Romans 4

Abalakam e Fein Ibolow Gelewemin Deiw em Yamtolo Unse Kunum Kese te.

Kame yu kililoliwka! Suda kawtiw nu nukalem abiok Abalakam em kakamele deiw be kilele atemuw tewe, nu nimtew eisneng mak atemokoluw e? Yu kame atemoliwka! E kun kuluko, kukuyemin sawa weng beelo kilele gelewbe tew tewe, e beem mongom ete “Ne kunum wiin so kunum nete te!”, angboke te. Kate, e beem deiw elote Sunbin-Got em kiin dim e kiol kuw sen so banim wiin ken so kunum kelinba kese te. Kate, Sunbin-Got em fut ayem beem tem e Abalakam em dulum elote bokolomele:

“Abalakam e Sunbin-Got elo 'Fein!', dangse kasike, beem mongom ete e elo bokolomele: 'E kiol kuw kunum te!', angse te.”,
angeko, fut tem bose kale. a 

Alik nu kal keluwete: Aluwbamin kunum alik alik i sak misim kuw aluwbamin em yan mak kulinba kekabiliw kate, im aluwbamin fian beem yan bete kuw fein kulukabiliw te. Kate, Sunbin-Got e kunum waneng nulo bil banim keyemeko, sak misim kuw yan mak duyemeko, bokoyemomele: “Yu ibolow sili sili nam kawtiw kate, nem kiin dim e yu kiol sen so banim kunum waneng kebiliw te!”, yangakabe te. Yangakabe kasike nimin kunum waneng ite mak kukuyemin sawa weng beem dulum elote bukemin fian mak kelinba kekabiliw kate, elo “Fein!”, dangiw tewe, Sunbin-Got e im fein ibolow beem dulum elote ilo “Weng banim te!”, yangakabe te. Yu kililina! Sunbin-Got e mali kawtiw im bukeko, “Em kiin dim e kiol kunum waneng nute te!”, angbiliw em aluwbamin be ateminba kekabe te. Kate, e kunum waneng biim sili sili kukuw ateyeminba tew keko, im kanekabiliw em yan wa be sak misim kuw koyemsomi, ilo akalem kiin dim e kiol kuw sen so banim kunum waneng mo koyemkabe te. Kaneyemkabe kunum waneng biim dulum elote suaem emisik kamok fian Debit akati bokoyemomele: “I kalfongeko, kakatemoliwka!”, yangse kale. Yu akalem fut tem bose weng be teing bokoko, atemoliwka! E bokolomele:

“Sunbin-Got e yom sili sili kukuw koyemkabe kunum waneng yu kalfongeko, kakatemoliwka!
Fein! Yu em sawa weng kilele gelewinba kekabiliw kate, e yom kukuw wa be sak kasiyemeko, koyemkabe kasike. b 
Feinka! Kamok Fian e yom ibolow sili sili nam kukuw be teing bokolinba keyemkabe kunum waneng yu kalfong fian so keko, kakatemoliwka!”,
angeko, fut tem bose kale.

Kame yu nono ibolow fukunbiliw e? Debit e ikalem ^kal okilewkabiliw Suda kawtiw num dulum elote kuw bokolomele: “Yu kalfongeko, kakatemoliwka!”, yangeko, bokoyemse sako? Bani, e kal okilewinba kekabiliw kawtiw yom dulum elote akati weng be bokoyemse sako? Feinka! E kal okilinba kekabiliw kawtiw iso, kal okilew kekabuluw kawtiw nuso, alik alik num dulum elote “Yu kalfongeko, kakatemoliwka!”, yangse kale. Nimtew angom? Nu fut ayem tem ka kel teing bokoko, atemuwete:

“Abalakam e Sunbin-Got elo 'Fein!', dangse kasike, beem mongom ete e elo bokolomele: 'E kiol kuw kunum te!', angse te.”,
angei, nu atemsuluw te. c 
10 Kame yu kilele kililina! Nalem tit ete Sunbin-Got e Abalakam elo “Ku kiol kuw kunum kute te!”, dangse ye? Abalakam em kal okileweko, kealenale ding dim kabalak ete? Bani, em kal okilewinba kealenale ding dim kabalak ete sako? Fein, em kal okilinba kealenale ding dim bakate, Sunbin-Got e “Ku kiol kuw kunum kute te!”, dangesomi, 11 elo ibik elote kal okilew kemin kukuw be bat kang dukulin tew dulewse te. Kasike kame, alik alik nu kilele kal keluwete: Sunbin-Got e Abalakam elo kilele atemeko, em kal okilinba kese ding dim kabalak e, elo weng banim kese te.

Kaneko beli, Abalakam e kawtiw Sunbin-Got elo “Fein!”, dangakabiliw kate, kal okilinba kebiliw kawtiw im abiok akati ke alenale te. Nimtew angom? Isik Abalakam emdiw kal okilinba kekabiliw kate, Sunbin-Got e im fein ibolow be atemeko, ilo akati “Yu kiol kuw kunum waneng yute te!”, yangakabe kasike. d 
12 Kaneko beli, Abalakam e kawtiw ikalem kal okileweko, akalem kal okilinba kealenale ding dim em kiol kuw kukuw beemdiw kakabiliw kunum waneng biim abiok akati kealenale te. Nimtew angom? I Abalakam em kanemale kukuw be geleweko, Sunbin-Got elo “Fein te!”, dangakabiliw kasike.

