Romans 16

Fol em “Yukalo!”, Yangse Weng te.

Nakunum kumel kunum waneng yutaka! Nawkolon Fibi um dulum elote bokoyembi weng ken kale kililoliwka! U Senkelia abiw mutuk fian em sios biim kunum waneng iso aulbabomi, ilo dokoyemkabu waneng ute te. Kame, yu ulo akati dokoumeko, kalfongumboliwka! Nimtew angom? Sua kel akate, u nakalem so, kunum waneng banban iso, alik alik nulo fein dokoyem kebisu kasike. Kanebisu kasike kame, yu Kamok Fian akalem galmose kunum waneng im ken kukuw be geleweko, ulo akati dokoumeko, um sukum keumbu mesesem mesesem eisneng be ulo fein duumoliwka!

Kais yemkal Bilisila so, Akuila so, yemkal biilo “'Yukalo!', yange kai!”, yangoliwka! Yemkal iso, neso, alik nu fangfangdako, Kulais Yesus em aluwbamin aluwdewkabuluw te. a  Sua kel akate, nem kal ilum fian kulusi ding dim bakate, yemkal bi ikalem kal dim em ibolow fukuninba keko, kuanomin awan finganeminba keko, dokonemsiliw kasike, neso, Suda kawtiw num ibik biliw kawtiw im sios kunum waneng yuso, alik alik nu yemkal biilo “Weso! Seyo!”, yangboluwka!

Yangeko, ikalem am dim wensankabiliw sios kunum waneng alik alik ilo ikati “'Yukalo!', yangbe kai!”, yangoliwka!

Nem ibolow kelewbi ken kunum Efainetus elo akati “'Kukalo!', kange kai!”, dangoliwka! E Esia aneng fian em emisik kunum Kulais elo “Fein!”, dangeko, telese kunum ete kasike.

Malia ulo “'Kukalo!', kange kai!”, wangoliwka! U bukeko, yom dulum elote aluwbamin fian mak keyemalu waneng ute kasike.

Nemdiw Suda kasel kebiliw Andolonikus eso, Yunias uso, yemkal
16:7 Mali kal kawtiw im fukunin e kanekote: Yemkal bi fein yemkal bate! Andolonikus akal, Yunias akal, aso i kunum im wiin mak kasike. Kate, mali kal kawtiw im fukunin e kanekote: Bilisila so, Akuila so, (16:3), Filologus so, Sulia so, (16:15), yemkalel biimdiw Andolonikus so, Yunias so, ikati yemkal kesiliw kale.
biilo “'Yukalo!', yange kai!”, yangoliwka! I wiin so kalan kunum waneng keko, neso sok am tem alenaliw kasike. I imisik keliwi, ne im ibik ete teleko, Yesus elo “Fein!”, dangsi te.

Nem nakunum Amfiliatus elo “'Kukalo!', kange kai!”, dangoliwka! E Yesus em “Fein!”, dangse kunum keko, alakabe kunum ete kasike, ne elo ibolow mutuk fian dulewsi te.

Neso fangfang da kunum keko, Kulais em sak weng afak aluwkabe kunum Ulbanus elo “'Kukalo!', kange kai!”, dangoliwka!

Dangeko, ibolow fian dulewkabi kunum Satakis akal “'Kukalo!', kange kai!”, dangoliwka!

10 Abeles elo akal “'Kukalo!', kange kai!”, dangoliwka! Fein! Ilum kuluse ding dim kabalak e, kawtiw alik alik i kunum beem Kulais elo fein gelewkabe kukuw be atemeko, kal ke alakabiliw kasike.

Alistobulus em angin alik alik ikal “'Yukalo!', yange kai!”, yangoliwka!

11 Nemdiw Suda kunum kebe Kelodion elo “'Kukalo!', kange kai!”, dangoliwka!

Dangeko, mali Nalsisus em angin keko, Kamok Fian elo “Fein!”, dangbiliw kunum waneng alik ilo “'Yukalo!', yange kai!”, yangoliwka!

12 Kamok Fian em aluwbamin fian ke aluwkabiliw waneng alew Tilifina so, Tilifosa so, uso ilo “'Yukalo!', yange kai!”, yangoliwka!

Ibolow fian keumbi nawkolon Felsis ulo “'Kukalo!', kange kai!”, wangoliwka! U bukeko, Kamok Fian em aluwbamin fian aluwkabu waneng kebute kasike.

13 Ulufus so, akalem auk so, yat ilo “'Yukalo!', yange kai!”, yangoliwka! Kamok Fian e kunum beelo akalem wiin so amkose kunum kelewe kasike. Em auk u nakalem yem umdiw kenembisu te. c 

14 Asinkilitus so, Felegon so, Kelmes so, Fatolobas so, Kelmas so, ikalem awkunum kumel biliw iso, alik alik biilo “'Yukalo!', yange kai!”, yangoliwka!

