Luke 24

Finik so Baba Teinse em Sang te.

Beli, finengdakamin ding Sabat banimei, aneng be iti daneko, kutim mililiw bakate, waneng bi mali memen kelewsiliw kamge eisneng be de uneko, Yesus em fomkamin tum tem dim elo unsiliw kale. Uneko, ka kel atemiwete: Tum tem beem bontem elo kasi kolewsiliw tum fian be bulbulun uneko, belei, atemsiliw kale. Atemeko, tum tem kawtem uneko, Kamok Fian Yesus em fom elo ka kel belei, ateminba kesiliw kale. Ateminba keko, ibolow tiaktiak kesomi, “Yesus em fom e nal kel be ya?”, ange ange kesiliw ding dim bakate, i ilim kais nam minggiko, ailbin filik falak so kunum alew mak mobiliwi, yetemsiliw kale. Yetemsiliw ding dim bakate, wanggel bi finganin fian mak kesomi, gatak wakas angeko, kawin dim elo kiin doung angsiliw kale. Angesomeliwi, kunum alew bi waneng biilo bokoyemomeliw: “Nimtew angom ete, finik so kunum beelo fomkamin dim kale kel fenem talbiliw a? Feinka! E kale kel binba be te. E iti baba teinko, mo kembe kasike! Yu Yesus em Galili aneng fian ka biliwi, yulo bakayemale weng be kilele ibolow fukunemoliwka! a  E yulo bokoyemomele: 'Maka kawtiw i Kawtiw Aul nelo sili sili kukuw gelewkabiliw kawtiw im teing dim elo duyemiwi, i nelo ais dim sil biki konemokoliw te. Konemokoliw kate, alemsal kel ding dim kabalak e, ne iti baba teinoki te.', yangse kasike!”, yangsiliw kale. Yangiwi, wanggel bi akalem suaem yangenale weng be ibolow fukuneko, fomkamin dim be koleweko, kanese eisneng be Yesus em guel kel gelewkabiliw kunum so, mali iso ka biliw kunum waneng iso, alik alik biilo bakayem unsiliw kale. 10 Weng bakayem unsiliw mali wanggel biim wiin e kanekote:

  • Mak u, Malia, Makdala abiw kayak waneng ute kale.
  • Mak u, Yoana ute kale.
  • Mak u, Malia, Sekow auk ute kale.
Alemsal wanggel biso, mali waneng iso, alik alik bi uneko, kalan weng be Yesus em kalan kunum im fukun bakayem unsiliw kale.
11 I kalan weng be de unsiliw kate, Yesus em gelewkabiliw kunum bi waneng biim weng be kiliko, “Weng be sak weng kuw te! Fein bate!”, angsiliw kale. 12 Angsiliw kate, Fita e yakoko, Yesus em fomkamin dim elo atebam unse kale. Uneko, tum tem beem abisom dim mewso unse ding dim bakate, e mul sukun angeko, tum tem kawtem elo kiin doung angeko, atemete: Yesus em falal kolewsiliw ilim kuw belei, e atemse kale. Atemeko, ibolow tiaktiak keko, iti akalem am elo unse kale.

Emeus Abiw Kunum Alew im Sang te.

13 Beli, Yesus em gelewkabiliw kunum alew mak i Selusalem abiw mutuk fian koleweko, abiw fong mak em wiin e Emeus kalo unsiliw kale. Abiw be singam bate. Mewso te. 14 Aso im Emeus em deiw ka unsiliw ding dim bakate, aso i Selusalem abiw mutuk em kanese weng alik alik beem dulum elo bokole bokole kem unsiliw kale. 15 Bokolew bokolew kem unbiliwi, Yesus e aso im mutuk ka teleko, makuw unsiliw kale. 16 Unbomi, Sunbin-Got e aso biim kiin net keyemei, i Yesus elo abelew kelewsiliw kale.

