1 John 3

Yoohaneefa maasá Ánutuna faiqi námuara qímaqoo ufáfa.

Ínnee qáfaaqa maasá qíkoofa Ánutufa firaaqóo maasára ámuqusifanoo rímarifa máridanoo. Maasára firaaqóo ámuqusifanoo maasára narí faiqi námu fee qídanoo. Maa-maqa maaqánasaaqaraasa Ánutunara sía írunnanara miná faiqi námu maasára faqa sía íridaqa. Qiní qifaaqasáa qíqoondiuqa, maqee mária áukuana Ánutuna faiqi námu máridaqa. Kásooqaqee innaarúnai miná faiqi námu máridaqa nána ámiqira ainaina fee moó faqa ootúpamma qímiannoo fee maasá sía minára íridaqa sía akooqóo máridanoo. Moodáa ainainá kai maasá íridaqa. Ásauku mundírafa innaarúnaindari koorooínaqa maasá mifára foora márianaura. Maasá miná narí uqanna raqúramisée qáfamasee minára narí fooqáanaikammianaura. Maqee mária kamuqoo ásauku mundírana asasammásee áfeesara máriasa minára indeé indee ídaqa náriqa mandóosana findaukaqá fídaqa.

Moó fannoo áaqee marífa Ánutuna ufa rukíaidanoo áaqaidanoo. Qáqaqarana óosana óosana fannoo Ánutuna ufa rukíarafa máridanoo. Ásauku mundírafa sía fífau koorooináu, maasá áaqee márunnana mara áquaneera koorooináu, minakí sía áaqarafa máridanoo ínnee minára írimariafanoo. Minára maasá ásauku mundíranaki máriasa sía káqi mandáinainaki nídaqa. Yáfa yáfee káqi mandáinainaki nída fee mifá ásauku mundíranara sía írifa sía uqanna minára írimarifa máridanoo.

Qiní faiqinámu níkaru qímari fasiqafa aniréenoo ínni ueeqáandoo qímasee maaná ínni qímannimidaqa aufariaqée qídaqa andeeqára qóo nímariasa andeeqárausa máridaqa ásauku mundírana aanna rárausa andeeqárausa máriaqa. Yáfa yáfee mandáikiraqoo káqi nímarifa mifá Sadannanaindi máridanoo, Sadannafa níkaruqirafa máridanoo níkaruqiannoo. Óoqai óosana árooqooqari mandáinainaki nímarifa Sadannafa máridanoo Ánutufa narí ámaaku maa-ainainnára maa-maqánasaa koorooináu, Sadannana mandáinainirana arutaikáanifeera maa-maqánasaa koorooináu.

Yáfa yáfee Ánutuna faiqi máridanoo fee sía mi-fasiqáfa mandáikiraqoo nídanoo. Ánutuna óosana ánoona uqanna minakí máridanoo, Ánutufa miná ákoofa márinara sía amaná mandáikiraqoo fímariannoo. 10 Dóo qinée maqee Ánutuna faiqi námufaqa Sadannana faiqi námufaqa akooroomásee qímannimidaqa. Faiqí ánaasee moó fannoo sía andeeqára qóo nímarifa sía Ánutuna faiqi máridanoo, narí ákaqaafasaara faqa sía úriqarara ainainee qímaseenoo minára sía ámuqusímarífa mifá sía Ánutuna faiqi máridanoo.

Yoohaneefa maasára naríara naríara nímuqusiaqée qímaqoo úfafa.

11 Óoqai indaarú maa-ufána ínnee írimarusa máriafanoo mi-ufána óosana maaqímminoo máridanoo maasá naríara naríara úriqarara ainainee qímasee nímuqusiani. 12 Maasá sía Kaina aanna ráa, mifá Sadannana faiqi máridanoo narí ákaqa árinau. Kainafa nánaree narí akaqa árinoo fee inau. Narí áuqoo áinaina mandáikufanoo, miná márirafa nírafa eendaándinoo márunara narí ákaqa nírafa márirafa andeeqánoo márunara minásaara áanoomáseenoo árinau.