15 Filologus so, Sulia so, yemkal biso, Neleus so, akalem waneng aul Olimbas uso, iso biliw Sunbin-Got akalem wiin so galmose kunum waneng biso, alik alik biilo “'Yukalo!', yange kai!”, yangoliwka!

16 Alik alik yu Sunbin-Got em angin num kukuw be geleweko, yengimel yukalem falal kolew kolew keko, “Biliw yako!”, yangboliwka!

Yu kililina! Abiw abiw angom im Kulais em sios kunum waneng alik alik bikati yulo “Yukalo!”, yangiw te. d 

Kilbiko, Bomin em Weng te.

17 Nakunum kumel kunum waneng yutaka! Yu kilelbiko, boliwka! Nimtew angom? Mali yom mutuk talsiliw kawtiw mak yom sua em kulusiliw kukuyemin weng beelo dasuw weng mak tikin kuw bokoyemkabiliw kasike, yu im kanebiliw beem dulum elote amen amen kuw keyemkabiliw kasike. Yu kanelom mali kawtiw biim mit mewso unokoliw te! e  18 Feinka! Dasuw weng abal nam bakayemkabiliw kawtiw bi ikalem kal im ibolow kuw fukunkabiliw kate, nukalem Kamok Fian Kulais em aluwbamin beem dulum elote fukuninba kekabiliw te. I dasuw dasuw weng kuw menew menew ati te mali yulo keyemeko, mali biim weng beem mongom ete akokow so kebiliw kawtiw biim ibolow fukunin be dolo dolo keyemkabiliw kasike. f 

19 Nakunum kumel kunum waneng yutaka! Aneng aneng angom kawtiw alik alik i yukalem Sunbin-Got em deiw gelewkabiliw kukuw em kanebiliw sang kilikabiliw kasike, ne yom dim ete kalfong fian mak kulukabi te.

Yu ken eisneng em kukuw atin kuw kal keko, gelewemoliwka! Kate, wa eisneng em kukuw e singam kel keko, boliwka! g 

20 Ding mewso mewso keloke ding dim kabalak e, menew ibolow em sen mongom kayak Sunbin-Got e Seten-Ataanim elo yom yan afak ka kel dawkatiko, kawtol angoke te.

Wee yutaka! Nukalem Kamok Fian Yesus em folok ibolow e fein yuso boke te! h 

Fefe “Yukalo!”, Yangsiliw Weng te.

21 Nakunum kumel kunum waneng yutaka! Nem fangfang dako, neso aluwbabe kunum Timoti so, Ilusius so, aso nemdiw Suda kunum kebiliw Sason so, Sosifatel so, kunum biso, neso ka biliw kunum waneng iso, alik alik yulo “Yukal o!” yangiw te. i 

22 Teltius nete, ne Fol em bokose weng beem bontem dim kuluko, fut kale boli kunum kebi te. Nakati yulo Kamok Fian Yesus em wiin dim e “Yukalo!”, yangi te.

23 Gaius akati yulo “Yukalo!”, yange te. E neso, kaem sios kunum waneng iso, alik alik nulo dokoyemeko, akalem am elo yemde unakabe kunum ete te.

Elastus so, nukalem akunum Kualtus so, aso i yulo “Yukalo!”, yangiw te. Elastus e abiw mutuk fian kaleem on kisol atebe kunum ete te. j 

Sunbin-Got em Wiin Dawsulemin em Weng te.

24 Nem Sunbin-Got em Weng Kal Ken Ati so Yesus Kulais em weng so bakayem tem bakayem tem uni ding dim kabalak e, ne diwkuw diwkuw weng kale bokoyemkabite: Sunbin-Got e ki keko, alik yom fein ibolow be kitil keyemkabe te. Sua kel akate, Weng Kal Ken Ati kale wokmoko, alenale kate kame, k  26 sunsun finik so bin Sunbin-Got e akalem ibolow fukunin geleweko, wokmobe weng be fitew dim dase te. Feinka! Sua kel akate, Sunbin-Got em bontem dim bakamin kunum i wokmobe weng be bokosiliw kate kame, aneng aneng angom kasel i fitewse weng beem mongom be kilele kal kekabiliw kasike, ikati ki keko, Sunbin-Got elo “Fein!”, dangbin em deiw gelewkabiliw te.

27 Emdiw makso banim keko, kal fian so Sunbin-Got e Yesus Kulais elo dabalase kasike, nu akalem wiin fian e diwkuw diwkuw daoluma! Feinka!

Bete kuw. Nem fut weng boyemi fut kame kilaka.

Copyright information for `BHL