Acts 13

Keko beli, Antiok abiw mutuk fian kaem sios kunum waneng biim mutuk e teingabi kel kunum mak alenaliw kale. Kunum bi Sunbin-Got em bontem dim bakamin kunum kesomi, em Weng Kal Ken Ati be mali ilo kukuyemkabiliw kunum keko, alenaliw kale. Kunum biim wiin e kanekote:

  • mak e Balnabas e,
  • mak e Simeon Nigel e,
  • mak e Sailini abiw mutuk fian kayak Ilusius e,
  • mak e Sol e,
  • mak e Manain ete kale. Manain so, emisik kamok Antibas Kelot eso, aso im aul dim dak akate, i ken kunum ke alenaliw kale.
Keko beli, deiw mak ding mak kabalak e, sios kunum waneng biim Sunbin-Got em wiin fian daolewsomi, wanin tokoko, kolewsiliw ding dim bakate, Sunbin-Finik e bokoyemomele: “Ne Balnabas so, Sol so, aso ilo nakalem wiin so amkoko, 'Nem aluwbamin kenemoliwka!', yangbi kasike, yu aso ilo beem dulum elo mo koyemoliwka!”, yangse kale. a  Yangei, i wanin tokoko, kolewsomi, Sunbin-Got eso weng bokosomi, ikalem teing e aso im dim dukuko, bamki so keyemeko, aso ilo yamdasiliw kale.

Emisik Ding e Weng Kal Ken Ati Bakayem Tem Bakayem Tem Kakamaliw em Sang te.

(13:4 - 14:28) b 

Okgung Saibulus Aneng em Kanese Sang te.

Sunbin-Finik em aso ilo yamdase ding dim bakate, aso i uneko, Selusia abiw mutuk fian uneko, ^siw fian mak kuluko, Selusia abiw mutuk fian koleweko, okgung Saibulus aneng kalo unsiliw kale. Im okgung Saibulus talsiliw ding dim bakate, i Salamis abiw mutuk fian kalo uneko, Suda im wensankabiliw am kawtem elo Sunbin-Got em weng be bakayem tem unsiliw kale.

(Kaem ding dim bakate, kunum mak em wiin e Sion Mak e aso ilo dakayem diliko, unse kale.) c 

Keko beli, i Salamis abiw mutuk fian iti koleweko, okgung be digeko, Bafos abiw mutuk fian kalo talsiliw kale. Ka teleko, Suda kawtiw im selew selew kunum mak em wiin e Bal-Yesus elo atemsiliw kale. Gilik im weng sin e beem wiin mak e Elimas ete kale. E aneng beem kamok kunum Selgius Faulus em akunum kese kale. Kate, kamok kunum be ibolow fukunin ken so kunum ke alenale kale. E Balnabas so, Sol so, aso ilo gaayemeko, bokoyemomele: “Yu nelo Sunbin-Got em weng bokonemina!”, yangse kale. Kate, selew selew kunum be ibolow fukunomele: “Nakunum be kanelom Yesus elo gelewin kunum keloke te!”, angeko, aso im weng dawkatiko, koyemse kale. Beli, Sunbin-Finik e Sol (mak em wiin e Fol) em mutuk gekei, e Elimas elo kiin sen so doung atemeko, 10 weng kitil weng mak bokolewomele: “Seten-Ataanim em min kutaka! Ku ibolow sili sili nam so, ibolow bangbang so gek kokembe kunum kute te. Diwkuw diwkuw ku ken eisneng elo maka kelewkabelew kunum kesomi, Sunbin-Got em deiw kiol ati be diwkuw diwkuw fimdi famde keleweko, kasi kolewkabelew kunum kute te. 11 Kame kilila! Kamok Fian em teing kitil nam e kom kiin elo kasi kokemoke te. Kokemei, sukum ding mak kiin milil kekemei, ataan kais be nam atemew te!”, dangse kale. Dangei, fein, yukam atew mak em kiin milil kelewei, e teifuluko, “Ibo! Mak kunum mak teleko, nem teing nauleko, deiw kukunemoka!”, angeko, olse kale. d  12 Olei, kamok Selgius Faulus e kanese be atemeko, fein ibolow kese kale. Nimtew angom? E Kamok Fian em kukuyemin weng beem kitil atemeko, yol angse kasike.

