Titus 1

Poluita nani Hu'mamofihi koko pana'a Yesu Kilisitohi aposolo bo nele'mo ho ti'ehina. Ya hu'ehina Hu'mau enele'mo eto hu'ehina bona'i enali aimo agoya hu emilabe luto enehe'mobo luto to lali mono'mofihi ka lamana'a kapogu enele'mo keheli bati hino luto ya'ma foya'mu nele'mo ho tito noho lifi'ehina yabe. Nani ka lamana'amofihi hapa'a ma luto ni'ibe. Hu'mau faga meluse bomofihi koyapa'i me'i hiti kokuluma hiti huto mehu'ehina kana'alo ya'ma amuya lemehi fi hetofa hu letalube luto mino kosaba huse'na lelepito lu'ehina fifa ito minolata nohune. Ya kagamofihi Hu'mau ya'ma kana'amu keheligo bati hulago ai ka'a lu huto nehago le'mo huto hu'ehina. Hu'mau lubuto bilata bouba ana foyalo nele'moto kaga lu molo neto'ehina'mu ana ka'a lu yege hoto minolata nohube.

Taitasio, lusi pana'ni kai hiti nani hiti moneko mono'i keheli emito mino'ohu'inamo ni'ibe. Kai ya'ma fayahiya koyoto nokumuna kehelibo. Afotifu, Hu'mau to Yesu Kilisitou lubuto bilata bomofitogati lehe'mose'na fuluna'a hiti kaitoga mineno.

Kiliti metoga Taitasiu foya lito nominanamofihi ka'a

Foya nekisa'a ni'inamofihi li bebe soto li baga ilane luto Kiliti metoga nohe'mi ketoto foyaga'ya ya luto lu keto'ohunamo ni'ibe. Kai asaga nohi hepalugu mono kaba bo olopa bona'i luga'a enele'mo bo tilane. To yata'a ka lu kimi'ohunamofihi beto hubo. Olopa bo moneubafi moneuba foipana'a meni'ilina to a'i moneko'i li'ehilina. To ai yagapana'amagi Kilisitotoga agoya hi emi'ehilana, to he'mi hale hilana to kegeiyo'na'a meni'ilina enali bati hite nehilana bona'magi kehelinogo afo'anifihi bati huto le'malane. To Hu'mamofihi foya'alo kaba huto nominalina bo ai foipana'a meminenogo minalibe. Ya huloto minoto hipu hapu meilina to mele'isi enipakafa mehalina, to bai nagami'i babu luto menalina, luba mehilina, to yogo fe'no kumu ekesa yigi yigi huto muhi muhi bilina bo meminalibe. Ya huloto bonoho bona'i e'ehinogo mehi epito enele'mo malalina, to asaga hetofana'mufi lamana'amufi laga besilina to komopa'a gulu gulu linogo minalina, to hapa'amu'i fu lina bo nohina to komopa'a hiti gufa'a li bati huto kaba hilina'mu yabe. Ya huloto lu epi epi nohuta kagamofihi lali kehelutogo ule'ale nohina kaga ya'ma li pili koto liloto minalibe. Ya'ma bouba ai fato bona'i enele'mo hetofa hinogo mono ka legeya'a lamana'a ya'ma lu epito enegekesa lito enele'mo bati hilibe. To bona'i luga'amagi mono ka enemegesa hu epite nehinogomo ya'ma kaba bouba enali'i foipana'animofihi enelepito o'e luto ya mehilo luto enele'mo bati hilina'mu yabe.

10 To bona'i luga'amagi yege yege'i ka lamana'a lu epi'ohuta'mu enipakafa nehabe. Fa'mene kamu'i li muyalo malo hite enimi'i mololata bona'i nehabe. Yuta bona'i enalitogati Kilisitohi ka lamana'a keheli'ahana bona'i mone'amagi aku i behe hite fato kaga enelepite minete lite ya hilata nehabe. 11 Ya hilata nehana bona'i enali fala kite yogo fe'no kumu yabe lite sefeyehena nasana'mu fi lehe talune lite kehelite bona'i luga'amagihi liha'ani yagapana'ani enele'mo sibina hilata nehanamo ni'inaya kai lu laga lu epolobo. 12 Ya'ma Kiliti melugu nehana bona'i enalitogati ka hapa'a keheli fotogo lu'ehina bo moneuba ma luto lu'ehina: Kiliti bona'i enali ya'ma fagalo bo lubalo kala legi nose'namu yagauba nohina suhi lolo hilata nehanamofihi fa'mene fuli minete nose'na neba neba nehana lili'na'mu kosele'i enoholata nohina bona'i nehabe. 13 Nani ya'ma kagamu'i nokehelugo lamana'a lolo hibe. Ya'mu ka babu luto ka epekito enegekesa linogo keheli bati huse ka'a ya'ma ho ti fefe luto minelenogo, 14 to Yuta bona'magihi kilihe ka fa'mene ka ya'ma mekehelilo luto lu epilo. To fa'mene bona'magihi ka'ani lamana'amofihi enemegesa hu emilete fa'mene kaga lu laga hi'ahanamofihi mekehelilo luto lu epibo. 15 Komopa'ani fana tago nehanamagi enali ana'ina'mu keheligo gulu gulu ligo neminabe. To luga'amagi ka lamana'a keheli meemi'ahana foipa nasana'mu enegekesa'anigu hiti komopa'anigu sifolohi gito kolota kolota hu'ehinamo yana'mu enali ana'ina'mu keheligo ana suhi huto sifolohi gito kolota kolota higo nehabe. 16 Enali Hu'mamofihi hapa'a keheli'ohune lite enabagaguti lilata nehanamo ni'inaya ya hite minete lite nehananauba ya'ma luto lu huto hulata nohina legeya'a meni'ibe. Enali tuguma bona'i nehana sipi foipanamofihi ka'ani mekehelise nehana enali foya lamana'a lilana'a meni'ibe.

Copyright information for `BEF