1 Corinthians 5

Yísuna ufara suqímarunakina mandóosana kambíqanau.

Óo Koorinti máqannaa Yísuna ufara suqímariasa ínni ufa moo íriqa firaa manda oosana ínniki márifa aamína maqannaasa firaaqóo mandóosana máree maríasa faqa sía máree maría óosana máreenoo ínniki Yísuna ufa írimariasaki moó fannoo narí ánoona aqoónnana narí ákoona ánaaqa máreenoo. Mi-ainaináfa ínniki márifaqa náqi fee mándee nóori uqéerasee ínneeqa nifaaqa amooqídee minára ínnee nisaurúaqa, ínni naunduráki soofaaraíkinoo máriani, mi-fasiqána ínneeqákinaana náqiraree káqi máridanoo, ínnee suqímarianakiqari mi-fasiqána aqiqaaqa. Qinée qeeqára qianáura kúqaa qinée moosáa níanai márida qiní maraquna ínni faqa máridanoo miqóo márifaqa karaambáiqa Yísuna áuqusaa dóo mandóosana márai fasiqana aqiqára ufa qíqa qinée ínni faqa máridaqara foora dóo aqiqára ufa qíqa.

Ínnee moodáanaki suqímarifanoo qiní maraquna faqa ínni sáimbaqa suqúannoo, Karaambáiqa Yísuna afeeka miqóo maasá faqa márinaqa ínnee mi-manda fasiqána maréeqee ínni suqíranakiqari aqiqáifanoo mi-aiqaránannai Sadannana ámifanoo miná apata kurídinanoo karaambáiqa qúminna faasaana miná aundurákinaana kai asumu máraannoo.

Óo Koorinti máqusanaasa ínnee ínneeqara káaqa andeeqárausee qímasaida ínni nóori uqéerara óosana sía andeeqánoo máridanoo. Ínnee maa-ooqeenaa ufána íridaqa maaqímminoo máridanoo. Nárana moodáa qoo suqú quqásainanoo káqikaafa moodáa putaa ínanoo aiqámafa minásaaqaraana putaa íannoo. Ínneeqákinaana mi-manda fasiqána maráqusaifanoo aiqáma andeeqánoo máriani. Miqóo ínnee ámiqira naranara foora máriaqa. Mi-manda fasiqána aqiqáranara qídaqa óoqai Mooseena áukuana áinnaaqarara qóomaqa máruna kíkiqususee sipsípa ánaaqi Ánutuna suqá ámisée náriqa ooruku fooqáa íra ainaina náriqa máaqakinaana aiqáma dóo maráquseeqa áinnaaqarara qoomáqa sakasée néemariqau. Dóo maqee mária áukuana ásauku mundírana aunírira saqarisaa sipsípa ánaaqiara foora dóo kuqá arusée Ánutuna amisaafanoo dóo maasá mandóosana taikáqiseenoo maasá márirana faqa andeeqá qiseenoo maasá putaaíra óosana taikáqisáifanoo áidaaqareenoo minára maasá áidaaqarara qoomáqa deedaqinóo márifoo qídaqa.

(Isaraee máqannaasa óoqai áinnaaqarara qóomaki ooruku síai feemu kai néemariqau. Maasá ooruku moó maqee máridanoo misáindi moó marinau.)

Dóo maqee maasá áinnaaqarara qóomaqara foora suqúfi naannána suqúfi ooruku síai feemuara foora naanáura. Náranaki mári oorukufa mandá óosanara faqa faiqí ánaasee narí úmmuari narí úmmuari ímariana faqa kíkiqusidanoo. Ooruku síai feemu kíkiqusimariafa Yísuna ufamáu fídaqa nisakadikí ikairí sía márirana faqa ánoona ufa qímariana faqa minára qídanoo. Maasá putaaíra óosana taikáqisoofaqa maqee ámiqira naranara foora putaaíra óosana faqa áaqara oosana faqa taikásee nisakadikí ikairí síaisa ánoona ufa qímariasa naanna rámafi márianaura.

Qinée Pauroosa óoqai ínni Koorinti máqannaasa Yísuna ufara suqímarusa pása ákara rúmannimaqaafannana. Mi-pasánaki ínniara faiqí ánaasee narí úmmuari narí úmmuari maríasa faqa sía áqoondikamannimaqararee qímasee misára eeráiriaqee qímasee ákara rúmannimaqaqiafana. 10 Ínnee akaqáusa qiní mi-ufána irisée áaqaafanoo maqee qinée qíafannufana kafáa kooroo ianáura. Ínnee Koorinti máqusanaasaki sía Yísuna ufa írimariasa kai máridaqa aamínauqaindi faqa moómoosa máridaqa. Qinée sía ínniara aamína fasiqa anaasee narí úmmuari narí úmmuariqa nímaria fasiqa anaaseeuqa faqa káaqa aináinara rímaria fasiqa anaaseesa faqa únna ufa qímasaida úmmuari maría fasiqa anaaseeuqa faqa túmunnai áuqi maría afaannára innaaru qímaria fasiqanaaseeuqa faqa sía mi-aiqama ainainná máree maríasara eeráiriaqee qíqa, ínnee eeráiriani qínnana moómoosa maa-maqa maaqánasaa márianara fásauki fee quqoonasáa fee óoru atooqáfi foora. 11 Sía qinée miqí qiqíafana maaqí qiqíafana. Ínniki moó fannoo naríara Yísuna ufa írimarinafa ínni níkaqaafasaa máridee qínafa faiqí ánaasee úmmuari marí fee káaqa aináinara rímari fee túmunnai áuqira afaannara innaaru qímari fee mandúfa qídanoo faiqí ánaasee níqi marí fee nammári námasee fúrufari marí fee únna qímasaida úmmuari marí fee miqíra fasiqa ánaaseera Yísuna ufa íri márianaki mária fasiqa anaaseesára eeráiridaqa misá faqa sía óoqu marifi nárana naaqa, misásaaqaraafa ínnisaa áqufuandoora.

12 Yísuna ufa sía írimariasa áqoosai máriasa sía nárira ufa qinée nímmianaura mi-saikáfa sía qiní saika máridanoo. Ánutufa kai misá nárira ufa nímiannoo. Ínneeqá kai ínneeqa níkaqaafasaa kímariana Yísuna ufara suqímariasa áaqaifaqa ufa nímirafa ínnindi máriannoo. Óoqai tamummáqara fasiqa moó fannoo minára maaqí qímasee ákara rínau.

Ínniqa suqíranakiqari mandóosana máree marína áaduma mara quqáaqee
qufaqa qinée Pauroosa minára ínniki mandóosana máree mari fasiqana aqiqaaqée qídaqa.

Copyright information for `BJR