Bamfilia Aneng Fian Belga Abiw Mutuk Fian so, Bisidia Aneng Fian Antiok Abiw Mutuk Fian so, kaem Kanese Sang te.

13 Beli, Fol so, akalem akunum kusel iso, alik alik i Bafos abiw mutuk fian be kolewsomi, ^siw mak kuluko, Bamfilia aneng fian em abiw mutuk fian Belga kalo unsiliw kale. Ka kel e, im akunum Sion Mak e ilo koyemeko, iti Selusalem abiw mutuk fian kalo unse kale. e  14 Em ilo koyem unse ding dim bakate, aso i Belga abiw mutuk fian iti koleweko, Bisidia aneng fian em abiw mutuk fian Antiok kalo unsiliw kale. Ka unesomi, Suda kawtiw im finengdakamin ding Sabat kese ding dim bakate, aso i Suda kawtiw im wensankabiliw am kawtem elo uneko, ka kel teinsiliw kale. 15 Teinbiliwi, mali kunum i Moses em kukuyemin fut so, mali Sunbin-Got em bontem dim bakayemin kunum mak im fut so, fut alew be teing bokosiliw kale. Keko beli, wensankabiliw am beem kak yetebiliw kunum i mali kunum mak yamdaliwi, i Fol so, em akunum kumel eso, aso biim mit teleko, bokoyemomeliw: “Nakunum kusel yutaka! Aso yom dim e temtem weng mak be tewe, yu kame teleko, kunum waneng nulo bokoyemoliwka!”, yangsiliw kale. 16 Yangiwi, Fol e fokfok moko, teing so fakmiw fakmiw keyemei, im kimi tete angsiliw ding dim bakate, e weng mak bokoyemomele:

