Acts 6

Ben kel Dakayemin Kunum mak Amkosiliw im Sang te.

Beli, kaem ding dim bakate, kunum waneng demdem mak Yesus elo “Fein!”, dangeko, em gelewkabiliw kunum waneng kesiliw kale.

Kesiliw kasike, beem ding dim bakate, mali Gilik weng bakabiliw kawtiw i Kibulu ikalem weng bakabiliw kawtiw ilo ibik weng mak keyemsomi, bokoyemomeliw: “Yu yom Kibulu waneng kalun imisik wanin yemgibiliw kate, yu num Gilik waneng kalun ilo kilele dokoyeminba kekabiliw te!”, angsiliw kale. a 
Angiwi, Yesus em kalan kunum kalun kel i fein ibolow so kunum waneng alik alik ilo bokoyemomeliw: “Nu kanelom Sunbin-Got em weng kal kukuyemin weng beem aluwbamin be kolewko, mali ilo wanin dukayemokoluw te! Be wa kasike, yu kame uneko, nimin kunum ite mali mak kunum waneng num kiin dim e kiol kuw kebomeliwi, Sunbin-Finik e im dim aluwbabelei, Sunbin-Got em deiw kilele kal kebiliw kunum ben kel mak feneko, yemde tololiwka! Teliw kano, nu wanin yemgiyemin em aluwbamin be im teing dim elo dayemokoluw te. Kaneluw tewe, nu ki keko, diwkuw diwkuw Sunbin-Got eso weng bakamin kukuw so, em weng be kawtiw ilo kukuyemin kukuw so, kukuw alew bete kuw kilele aluwbamokoluw te.”, yangsiliw kale.

Yangiwi, ka biliw kunum waneng i kiliko, makuw “Kenka!”, angeko, ben kel kunum mak mo koyemsiliw kale. Ben kel kunum biim wiin e kanekote:

  • Mak e Stiben ete kale. — E Sunbin-Got elo “Fein!”, angeko, kitil kuw gelewkabelei, Sunbin-Finik e em dim weneko, gekse kunum ete kale.
  • Mak e Filiw ete kale.
  • Mak e Folokolus ete kale.
  • Mak e Nikanol ete kale.
  • Mak e Timon ete kale.
  • Mak e Falmenas ete kale.
  • Mak e Antiok abiw mutuk kunum Nikolas ete kale. — Kunum be Isalael kunum ba kate, Suda im kukuw kuluko, Sunbin-Got elo gelewkabe kunum ete kale.
Keko beli, i ben kel kunum bi kalan kunum biim kiin dim kel mo koyemiwi, i ikalem teing deeko, biim dim dukuko, Sunbin-Got elo “Im aluwbamin be bamki so keyema!”, dangsiliw kale.

Beli, aneng aneng angom biliw kunum waneng alik alik i Sunbin-Got em weng be kiliko, banban mak Yesus elo “Fein!”, dangesiliw kale. Keko beli, Selusalem abiw mutuk fian kasel banban akal, Sunbin-Got em am yol em kunum ayem afak kunum banban ikal, alik alik i Yesus elo “Fein!”, dangeko, fein ibolow so kunum waneng iso makuw bongguko, fufu banso mak kesiliw kale. b 

Stiben em Sang te.

Kaem ding dim bakate, mali Sailini abiw mutuk so, Aleksandilia abiw mutuk fian so, mali Silisia aneng so, Esia aneng so, aneng aneng be kolewsiliw Suda kawtiw mali mak i Selusalem abiw mutuk fian kalo teleko, ka kel ikalem wensankabiliw am mak gelewsiliw kale. Am gelewsiliw kawtiw biim dulum elo mali kawtiw i bokolomeliw: “I mali kawtiw im afak kelinba kawtiw te!”, yangsiliw kale.

Keko beli, Sunbin-Got e Stiben elo bamki fian so kelewbelei, e auk so kitil so eisneng banban mak kawtiw alik alik im kiin dim kel aluwse kate, bakalem biliw mali kunum mak teleko, Stiben em yange weng beelo ibolow ki kelinba kesomi, weng ane ane bokolewsiliw kale.
10 Ane ane bokolewsiliw kate, Sunbin-Finik e Stiben elo kal fian mak dulewse kasike, e fil atul so kelei, mak kunum mak ki keko, em ange weng be de mit dalinba kese kale. c  11 Keko beli, kawtiw bi okmoko, dasuw kunum mak ilo dasuw weng im bontem dim duyemeko, bokoyemomeliw: “Yu bokolomeliw: 'Sua kel akate, nu Stiben em weng kilisomeluwi, e Moses so, Sunbin-Got so, aso ilo miyemin weng mak bokolei, nu kiliko, atemsuluw te!', angboliwka!”, yangsiliw kale. 12 Yangesiliw kasike, i Isalael kawtiw im kak yetebiliw kunum so, Sunbin-Got em kukuyemin auluwko, kukuyemkabiliw kunum iso, ka biliw kawtiw iso, kawtiw alik alik biim ibolow silikmoyemsomeliwi, i Stiben elo debele uneko, Isalael kawtiw im kak yetebiliw diwyemin kunum im mit kalo da kolewsiliw kale. 13 Da kolewsomi, dasuw kunum makso mo koyemiwi, i bokolomeliw: “Kunum kale diwkuw diwkuw am yol ayem ka kel so, Sunbin-Got em kukuyemin weng beso, alew beelo weng milewkabe te. 14 E bokolomele: 'Nasalet abiw kayak Yesus e teleko, am yol be dakal kolewsomi, Moses nulo duyemse kukuw beelo alwol keyemoke te.', angei, nu kilisuluw te!”, yangsiliw kale.

15 Im yangbiliw ding dim bakate, Isalael kawtiw im kak yetebiliw diwyemin kunum i Stiben elo kiin doung doung angeko, em kiinguen e Sunbin-Got em dabalakamin finik em kiinguen atew kelei, i atemsiliw kale.

Copyright information for `BHL