Acts 28

Malta Okgung em Kanese em Sang te.

Beli, kaem ding dim bakate, kawtiw i nulo aneng beem wiin e “Malta!”, yangiwi, nu kilisuluw te. Malta kasel bi nulo ibolow menew keyemeko, “Talbiliw yako!”, yangiwi, suuk so asolow ding kebe kasike, i ais abuleko, “Ais beem dim mewso telina!”, yangsiliw te. a  Keko beli, kaem ding dim bakate, Fol akati ais kuluko, ais abulse te. Kate, em kanemomin kebe ding dim bakate, sokyan mak weing beem mamin kawtem beelote teleko, Fol em teing dim elo ning dut kelewse te. Kelewei, aneng kasel i kanele eisneng be atemeko, bokolomeliw: “Ibo! Kunum be nomin kunum e? E kawtiw yenomin kunum kebe sako? Nimtew angom? E okmun dim kuaninba kese kate kame, em kukuw wa beem yan dulewkabe got e elo alomin kebe kasike!”, ange ange kesiliw te. Kesiliw kate, Fol e sokyan beelo butut kalis koleweko, weing dim elo keleweko, wakamin wa mak em anggil dim kelewinba kese te. b  Kanelei, ka biliw kawtiw i em anggil dim be kiin doung atemiwete: “Atin kuw kuanoke sako? Bani, wakamin wa mak kuluko, fasuloke sako?”, ange ange keko, tiak ding mak fensiliw kate, em anggil dim e mak wa eisneng mak kelewinba kelei, i atemsiliw te. Keko kasike, i ibolow fukunomeliw: “Ibo! Kunum be wa kukuw so kunum bate! E got mak ete te!”, ange amge kesiliw te. c 

Keko beli, kanebe aneng ka kel e, kunum mak em wiin e Buwlius ete te. E okgung aneng beem emisik kak kunum ke alenale te. Em am e aneng beem mewso kese kasike, e nulo akalem am kalo yemde unei, yemamas kel ding kabalak e, wanin yemensomi, nulo kilele yetemse te.

Keko beli, kaem ding dim bakate, Buwlius em alew e anggil mamin so ol kil so wakamin fian mak kelewse kasike, Fol e Sunbin-Got eso weng bokoko, akalem teing e wakamin kunum beem dim elo dukuko, elo kilelewse te. Kilelewei, mali okgung beem kasel i wakamin so biliw kawtiw ikati yemde teleko, Fol em mit mewso koyemiwi, e ilo kilelyemse te.

10 Keko beli, kawtiw alik alik bi nulo kalfongyemeko, ken kukuw kuw keyemsomeliwi, num “Kame iti ^siw kuluko, unuma!”, angsuluw ding dim bakate, i num mesesem sukum kesuluw mesesem mesesem eisneng be nulo yemeniwi, nu unomin memen kesuluw te.

Ulom Abiw Mutuk Fian Kalo Talsiliw em Sang te.

11 Beli, yemamas kel kayow banimse ding dim bakate, nu Aleksandilia abiw mutuk fian em siw mak kawtem elo unsuluw te. Inim fian kese ding dim kabalak e, siw beem atebiliw kawtiw i siw beelo okgung ka kel sok so giko, kolewsiliw te. Siw beem kak dim ka kel e nu takak mak atemuwete: Takak be siw kasel biim got Dioskul
28:11 Gilik kawtiw i ikalem emisik got Sus em awang aul im wiin e ”Dioskul!”, yangsiliw kale.
im takak kelei, nu atemsuluw te.

Keko beli, nu siw kawtem elo uneko, okgung be koleweko,
12 Silakius abiw mutuk fian kalo uneko, ka bomi, alemsal ding mak banimsuluw te. 13 Banimsomi, iti siw kawtem elo uneko, abiw mutuk fian be koleweko, Elegium abiw mutuk fian kalo unsuluw te. Unbomeluwi, aneng iti danse ding dim bakate, nulo dokoyemomin inim mak teleko, nulo fongate akate yemde unse kasike, iti aneng danse ding dim bakate, nu Buteoli abiw mutuk fian kalo talsuluw te.

14 Ka teleko, nu Yesus elo gelewkabiliw kunum waneng mak yetemuwi, i nulo bokoyemomeliw: “Yu teleko, ben kel ding mak nuso makuw bina!”, yangsiliw te. Yangiwi, nu kiliko, iso ka buluwi, ben kel ding mak alsuluw te. Keko beli, nu ilo iti koyemeko, kawin dim kel Ulom abiw mutuk fian kalo unsuluw te. 15 Num unsuluw ding dim bakate, mali Ulom abiw mutuk fian beem Yesus elo gelewkabiliw kunum waneng i kililiwete: “Kame teliw kai!”, ange ange kesomi, im biliw abiw mutuk fian be koleweko, uniwi, mali i Abius em Wemin Am dim kalo uniwi, mali i Deiw Am Alemsal dim kalo uniwi, alik alik bi kalo uneko, num fukun talsiliw te. Teliwi, Fol e ilo yetemeko, kalfongeko, ibolow kalaing kuw keko, Sunbin-Got elo “Weso, seyo!”, dangse te. 16 Dangei, nu iti unuwi, fe kabalak e, nu Ulom abiw mutuk fian kalo talsuluw te. Kalo telesomeluwi, i Fol elo bokolewomeliw: “Komikel kuw am mak belew kano, kate, wonuk so kunum mak kukalem am belew am be moko, kulo kateboke te.”, dangsiliw te.

Ulom Abiw Mutuk Fian em Kanese Sang te.

