1 Corinthians 1

Qinée Pauroosa maa-pasána ákara rúmannimaqaidaqa Ánutufa narí íriranannai qiní maqásaa fasiqa dáaramáseenoo narí ásauku mundírana Yísufa niqiqoo fásiqausaki qiní quqáqoosa máridaqa maa-pasána ákara rúmannimaqaidaqa. Maasá qíkaqaafasaa Soosateeneesafa maa-pasánaki mifá faqa qinée faqa níanaindari ínni nímandaidaqa.

Ínnee Koorinti máqusai Ánutuna ufara suqímariasa ákara rúmannimaqaidaqa Ánutufa ínniara narí áiku ásauku máriaqeera útaaqamáqaisa máriafanoo, ínnee miná ásauku mundírana Yísunasaa atooqáanara Ánutunaindi kámmiqa máriafanoo, Ánutufa narí faiqi námu máriaqeera narí innai fuaqéera ínni náareenoo, sía ínnee kai mináindi máriafanoo, aiqáma máqanaa maasá karaambáiqa ásauku mundírana Yísuna áaree maríasa misá faqa ínnee faqa mináindi máriafanoo. Yísufa misá faqa maasá faqa karaambáiqa máridanoo.

Maasá qíkoofa Ánutufa faqa maasá karaambáiqa ásauku mundírafa Yísufa faqa miqandá káqi áfaarirana faqa naundurá asooárana faqa ínni Koorinti máqannaasa nímiani.

Pauroofa Roomma máqannaasara dúfi dúfi qídanoo.

Ánutufa ínnee miná ásauku mundírana Yísuna saqárikianara narí áfaarirana ínni níminoo. Ínnee Yísunaki márianara Ánutufa óosana óosana ámiqira ufa qírana faqa óosana óosana ámiqira irirana faqa mi-ainainaqandá moómoo nímunara qinée Pauroosa minára íriqa qeeqá Ánutunara ínniara maqee maqee dúfi dúfi qídaqa. Ínnee maasá karaambáiqa ásauku mundírana Yísunara innaarúnaindaraafa kooroo íranara áfeesimáriafanoo ásauku mundírana ámiqi ámiqirana aufakiana ínni naunduráki mapukúsee márinara Ánutufa moómoo narí dadaaqí narí dadaaqírana akoofásaikírana níminau. Ánutufa máa̱ máriaqooqari ámiqimmandee rakísinoo fífi ínaqa sía kasaaqaí kurídifaranoo taikára aukuana andeeqásee paqúrifaranoo. Miqúnara mi-karí maasá karaambáiqa ásauku mundírana Yísufa qúmira faasaana Ánutufa maasá niuqummásee moo áaqarana sía paqúriannoo.

Ánutufa ínniara narí ámaaku narí ásauku mundírana maasá karaambáiqa Yísuna faqa áqoondikiaqeera ínni náarée marífa márinara sía ínni níkaruqímasee kasaaqaí minínnisaannoo ínnee minásaa nifaaqa quqéemariafa máridanoo.

Pauroofa misáki raiqáranara áaqée maríafanoo fee qinau.

10 Qiní qíkaqaafasaa Koorinti máqannaa máriasa, maasá karaambáiqa ásauku mundírafa Yísufa ínni qímannimira saiká qímunara irisée ínni reendeenámandee kai qímannimidaqa, ínneeqa sía rainá rainída fúrufariaqee qímasee moodáa ufa qímasee moodáanaki máriaqa kúqaa uqanna moodáanaki máriasa máridaqa moodáa irirana faqa moodáannai fírana faqa máriaqa. 11 Moo ánaasee áuqu Karooeena námmarifa miná áiku ásauku ínnikina mandá ainaina, raiqára ainaina qáfamasee akooqóo qímaqimiafaqa íriqa.

12 Misá akooqóo qímaqimiafaqa dóo qinée akooqóo ínni qímannimianaura. Ínniki náadu náadu mooná ufa íriqa mooná ufa íriqa ufa moó qímariana qámbaanai raiqárafa áaqarafa máridanoo. Moó fannoo qinée Pauroona áiku ásauku márunausee qiafanoo moó fannoo qinée Apooroosana áiku ásauku márunausee qiafanoo moó fannoo Peetooroona áiku ásauku márunausee qiafanóo moó fannoo ásauku mundírana áiku ásauku máridee qímasaida miqíra raiqára ufa áaqarafa máridanoo. 13 Qinée Pauroosa minára maaqí qídaqa ásauku mundírafa narí apata aukú moodáa moodáa máqaisee máridee sía aukáakinoo márunara ínnee faqa sía rakéekaa iaqa. Qinée Pauroosée ínniara aunírira saqarisaa kúqi fee qiqíafana. Sía kúquafannanara sía qiní kíkiqusuaqa. Ínnee nammári máraqau qiní Pauroosa dúqusaa fee nammári mároosee máridee. Ásauku mundírana áuqusaa qímasee nammári mároonara miná áiku ásauku kai máriaqa.

14 Qinée sía ínnikina nammári moómoo rúmannimaqaqiafana minára Ánutunara dúfi dúfi qídaqa. 15 Qinée Kirisipusana faqa Kaiusana faqa nammári rúmannimaqaafannana. Dóo dáaqoo írifaqa Sateefanasana faqa narí áiku ásauku faqa ínamusá kai nammáriki keeqannimaqaqiafana. Akaqáusa faqee nammáriki keeqannimaqaafananee dóo maqee aunúsee sía íridaqa, minára sía moó fannoo qiníara áiku ásauku kámmambi nammári máreeunoo qifáranoo. 17 Ásauku mundírafa sía qiníara nammáriki keeqannimaqaannee qímasee diqiqéenoo ámiqira fasaasa ufa qímannimiannee qímasee qiní diqiqéenoo sía faiqí faiqi íriranamau qímannimiannee qínoofau qiní diqiqéenoofau. Qinée faiqí faiqi íriranamau qímannimiqa ásauku mundírafa auníriranasaa kúqu afeeka ufana uréeqanoo márina sía írifoora.

