1 John 4

Ibolow fian keyemkabi nakunum kumel kunum waneng yutaka! Dasuw selew kunum banso i kawin dim kale bayemel kakabiliw kasike, yu kilelbiko, boliwka! “Seten-Ataanim em ibolow fukunin bakabiliw yake? Bani, Sunbin-Finik em weng bakabiliw yake?”, angeko, alik alik im weng kilele diwyemoliwka! a  Sunbin-Finik em bakayembe weng e yu kiliko, kaneko beem dulum elote kal keliwete: “Yesus Kulais e kal so kun so kawtiw nukatetew kese te!”, angakabiliw kunum waneng i fein Sunbin-Finik em weng bakabiliw bakate. b  Kate, “Yesus e kawtiw nukatew kelinba kese kai!”, angakabiliw kawtiw im ibolow tem ka kel e Sunbin-Finik e binba kekabe kate, Kulais em Maka Kunum beem ibolow fukunin e kanekabiliw kawtiw biim ibolow tem ka kel alakabe te. Sua kel akate, yu kililiwete: “Kulais em Maka Kunum akal toloke te!”, angenaliw kate, akalem fukunin emisik teleko, kame fein kawin dim kale fitewse te. c 

Yesus em muluwel ibolow fian keyemkabi nakunum kumel kunum waneng yutaka! Yu Sunbin-Got em angin kasike, Sunbin-Finik em kitil fian e yom mutuk ka kel bomelei, yu yomel kuw keko, kawin kaleem dasuw selew kunum im aneng matil biilo mit da koyemkabiliw te. d  Dasuw selew kawtiw i kawin dim kaleem kasel kasike, i kawin dim kaleem weng sang bete kuw bakamkabiliw bakate. Kasike, kawin dim kaleem kasel i im yangbiliw weng be kiliko, gelewkabiliw te. e  Kate, nu Sunbin-Got em muluwel kebuluw kasike, Sunbin-Got elo kal kebiliw kunum waneng i num weng akal kilikabiliw te. Kate, Sunbin-Got em muluwel kelinba kebiliw kawtiw i num weng kililinba kekabiliw te.

Kanekabiliw beem mongom ete nu kilele kal keko, diwyemeko, mali im dulum elote bokolomeluw: “I Sunbin-Finik em fein weng bakayembiliw kai!”, angeko, mali im dulum elote “I aneng matil im dasuw weng kuw bakayembiliw kai!”, angeko, kilele kal kebuluw te.

Ibolow Fian Keyemin em Weng te.

Ibolow mutuk fian keyemkabi nakunum kumel kunum waneng yutaka! Sunbin-Got e ibolow mutuk fian kelew kelew kukuw beem mongom kasike, nu mali kawtiw ilo ibolow mutuk fian kelew kelew kukuw gelewemoluwka! Mali ilo ibolow mutuk fian kelew kelew kukuw gelewkabiliw kunum waneng i Sunbin-Got akalem fein muluwel kesomi, elo kilele kal kekabiliw kasike. Sunbin-Got e ibolow mutuk fian dulew dulew kemin kukuw beem sen mongom kayak kasike, mali ilo ibolow mutuk fian dulew dulew kukuw gelewinba kebiliw kawtiw i Sunbin-Got elo kilele kal kelinba kebiliw te. Sunbin-Got em akalem ibolow fian dulewkabe Min makmak beelo dabalalei, em kawin dim kaleelo teleko, nulo sunsun finik so bin duyemse ding dim bakate, Sunbin-Got e akalem ibolow mutuk fian be nulo kilele kaleyemse te. f  10 Sunbin-Got em nulo duyemse ibolow mutuk fian be kanekote: Sua kel akate, num elo ibolow mutuk fian dulewinba kebuluw ding dim bakate, Sunbin-Got emisik keko, nulo ibolow mutuk fian kukuw kukuyemsomi, akalem min elo dabalalei, Min be num abin kuluko, kuaneko, num ibolow sili sili nam beem yan wa be wese te. g 