17 Beli, alemsal kel ding mak banimse ding dim bakate, Fol e abiw mutuk fian kaem Suda kawtiw im kak yetebiliw kunum mali mak gaayemei, i teliwi, e ilo bokoyemomele:

  • “Nakunum kumel yutaka! Ne nukalem Suda kawtiw ilo wa kukuw mak keyemeko, nukalem awalik kumel im nulo kukuyemsiliw kukuw mak beelo sakok keko, alik alik be itel kelinba kesi te. Kate, nem Selusalem abiw mutuk fian ka kel bisi ding dim kabalak e, abiw kasel i nelo sok so nit net kenemeko, Ulom abiw mutuk fian im wonuk so kunum im teing dim da konemsiliw te.
18 Da konemiwi, i nelo diw netemeko, bokolomeliw: 'Kunum be wa eisneng mak kelinba kese kasike, nu kanelom em kanese beem yan e duleweko, 'Elo aluwi, e kuanoka!', dangokoluw te!', nangeko, nelo kut elo da konemomin ibolow kesiliw te. e  19 Kate, Suda kawtiw num kak yetebiliw kunum i diwyemin kunum biim weng be ibolow kelinba keko, kitil kesiliw kasike, ne nanew deiw mak feneko, bokolomeli: 'Ne Ulom abiw mutuk fian beem emisik kamok fian em mit uni kano, ete nelo kiliko, diwnemoka!', angsi te. Angsi kate, nakalem Suda angin ilo geeyemomin beem dulum elote kalo telinba kebi te. f  20 Nakalem sang be bokoyemomin beem mongom ete ne yulo gaayemii, yu teliwi, ne yulo kame kukuyembi te. Nakunum kumel yutaka! Isalael kawtiw alik alik nu Sunbin-Got em 'Alik alik yulo dokoyemin kunum ^Mesaya ete dabalalii, e toloka!', angse weng beem kaneloke ding dim fenbuluw te. Alik alik num fenbuluw beem mongom ete i nem teing e sok so ge konemiwi, ne ka bi te.”, yangse te. 28:20 Kalan Kunum 26:6-7 21 Yangei, i yan weng bokolewomeliw: “Sudia aneng fian kasel i kom kaneselew eisneng beem dulum elo fut mak boko, nulo weng kal bokoyeminba kesiliw te. Beemdiw, Sudia aneng fian koleweko, kale telese kunum mak akati ibik weng mak nulo bokoyeminba kese te. 22 Kate, nu kililuwete: Aneng aneng angom kasel i deiw kikis beem dulum elote weng on ete kuw ganbin kelewkabiliw kasike kame, kukalem ete num ibolow fukunin be kilele dolon keyema!”, dangsiliw te. g  23 Dangiwi, iso, Fol eso, alik alik i weng kitokoko, “Kaem ding dim iti wensanuma!”, angsiliw te.

Keko beli, kitokosiliw ding em kutim akal, kuinbele akal, diwkuw diwkuw kabalak e, Fol e akalem am matem telesiliw kawtiw banban biilo Sunbin-Got em ^gawman ding dim em sang be kilele mongom so bokoyemse te. Bokoyemeko, “Moses em kukuyemse weng akal, Sunbin-Got em bontem dim bakamin kunum im weng akal, alik alik biim weng be nulo kilele kukuyemete: ^Mesaya angsiliw kunum be Yesus ete kuw te.”, yangse te.
24 Yangeko, mali Fol em weng kilisiliw kunum waneng bi em weng elo “Fein te!”, dangsiliw kate, mali kawtiw i “Babo! Weng be fein weng bate!”, dangsiliw kasike, 25 i weng on ete kuw kesomi, amen kuw amen kuw kesiliw te. Kesomeliwi, im Fol elo iti kolew unsiliw ding dim bakate, Fol e weng mak bokoyemomele: “Sua kel akate, Sunbin-Finik e yom kawalik kumel ilo bokoyemomin weng mak Sunbin-Got em bontem dim bakamin kunum Aisaya elo bokolewomele:

26 
  • 'Aisaya, ku uneko, kawtiw biilo weng kale bokoyemomelew:
'Yu tiak ding kilikabiliw kate, weng beem mongom e yu kilele dolon kuw kelinba kesomi, akokow kelewkabiliw te.
Yu weng be fein atemokoliw kate, beem mongom e yu kal kelinba kekabiliw te.
27 Nimtew angom? Kawtiw biim ibolow fukunin e atin kuw kou keyembe kasike.
I weng be kilele wosulinba kekabiliw kawtiw kesomi,
kiin akati gal kuw kesomi, akalbin kawtiw ite te.
Mesik esik im kiin be atemsomeliwi,
i weng kiliko,
'Ibolow fukunin ken kuw kulubuluw kai!', angomi,
biim sili sili kukuw be koleweko, nem dim elo teliwi,
ne ilo kilelyemoki kasike.',
yangolewka!',
dangse kale.
28 Kaneko beli, kame yu kilele kililina! Sunbin-Got e akalem Weng kal Ken Ati be Suda kawtiw num ibik biliw kawtiw ilo duyemkabe te. Duyemei, ite fein kililokoliw kasike, e ilo dokoyemeko, sunsun dinik so kulomin deiw ka kel mo koyemkabe te.”, yangse te.

29 Keko beli, itol alew mak kelei, Fol e Ulom abiw mutuk fian beem am dim ka kel kuw bise te. Bomi, am beem kayak elo yan on kisol so welewbise te.

Keko beli, e mali em fukun teliw kawtiw banban ilo kalfongyemeko, “Am matem telina!”, yangeko,
31 kalaing kuw keko, Sunbin-Got em ^gawman sang so, Kamok Yesus Kulais em sang so, sang be diwkuw diwkuw kukuyembise te. Nimtew angom? Mali kawtiw i em kanese deiw be goto kelinba kesiliw kasike.

Copyright information for `BHL