  • “Isalael kawtiw kunum waneng yuso, num ibik biliw kawtiw yuso, alik alik Sunbin-Got em wiin daolewkabiliw kunum waneng yutaka! Yu nem weng kale kilele wosulina!
17 
  • Isalael kawtiw num Sunbin-Got e nukalem awalik kumel ilo akalem wiin so amkose kale. Keko beli, im ikalem kawin kolewko, Isiw aneng fian elo uneko, ka kel alenaliw ding dim bakate, Sunbin-Got e ilo bamki so keyemeko, kunum mongom so keyemse kale. Keyemsomi, akalem kitil ete ilo iti kuluko, yemde unse kale. f 
18 Yemde unei, im 40 kel itol keko, kawtiw banim, ok banim aneng tiow dim ka kel kakameliw ding dim bakate, e im kukuw wa be ateminba tew kesomi, ilo menew ibolow kukuyemeko, yetemalenale kale. 13:18 Teing Bakamin 14:34; Sawa Weng 1:31 19 Keko beli, Kenan aneng fian ka kel e, Sunbin-Got e ben kel kunum mongom mak im muluwel dow yeneko, ikalem kawin be Isalael kawtiw nulo atin kuw fan atew duyemse kale. g  20 Kaneko eisneng beem kanese ding dim bakate, 450 kel itol atew kese dim ete kale. Keko beli, Sunbin-Got e Isalael kunum waneng nulo diwyemin kak kunum banban mak duyemse kale. Diwyemin kunum biim fefe e Sunbin-Got em bontem dim bakamin kunum Samuel ete kale. 13:20 Geeyemin Kunum 2:16; 1 Samuel 3:20 21 Kaem ding dim bakate, kawtiw i gaaneko, bokolomeliw: 'Nu emisik kamok fian mak kulomin ibolow keluma!', angsiliw kasike, Sunbin-Got e im gaanin be kiliko, im emisik kamok fian Sol elo mo kolewse kale. Sol be Benyamin em mulki Kis em min ete kale. Keko beli, e emisik kamok kebelei, uneko, 40 kel itol kese kale. 13:21 1 Samuel 8:5,19; 10:20-24 22 40 kel itol banimse ding dim bakate, Sunbin-Got e Sol beelo sak kulu koleweko, Debit elo Isalael kawtiw im emisik kamok fian kelewse kale. Keleweko, bokolomele: 'Nakalem ete Sesi em min Debit beelo atemite: E nem ibolow fukunin gelewkabe kunum angomi, nem weng bokolewkabi weng alik alik be kilele aluwko, gelewkabe kunum ete te!', angse kale. 13:22 1 Samuel 13:14; 16:12; Sim Fut 89:20 23 Angeko, Sunbin-Got e 'Kaneloki te!', angse weng kitil mak Isalael kawtiw nulo bokoyemomele: 'Deiw mak ding mak, ne Debit em mulkis mak yuso amkoko, koyemoki te. Kunum be yulo yemdeko, finik so bin kulomin deiw ka kel mo koyemoke te.', yangse kale. Yangeko, Yesus elo dabalase te. h  24 Em teleko, kawtiw im kiin dim fitewinba kese ding dim bakate, Sion emisik Isalael kawtiw alik alik nulo weng mak bakayem tem bakayem tem teleko, bokoyemomele: 'Ibolow famdeko, sili sili kukuw kolewboliwka! Kolewiwi, ne yulo ok da koyemoki te!', yangse kale. 13:24 Matyu 3:1-2 25 Yangei, em aluwbamin be mewso banimse ding dim bakate, e bokolomele: 'Yu ibolow fukuneko, bokolomeliw: 'Ne yom ding fen alakabiliw kunum ^Mesaya nete te!', nangeko, ibolow fukunkabiliw sako? Kate yu kililina! Nemteben toloke kunum be auk so kitil so kamok fian keloke kasike, ne ki keko, elo dokoleweko, em yan aum sok e ne nam sileli te.', yangse kale. 13:25 Sion 1:20 , 27 26 Kame, Abalakam em muluwel dow so, Isalel num ibik biliw kawtiw yuso, alik alik yu Sunbin-Got em wiin daolewkabiliw nakunum kumel yutaka! Nulo dokoyemomin beem dulum elo Sunbin-Got em Weng Kal Ken Ati be talse kate, 27 Selusalem abiw mutuk fian kasel so, ikalem kak yetebiliw kunum iso, alik alik i Yesus elo kilele atemeko, dolon kelinba kesiliw kasike, i elo ibolow wa keleweko, geelewsiliw te. Geelewsiliw kasike, im Sabat fingendakamin ding dim fut tem bakameliw weng be fein dem gilase kale. Nimtew angom? Sua kel akate, Sunbin-Got em bontem dim bakamin kunum i bokolomeliw: 'I Mesaya elo aliwi, e kuanoke te!', angsiliw kasike. 28 
  • Feinka! I elo mongom banim so akate geeleweko, kak kunum Failat elo bokolewomeliw: 'Elo alew kano, e kuanoka!', dangsiliw te. i 
29 Dangesomi, elo ais dim sil bikiko, aliwi, e kuanse te. Kuanei, mali kunum mak em fom be debeleko, kawin tem dawkusiliw kate, j  30 Sunbin-Got e elo fomkamin dim elo dawkalfolse te. 31 Keko beli, ding banban ding mak kelei, mali Yesus eso Galili aneng koleweko, Selusalem abiw mutuk fian kawtem elo uneko, eso makuw kakameliw kunum waneng i elo iti kiin so atemeko, Suda kawtiw ilo bakayem tem bakayem tem unakabiliw te. 13:31 Kalan Kunum 1:3 , 8 32 Feinka! Nu yulo Sunbin-Got em num awalik kumel ilo 'Kaneloki te!', yangse Weng Kal Ken Ati be bakayem talbuluw te. 33 Weng Kal Ken Ati be kanekote: Sunbin-Got em nukalem awalik kumel ilo 'Kaneloki te!', yangse weng be num dim fein dem so keko, dem gilase te. Nimtew angom? E Yesus elo fomkamin dim elote dawkalfolse kasike. Kanese be, auk teben sim Sim Fut tem beem weng be ki kelewkabe te. Weng be bokolomele: 'Ku nakalem min te. Kame akate, ne kom kalew kebi te.', angakabe te. 13:33 Sim Fut 2:7 34 Yu kililina! Sunbin-Got e Yesus elo fomkamin dim elote dawkalfolse kasike, Yesus e fomkamin ka kel kiloninba kese te. Kate kame, e diwkuw diwkuw finik so be te. Sunbin-Got e beem dulum elo bokolomele: 'Nem emisik kamok Debit elo dulewsi fein so, sen banim so, bamki be yulo akati duyemoki te.', angse kale. 13:34 Aisaya 55:3 35 Angeko, ^Mesaya em dulum elo iti bokolomele:

'Sunbin-Got e akalem wiin so amkose kunum elo nam fomkamin dim kabalak kel kolewei, e kilone te.',
angse kale.

36 Yu kilele kililina! Emisik kamok Debit em finik so bise ding dim bakate, e Sunbin-Got em weng kiliko, gelewemale kunum ete kale. Kate, e kuanei, i elo akalem awalik kumel im fomkamin tem mewso ka kel dawkuliwi, em fom be fein kilonse kale. 37 Kilonse kate, Sunbin-Got e Yesus elo fomkamin dim elo dawkalfolei, e kawin tem ka kel kiloninba kese te. 38 
  • Nakunum kumel yutaka! Num bakayembuluw Weng Kal Ken Ati kale kilele kililoliwka! Moses em kukuyemse weng be yom ibolow sili sili nam beem sen e kilele banim keyeminba kese kate, Yesus e yom sili sili kukuw beelo sak misim kuw atin kuw kulu koyemeko, yulo fein dokoyemoke te.
39 Kasike, nimin kunum waneng ite mak kunum Yesus beelo 'Fein!', dangiw tewe, e ilo Sunbin-Got em kiin dim e, kiol kuw sen so banim kunum waneng keyemkabe te. l  40 Yu kilelbiko, boliwka! Mesik esik Sunbin-Got em bontem dim bakamin kunum im yangenaliw weng be yom dim telemoke kasike! I bokolomeliw: 41 'Sunbin-Got elo weng minin kuw kelewkabiliw kawtiw yutaka!
Yu kilelbiko, boliwka!
Yom kakameliw ding dim kabalak e, ne auk so kitil so eisneng mak kaneloki te.
Kaneloki kate, mali kawtiw mak yulo bokoyemomeliw: 'Sunbin-Got e kitil so auk so be kanelewse kai!', yangiw tewe, yu kiliko, yan weng bokoyemomeliw: 'Babo! Dasuw weng bakayembiliw te!', yangeko,
kaneloki auk so kitil so eisneng be atemeko, yol angokoliw kate, yu atin kuw banimokoliw te.',
angsiliw te.”,

yangse kale. m 

42 Yangesomelei, im wensanbiliw am be kolewsiliw ding dim bakate, aso iso kut elo unsiliw kunum waneng alik alik bi aso biilo bokoyemomeliw: “Kame Sabat finengadakamin ding dim banim kembe kasike, sowem finengdakamin ding Sabat keloke ding dim kabalak e, kaso yu iti teleko, nulo weng makso bakayemboliwka!”, yangsiliw kale. Yangesomi, mali Suda kunum waneng banban so, Isalael kawtiw im ibik biliw keko, Sunbin-Got em wiin daolewsiliw kawtiw iso, alik alik bi makuw Fol so, Balnabas so, aso ilo yenggelew unsiliw kale. Yenggelew uniwi, aso i kunum waneng biim fukunin be kitil keyemeko, bokoyemomeliw: “Sunbin-Got e yulo ibolow folok keyemeko, ken kuw kukuw kukuyemse kasike kame, e yulo diwkuw ibolow folok kukuw keyemkabe te. Yu kitil kuw keko, elo gelewemoliwka!”, yanganaliw kale.