Ánutuna írirafa áadumamaumbidanoo, maqásaa fasiqa írirafa moomáu fídanoo.

18 Ásauku mundírafa aunírira saqarisaa kúqu ufana kurídiranaki fímariasa irisée fúrufarira ufa fée qídaqa. Maasá asumu máriranaki fímariasa sía miqí qídaqa mi-ufánara Ánutuna afeeka mi-ufánara kai mári ifoo qídaqa. 19 Óoqai tamummáqara fasiqauqa minára maaqí qímasee ákara ríqau.

Írirana faqaasa Ánutunara sía írimaria irirana qinée qeeqá Ánutusa kurídinnimaqaanaura. Aiqáma firaa irirana írimariasa aiqáma misá maa-maqánasaaqaraa írirana rukásaanauranoo.
Tamummáqarausa ufa óosana miqíminoo máridanoo.
20 Qinée Pauroosa minára kafáa maaqí qídaqa. Írirana faqaasa íriranara minára náqi fee qianáuree. Úriqarara sukuraki kéeqee maríasara náqi fee qianáuree. Maa-maqa maaqánasaaqaraa ufa akoofásauqa íriranara náqi fee qianáuree. Misára maaqí qianáura, dóo Ánutufa óoqai uqannífiaqoofa kooroo ínoo máridanoo qímaqiminoo. Maa-maqa maaqánakinaasa írirafa Ánutunara fúrufarirafa máridanoo.

21 Ánutufa narí firaa iriranaki máridanoo quándakinoo sía misá nári íriranannai qiníara íriaqee qímaseenoo faiqí áuqu quqánau. Miqóoqari maasára Yísuna áufakiana qímannimifaqa, misá minára fúrufarira ufa qímariafa, qímannimifaqa iriséeqa misá írirana minásaa rusímariasa asumu márirana Ánutufa nímianifee qinau. 22 Yuda máqannaasa faiqí sía amana áuqaaqaa íra ainaina uqaqífiqasainaqa aní ufara kúqaa fee qíraree qímariasa. Ánaamuru Kirisa máqannaasa firaa iriranakínaa irirana qímaqimifaqa kúqaa fee qianáuranoo. 23 Maasá sía mi-maqannaaqandá naanna ráidaqa, maasá ásauku mundírafa aunírira saqarisaa kúqunara minára kai qímannimiafaqa Yuda máqannaasa miná irisée áanoo qiafaqa ánaamuru irisée fúrufarira úfee qímariafanoo. 24 Ánutufa útaaqamánnimaqáisa mi-ufána iriséeqa Yuda máqannaasakiqari faqa ánaamurukiqari faqa mi-ufánara ásauku mundírana kúqirafa Ánutuna firaa irirana faqa miná úriqarara afeeka faqa máridanoo fee qídaqa.

25 Anée Ánutuna írirana iriséenana minára fúrufarammí ifoo qínanoo Ánutuna mi-iriráfa faiqí írirana úrinaaqaranoo máridanoo. Anée Ánutuna moo áinainara sía afeeka ainainámmíifoo qínanoo Ánutuna mi-sia afeeka ainaináfa faiqí afeeka úrinaaqáranoo máridanoo.

26 Óo Koorinti máqannaasa, maanára náaqooki íriaqa ínni Ánutufa náaroo áukuanna Yísuna saqáriku aukuanafa ínnee mi-karí írirana faqaasa moómoosee máriqee iqau. Faiqí faiqi írirana faqáasa sía moómoo ínniki máriqau. Faiqí faiqi afeeka faqáasa sía moómoo ínniki máriqau, sía faiqí úriqararausa moómoo ínniki máriqau. 27 Ánutufa faiqí faiqi írirana faqaasa nisauríranaki quqáannee qímasee misákiaqa fúrufari maríasee qímariasa Ánutufa mi-furufarira fasiqa anaaseesára faqa nári írirana faqa qumáreenoo minára qiní ámiqira irirana faqaasee qídanoo. Ánutufa maqásaaqaraa afeeka faqaasa nisaurúaqee qímasee faiqí faiqi akaqáusara sía afeekee qímariasa Ánutufa mi-sia afeeka fasiqa anaaseesá faqa nári írirana námufaqa qumáreenoo minára qiní afeeka faqáasee qinau. 28 Ánutufa faiqí faiqi úriqarara fasiqa anaasee fee qímariasa kurídianifeera misá níkooqee maría fasiqa anaaseesee qímariasa faqa misá fídiaqaa ímaria fasiqa anaaseesee qímariasa faqa nári írirana námufaqa misákinaana naríara rusandeesámumasee qumáreenoo úriqarara ainainee qídanoo. 29 Miqúnara sía faiqí moó fannoo Ánutuna óorisaa narí írirana amooqíannoo.

30 Ánutufa ínni maréeqeenoo ásauku mundírana Yísunasaa atooqáseenoo ásauku mundírana qumáreenoo maasá íriranee qímaseenoo maasá maréeqeenoo narí andeeqáranaki qíseenoo narí áiku ásauku uqannáikammaqimaqeenoo maasá mandá áinainakinaana idukúqisoofaqa márunnanara maasá tamummáqara fasiqa ufamáu kai fuannánara minára maaqí qímasee mifá ákararinau.

Faiqí moó fannoo nána ainainaree moo áinaina amooqianáuree qímasee sía narí amooqírana uqéeraani karaambáiqara kai amooqíani.
Copyright information for `BJR