1 Corinthians 9

Pauroofa narí kadáapisaaqaraa nárana kai néemarínau.

Qinée Pauroosa kúqaa Yísufa diqiqoo fásiqausa máridaqa kúqaa qinée Yísuna maasá karaambáiqa qáfaafanausa máridaqa qinée sía mooná karabúsaki máridaqa qinée qeeqá íriranannoo maa-saikána máraidaqa. Qinée Karaambáiqa saiká ínniki máraafannana miná ánoona ínnee Yísuna ufa uqéeraafanoo. Akaqáusa qiní Pauroosara sía Yísufa aqiqoo fásiqafee qímariafaqa ínnee Koorinti máqusanaasa sía qiníara miqí qímariafanoo. Ínnee Karaambáiqa ufa irisée mi-maú fímariafanoo mifá kai Yísufa qiní diqiqoonára koorooídanoo.

Faiqí ánaasee akaqáusa qiní saikóosanara díqiafaqa maaqí qímasee qeeqásaa ititáidaqa misá qímannimidaqa. Qinée Yísuna ufa maqúsa maqusa óonuree anirée ídaqa Yísunara qímannimimarunnana ákiaqara mi-maqannáasa nárana nammári káqi qímifanoofau andeeqárafa máriqini.

Yísuna niqiqoo fásiqausa Yísuna ákaqaafasaauqa faqa Peetooroona faqa nári nínaaqmaaka Yísuna ufa írimaria anaaseeuqa níndiamaree misá faqa maqúsa maqusa nídaqa. Yísuna ufa qímannimiafaqa néeqa káqi nárana nímiafaqa náidaqa. Qiní Pauroosa miqífau andeeqáraqóo márini, sía miqídaqa Baranabasisandíri maaqandá kai fee aináinammásaida náidee. Maaqandá qeeqá aináinammásaida feefaurú marasáidaqa náidaqa Yísuna ufa qímannimiqanidaqa. Sundía moó fannoo fee ammí fee rákiranaki fídaqa aináinámandaida náidee sía fee. Sía uqanna miqídaqa. Uáinna qaqamma úmmaqimari fasiqafa narí náaree díqisee námaseenoo ínaaqianna moosá nímidanoo. Sipsípasaa rakísimarifa narí kadáapiriranasaa miná náamma anoona náidanoo. Dóo qinée faqa maqúsa maqusa nídaqa Yísunara qímannimimarunnana nárana nammári káqi qímifanoofau qeeqá kadáapi ákiaqara nani, sía miqídaqa.

Sía qinée faiqí faiqi ufamáu kai fídaqa Yísuna ufa qímannimimarunnana ákiaqara nárana nárara qímannimidaqa. Mooseena sándufa miqínoo márifaqa qídaqa. Mifá maaqí qímasee ákara rínoo máridanoo.

Ínneeqa sakuma maqúsasaa téeqimasee burimakáu maréeqee miqóo quqásaifanoo burimakáu fannoo óonuree anirée ídanoo áikunnai rafárimarínaqa sía miná óori arooríaqa, sía miná óori rumbáaqa, sáifanoo akaqána náidanoo rafáriani.
Qinée Pauroosa minára maaqí qídaqa. Ánutufa burimakáura kái fee íridanoo fee miqí qinau, maasára faqee miqí qinau.
10 Óo sía misárau miqí qinau, maasára írinoo miqí qinau. Úmmaqimarífa faqa aiqí marífa faqa minakínaana náraree qídanoo aináinidanoo. 11 Baranabasisandíri ínni Koorinti máqusanaasa naunduráki innaarúnaindaraa asumu úmmaqusaafananoo kambíqaidanoo. Sía fee maqee mi-kadaapirirána ákiaqara maqásaa nárana káqi qímifaqee naanáuree. 12 Akaqáusa ínniki káqikaaqóo kadáapiri maruna ákiaqara káqi nárana nímiafaqa náidaqa, maasá fíqaramásee ínniki kadáapiri márunnana ákiaqara ínni nárana marasée náunaiqini sía káqi marasée náidaqa. Ánutufa amanámmifoo qifaqa maasá sía miqídaqa. Ásauku mundírana Yísuna ámiqira fasaasa ufa ínni naundurái sía kéeqaandoo qímasee dáara rárana faqa kadáapirirana faqa óosana óosana saiká áuqee marúnnanara faqa qímannimiqiafana.

13 Ánutuna firaa amaana maqa Yeerusaree máqusa márinaki aináini maríasa misá minakínaana náriqa nárana máraidaqa. Faiqí ánaasee sipsípa arusée aandáu̱ tatúfu Ánutuna amaana máqaki ámimaríana minakí aináinimáriasa aanáiqiki maríasa náriara akaqána marasée náidaqa ínnee minára ámiqimasee írimariafanoo. 14 Karaambáiqa Yísufa miqí kai másee narí ufa qímannimi maríasara qímannimiqa fídaqa misákinaana nárana marasée naaqée qinau.