44 Keko beli, ben kel ding banimeko, iti Suda im finengdakamin ding Sabat kese ding dim bakate, abiw mutuk fian kasel banban i Suda im wensankabiliw am dim kalo talsiliw kale. Nimtew angom? Alik alik i Fol so, Balnabas so, aso im Kamok Fian em bakayembiliw weng be “Nukati kililuma!”, angeko, talsiliw kasike. 45 Talsiliw kate, mali Suda kunum im talsiliw kawtiw demdem biilo yetemsiliw ding dim bakate, i aso ilo ibolow mesem keyemeko, Fol em yangbe weng beelo sakalaw keko, weng bo bo keleweko, eso weng on ganesomi, em weng beelo ankiw dasiliw kale. 46 Daliwi, aso ikati kalaing kuw keko, kitil weng mak biilo bokoyemomeliw: “Aso nu kiol kuw kukuw geleweko, emisik ding e, Sunbin-Got em weng kale Suda kawtiw yom dulum elo 'Yu kulina!', yangeko, de talbuluw te. Kate, yu sakalaw keko, weng bo bo keko, yukalem ibolow kuw bokolomeliw: 'Nu sunsun finik so bin be nam kuluw te!', angbiliw kasike, aso nu beem dulum elo kilele yetemuwete: 'Yu fein sunsun finik so kulomin kawtiw bate!', angeko, yetemuw te. Kasike kame, aso nu yulo Weng Kal Ken Ati kale nam makso bokoyemuw te. Aso nu Isalael kawtiw num ibik biliw kawtiw ite kuw bakayem tem bakayem tem kemokoluw te. n  47 Nimtew angom? Kamok Fian e aso nulo kitil weng mak bokoyemomele:

'Ne yulo ailbin atew keyemii, yu yongom dong atew fung angiwi,
ne yulo Isalael kawtiw im ibik biliw kawtiw im ailbin atew keyemboki te.
Keyemii, yu aneng aneng angom biim kawtiw im kuankemin kakameliw deiw be aileko,
ilo Sunbin-Got em finik so kulomin deiwkim dim elo yemde telemokoliw te.',
yangse kale.”, yangsiliw kale. o 

48 Yangiwi, Suda kawtiw im ibik biliw kawtiw i aso biim weng be kiliko, im ibolow e kalfong ati kesomi, Kamok Fian em weng be kiliko, daolewsiliw kale.

Keko beli, nimin kunum waneng im dulum elo Sunbin-Got e bokolomele: “I sunsun finik so bin kulukoliw te!”, yangse kunum waneng alik alik bi em weng kiliko, “Fein te!”, dangsiliw kale.

49 Keko beli i Kamok Fian em weng be aneng aneng angom elo deko, bakam unsiliw kale. 50 Unsilw kate, mali Suda kawtiw i abiw mutuk fian beem Sunbin-Got em wiin daolew kebiliw wiin so wanggel so, kak kunum iso, alik alik biim mit mewso uneko, im ibolow silikmoyemsiliw kasike, i Fol so, Balnabas so, aso ilo yenomin ibolow keyemeko, kitil weng mak bokoyemomeliw: “Yu fongate akate num buluw aneng kale koleweko, unina!”, yangeko, yenbakalasiliw kale. 51 Yenbakalaliwi, aso i uneko, man kukun im yan dim alakabe be abiw ka kel yel kalis koleweko, fein unsiliw kale. Beem mongom ete aso i kawtiw biilo kukuyemomeliw: “Abiw kasel yu Sunbin-Got em weng kulinba kebiliw kawtiw yute te!”, yangeko, kukuyemsiliw kale.

Kanesomeliwi, Sunbin-Finik e Antiok abiw mutuk fian kaem Yesus elo “Fein!”, dangsiliw kawtiw biim mutuk weneko, gekei, i kalfong fian kesiliw kale.

Keko beli, aso i Antiok abiw mutuk fian be koleweko, Aikoniam abiw mutuk fian elo unsiliw kale. p 

Copyright information for `BHL