17 Keko beli, Yesus e aso biilo bokoyemomele: “Yu nimtew weng mak bakam unbiliw a?”, yangse kale. Yangei, aso i dubuluw moko, sakik ibolow fian kesiliw kale. 18 Kesomeliwi, mak kunum em wiin e Kiliofas e elo yan weng bokolewomele: “Eke! Kawtiw banban kuw Selusalem abiw mutuk fian kawtem elo uneko, ka em kanese eisneng be kilele kal kebiliw kate, kukalem ete kuw kanese sang be akokow kelewbelew sako?”, dangse kale. 19 Dangei, Yesus e aso ilo dakalomele: “Nimtew eisneng mak kane kembe ya?”, yangei, aso i elo yan weng bokolewomeliw: “Nu Nasalet abiw mutuk fian kayak Yesus em sang bakam talbuluw te! E Sunbin-Got so, kawtiw so, alik alik num kiin dim e Sunbin-Got em bontem dim bakamin kunum wiin so kitil nam so kunum ete te. 20 Kate, alemsal kel ding banime ding dim kabalak e, Sunbin-Got em am yol em kunum ayem sel so, akalem angin iso, Suda kawtiw num kak kunum iso, alik alik bi elo geeleweko, 'Elo aluwi, e kuanoka!', angeko, elo ais dim kel sil biki kolewsiliw te. Kolewsiliw kate, nu ibolow fukunomeluw: Sunbin-Got e kunum beelo Isalael kawtiw nulo kilele dokoyemomin beem dulum elo dulewse te. b  22 Kane kembe kate kame, num mutuk biliw mali waneng mak nulo weng mak bokoyemiwi, nu kiliko, yol ange kembuluw te. Nimtew angom? Kameem aneng dane ding dim bakate, i Yesus em fomkamin dim elo uneko, 23 atemiwete: Em fom e ka kel binba kelei, i atem kembiliw kasike. Atemeko, i iti num dim elo teleko, nulo bokoyemomeliw: 'Mali Sunbin-Got em yemdakamin finik makuw ka biliwi, nu yetem kembuluw te. Yetemuwi, i nulo bokoyemomeliw: 'E finik so baba tein kembe kai!', yange kembiliw te.', yangeko, nulo bokoyem kembiliw te. 24 Yangiwi, num mutuk biliw mali kunum mak i waneng biim weng be kiliko, ikati fomkamin kalo atebam une kembi te. Keko beli, wanggel im yangiw weng be fein dem ke kembe kate, i Yesus elo ateminba ke kembiliw te.”, dangsiliw kale. c 

25 Dangiwi, e aso ilo bokoyemomele: “Kaso yu kilele ibolow fukuninba kesomi, ibolow dolon kelinba kunum yutaka! Yu Sunbin-Got em bontem dim bakamin kunum im sua kel yangbisiliw weng be kiliko, 'Fein!', danginba kebiliw sako? 26 Feinka! Sunbin-Got em bontem dim bakamin kunum bi sua kel akate bokolomeliw: '^Mesaya e teleko, betbet fian mak kuluko, kuaneko, iti finik so baba teineko, kamok fian kesomi, akalem wiin fian so abin kalo unoke te.', angsiliw kasike!”, yangse kale. d  27 Yangeko, Moses em weng so, Sunbin-Got em bontem dim bakamin kunum im weng be so, Sunbin-Got em fut tem ^Mesaya em dulum elo bosiliw mali weng be so, weng alik alik beem mongom e ilo kilele kukuyemeko, aso im ibolow dolon keyemse kale. e 

28 Keyemsomelei, yenggdel i Emeus abiw kalo mewso talsiliw kale. Talsiliw ding dim bakate, Yesus e weng bakamko, unomin ibolow atew kese kale. 29 Unomin ibolow atew keemei, aso i elo kitil kuw keleweko, bokolewomeliw: “Wee! Ku nuso kalak kola! Nimtew angom? Ataan akati tem dokong angeko, kutiliw akal mewso kele kasike!”, dangsiliw kale. Dangiwi, e aso im weng be kiliko, aso im am kawtem elo unse kale.

30 Keko beli, am kawtem wanin wanomin kesiliw ding dim bakate, Yesus e ^belet wanin be kuluko, Sunbin-Got elo “Weso! Seyo!”, dangeko, belet wanin be fakal fakal keleweko, aso ilo duyemse kale. 31 Em duyemse ding dim bakate, aso im kiin akal, ibolow fukunin akal, silel angeko, elo dolon kuw atemsiliw kale. Atemiwi, Yesus em ka kel be ding dim bakate, e banim banim kelei, aso i elo ateminba kesiliw kale.

