2 Timothy 4

Nakunum Timoti kutaka! Kulais Yesus e iti teleko, finik so biliw kawtiw so, kuansiliw kawtiw iso alik alik ilo diw yetemeko, geeyemoke te. Geeyemsomelei, e diwkuw diwkuw emisik kamok fian keloke kasike kame, ne Kulais Yesus beso, Sunbin-Got so, yelim biim kiin dim e weng kitil weng mak kale bokokemite: Ku kanelom “Kame ken ding kebe yake? Wa ding kebe yake?”, angbokolew kate, ku kitil keko, Sunbin-Got em weng kale diwkuw diwkuw bakayembolewka! Ibolow menew kukuw so kukuyembomelewi, ku ilo ibolow tem sayemeko, sili sili kukuw kaim dim dayemeko, weng temtem weng kuw bakayembolewka! Ku kilila! Mewso ding keloke kabalak e, kawtiw i ilo fein dokoyemoke kukuyemin be kililominba kis ibolow kemokoliw te. I ikalem ibolow danong so, ikalem ibolow fukunin so, bete kuw gelewkabiliw kukuyemin kunum banban feneko, yetemsomeliwi, biim kaleyemin bete kuw kilikabiliw te. a  Kilikabiliw kasike, i fein dem so weng be ibik kuleweko, fufu sang bete kuw abelew keko, kiliko, gelewkabiliw te.

Kate Timoti kutaka! Nomin eisneng mak kom dim telebe tewe, ku ibolow kilinin keko, bolewka! Bomelewi, ku kanelom betbet kulomin em dulum finganemokolew te! Kate ku bukesomi, mali kunum waneng ilo Sunbin-Got em Weng Kal Ken Ati be bakayembolewka! Kom aluwbamin alikum kilele atin kuw aluwkakamolewka!

Fol em Fefe Kuanomin em Weng te.

Nakunum kutaka! Sunbin-Got em am yol em kunum ayem i ^siwsiw men mak anko, aik ayem dim duksomi, Sunbin-Got elo dulewsiliw te. Im kanemaliw aluwbamin beem fefe ding dim kabalak e, i ^wain ok kuluko, aik ayem tikin kel buselemaliw te. Beemdiw, nem fefe aluwbabi ding dim kale, mali kawtiw i nem kaim akal buselnemokoliw te. b  Buselnemokoliw kate, nem finik so bisi dim e, ne ganbin kitil nam kunum atew keko, beit kelinba kebomi, Sunbin-Got em dunemse aluwbamin be fein atin kuw aluwsomi, banim kelewsi te. Kelewsomelii, nem fein ibolow akati kitil kenembelei, bisi te. c  Kame, nem finik so bin beem awet kebe ding kabalak be, nem yan kuloki ding fenbi te. Nimtew angom? Kamok Fian em alik nulo kiol kuw diw yemoke ding dim bakate, ne elo kiol kuw gelewemeli em yan fian kuloki te. Kate nemikel kuw nam kuli te. Babo! Alik alik em toloke ding feneko, “Toloka!”, angbiliw kunum waneng iso neso alik alik nu makuw yan ki makmak kulokoluw te. d 

Timoti e Fol elo Atebam Unoke em Sang te.

Timoti, ku fongate akate deiw fenko, nem fukun tololewka! 10 Neso bise kunum Demas e kawin kaleem eisneng beelo iti ibolow kuw keemeko, nelo konemeko, Tesalonaika abiw mutuk fian elo unese te.

Kelesens akati konemeko, Galesia aneng fian elo unese te.

Unei, Taitus e Dalmesia aneng kalo unese te. e 

11 Iluk ete kuw kale neso be te.

Be kasike, kom tolokolew ding dim bakate, Mak akati debele tololewka! Debele telewi, e nem dakanembin kunum kebomelei, Sunbin-Got em aluwbamin aso nukalem makuw keko, aulbamokoluw te!

12 Ne Tikikus elo dabalalii, e Efesus abiw mutuk fian elo unese te.

13 Timoti a! Kom tolokolew ding kabalak e, ku nem asolow ilim be kanelom akokow kelokolew te! Sua e, nem Toloas abiw mutuk fian ka kel bomelii, ne ilim be nakunum Kalbus em am kel kolew telsi te. Ka akate fut mali mak kolewsi kasike, beso de tololewka! Nem ibolow fukunin e atin kuw mew samal kal dim bosiliw fut
4:13 Mali kal kunum i ibolow fukuniwete: Samal kal dim bosiliw fut be Sunbin-Got em emisik kitakamin weng em fut anung ete te.
beem dim kuw bete te. g 

14 ^Ain so, ^balas so kaikabe kunum Aleksandel elo akal kilelbi bolewka! E nelo maka fian kenemeko, num kalan weng bokoyemkabuluw weng beelo dumin weng kitil nam kuw bokolewkabe kasike. Kate, Kamok Fian e em kukuw be diw atemeko, fein geelewoke te. h 

16 Emisik ding e, i nelo geeyemkabe kunum em kiin mo konemsiliw beem ding e, mak kunum mak nelo dokoneminba kese te. Alik alik i nelo sak konemsiliw te. Sunbin-Got e mali biim wa kukuw kukunemsiliw be nam diwko, ateyemoke te! 17 Kate Sunbin-Got e neso bomelei, kitil dunemse kasike, ne akalem Weng Kal Ken Ati be Suda kawtiw num ibik biliw kawtiw biilo atin kuw bokoyemii, ikati fein kilisiliw te. Kilisomeliwi, maka i ^alaion emdiw keko, nelo nenomin ibolow kesiliw kate, Sunbin-Got e nelo dokonemeko, im teing dim takalako, kulu konemse te. 18 Feinka! Kamok Fian e nelo dokonemomi, nenomin wa kukuw alik alik beem deiw fein goto kelewsomi, akalem ^gawman dim abiil tikin beelo nemde unoke te.

Unesomi, akalem wiin diwkuw diwkuw fian katiw kel boke te! Feinka!

Fol em Fefe Kewkew Weng Bokoyemse em Weng te.

19 Nakunum a! Kame, ku Bilisila so Akuila yemkal biso, Onesifolus em am biliw kunum waneng iso, alik biilo “'Yukal o!', yanga kai!”, yangolewka! i 

20 Elastus e Kolin abiw mutuk fian kel kait be te.

Nem Miletus abiw mutuk fian kolew talsi ding kabalak e, Tolofimus e wakamin so kebelei, ne elo ka kel kolew telsi te. j 

21 Ku fongate akate tolomin deiw fenko, tololewka! Nimtew angom? Mesik esik ku tiak ding fenew tewe, asolow so, inim fian so ding kelei, kom tolomin deiw okikemoke kasike.

Keko beli, Yubulus e, Fudens e, Ilinus e, Kolodia e, Kulais elo ibolow fein dangbiliw kunum waneng alik alik ikati kulo “Kukal o!”, kangiw te.

22 Kamok Fian e kom finik so amkobelei, boka! Sunbin-Got em ibolow folok e kuso boke te.

Bete kuw. Nem fut weng bokemi fut be kame kilaka.

Copyright information for `BHL