13 Qiní qíkaqaafasaauqa maa-maqa maaqánakinaasa ínniara fídiaqaaifaqa síamma ínnee minára taútiaqa. Kaina óosana máraifaqa misá ínniara fídiaqaammifaranoo. 14 Maasá kúqirana minníseeqa káqi máriranaki ani máridaqa. Maasá naríara naríara andeeqásee qímuqusúnnanara minára maasá káqi máriranaki animáridaqee qídaqa. Yáfa yáfee naríara naríara sía andeeqásee ámuqusínafa káqi kúqiranaki máridanoo sía anikéeqaidanoo. 15 Yáfee faiqí moó fannoo narí ákaqaafasaara fídiaqaa ímarinafa mifá dóo kuqá nárí marífa máridanoo. Ínnee maaná íridaqa faiqí kuqá nárí máriasa sía náaru márirafa misáki máridanoo. 16 Maasá naríara naríara úriqarara ainainee qímasee nímuqusira óosana maaqímminoo máridanoo. Ásauku mundírafa maasára ámuqusidanoo narí márirana maasára aunírira saqarisaa quqásee kúqinau. Dóo maasá faqa miqí kai íqa maasá qeeqá qíkaqaafasaa Yísuna ufa írimariasa miná ufasáara kúqiranaki fírariafaqa maasá misá rafáaqafunnimaqasee káqi máriaqee qímasee misá nímaaqa maqasée kúquanaura. 17 Moó fannoo aináina narí amanasáa maqéeifa narí ákaqaafasaa sárauqiranaki márina qáfamasee qimudáoo qímasee ámiraree qímasee narí ámuqusirana ámuqusinanoo narí ámuqusa múqufi rafáaqafuseenoo sía dadaaqínoo, náqimasee miqínna fasiqafa Ánutunara qiní qímuqusaki máridanoommifoo qíannoo fee. Sía amana máridanoo. 18 Qiní faiqi námu, maasá naríara naríara úriqarara ainainee qímasee rírana sía áfaurunnái kai qía. Ásaukunnai ánoona ainaina kai narí ámi narí ámi íranannai kai miná ánoona kooroo ínoo kambíqaannoo.

Yoohaneefa maasára Ánutuna áfusaa paasóosiaqee qímaqoo úfafa.

19 Maasá miqíannanannai kúqaa ánoonasaa atooáqa máridee qianáura. Maasá miqíannanara maaqóo nídaqa máridaqa Ánutuna áfusaa mirínni máridanoo maasá qíqafainaqa paasóosianaura. 20 Maasá áaqamásaananoo maasá qímuqusa dárinanoo Ánutufa qímuqusa úriqararafa máridanoo maasá aiqáma ainainara írimarifa maasára ámuqusinoo sía dáruannoo. 21 Maasá qímuqusirafa sía dárinaqa Ánutuna áfusaa paasóosammianaura. 22 Paasóosidaqa maasá nána ainainaree sárau ianna áinainnara innaaru qía̱nanoo Ánutufa maasá qímiannoo. Maasá miná ufara qímuqusannoo eedóo qímasee Ánutuna áidimari óosana máraidaqa iráanna ainainara qíananoo mifá qímiannoo. 23 Ánutufa maa-naakaparufána maasá qímaqiminau. Ínnee qiní qímaaku Yísuna qiní qísauku mundíranara ínneeqa írirana minásaa rusísee quándaki narí miná ufamau fíqa naríara naríara úriqarara ainainee qímasee nímuqusiaqée qinau. 24 Yáu yáusee Ánutuna naakápara ufamau fímarinausa misá Ánutunaki márifanoo kafáa Ánutufa misáki máridanoo. Ánutufa narí maraquna nimiqooná minára Ánutufa maasá daunduráki máridanoo fee qídaqa.

Copyright information for `BJR