1 John 2

Yísufa maasá áaqarana andeeqárufa qímaqoo úfafa.

Qiní faiqi námu sía ínnee áaqaaqeera maa-ufána ákara rídaqa. Yísufa ásauku mundírafa andeeqárafa Ánutuna áfusaa maasúfa dadaaqu fásiqafa máridanoo faiqí faqa ánaasee faqa moó fannoo áaqaifanoo Yísufa minára iriséenoo maasá qíkoofinnai óonureenoo maasá áaqarana andeeqá taikáannoo. Ánutuna ásauku mundírafa mifá kai aandáu̱ tatúfirafara foora maridanoo. Minánnai maqásaa fasiqa anaasee mandáinaina ákiaqara taikánniseenoo dóo maasá Ánutufinnai máfi qísaidanoo. Sía maasáindi kai aiqáma anaamurundi minánnai kai taikánnisaaninafa máridanoo.

Maasá Ánutuna ufa iriséeqa mi-maú fídaqa kúqaa Ánutunara íridee qianáura. Faiqí faqa ánaasee faqa moó fannoo Ánutuna áqoondi fee qímasee sía Ánutuna ufamau fínafa mifá únna qímarifa sía ánoona ufa minakí márifa máridanoo. Ánutuna ufara eedóo qímasee mi-maú fínafa kúqaa Ánutunara rímarifa mifá ánoonaikinoo máriannoo. Maasá maaqí qímaseeqa máridaqa kúqaa Ánutunaki máridee qianáura. Faiqí faqa ánaasee faqa moó fannoo qinée kúqaa Ánutunaki máridee qímasee mifá ásauku mundírana aanna ranóo márinaqa kúqaa Ánutunaki márifa máridanoo, sía ásauku mundírana aanna ráinafa únna qímarifa máridanoo.

Yoohaneefa fúka naakaparufa qímaqoofa.

Qiní qifaaqasáa qíqoondiuqa. Maa-ufána sía fúka ufa máridanoo ínnee óosanaindari íri maría úfafa máridanoo. Óoqeenáa ufa írimariafa máridanoo. Maa-fúka ufáfa óoqeenáanasaa ootúpamásee ínni qímannimidaqa ákara rídaqa. Maa-fuka ufána ánoona ásauku mundíranaki kooroo inóo máridanoo ínniki faqa kooroomá nímaqaidanoo, dóo asukuna áfaqaidanoo fúka káaqa qárafa qóomara foora ínni qámbaanai qáidanoo.

Mi-fukufána maaqímminoo máridanoo. Moó fannoo naríara Yísuna káaqa qáranaki máridee qídanoo quandáfi narí ákaqaafasaara fídiaqaa ínafa mifá sía káaqa qáranaki máridanoo asukunakí káqi máridanoo. 10 Moó fannoo narí ákaqaafasaara rínafa mifá fáasaana miqíranasaa máridanoo, sía minakí áiku ámaki áqufirafa máriannoo. 11 Narí ákaqaafasaara fídiaqaa ímaria fasiqa anaaseesa asukunakíara foora máridaqa, asukunakí nídaqa fírannai ánirannaira randáidaqa míkimákanídaqa asukuna fannoo misá nífusaa ititánoo márifaqa miqídaqa.

12 Qiní faiqi námu, qinée ínniara ákara rídaqa. Ínni mandóosanara Ánutufa narí ásauku mundíranara iriséenoo dóo ínni mandóosana akiqaara minínnísoonara qinée ínni ákara rúmannimaqaidaqa. 13 Ínnee faiqí firaasá indaarú Yísuna ufa írusa ínni ákara rúmannimaqaidaqa. Ínnee Yísunara óoqai óosana árooqooqari márinara írimariasa máriafaqa minára ínni ákara rúmannimaqaidaqa. Qinée ínni kumaaráauqa faiqi námuara ákara rúmannimaqaidaqa. Ínnee aakaaqaindáraa fasiqa úraaqaramáfuanara ínni ákara rúmannimidaqa.

14 Qinée ínni faiqi námu faqa ákara rúmannimaqaidaqa. Ínnee ínneeqa níkoonara Ánutunara írimariafaqara ákara rúmannimaqaidaqa. Ínnee faiqí firaasá ínnee Yísunara óosana árooqooqari márinara írimariasa máriafaqá minára ínni ákara rúmannimaqaidaqa. Qinée ínni kumaaráauqa faqa ákara rúmannimaqaidaqa. Ínnee nímudaanai qímariasa maríafaqa Ánutuna ufa ínni máriranaki márifa máridanoo ínnee aakaaqaindáraa fasiqa úraaqaramáfuasa márianara ínni ákara rúmannimaqaidaqa.

