aLebitika 18:5
bUtoronomi 30:12
cUtoronomi 30:13
dUtoronomi 30:14
eIsaya 28:16
fJowel 2:32
gIsaya 52:7
hIsaya 53:1
iIngi Sam 19:4
jUtoronomi 32:21
kIsaya 65:1
lIsaya 65:2

Romans 10

Ini ne kiling Yisuyegi ngizi kumuli puwili ne pobokko yenge ya nogoragi yungka kelirik Yuda yongkambanu neyaga puwili Anotogi kazing yombanu yaliya wazayi pumok kolok uliweki keli. Ne puwiligi wiyeke Anotoyegi kozang panu waberek mizi. Ne puwiliyegi iwaka legi nogo puwiliyegi langai pelik kai, puwili Anotoyegi yawe mizagimokko tarikke keya miziwili kapura puwili Anotogi kazing puluwengki kiyebuk legi puwiligu tarikke keya mizi pura yeik ulaktikku. Puwili Anotogo kazing yombanuwili ngezebek kiling pangka wazayi pumokki puwili ngaungaugu kiyebuk miza logo ngezewiligu kazing lo Mosego lende miza piyengko puwili Anoto kiling pangka wazayagi namek keremiziweki miza logo puwili Anotogi kazing lewengke kiliya ono.

Yudawiligu puwiligi kazing were loyengki kiriwei panu mizi purikku Anotogo puwili pi kiling pangka wazayagi miza pumok Kilisigu kayimarikku puwiligu pilik kumuli pura yeik sa wazamiya. Logo piliktikki kandik Anotogo yombanu Kilisiyegi ngizi kumuli puwili ngezebek kiling pangka wazayi. Kazing loyengki kiriwei mizirikku Anoto kiling pangka wazayi pumokkirik Mose loyeng melabokko pelik kai,

Yombanu lo Mosego lende miza piyengko miziweki kai piyeng mabiyeng mizibok Anoto kiling paka ngalege wizagomagi, kai. a 
Kapura kazing Kilisiyegi ngizi kumulirikku Anoto kiling pangka wazayi pumokkirik Anotogi Kapiya Walektikku pelik kai,

Ni makngezeyegi takko paka ngalege kangki kai nagani, kai. b 
Purikku kai purik takko tenigi wiyeke Kilisi paka ngalega miza orowei lewagi kai yagenda.
Keya Mosego pobiliktarau kai,

Ma ni makngezeyegi takko yungu yenge yungke kambelirikki kangki kai nagani, kai. c 
Purikku kai purik yombanu Kilisi yenge ibengwiligi iga miza orowei yabekkeyagibek tak kai yagenda kapura nakkorau pilik mizagi ono purik Kilisi ulogo paka ngalega kayima keya ulogo ibendaga yangalekta.
Keya Mosego piyengkirau pelik kanga kai,

Anotogi ngagora iniyegi mereke yolu puloge mena kili inuguyengko ne puragi ngizi kumuli kisi logo ya inuguyengke wiyi, kai. d 
Anotogi ngago pura ngago Yisuyegi ngizi kumuli logo ini yaliya wazayiweki tonugu kozak kisi pura.
Purik tamizeige nazuwagawiligi wirege kili ni makngezegirago, Yisu Yemizi nogobek, kai keya yenge ya nuguraga Anotogo pi ibendaga yangalekta wazamiya purikki ngizi kumuli mabura Anotogo ni yaliya wazaniyagi. 10 Purik ya nugurago ngizi kumulirikku Anotogo ni ngezebek kiling pangka mizi, keya nazuwagawiligi wirege kili ni makngezegirago, Yisu Yemizi nogobek, kai puwekke Anotogo ni yaliya wazaniyagi. 11 Kapiya Walektikku pelik kai,

Yombanu piyegi ngizi kumulibok yeik ulak ngizi kumulagi ono, kai. e 
12 Pilik kai purik mabuwiliyegi kai yagenda, purik Anotogo kazing menalikmekke Yuda keya Yuda ono puwili mabuwili yaliya wazayi. Purik Anoto Yuda keya Yuda ono puwili mabuwiligi Yemizibek keya Anotogo yaliya wazayibene nguk mei puwili Anotogo yaliya wazayiweki keli keya pugu pangka yaliya wazayagi. 13 Purik Kapiya Walektikku pelik kai,

Yemizibokko yombanu piyegi pugu yaliya wazamibene nguk meibok yaliya wazamiyagi, kai. f 
14 Kapura tamizeige puwili piyegi ngizi kumuli ono mabura puwili piyegi nguk meiyagi langai ono. Keya tamizeige puwili ngago piyegi langai puragi kerewiya ono mabura puwili piyegi ngizi kumulagi langai ono, keya tamizeige ngago pura kozak yei ono mabura puwili kerewiyagi langai ono. 15 Keya tamizeige Anotogo ngagora orowei mizagi nawili wezayeli ono mabura ngagora kozak yeiyagi langai ono. Purik Kapiya Walektikku pelik kai,

Ngago wazonora orowei lewawili lewa purik wazono panurikku, kai. g 

16 Kapura Yuda mabuwili ngago wazono pura weiya logo ya puwiligiyengki wiya ono. Isaya Anotoyaga ngagoyeng weiya logo kozak kisa puwiliyaga nakko Kapiya Walektikke ngezebokko kapiya lende mizarikke Anotoyegi pugu pelik meiya,

Yemizibek, nakkorau ngago towagi puragi ngizi kumuli ono, meiya. h 
17 Togo yombanu nak ngagoragi ngizi kumulagi mabura were ngago puragi kerewiya logo. Keya yombanu nak ngago puragi kerewiyagi mabura nakko ngago wazono Kilisiyegi langai pura were kozak meiya logo.

18 Kapura ne Yudawiliyegi langai kumuli. Puwili ngago wazono Kilisiyegi langai puragirau kerewiya ma yeik miza purikki? Ei, puwili wameik ngago wazono Kilisiyegi langai puragi kerewiyawiligu, purik Kapiya Walektikku pelik kai,

Ngago wazonora oroweiwiligi kiliyengki ngabangamek yongkambanu ngabelakpekkewili mabuwiliyegi kuna logo ngago wazonora yongkambanu ngabelakpekkiwili mabuwili kerewiya, kai. i 
19 Ne ngereke mawinda kumuli. Yudawili ngago wazono puragi ngizi iwaka sa ma talik? Ei, puwili iwaka sa keya Mose ngezebokko puragi were kangkira mela yo mela,

Ne Anotogo ini Yudawiliyaga onowili ngago nogoragi kerewiyiwili izagi logo ini piliktikki keriya logo puwiliyegi yagolok mizagi. Ne Anotogo puwiliyegi wazono mizagi logo purikku mizagewiyege ini Yudawili yongkambanu inugu kangkayendau onowili kisi puwiliyegi sisik mizagi. j 
20 Keya kalike Isaya kozang sara wizimowei Yuda onowiliyegi langai pelik kaiya,

Ne, Anotoyegi welageya koya ono puwiligu neyegi keriya keya ne, Anotoyegi kisa onowiliyegi ne wiriya, kai. k 
21 Keya Yudawiliyegirik Isayago pelik kaiya,

Ne Anotogo puwili kiling melegulang miziweki keli wilibek, kapura puwili yongkambanu nagerewiyi mizi keya ngago wageliwei miziwili, kaiya. l 
Copyright information for `BIG