15 Mi-andeeqara oosanáfa márifaqa qinée sía miqíqa maa-pasána ákara rúnnana ínnee nárana sía káqi qímiaqee qídaqa ákara rúmannimaqaidaqa. Akaqáusa qiní maa-ufánara fífau dapi ufámmifoo qifoora sía ínni nárana marasée káqi naanáura kúqiranaki fuanáura, qeeqá kadáapinnoo feefaurírafa amaná. Miqí márifaqa Ánutuna ufamau fíqaramásee fúnnanara qeeqá qimooqídaqa. Sía moó fannoo mi-ainainníannanara qimooqírana áruannoo. Aináinamaseeqa feefaurúmasee naanáura.

16 Kúqaa qinée Pauroosa Yísuna ámiqira fasaasa ufa óonuree anirée ídaqa qímannimi marúnausa máridaqa, sía miqíannanara qeeqá qimooqídaqa qeeqá dúqu uqéeraanaura. Yísufa qímaqimunara miqídaqa. Sía miqíanaqau mandáinaina qámbaanai máriaqini. 17 Qinée qeeqá kai qímannimira saiká máreefau feefaurúara qúnaiqini. Ánutufa daakápainara aináinidaqa miná ákiaqara sía feefaurúara innaaru qídaqa qímira saiká márifaqa káqi máraidaqa. 18 Qeeqá saiká ákiaqara nána feefauru fee máraidee, Ánutufa amaná kadáapi ákiaqara nárana marasée náannee qifaqa qinée sía miqídaqa ámiqira fasaasa ufa sía feefaurúara irisée káqi dídifaqa qímannimúnafa mifá qiní feefaurírafa máridanoo. Káqi qímamidaqa qeeqá andeeqára kadáapirirana ákiaqara sía máraida káqi qímannimira asasirafa mifá qiní ámiqira feefauru máridanoo.

19 Qinée sía moo fásiqa aináini marúnausara foora máridaqa káqi fasiqara foora máridaqa Yísufinnai moómoosa ániaqeera aiqámausa aináinira faiqi kámmambi máridaqa. 20 Qinée Yuda máqannaasaki Mooseena sándufa ámeemaanai máriasaki aináinidaqa misá naanna rámafi misá márirana máraidaqa. Qinée sía Mooseena sándufa ámeemaanai máridaqa, misá sándufa ámeemaanai máriasa moómoosa Yísuna ufara ániaqeera qinée faqa miná ámeemaanai máridara foora náaraidaqa.

21 Miqí kai íqa ánaamuruki aináinidaqa ánaamuru moómoosa Yísuna ufara ániaqeera ánaamuará foora Yuda máqannaasa sándufara níanasaa tatíaqa máridaqa qímannimidaqa. Miqúnnanannai sía Ánutuna sándufa rukíaida miqídaqa. Qinée ásauku mundírana sándufa ameemaanai qinée kúqaa máridaqa. 22 Qinée Yísuna ufara sía andeeqásee saqáriki máriasaki aináinidaqa misá faqa moómoosa ániaqee qímasee misá naanna rámafi máridaqa. Qinée óosana óosana qaini qáini qíranannai faiqí ánaasee máraanee qímasee aiqáma fasiqa anaasee naanna rámafiqa misá náaraidaqa.

23 Qinée maa-ainainníranaki máridaqa moómoo óosana óosana ummaara káqi máraidaqa qinée faqa ínnee faqa mi-amiqira fasaasa ufánasaaqaraa naundurákina adíafaairana máraannanara miqídaqa. 24 Ínni maqúsai Koorinti máqusai faiqí moómoosa suqúfiqa narí ámani narí ámani sandéemariana maqee maqee kambíqee márifaqa qáfeemariafanoo. Sandée maríasaki moómoo sandáidaqa moodáa fannoo kai úrinaaqareenoo qafee máraidanoo. Ínnee faqa misá naanna rámasee Yísuna aatáta sandée fídaqa úriqarara qafee márararee qímasee sandáaqa.

25 Aiqáma sandée maría fasiqausa óoqaindari amanídaqa káqiqóo afeekaikámandee máriiqa sandára aukuana aniráinaqa káqi sandéefaranoo. Misá sía mi-kadaapiriránara íridaqa, úriqarara qáfeeroo kai qímasaida káqiqóo afeekaikámasee nimanída sandáidaqa. Misá dauní afauqáqee marí qafeenara kísaaqasaa kadáapiridaqa. Maasá misá naanna rámasee kísaaqasaa kadáapiridaqa, sía afauqáqee mari qafeenáranoofau ídau miqídau, náaru náaru márira qáfeeroo qídaqa kadáapiridaqa andeeqáidaqa. 26 Minára iriséeqa sandéeqa taikée ániaqoo andeeqásee fídaqa. Qinée bookséena akoofása fasiqara foora sía fífau fáafau qísauku áqidaqa andeeqásee kai qísauku áqiara foora ídaqa. 27 Qeeqá qifaaqa qiní ufa ámiqimmandee íriaqeera firaaqóo qeeqá qifaaqa dáriara foora ídaqa, qeeqá qimudaani fáasasaa afeekaikídaqa. Qinée aiqámausa náaramásee anirée bookséenara foora amaniaqée qímaseeqa qeeqá faqa amanianée qímasee óorudupiananoo Ánutufa mandá saikammiaanoo qímasee diqiqáandoo qímasaidaqa fáasasaa afeekaikídaqa.

Copyright information for `BJR