15 Ínnee sía maa-maqa maaqánasaaqaraa mandírirana máriranara ruaqa. Minakí mári ainainnara faqa sía ruaqa. Ínnee maa-maqa maaqánasaaqaraa mandá íriranara rímarifanoo Ánutunara rírafa sía ínniki máriannoo. 16 Maa-maqánasaaqaraa mandáinaina óosana maaqímminoo máridanoo. Maasá mandá daundurakiqari óosana óosana ainainara randéemarunnanara faqa maasá óosana óosana ainaina qáfamasee márararee qímarunnanara faqa maasá nifaaqa amooqímariana faqa maa-ainaináusa aiqáma sía maasá qíkoofinaindari qumu mári ainainafa máridanoo aiqáma maa-maqánasaaqaraa ainainá kai máridanoo. 17 Maa-maqa maaqánaki mária mandírirana márina ainainausa faqa faiqí nídimari mandainainausa faqa dóo taikánoo qúmidanoo kásooqaqee firaaqóo taikáannoo. Faiqí fee ánaasee fee moó fannoo Ánutuna íriranamau fímarifa sía maa-maqa maaqána námufaqa taikáanno, káqi náaru náaru máriannoo.

Ásauku mundírana namuqáara qímaqoo úfafa.

18 Qiní faiqi námu, taikára áukuana adeedíranoo máridanoo. Óoqai ásauku mundírana namuqáa úriqararafa ániannoo fee qímasee qímannimiafannana dóo maqee miná namuqáa moómoo kooroomáfi máridaqa. Maasá miná qáfeeqa taikára áukuana adeedíranoo máridanoo fee qídaqa. 19 Mi-namuqaasá maasáki máriusa rakéemaki namuqáakiqau. Misá maasáki máridaqa sía maasá írirana ámiqimasee mároosa márusa. Misá kúqaa maasáindi máridau maasáki káqi márini. Ánutufa maasá dadaaqianée qímasee misá qumeenní niqiqoofaqa maasákiqari rakéemakufaqa fufanóo Ánutufa minánnoo misá mandóosana kooroo ináu.

20 Ínnee sía misá naanna rée maríasa máríafanoo ásauku mundírafa kúqaa narí náaquqara andeeqára maraqunna ínni náakunnimaqee márifaqa máriafanoo ínnee Yísuna ánoonufara írimariafanoo. 21 Ínnee Yísuna ánoona ufa sía írifaqau sía ákara rini írimarianara ákara rúmannimaqaidaqa. Sía únna ufa moó fannoo ánoona ufakíqari kambíqaidanoo. Ínnee minára faqa írimariasa máriafanoo.

22 Yáfee únnufa qímarifa máridanoo Yísunara sía Ánutuna ásauku mundíra fee qímarifa mifá únna ufa qídanoo ásauku mundírana namuqáa máridanoo. 23 Miqí qímarifa sía miná ámaakuara kaifau qáoo qídanoofau miná ákoona Ánutunara faqa qáoo qímarifa máridanoo. Faiqí fee ánaasee fee moó fannoo miná ámaaku márainafa miná ákoona Ánutuna faqa máraannoo.

24 Óoqai indaarú Yísuna ufa íriusa mifá ínni naunduráki márinara ámiqimasee rakísiaqa. Yísuna ufa írufa ínni naunduráki márinaqa dóo ínnee minánnai ámaaku faqa narí ákoona faqa atukarasée miqandáki márifaranoo. 25 Márifanoo ásauku mundírafa narí uqanna moo áinaina maa-ainainná náaru márirana qímiraree qinau.

26 Akaqáusa ínni ueeqásee níkaru qímarifaqa maaná minára qímannimidaqa ákara rúmannimaqaidaqa. 27 Qinée ínniara íridaqa ásauku mundírafa narí ufa ínni náakunnimaqoofanoo máridanoo. Miná ufa fannoo ínniki máridanoo sía fífau moó fannoo aaná ínni uqannífiqaannoo. Miná ufa fannoo narí kai aiqáma ainaina ánoona ainaina faqa únna ainaina faqa rainásee qímannimidanoo sía moo únna qídanoo. Ínnee Yísuna ufa irisée eedóo kai qiaqa. Miqídaqa ásauku mundíranaki káqi máriaqeera qídaqa.

28 Óo qiní faiqinámu Yísunaki máriafanoo káqi minakí kai máriaqa. Miqí márifanoo narí innaarúnaindari qúminaqa sía ínnee nisaurúsee kukéeqaaqa káqi nifaaqa quqásee qáfaaqa. 29 Ínnee ásauku mundíranara írimariafanoo mifá andeeqéemarífa máridanoo. Ínnee maanára faqa dóo íriaqa, faiqí fee ánaasee fee moó fannoo andeeqára óosana márainafa mifá faqa Ánutuna faiqiara foora máridanoo.

Copyright information for `BJR