11 Ibolow fian keyemkabi nakunum kumel kunum waneng yutaka! Nu Sunbin-Got em nulo ibolow mutuk fian duyemse kukuw be atebuluw kasike, nukati beemdiw keko, ibolow mutuk fian dulew dulew kukuw keyemoluwka! 12 Kawtiw alik alik nu Sunbin-Got elo kiin so ateminba kebuluw kate, nu mali kawtiw ilo ibolow mutuk fian dulew dulew kukuw gelewemuw tewe, Sunbin-Got e fein num mutuk tem ka kel bomelei, akalem ibolow mutuk fian akati kilele ka kel alakabe te. h 

13 Sunbin-Got e akalem Sunbin-Finik nulo duyemse kasike, nu kilele kal keluwete: “Sunbin-Got eso nuso makuw fewtokoko, ibolow ki makmak kebuluw kai!”, angeko, kal kebuluw te. i  14 E akalem Min elo dabalalei, e kawin dim kaleem kasel num kuankemin deiw be bul gewsi belei, okileweko, nulo Sunbin-Got em sunsun finik so bin kulomin deiw ka kel mo koyemse te. Feinka! Nu em kanese be kiinwalasomi, yulo kilele bokoyemkabuluw te. 15 Yu kilele kililina! “Feinka! Yesus e Sunbin-Got em Min ete te!”, angakabiliw kunum waneng bi eso iso fewtokoko, biliwi, e im ibolow mutuk ka kel alakabe te. 16 Keko beli, nu Sunbin-Got em nulo kukuyemse ibolow mutuk fian be kal keko, atemeko, kitil kuw aulkabuluw bakate.

Sunbin-Got e ibolow mutuk fian dulew dulew kukuw beem sen mongom kayak kasike, ibolow mutuk fian keyemin kukuw kelewkabiliw kunum waneng i Sunbin-Got eso iso fewtokoko, biliwi, e im ibolow mutuk ka kel alakabe te.
17 Nu beemdiw kaneluw tewe, ibolow mutuk fian kukuw be nukalem mutuk tem ka kel fasuko, atin kuw kiol kuw kelei, num gelewkabuluw kukuw be Yesus em gelewse kukuw beemdiw kebe kasike, em kawtiw alik alik ilo diwyemeko, geeyemoke ding dim kabalak e, nu kalaing keko, em kiin dim kel kitil kuw molokoluw te. 18 Fein te! Ibolow mutuk fian kelew kelew kukuw be num ibolow mutuk tem ka kel be tewe, finganin mongom mak banim te. Nimtew angom? Num ibolow tem be gekeko, wenbe ibolow mutuk fian be finganin be takala kolewkabe kasike. Feinka! Nu Yesus em geeyemoke ding dim em awan finganuw tewe, ibolow mutuk fian kelew kelew kukuw be nukalem ibolow tem be atin kuw gek koyeminba kekabe te. 19 Sunbin-Got emisik keko, nulo ibolow mutuk fian duyemse kasike kame, nukati ki keko, mali kawtiw ilo ibolow mutuk fian duyemkabuluw te. 20 Nimin kawtiw ite mak bokolomeliw: “Nu Sunbin-Got elo ibolow mutuk fian dulewkabuluw kai!”, angakabiliw kate, Yesus em mali angin ilo ibolow kaim alel yetemkabiliw tewe, kanekabiliw kawtiw bi dasuw weng kuw bokokabiliw kawtiw ite te! Nimtew angom? Nu kiin so yetemkabuluw kunum waneng mak ilo ibolow mutuk fian duyeminba kebuw tewe, nu ki keko, kiin so ateminba Sunbin-Got elo akati ibolow mutuk fian dulewinba kekabuluw kasike. 21 Kate, Yesus em nulo duyemse kukuyemin weng e kanekote: “Sunbin-Got elo ibolow mutuk fian dulewkabiliw kunum waneng i Yesus em angin keko, ikalem awkunum kumel kunum waneng ikati ibolow mutuk fian dukayemboliwka!”, yangse te. j 

Copyright information for `BHL