13 Sua kel akate, Sunbin-Got e Abalakam elo fawtuk ayem weng mak bokolewomele:

“Ne kawin dim angom kale kukalem so, kom muluwel dow iso, alik alik yulo duyemoki te!”,
dangese kale. Feinka! E Abalakam em kukuyemin sawa weng afak kebomi, gelewkabe kukuw be ateminba kese kate, em fein ibolow bete kuw atebamele kasike, e em kiin dim e kiol kuw sen so banim kunum kealenale te. e 

14 Fein te! Sunbin-Got e mali Moses em kukuyemse sawa weng beem afak keko, gelewkabiliw kawtiw ilo kuw fawtuk ayem weng be bokoyeme tewe, mali kunum waneng im elo “Fein!”, dangakabiliw ibolow be soson mongom banim so emdiw kebe tew te. Kebomelei, Sunbin-Got em fawtuk ayem weng bakati sak fong atew keko, dem banim atew kebe tew te. f  15 Nimtew angom? Kawtiw im sawa weng sakalaw keko, weng bo bo kelewkabiliw beem mongom ete sakalaw keko, weng bo bo kemin beem kaisuw yan fian im dim kel dakin aileko, fitewkabe kasike. Kate, sawa weng mak banim kele tew tewe, kawtiw i ki keko, sawa beelo akati nam sakalaw keko, weng bo bo kemiw te. g  16 Kasike, Sunbin-Got em ibolow folok e kunum waneng elo “Fein!”, dangbiliw kunum waneng im dulum elote fein fitewkabe te. Fitewei, em weng Abalakam so, em muluwel dow iso, alik alik ilo bokoyemse fawtuk ayem weng be fein dem gilalei, alik alik i elo kulokoliw te. Kate, Abalakam e Suda kawtiw so, mali Abalakam emdiw Sunbin-Got elo “Fein!”, dangakabiliw kawtiw iso, alik alik makuw bongguko, num abiok makmak keyemse kasike, Sunbin-Got em fawtuk ayem weng be alik alik num dulum akati makuw talse te. h  17 Nimtew angom? Sunbin-Got e Abalakam em dulum elote bokolei, i akalem fut ayem tem ka kel boliwi, nu kilele teing bokoko, atemuwete:

“Kawtiw mongom banso banso im abiok awalik kekemoki te!”,
dangei, nu atemuw kasike. Feinka! Abalakam e auk so kitil so Sunbin-Got elo “Fein!”, dangeko, kal kelete: Ete ki keko, kuansiliw kawtiw ilo iti yemkalfoleko, kanelinba mesesem mesesem eisneng beem dulum elote “Kanela!”, angei, mesesem be fein talfut keloke kasike, e Sunbin-Got em kiin dim e num fein abiok kealakabe kasike. i 

18 Yu Abalakam em kanelewse sang be kililina! Abalakam em itol e 100 kel kelei, e fasel kesomi, em aul kailomin deiw akal banimse kale. Banimei, em kalel Sala ukal kumun du keko, aul dukukemin am tum kutse kate, Abalakam e yemkal ikalem dim em kaneyemkabe be ibolow fukuninba kebomi, Sunbin-Got em kitil fian beem dim ete kuw ibolow fukuneko, kitil kuw mosomi, Sunbin-Got em dokolewoke ding fense kale. Ding feneko, Sunbin-Got elo kuw dawsiko, em yangse weng

“Kawtiw mongom banso banso im abiok awalik kekemoki te!”,
angse weng beso, em angse weng

“Kom muluwel dow i banban demdem kekemoki te.”,
dangse weng beso, weng alew beem ki keloke ding fense kale. j 
20 Feinka! Abalakam em fein ibolow e kitil kelewbelei, e Sunbin-Got em elo dangse fawtuk ayem weng be kitil kuw aluweko, ibolow alew kelinba kebomi, Sunbin-Got em wiin fian kuw daoleweko, 21 bomi, atin kuw kal kelete: Auk so kitil so Sunbin-Got em dangse fawtuk ayem weng be “Fein dem gilaloke kai!”, angeko, bise kale. 22 Sunbin-Got e Abalakam em fein ibolow aluwbise beem mongom ete em dulum elote bokolomele:

“E kiol kuw sen so banim kunum ete te!”,
dangse kale. k 
23 Beemdiw, nukati Abalakam emdiw Sunbin-Got elo “Fein!”, dangbuw tewe, e nulo akati “Yu kiol kuw sen so banim kawtiw yute te!”, yangoke te. Nimtew angom? Nu Sunbin-Got em akalem min num Kamok Fian Yesus elo dawkalfoleko, tein kolewse em weng be kiliko, “Fein!”, dangbuluw kunum waneng kebuluw kasike. Kebuluw kasike, sua em ding em fut ayem bosiliw weng be num dulum elote akati fut tem boyemsiliw te.

25 Fein! Num ibolow sili sili nam beem sen mongom ete Sunbin-Got e akalem min elo maka kawtiw im teing dim da kolewei, i elo aliwi, e kuanse te. Kuanse kate, e elo iti dawkalfolse kasike kame, nu Sunbin-Got em kiin dim e kiol kuw keko, sen so banim kunum waneng kekabuluw te. l 

Copyright information for `BHL