John 21

Gelewkabiliw Kunum Ben kel im Sang te.

Beli, Yesus e akalem gelewkabiliw kunum im kiin dim e iti fitewse kale. Beem ding dim bakate, i Okmun Galili ka kel bisiliw kale. Okmun Galili em wiin mak e Okmun Taibelias ete kale. Fitewse sang e kanekote:

Kaem ding dim bakate, ben kel gelewkabiliw kunum mak okmun dim ka kel bisiliw kale. Kunum bi kanekote:

  • Mak e Saimon Fita e,
  • mak e Tomas (em wiin mak e “Awang Men”
    21:2 Gilik im weng sin e, “Didimus” dangsiliw te.
    ) e,
  • mak e Nataniel (Galili aneng fian Kena abiw mutuk kayak) e,
  • mak i Sebidi em muluw alew i,
  • mak i nanew gelewkabiliw kunum alew ite te.
Keko beli, Saimon Fita e mali ilo bokoyemomele: “Yutaka! Ne uneko, takam fenem uno yo!”, yangei, i bokolewomeliw: “Ken! Nu makuw unuma!”, dangsiliw kale. Dangiwi, ikalem alik alik i ^kunuw tem kawtem uneko, teinsomi, okmun dim elo unsiliw kale. Unsomeliwi, kutiliw ding uneko, iti aneng danei, i takam fensiliw kate, mak kulu takalinba kesiliw kale. b 

Keko beli, aneng danse ding dim bakate, kunum bi Yesus elo okmun benggew dim kel mobelei, i atemsiliw kale. Kate, i elo abelew keko, dolon kelinba kesiliw kale. Kesomeliwi, e gaaneko, dakalalomele: “Kunum aul min yutaka! Yu takam takabiliw e?”, yangei, i yan weng bokolewomeliw: “Babe! Nu takam mak takalinba kebuluw te!”, dangsiliw kale. Dangiwi, e bokoyemomele: “Yu yom wakal men be kuluko, kunuw em yuk teing dulum elo iti okmun tem elo kuse kabalak dalina! Kuse kabalak daliw tewe, fein takam kulokoliw te!”, yangse kale. Yangei, i em yangse weng be geleweko, wakal men kuse kabalak dasomeliwi, takam banso banso mak wakal men be gekse kale. Gekse kasike, im wakal men kunuw tem dim elo “Bing kuluma o!”, angsiliw ding dim bakate, wakal men beem ilum e fian kuw kelei, i ki keko, binginba kelewsiliw kale.

Kaneko beli, Yesus em elo ibolow mutuk fian dulewkabe kunum be Saimon Fita elo bokolewomele: “Kunum be nukalem Kamok Fian ete te!”, dangse kale. Kunum biim aluwbabiliw ding dim bakate, i ikalem ilim gulu kolewsiliw kasike, Fita elo weng be dangse ding dim bakate, e fongate akate akalem tikin ilim be iti minggisomi, okmun tem bukbuk angeko, benggew kalo unse kale. c  Kalo unse ding dim bakate, mali gelewkabiliw kunum i kunuw dim kel uneko, wakal men ilum sel be bingem kule unsiliw kale. Im unsiliw em singam e 100 ^mita emdiw te.

Keko beli, okmun beem benggew kel, akunum kusel bi ais abuleko, kainbelei, takam mali mak fu gis ke duku belei, i atemsiliw kale. Atemsomeliwi, ^belet wanin akal belei, i atemsiliw kale. 10 Atemiwi, Yesus e bokoyemomele: “Yu kame kulu kembiliw takam mali mak de telina!”, yangse kale. 11 Yangei, Saimon Fita e kunuw dim mewso uneko, wakal men takam banban so benggew dim kalo bingse kale. Bingei, isik takam be teing bokoko, “Ibo! Takam im fufu e 153 kel kele kai!”, angeko, yol angsiliw kale. Nimtew angom? Takam banban kese kate, wakal men be dakalalinba kese kasike. d  12 Keko beli, Yesus e bokoyemomele: “Kame, yu teleko, wanin wanina!”, yangse kale. Yangei, gelewkabiliw kunum bi Yesus elo atemeko, “Be fein Yesus ete kai!”, ibolow tem angsiliw kate, i finganeko, kaim dim kel “Be Yesus ete te!”, anginba kesiliw kale. 13 Kesomeliwi, Yesus e belet wanin so, takam so kuluko, yemense kale.

14 Yesus e kuaneko, iti baba teinse em ding elote, kaleem kanese ding dim telei, kanese sang be, Yesus em alemsal kel ding akalem gelewkabiliw kunum im kiin dim fitewse em sang te. e 

Yesus so, Fita so, Aso im Weng Bokosiliw em Sang te.