32 Kanese ding dim bakate, aso i bokolew bokolew keko, bokolomeliw: “Em aso nuso deiw teleko, aso nulo Sunbin-Got em fut tem em weng mongom be kilele bokoyem kembe ding dim bakate, aso nu em yange kembe weng be kilisomeluwi, aso num ibolow bi silel angeko, dolon keko, ibolow kakat ati ke kembuluw te!”, angsiliw kale. 33 Aso im angsiliw ding dim bakate, aso i iti ikalem abiw koleweko, Selusalem abiw mutuk fian kalo uneko, Yesus em guel kel gelewkabiliw kunum so, iso biliw kunum waneng bi so, alik alik ka kel makuw wensansiliw kunum waneng ilo yetebam unsiliw kale. 34 Yetebam uneko, aso im abiw ka talsiliw ding dim bakate, ka biliw kunum waneng i aso ilo bokoyemomeliw: “Feinka! Kamok Fian moko, finik so be te! Saimon akal elo atem kembe kasike!”, yangsiliw kale. f  35 Yangiwi, aso ikal ilo bokoyemomeliw: “Aso nukati elo deiw kel atem kembuluw kate, aso nu elo abelew kuw keleweko, dolon kelinba kelew kembuluw te. Kate, Yesus em ^belet wanin fakal fakal keleweko, nulo duyemse ding dim kabalak e, aso nukati elo kal keleweko, dolon kelew kembuluw te.”, yangsiliw kale.

Gelewkabiliw Kunum Ikati elo Atemsiliw em Sang te.

36 Im yangsiliw ding dim bakate, Yesus akati im mutuk ka kel moko, alik alik ilo bokoyemomele: “Ibolow menew so boliwka!”, yangse kale. 37 Yangei, i elo atemeko, yol angeko, finganin mak kuluko, ibolow fukunomeliw: “Ibo! Yakei! Sawkal mak telbe sako!”, angeko, olsiliw kale. g  38 Oliwi, e ilo bokoyemomele: “Nimtew angom ete yu finganeko, 'Fein!', nanginba kebiliw a? 39 Yu teleko, nem yan o, teing o, kale atenemina! Atenemsomi, teleko, nem kal dim kalakati nauleko, kal keliwete: Ne sawkal ba kate, kal so kun so kunum nete te!”, yangse kale. 40 Yangeko, ilo akalem yan a teing a be kukuyemse kasike, 41 i elo atemsomi, yol angeko, kakatsiliw kate, i elo kilele “Fein!”, danginba kesiliw kale. Keko kasike, e ilo bokoyemomele: “Wanin mak de teliw kano, ne yom kiin dim kel wano yo!”, yangse kale. 42 Yangei, i fein takam gis anung mak delew teliwi, 43 e kuluko, im kiin dim kel wanse kale.

44 Wansomelei, e iti weng mak bokoyemomele: “Nem yuso kakabisi ding dim kabalak e, ne Moses em weng so, Sunbin-Got em bontem dim bakamin kunum im weng iso, Sunbin-Got em kunum alik biim fut ayem tem bosiliw em weng beem mongom e yulo dolon kuw keyemeko, kukuyemomeli: 'Kanele eisneng be nem dulum elo fein keloke te!', yangsi te.”, yangse kale. h  45 Yangeko, im ibolow silel keyemeko, Sunbin-Got em fut tem em weng beem mongom e dolon kuw keyemeko, 46 bokoyemomele: “Sunbin-Got em fut tem weng bokolomele: 'I ^Mesaya elo aliwi, e kuaneko, alemsal kel ding dim kabalak e, e iti baba teineko, finik so keloke te. 47 Keloke kasike, kawin dim kaleem aneng aneng angom im kasel alik alik i Weng Kal Ken Ati be kilisomi, ibolow famdeliw kano, Sunbin-Got e im sili sili ibolow be sak misim kuw kulu koyemoke te. Kasike kame, yu emisik keko, Selusalem abiw mutuk fian em kasel ilo weng be bakayem unoliwka! 48 Alik yu kane kembe beem sang be kilele kiinwalako, atem kembiliw te. i 

49 Yu kilele kililoliwka! Aatim em 'Kaneyemoki te!', yangse weng be yom dulum elo fein keloke kate kame, yu uneko, abiw mutuk fian kawtem kel beem kaneloke ding fenem unoliwka! Kaneloke ding dim kabalak e, yu abiil tikin em auk so kitil so fein kulokoliw kasike.”, yangse kale. j 

50 Yangeko, akalem gelewkabiliw kunum biilo yemde unei, i Betani abiw fong em mit mewso kalo unsiliw kale. Unesomeliwi, e akalem teing daok kesomi, bamki so keyemse kale. 51 Em bamki so koyemse ding dim bakate, Sunbin-Got e elo abiil tikin elo debele unesomelei, e ilo fein koyemse kale. 52 Keko beli, Yesus em gelewkabiliw kunum bi ka kel akate katin bukbuk angeko, Yesus em wiin fian daolewsomi, kakat fian mak kuluko, iti Selusalem abiw mutuk fian kalo unsiliw kale.

53 Beli, i diwkuw diwkuw Sunbin-Got em am yol aneng dim ka kel bomeliwi, Sunbin-Got em wiin fian daolewko, alenaliw kale.

Copyright information for `BHL