Genesis 48

Awalik Sekow em Bamki so Weng Bokoyemse em Sang te.

Beli, mali deiw mak ding mak kabalak e, Yosew e kililete: “Kalew e wakamin so kebe te!”, dangiwi, e kilise kale. Kilisomelei, e akalem muluwel alew Manase so Efalaim so ilo kuluko, yelimel bi makuw akalem alew elo atebam unsiliw kale. Unsomeliwi, mali kunum im Sekow elo bokolewomeliw: “Kukalem min Yosew e kulo katemomin telbe te.”, dangsiliw ding kabalak e, Sekow e kitil kesomi, akalem akalbe dim elote baba teinse kale. Teinsomelei, e Yosew elo bokolewomele: “Sua e, nem Kenan aneng fian em Ulus abiw mutuk ka kel alenali ding dim e, Kitil so Auk so Sunbin-Got e nem dim mewso teleko, bamki so weng mak dunemeko, a  bokonemomele: 'Kulo bamki so kekemsomi, kom muluwel dow ikal bamdako, nengso nengso keyemoki te. Keyemsomi, aneng fian ka kel kukalem so, kom muluwel dow iso, alik alik yulo diwkuw diwkuw duyemii, yu beelo aluwbokoliw te.', nangse te. Kaneko beli, ku kilele kilila! Nakalem Isiw aneng fian kaleelo telinba kebisi ding dim kabalak e, ku kame yemde telselew muluwel alew biilo dukuselew te. Kate kame, ne muluwel alew biilo nakalem aul imdiw keyemsomi, nakalem dukusi muluwel Uluben so Simeon so aso biimdiw keyemsomelii, i nakalaem fan anung ikati kulokoliw te. Kom imisik dukuselew muluwel aso biim ibik teleko, dukukemokolew muluwel bite kuw kukalem mongom kemokoliw te. I ikalem fik kumel Efalaim so Manase so, alew biim kawin be fan atew kulokoliw te. Nem Mesofotemia aneng fian koleweko, Kenan aneng fian elo kakabisi ding dim kabalak e, kauk Elesel u Efalata abiw mutuk fian beem mewso ka kel kuanui, ne sakik ilum fian mak kuluko, ulo Efalata unsuluw deiw mutuk kel wamkusi te. Kame, ne kom dukuselew muluwel Efalaim so Manase so, aso biilo kauk Elesel um iti dukulin muluwel atew keyembi kasike.”, dangse kale.

Efalata em wiin mak e Betelekem te. b 

Alew Isalael em weng be banim kelewse ding bakate, e Yosew em yemde talse muluwel alew biim dulum elo yetemeko, dakalalomele: “Aul alew kali kante a?”, dangse kale. Nimtew angom? Alew Isalael e fasel kelomi, kiin sukul kese kasike. Keko beli, Yosew e alew elo yan weng bokolewomele: “Aul alew kali, Sunbin-Got em nakalem Isiw aneng fian kale kel bomi, nelo dunemse muluwel alew ite te.”, dangesomelei, alew Isalael e bokolewomele: “Nem mit mewso yemde tala! Yemde telew kano, ne ilo bamki so weng mak duyemoki te.”, dangse kale. Dangei, Yosew e fein, aso ilo awalik em mit yemde telei, awalik sel e biilo falal mumul da koyemeko, 11 min Yosew elo bokolewomele: “Sua e, ne ibolow fukunomete: 'Ne kulo nam katemi sako!', angeko, ibolow fukunsi kate kame, Sunbin-Got e ibolow folok kenemei, ne kukalem muluwel iso yelimel makuw yetemika!”, dangse kale. 12 Dangei, Yosew e awalik em mumul dim teinbiliw muluwel alew biilo kuluko, kaneng da kaneng da koyemsomi, akalem kiinguen gatak wakas kawin dim elo dasomi, alew elo “Weso! Seyo!” dangse kale. 13 Keko beli, Yosew e ning Efalaim elo yuk teing dim elote aluwsomi, fik Manase elo awan teing dim elote aluwsomi, aso ilo yamdeko, awalik Isalael em mit mo koyemse kale. Mo koyemse kasike, e fik Manase be Isalael em yuk teing dulum elote mo kolewsomi, ning Efalaim be awalik em awan teing dulum elote mo kolewse kale. 14 Kaneyemsomi, awalik Isalael e akalem yuk teing de uneko, ning Efalaim em awan dulum mose dim elo dukuko, kolewsomi, akalem awan teing be de uneko, fik Manase em yuk dulum mose dim elo dukuko, kolewse kale. 15 Kolewsomelei, e min Yosew elo bamki so weng mak bokolewomele:

“Nakalem aatim kumel Abalakam so Aisak so aso em afak bomi, em weng gelewsomi,
nelo diwkuw diwkuw *siwsiw yetebin kunum emdiw kenati kuw netemeko, dokonemkakabe Sunbin-Got
e kom aul biilo bamki so keyemboke te!
16 Feinka! Sunbin-Got em nem anggil ilum so kakabi ding dim kel kilele dakanembise dabalakamin finik be
muluwel alew biilo bamki so keyemboke te!
Keyemsomi, kawin dim kale, muluwel biim dow e fian kuw kesomi, bamda nengso nengso keyemoke kasike, kunum waneng angom alik alik i nakalem wiin so, nakalem aatim kumel Abalakam so, Aisak so, yelim biim wiin so, alik alik num wiin be nam banime te.”, dangse kale.
17 Dangei, Yosew e alew Sekow em yuk teing e “Ning Efalaim em kak dim elo dukulewe kai!”, angeko, atemsomi, em kiin dim e “Wa kele kai!”, angeko, alew em yuk teing kuluko, bo keleweko, fik Manase em kak dim elo dukulomin ibolow keko, 18 alew elo bokolewomele: “Aatim kutaka! Bayo! Ku kaneminba te! Kom yuk teing e fik em kak dim kel dukula o!”, dangse kale. 19 Dangse kate, alew e yan weng bokolewomele: “Min kutaka! Nakalem kilele kal kebomi, kanebi te. Fik Manase akati kunum mongom fian mak kesomi, aul kaileko, muluwel dow banso banso keloke kate, ning bete kunum mongom atin fian kuw kesomelei, em muluwel dow banban bi kawin dim kaleem aneng aneng angom alik be gek yak yak kelokoliw te.”, dangse kasike, 20 e fein fik Manase elo ning Efalaim em afak kelewse kale. Kelewsomi, bamki so weng makso aso ilo bokoyemomele: “Isalael kawtiw i kaso yom bamki beelo ibolow fukunsomi, yom wiin dim kel bamki so weng mak bokolew bokolew kebomeliwi, 'Sunbin-Got e yulo Efalaim so, Manase so, aso biimdiw bamki so keyemoke te!', ange ange kebokoliw te.”, yangse kale. c 

21 Yangesomi, Yosew elo bokolewomele: “Ku nem weng kale kilele kilila! Nakati kuanomin mewso keli kate, Sunbin-Got e alik alik yulo kilele yetebomi, iti yukalem kawalik kumel nukalem kolew talsuluw aneng fian kalo yemde unoke te. 22 Yemde unoke kasike kame, ne kulo kawin ken ati mak dukemi te. Nem Amol kawtiw iso on genesomi, kulusi Sekem
48:22 “Sekem” weng alemsal beem mongom be kanekote: Mak e, abiw mutuk fian em wiin e, mak e, amgu gen e, mak e kun tomo te. Kun tomo beem fakam weng em mongom e kanekote: Kawin anung tugul ati so.
anung be kulo fein dukemi te.”, dangse kale.

Copyright information for `BHL