15 Beli, Yesus so, akalem gelewkabiliw kunum biso, alik alik im wanin be waneko, banimsiliw ding dim bakate, Yesus e Saimon Fita elo dakalalomele: “Sion em min Saimon kutaka! Kom nelo kenembelew ibolow mutuk fian be mali im ibolow mutuk fian bakiyembelew sako?”, dangse kale. Dangei, e yan weng bokolewomele: “Kamok Fian kutaka! Ku nem dukemkabi ibolow fian be kilele kal kebelew te!”, dangei, e bokolewomele: “Kasike, ku nem ^siwsiw men ilo yetemeko, wanin yemgiyemolewka!”, dangse kale.

16 Dangeko beli, iti dakalalomele: “Sion em min Saimon kutaka! Ku nelo ibolow mutuk fian kenembelew e?”, dangse kale. Dangei, e yan weng bokolewomele: “Kamok Fian kutaka! Ku nem dukemkabi ibolow fian be kilele kal kebelew te!”, dangei, e bokolewomele: “Kasike, ku nem siwsiw ilo yetemeko, wanin yemgiyemolewka!”, dangse kale. f 

17 Dangeko beli, yemamas kel ding Fita elo iti dakalalomele: “Sion em min Saimon kutaka! Ku nelo ibolow mutuk fian kenembelew e?”, dangse kale. Dangei, e ibolow ilum fian mak kuluko, yan weng bokolewomele: “Kamok Fian kutaka! Ku alik alik eisneng kilele kal kebelew kasike, ku nem dukemkabi ibolow mutuk fian bakati kilele kal kebelew te!”, dangei, e bokolewomele: “Kasike, ku nem ^siwsiw ilo yetemeko, wanin yemgiyemolewka!”, dangse kale.

18 Dangesomi, nono deiw ete Sunbin-Got e Fita em kuanoke beem dulum elo wiin fian kuloke beem dulum elo Yesus e weng mak bokolewomele: “Ku kame kilele kilila! Tanbel kaim so biselew ding dim kabalak e, ku kukalem yewet be kukalem teing so minggisomi, kukalem ibolow kuw geleweko, 'Ka uno! Ka uno!', angeko, fein kalo unemelew te. Kate, fasel kelokolew ding dim kabalak e, ku kukalem teing so silel angewi, mali kunum mak kom yewet net kekemeko, aneng ku ibolow kelewinba kelew aneng kalo kamde unokoliw te.
21:18 Kal kunum i weng beem mongom e bokolomeliw: Fita em fasel keloke ding dim kabalak e, maka i elo aluwsomi, Yesus emdiw ais dim sil biki kolokoliw te. Beem mongom ete Yesus e bokolomele: “Kom teing silel angokolew te!”, dangse kale.
”, dangse kale. Dangeko beli, Yesus e bokolewomele: “Kate kame ku nelo nenggelewa!”, dangse kale. h 

20 Dangei, Fita e famdes angei, Yesus em ibolow mutuk fian dulewkabe kunum aso ilo yenggelew telei, e elo atemeko, Yesus elo dakalalomele: “Kamok Fian kutaka! Kunum kaleem dim noloke ye?”, dangeko, dakalase kale.

Sua kel, fefe wanin wansiliw ding dim kabalak e, kunum be Yesus em mit mewso teineko, waneko, dakalalomele: “Kante kulo maka im teing dim daloke ye?”, dangse kale. i 
22 Kate, kaem ding dim bakate, Yesus e Fita elo yan weng bokolewomele: “Em dulum elo ibolow fukunomeli: 'Kunum be finik so belei, ne iti toloki te.', angi tewe, be kom eisneng bate. Kukalem ete nelo nenggelewolewka!”, dangse kale. 23 Dangei, akalem gelewkabiliw kunum i ikalem mutuk bokolew bokolew kelomeliw: “Kunum be nam kuane te!”, ange ange kesiliw kate, Yesus e kanele weng bokolinba kese kale. E bokolomele: “Em dulum elo ibolow fukunomeli: 'Kunum be finik so belei, ne iti toloki te.', angi tewe, be kom eisneng bate.”, dangse kale.

Sion em Fefe Kewkew Weng te.

24 Nem dulum elo “Nam kuane te!”, dangbisiliw kunum be nakalem ete kuw te.

Alik alik kunum waneng nu kilele kal keko, weng kale kitil kuw einging kelewuwete: Nem bosi weng kale dasuw so weng bate. Alik makuw fein weng ete kuw te. j 

25 Yesus e mesesem mesesem eisneng tulun tulun kuw kese kasike, ne em kanese eisneng alik alik be fut tem boli tewe, kawin dim kale gekomi, fut boloki em dolon e banimoke kasike, koli te. k 

Copyright information for `BHL