1 Corinthians 11

Amaana máqaki kéeqee maru anaaseesá níkiaqa rumbárausa kéeqee maría ufana.

Qinée ásauku mundírana Yísuna aanna ráidaqa ínnee miqíkai íqa qiní daanna raaqa.

Óo Koorinti máqannaasa ínnee qiníara maqee maqee irisée Yísuna ufa írimariasa sándufa qinée qímamiafanna ufamau fímarianara ínni nimooqídaqa. Qinée maa-moodaa ainainnára kai ínniara íriaqeera qímannimidaqa, aiqáma fasiqa nári nínaaqmaaka úrinaaqararausa máridaqa kafáa ásauku mundírafa aiqáma fasiqa úrinaaqararafa máridanoo. Ánutufa ásauku mundírana úraaqararafa máridanoo.

(Pauroofa narí máqannaa ánaasee óosanara qímaqoofa sía maasáki máridanoo. Ánaaseeuqa náriqa andeeqára óosana marasée narí nifaaqmaaká nímeemaanai óorudupi mámbunara kooroo íanifeera qamunnannai níkiaqa rumbárausa amaana máqaki kéeqee maríqau. Sía níkiaqa rumbásaidaqa kéeqee marusa nisaurírana mara nímimariqau. Úmmuari mari anaaseena paqúrimasee asaurírana máraanifee qímasaida ákiqa maqá namufaqa indufú áqimariqau.)

Qinée Pauroosa faiqí narí ánaaqa úraaqararanara irisée maaqí qídaqa. Faiqí moó fannoo ákiqa rumbárafa amaana máqaki kéeqafi aiqámausa nífusaa innaaru qína fee Ánutuna ufa qímannimina fee ásauku mundírana asaurírana ámiannoo.

Ánaasee moó fannoo amaana máqaki kéeqafi Ánutuna ufa qímannimiannoo fee innaaru qíannoo fee ákiaqa sía rumbárafa mi-anaaseefá narí afaaqi asaurírana ámidanoo úmmuari mari anaaseena amanakái máridanoo, ákiaqa maqá faqa indufíra anaasee amana amana kái máridaqa. Sáina ákiaqa qamunnannóo rumbásee amaana máqaki kéeqafinoo innaaru qíannoo fee Ánutuna ufafée qímannimiannoo fee, andeeqánoo máriani. Ánaasee moó fannoo sía ákiaqa rumbárafa amaana máqaki kéeqaina sée múnusee ákiaqa maqá faqa indufú áqusaa. Ánaasee ákiaqa maqá faqa indufírafa asaurínoo ákiaqa qamunannái rumbárafa amaana máqaki sía asaurírainni káqi kéeqaannoo. (-) Indaarú Ánutufa sía ánaaseesaa qaraana faiqí áuqinau, faiqísaaqaraana ánaasee áuqinau. Ánutufa sía ánaasee dadaaqíanifee qímasee faiqí áuqinau, faiqíara iriséenoo ánaasee áuqinau.

(v 7) Faiqí Ánutuna amana faqa Ánutuna aréenarafa faqa minakí márifa márinara sía ákiqa rumbárafa amaana máqaki kéeqaannoo. Ánaasee faiqí aréenarafa minakí márifa márinara ákiqa rumbárafa máriani.
10 Qangiroorá maasá qíqafaidammiaafoo qímasee nári nifaaqmaaká uréeqarausa márianara koorooíanifeera níkiaqa rumbára ánaasee amaana máqaki kéeqaaqa. 11 Maasá karaambáiqa ufamáu fídaqa maa-iriráfa kai máriani, ánaasee naríaraa áadumai márianinafa fífau máriani, faiqí miqíkai másee áadumai márianinafa fífau máriani.

12 Indaarú ánaasee faiqísaaqari kambíqanau miqíkai ínoo miqóoqari faiqí fannoo ánaaseekiqari kai kambíqaidanoo dóo mi-aiqama ainainaqandá Ánutunakiqarí kai kambíqanoo máridanoo. Faiqí fannoo ákiqa asausí kísaaqa márinaqa faiqí ánaasee narí kai naríara naríara irisée mandáinainee qímasee nisaurífaranoo. Ánaasee kísaaqa ákiaqa asausífaqaanara sía miqídaqa ámiqiranee qídaqa mi-anaaseefá minára firaaqóo nasurídanoo. Ánutufa ánaasee kísaaqa ákiaqa asausí ínni níkiaqa paranná rafáaqafuanifeera níminau. Ínneeqá kai íriaqa, ánaasee sia ákiaqa rumbara anaasee fannoo aiqámausa nífusaa amaana máqaki innaaru qírafa andeeqáidanoo fee sía fee andeeqáidanoo. Sía andeeqáidanoo. Ínnee minára írimariáfanoo.

16 Faiqí moó fannoo yáfee ufa raináani qímasainaqa maa-ufána kai qímamíanaura, maasá maaqóoqaraasa faqa Ánutuna ufara maqúsa maqusa suqímariasa faqa mi-ufamaú kai fídaqa sía moo óosana máraidaqa.

Karaambáiqa áafaqa néemaria naamúaqirafa.

17 Ínnee Koorinti máqusanaasa Ánutuna ufara suqídaqa sía ámiqimmandee suqímaríafanoo mandáinaina kai kambíqaidanoo, minára maa-ufána sía nimooqídafau qímannimidaqau. 18 Ínnee Ánutuna ufara suqídaqa rainá rainídaqa áanooqimariafaqa qímaqimiafaqa qinée íriqa akaqánara kúqaa fee qídaqa.[ 19 Áaqarausa faqa andeeqárausa faqa moodáanaki márifanoo kúqaa rainárafa kambíqaannoo. Miqímasainanoo áaqee maríasa faqa andeeqárausa faqa kooroo ifáranoo.]

