Hebrews 2

Kulais em Weng Fian be Kilele Aluwboliwka!

Keko beli, nu Kulais em kilisuluw sang be atin kuw kitil kuw fukuneko, aluwko, gelewemuma! Mesik esik nu teifulubomi, beem deiw beelo akokow kelokoluw kasike. Yu kililina! Sua kel akate, dabalakamin finik mak Sunbin-Got em bontem dim bokoko, nukalem awalik kumel ilo em sawa kukuyemin weng be bokoyemse te. Bokoyemse weng be kitil kuw kese kasike, nimin kawtiw ite mak em yangse weng beelo sakalaw keko, weng bo bo kebiw tewe, i ikalem kanekabiliw beem yan wa be fein kulusiliw te. a  Kulusiliw kasike kame, nukati Sunbin-Got em Kulais em dim aluwse sang be fein kiliko, sakalaw keko, weng bo bo keluw tewe, nu nono keko, yan wa beem kulomin deiw bakileweko, fon unokoluw e? Deiw mak banim te. Nimtew angom? Kamok Fian akalem ete emisik keko, nulo dokoyemin sang be bokoyemei, mali kiinwalasiliw kunum i beem weng be kiliko, num kiin dim akal kitil kuw mosiliw kasike. b  Mosomeliwi, Sunbin-Got e im yangkabiliw weng be kitil keleweko, akalem ibolow fukunin geleweko, Sunbin-Finik em bamki kitil eisneng kunum waneng im dim amen amen kuw keyemeko, auk so kitil so eisneng banban mak kese kasike, kawtiw i atemeko, kilele kal keliwete: Kulais em sang e “Fein weng te!”, angeko, kal kesiliw te. c 

Sunbin-Min e Kunum Awet Numdiw Kese em Weng te.

Nakunum kumel kunum waneng yutaka! Abiil tikin katem em angakabuluw sang beem abiw e yemdakamin finik i kamok keko, nam ite keko, elo atebiw te. Babo! Kate, Sunbin-Got em fut ayem tem mak em anung e weng kale bokolomele:

“Kunum e wiin so kunum kebe kasike, ku elo ibolow fukunbelew sako?
Bani, Kawtiw Aul e wiin so kebe kasike, ku elo atebelew sako? d 
Feinka! Sukum ding ete kuw ku kunum beelo wiin banim keleweko,
yemdakamin finik im afak kelewselew te.
Kate, ku elo iti wiin fian duleweko,
auk so kamok fian kelewsomi,
alik alik mesesem mesesem angom be em yan afak elo kuw kelewselew te.”,
angse kale. Angbe weng alik alik mesesem mesesem angom be nulo kilele kukuyemkabete: Mak eisneng mak nam tal kelewbe kate,alik alik eisneng angom beem afak kuw kebe te. Kate kame, nu kilele atemeko, “Feinka! Alik alik mesesem angom be em afak kebe kai!”, anginba kekabuluw te.
Kate, nu kilele atemeko, “yemdakamin finik im afak kelewselew” Yesus be Sunbin-Got em ibolow folok duyemkabe beem mongom ete num dulum elote betbet fian kuluko, kuanse te. Kasike kame, “Ku elo iti wiin fian duleweko, auk so kamok fian kelewselew te.”, angeko, atemkabuluw te. e 

10 Alik alik mesesem mesesem eisneng angom be talfut keleweko, akalem dulum elote dulewse Sunbin-Got em ibolow folok so kukuw ki kelewkabe beem mongom ete Sunbin-Got e bokolomele: “Kunum waneng banban nem abiil tikin kaleelo tolokoliw kai!”, angsomi, biim gomet em dulum elote ilo finik so kulomin beem deiw ka kel mo koyemkabe kunum sen mongom kayak Kulais beelo bokolewomele: “Ku betbet kuluko, kuana!”, dangse te. Dangeko, Kulais elo dokolewei, e Sunbin-Got em ibolow fukunin be kilele fein gelewse kasike, e Min beelo wiin fian dulewse te. 11 Keko beli, Sunbin-Got e akalem wiin so galmose kunum waneng so, em wiin galmo koyemkabe kunum Kulais eso, nungmel alik alik nukalem Aatim makmak kekabe te. Kekabe kasike, Kulais e finganinba keko, kunum waneng nulo “Nem nanggelel kunum waneng yute te!”, yangeko, f  12 Sunbin-Got elo bokolewomele:

“Nanggelel kunum waneng biilo kom auk so kitil so sang be fitew dim elo bakayembi te.
Ne sios kunum waneng biim mutuk ka kel kamsulemin sim bokokemkabi te.”,
dangse kale. g 
13 Dangeko, iti bokolomele:

“Nakati Sunbin-Got em ding fenbi te!”,
angeko,

“Sunbin-Got em nelo dunemse kunum waneng iso mobi kai!”,
angse kale. h 

14 Feinka! Kulais e num fik kesomelei, kunum awet numdiw kesomi, kun so kal so kunum waneng nukatetew kesomi, kuanse te. Kuanse kate, e beem mongom ete kuankemin beem kamok Seten-Ataanim em kitil beelo dawkatikoko, kalak da kolewse te. i  15 Da kolewse kasike kame, e diwkuw diwkuw kuankemin em awan finganeko, em afak sok so emdiw kakameluw kunum waneng alik alik num sok be silel koyemse emdiw keyemei, nu kame kalaing kuw kakabuluw te. 16 Kame yu kilele ibolow fukuneko, atemoliwka! Kulais em kanese be yemdakamin finik im dulum elote kanelinba kese kate, e Abalakam em muluwel dow keko, yom gomet em dulum elote kuw kaneyemse te. 17 Kaneyemse kasike, e atin kuw kun so kal so kunum waneng nukatetew kesomelei, mesesem nulo kak keyemkabe mesesem be elo akati kak keleweko, betbet dulewse kasike, e num kak keyemkabe ibolow beelo fukunsomi, ki keko, nulo kilele dokoyemeko, Sunbin-Got em kiin dim e ibolow folok so, kinkin ibolow so kunum ayem sel kesomi, num sili sili nam kukuw beem yan wa be fein weyemse te.

Copyright information for `BHL