi pata mesise Hu'mamofihi pana'amagi hetofa hite minalana ya'ma kanagu keta husemofihi nagaluguti gulu fo epalalibe. 22 To yatai Hu'mau lolo hu'ehinanauba usegi asegi huto ana legita a'i moneuba pana'i noketana sipi gabu gise'na suhi huto nominanamo ni'igo akeheli'ohune. 23 To asaga melugu neminana usegi asegi hite hilata neminago enali'anigo menehabe. Lali hiti Hu'mamofihi Sikalafu'i kohe toto limi'ehina bona'magita komopatigu yibi bena huto yibi huto usegi asegi ilata nohune. Ya nohuto Hu'mau lugufati kosaba'na lolo huto lele'mo bati hilina kana'amu geba nohunogo keta huse nagaluguti gulu ho letalibe. 24 To Hu'mamofihi hetofana hu letalinamofihi bu megose geba huto yanauba nohunogo Hu'mau yana'mu kehelito lubuto bi'ehina. Ya'ma geba nohunamofihi yatai bu go'ohuna, ya'ma geba hilinamo meni'ibe. Bo moneuba mone'mofihi geba huse'i alihi bu galina henabe luto mone kana hiti geba hulata nohibe? Ya huto meni'ibe. 25 To lali mone bu megose'namofihi geba huto hugo Hu'mau limilina'mu yabe luto geba huto minomo buto kosele'i melohose huto minalune.

26 Ya'ma geba hulata komopati amuya memolose nohunogo Hu'mamofihi Sikalafu'uba lalitoga oto lehe'malina'mu yabe. Lali aitoga henana loka haluta mekeheli'ohunogo ai keheli'ehina. Ya'ma Sikalafu'uba lali kumu Hu'mamofitoga baga'atu kaga meluse komopa'a amuya'auba buka tilata nohibe. 27 Ya higo Hu'mau asaga bona'i komopa'anigu bu goto keheligo Sikalafu'uba enali kumu ekesa yigiba yigiba nohigo yanamofihi Hu'mau kehelilata nohibe.

28 To lali mana akeheli'ohune, Hu'mau lu kehelise'namofihi bona'a enali kumu kehe igo bite aitoga komopa'ani emi'ahanamagihi ai asaga huto hilina kanagu hetofana hu epololata nohinagihe. 29 Hu'mau fuku lu'ehina bona'i enali'i pana'a Yesu yabe moneko babeyafa hite gona'a lolo huto minalabe luto Yesu yege'a pana'i minoto naga'a enele'mo molo'ehina yabe. 30 To Hu'mau ekesa kehelito enele'mo molo'ehina bona'magihi aitoga kehe igo e'ahabe. To ai kehe igo e'ahanamofihi foipana'ani he'mito bebe sose bona'i enele'mo lolo hu'ehina. To ya huto bebe sose bona'i enele'mo lolo huto ai hetofa fana meha'agu enele'mo molo'ehina.

Hu'mau lali kumu ginaga fi'ehina ka

31 Ya'ma asaga'na hu leto'ehinamofihi hapa'a henana ni'ibe? Hu'mau to lali hiti nominenogomo kiyi'afu loho fi talina bo nohibe? 32 Ai koyapa'i pana'a nu ki pili koto meminose lali kumu asaga'i ho lifito bona'magihi enayanugu epi'ehigo fili leto'ehina, ya'ma limi'ehina bo, Hu'mau, ai loe sana sana mina'a meni'inamofihi fa'mene limilina'mu yabe. 33 To Hu'mau lu kehelito lele'mo ho ti'ehinagi kiyi'afu lifisa ilina bo nohibe? Ana hilina bo mone menohibe. Hu'mau ai'asi bebe sose bona'ni nehabe luto ya'ma lali kumu luto lulata nohinagihe. 34 Kiyi kiyi'afu lifisa iloto ka foya lilube'mu nohibe? Yesu ai'asigo lali kumu fililoto ho tito aku Hu'mau lamaga'aga le'mo'ehigo nominabe. Analo nominoto lali kumu Hu'mamofihi amuya loka holata nohibe. 35 To Yesu lali kumu ginaga fi limi'ehinalo to kaba hu bati hu leto'ehinalo lali ya'ma hepitoti minaluta nohunogo kiyi'afu yanaloti lele'mo loko hilibe? Keta hu letalinauba analoti loko hilifiye? Analoti fi taga hu letalinaubafi? Gabu gi letalinaubafi? Nose'na fenene hinogo kau'na lahalinaubafi? Musufalo nasanauba ya hu letalinafi? Luba huse'nauba ya hilifi? Filise'namofihi amuya'auba aitogati loko hu letalinafiye? O'e, ya huto Yesu ginaga fi limi'ehinagati loko hu letalinamo meni'ibe. 36 Yananamu'i koyapa'i mono bukugu keye'ahana:

  • Fatehatimagi kai kumu asaga yupahi
  • loho fililune'mu nehago
  • asaga yupahi yana lahalina kana'amu
  • geba huto minalune.
  • Lali sipisipi yaga keye lilina legi huto
  • geba huto nominone.

37 Ya'ma huto hu letalana asaga'namofihi Yesu be ligi'ehigo bati huto minalune. Yesu ai sipi ginaga fi limito kaba hu letago aitoga ule'ale huto minolata nohune. 38 Nani mana keheli ule'ale nohube. Mone filise'nafi to ma melugu minose'nafi, foipa agelomagifi to kokulumagu felemagifi anagu kaba huse kene'magifi to mone yatai ni'ina nasanauba huto huse'nafi to aliha'auba huto hilinafi, asaga'magi Yesutogati lele'mo loko mehilana'mu yabe. 39 To mone ifo muyalo ni'ina me'i afenuga ni'inafi moneuba Yesutogati lele'mo loko mehilina'mu yabe. Hu'mau lali kumu sipi ginaga fise'na'amofihi Sipi Boti Yesu Kilisito limi'ehinamofihi ya'ma melugu lolo huto minolatana asaga'namagi lele'mo loko mehilana'mu yabe.

Copyright information for `BEF