(Pauroona ákara rúmannimu áukuana Yísuna ufa írimarusa sía maqee maasá ímarunandee áafaqa néemariqau, misá nári aináinirana taikásee eendáki áafaqa náraree qímasee nári nárana deedaqammámaree mara máree moodáa maqaki míni quqásee qoomáqa sakasée námasee ínaaqianna féemu marasée ruqí ruqí másee uáinna nammari misá maqee maqee néemaru nammarína námufaqa innaaru qímasee námasee fífainí maríqau. Faiqí ánaasee óosana óosana suqíqau. Aináina faqaasa faqa kudi fasiqa faqa óosana óosana aináini maríasa faqa náriqa aináinirana taikásee eendáki anirée moodáanaki suqíqau. Akaqáusa fúrufara máseeqa nárana moómoo námataikasoonara nínnaaqiana ánusa náararanau. Akaqáusa uáinna nammari moómoo néeneesee sipákiqa fúrufariqau, Pauroofa minára iriséenoo maaqí qímasee ákara rúmannimaqanau.)

20 Ínnee Koorinti máqannaasa Karaambáiqa qoomáqa suqúfi naani qímasee ínnee sía kúqaa suqúfi miná náraree qímaseefau ániafanóofau fúrufaridaqa náidaqa moosáindi faqa néemariafanoo. 21 Akaqáusa nári máree ánia naranna sía náida nímidaqa náriqá kai naafaqa akaqáusa náarara máridaqa, akaqáusa uáinna nammari moómoo náida fúrufarida. Miqíafanoo mi-qoomaqáfa sía karaambáiqaindi máridanoo. 22 Ínnee máaqa síaisee maqee maqee néemaría narana nammarína sía minakí náidee, ínnee Ánutuna ufara suqímariasa fídiaqaamma nímaqaidee miqídee, ínnee nára ainaina síaisa nisaurírana nímianee fee qídee miqídee. Ínnee minára irisée qiníara nána úfee qímaqimiannoo fee qídee. Ábee nimoofée qianáuree. Óo sía uqanna nimooqianáura.

23 Óoqai qinée karaambáiqa ufa irisée qímannimiafanna sándufana maqee faqa kafáa qímannimianaura, karaambáiqa Yísufa Yudasifa ueeqóo eendanaki féemu ásaukunnai qumáreenoo Ánutunara dúfi dúfi qímaseenoo, ruqí ruqí máseenoo maaqí qímasee narí faiqi námu qímanniminau. Maa-feemúfa qiní qimaqí kíkiqa úsinoo máridanoo ínnimma kúqiranaki quqánnimaqaanaura. Qinée kúquannanara aunífoora óonumafi íridaqa féemu maqee maqee naqáfuaqa.

25 Misá mi-feemúna námaseeqa kaifáa miqóo nárana námasoofanoo Yísufa uáinna maru kaafana náriqa maqee maqee néemaru nammarína qumáreenoo maaqí qímasee qímanniminau. Maa-kaafánaki mári uainna qiní fidíka kíkuqusinoo máridanoo. Ánutufa maqásaa fasiqa anaaseera qiní faqa moodáanaki kíra ufa márifanoo qiní fidíka fannoo mi-ufána mapukíra fidíka máridanoo. Ínnee miná naqá fídaqa qiníara irisáidaqa naqá fuaqa. Yísuna ufa miqíminoo márifaqa qinée Pauroosa minára maaqí qianáura. 26 Máa̱ maqee kámuqoo Karaambáiqa sía kafáa qúmi marí kamuqoo ínnee miná yákamuqoo fee maa-feemúna faqa maa-uainnána faqa naqá fídaqa ínnee Karaambáiqa kúqiranara kooroo ídaqa.

27 Qinée minára irisée maaqí qídaqa faiqí moó fannoo miná óosana fúrufarira fasiqa fannoo Karaambáiqa féemu fee miná káafakinaa uainna fee fúrufara mándee námaseenoo karaambáiqa amaqí faqa fidíka faqa mara máree fúrufara mámaqaidanoo náannoo. 28 Aiqáma fasiqa anaasee náriqá kai nári naundurá márirana írirana aiquqummásee óonumafi írirana íriséeqa féemu faqa káafakinaa uainna faqa naaqa. 29 Karaambáiqa afaaqa óosana sía írimarifa káqi fífau feemu faqa uáinna faqa néemarífa Ánutufa áruaninna ufana narí náidanoo narí afaaqaí máfi quqáidanoo. 30 Ínnee Koorinti máqannaasa miqíanara moómoosa aurímariafanoo kudoosaápee máriafanoo akaqáusa dóo kúqiqa máridaqa. 31 Maasá indaarú qeeqá daundura márirana qímanammándee andeeqásee náananoofau sía Ánutuna dárira ufa ámeemaanai márunaiqini. 32 Maa-maqánasaaqaraasa Yísuna ufa sía írimariasa kurídiranaki fídaqa maasá misá faqa fuanóora maqee kámuqoo karaambáiqa niuqummásee náridanoo.

33 Qiní qíkaqaafasaauqa maa-ufána iriséeqa karaambáiqa qoomáqa naani qímaseeqa qínaaqiana áninausara nífeesamásai faqa aniráifaqa dóo moodáa kari óonuree naaqa. 34 Moó fannoo áararáinafa aneenná máaqaki óonu námasee ánia. Miqímandee moodáanaki kéeqafifanoo Ánutuna nárira ufa fannoo sía ínnisaa máriani. Dóo qína kai qímannimiqa qinee ínnee iannái fíqa akaqá ufa qímaqimuna andeeqáanaura.

Copyright information for `BJR