1 Corinthians 8

Únna túmunnai áuqira afaannara dúfi dúfi qímasee nárana aandáu̱ra qídanoo.

Ínnee Koorinti máqusanaa Yísuna ufara suqímariasa únnaqira afaanna náranara iraafaqa ínni minára qímannimianaura.

(Ínni máqannaasa Yísuna ufa sía írimariasa misá túmunnai áuqira afaanna amaana maqaki aandáu̱ arusée suqásee únnaqira afaanna amaana máqaki qoomáqa náida túmunnai áuqira afaannara dúfi dúfi qímasee anímma ámidaqee qímasee nári néemariafaqa ínnee akaqáusa misá dadaaqídaqa mi-oosannára qiní irée maríafanoo. Ínnee Yísuna ufa írimariasa akaqáusaki náriara maasá áaqaidaqa miqíra aandau náida fee qímariafanoo, mi-aandaufá maasá daundurákinaana kurídiandoo qímasaidaqa qímiridaqa náida fee qímariafanoo. Akaqáusa náriara maasá írirana faqaasa nóori uqéerasee fífau túmunnai áuqira afaanna márifaqa káqi naanáuree qímariafanoo.)

Qinée Pauroosa minára kúqaa fee qídaqa moo írirana minásaa ookáaidaqa maaqí qídaqa. Miqíra írirafa narí áidirafa narí aundurái umbiqáfinara óori uqéeraidanoo nasurídanoo narí kai narí kurídidanoo. Moo írirafa ámiqirafa maaqí qídanoo. Faiqí naríara naríara ámuqusira írirafa mi-iriráfa sía kurídidanoo faiqí ánaasee nifeeqáreenoo poodúqaifanoo ánoonaikidanoo.
Moó fannoo naríara aiqáma ainainara írimarunausee qímarifa sía ánoonaikira irirana írimarifanoo Ánutufa mi-iriranára ákooqaidanoo. Faiqí ánaasee moó fannoo Ánutunara áidimárifanoo Ánutufa ámiqimmandee misára íridanoo áididanoo.

Yísuna ufa sía írimariasa túmunnai áuqira afaannara innaaru qímasee aandáu̱ nárana néemariafaqa ínnee Yísuna ufa írimariasa mi-naranná naanára iraafaqa qinée Pauroosa minára maaqí qídaqa. Túmunnai áuqira afaanna óosana ínnisaimbaqa íridaqa mifá sía mári ainainna kíkiqusirafa máridanoo fífau ainaina kai máridanoo. Maasá moodáa Ánutufa márinara minára kai ámiqimmandee íridaqa. Maa-maqa maaqánaki faqa innaarúnai faqa moómoo óosana óosana áfaannee qímariafa máridanoo. Mi-afaanáusa misá úriqararausa faqa Karaambáiqauqa faqa únna qímasee máridammiafoo qídaqa.

Sía maasá misáuqara íridaqa maasá Yísuna ufa írimariasa Ánutufa aiqámausa níkoofa moodáa kai márifaqee qídaqa, aiqáma ainaina áuqu quqóo fee qídaqa maasá mi-Anutúna aináinammaisaranara máridaqa. Sía moo káraambáiqa máridanoo maasá karaambáiqa, ásauku mundírafa Yísufa mifá kai márifaqee qídaqa. Minánnai Ánutufa sía máru ainainanna aiqáma ainaina áuquqoofa máridanoo, maasá minásaaqaraa máriranasaa máridaqa. Minára maasá aiqáma nárana amaná naanáura. Káqi nárana faqa fífau afaanna aandáu̱ faqa aiqámaqara námasee miná néemariafa sía áaqarafa máridanoo. Moo áinaina áaqarafa maaqímminoo máridanoo. Aiqáma Yísuna ufa írimariasa sía máa̱ qúnnanara íridaqa. Akaqáusa óoqaindari sía Yísunara íru aukuanaindari mi-fifau afaanna amaana maqánaki maqee maqee kéeqafiqa nárana námasee mi-narannára mi-afaannánaindi fee qímariqau, kafáa maqee faqa Yísuna ufa íridaqa sía áfaannara innaaru qídaqa káqi kéeqafi námasaidaqa únna qímasaida afaanna márifaqee qímasaidaqa káqi mi-narannára Ánutuna namuqáandi fee qímasee bóo Ánutuna namuqáa áqoondikidaqa áaqaidee qímasaidaqa nári maraquna nári náakirafa ummaara nímifaqa maasá daunduráki putaaírana qímifaqee qídaqa. Qinée Pauroosa minára maaqí qídaqa. Sía fífau nárana fannoo maasá maréeqee Ánutuna áqoondikiannoo. Maasá sía néeqa sía Ánutuna óorudupianaura káqi néeqa sía óoraaqaráanaura. Nárana fífau ainaina máridanoo maasá íridaqa.

Ínnee afaanna amaana máqakinaa náranara mána mána ímariasa minára eeráiriaqa. Mi-narannára akaqáusa rufíee maríasa írirana óorudupimariasa aní mána mána íranasaaqari arufarindámaki mandáinainaki áqufifaara. 10 Anée írirana afeeka faqáafa túmunnai áuqira afaanna amaana máqaki kéeqafi mána mána mándee nárana náinanoo aní ákaqaafasaa moó fannoo írirana amannaikímarífa fúkasaa Yísuna ufa írimarifa ani qáfamaseenoo áfaanna amaana maqaki kéeqafi nárana náinanoo miná aundurákinaana akamúmmasainanoo mi-fifau afaanná finnai kaifáa minní ubeekéenoo áqoondikiandoora. 11 Óorudupimasee íri mari fasiqafa áfaanna náranara rufíee mari fasiqafa máridanoo. Mi-fasiqáfa áfaanna nárana mána mána mámaree néemaria fasiqausa óosana qáfamaseenoo narí faqa námaseenoo minásaa arufarindámaki kurídiranaki áqufidanoo. Fífau kurídiranaki áqufuannoo ásauku mundírafa minára faqa kúqufammi.

12 Ínnee mána mána írirana faqaasa ínneeqa níkaqaafasaa óorudupira írirana árimariafanoo, miqí márianannai ínneeqa níkaqaafasaa mandáikamánnimaqaidaqa, miqíanannai ásauku mundírana faqa mandáikammamaqée maríafanoo. 13 Qinée Pauroosa minára maaqí qídaqa qinée áfaannara dúfi dúfi qíra nárana aandáu̱ námasaananoo qiní qíkaqaafasaa qiní qíqafeenoo minásaaqaraana mandáinainaki áqufinaqa qinée náaru náaru sía uqanna áfaanna aandau naanáura qiní qíkaqaafasaa sía áqufuanifee qímasee sía naanáura.

Copyright information for `BJR