1 Peter 1

Qinée Peetooroosa Ánutuna ásauku mundírafa Yísufa narí faiqi námukiqari maa-maqánasaa diqiqámaqai fasiqausa maa-ufána ínni ákara rúmannimaqaidaqa.

Ínnee Ánutufa ínni rusandeesámumasee qumároo fasiqa anaaseesa máriafanoo. Ínnee maaqóoqari asaqúakida Isaraee máqa maaqakiqari daráanimáfusa Poontusa máqa maaqaki fusá faqa Karatia máqa maaqaki fusá faqa Kapadoosia máqasaa fusá faqa Asia máqasaa fusá faqa Pitinia máqa maaqaki fusá faqa ínni aiqámausa maa-akarána rúmannimaqaidaqa.
Maasá qíkoofa Ánutufa maqee maa-karí narí íaninnanara iriséenoo ínni rusandeesámumaqoosa máriafanoo. Sía fífaufau rusandeesámuinau.

Ásauku mundírana Yísuna fidíkannai findaukárausaikiaqeera faqa Yísuna ufara eedóo qímasee mi-maú fuaqéera faqa Yísuna maraqunannái káaqa andeeqára fasiqa anaasee kámmafi máriaqeera ínni rusandeesámumasee máranau. Ánutuna áfaarirafa faqa asooárana faqa ínni naundurái qumbiqáfinoo irairaámminoo máriani.

Náaru kambíqaaninna ainainara asasammásee áfeesiranara qídanoo.

Karaambáiqa Yísufa Ánutuna ásauku mundírana ákoonara Ánutunara maasá aiqámausa dúfi dúfi qímamaqaidaqa. Maasá áaqarana ákiaqara nífauarafa firaafá márinara narí ásauku mundírafa kúqiranakiqari fíndifinoo fúkasaa ánaaqi kámmafi márirana maasá paqúrimma qíminau. Náaru kambíqaaninnanara maqee asasíqa dóo mi-mariráfa maasá qumbiqáqímaqaidanoo. Ámiqi Ámiqira ainaina Ánutufa narí áiku ásauku maasáree qímasee innaarúnai rafáaqafímari ainaina maasá miná márararee qídaqa maasá minásaa kai qífu mundúsee fídaqa. Mi-amiqi amiqira ainaináusa Ánutufa ínniara innaarúnai quqáqaqee rakísidanoo sía putaa ímariqoo sía náuraanaiki máriqoo sía taikéemariqoo máridanoo ínniara rakísidanoo. Mi-ainaináusa ínnindi máridanoo Ánutuna afeeka fannoo ínneeqa Yísuna mandaaqáranannai ínni faqa mara afeedammá nímaqée maríasa mi-ainaináusa ínnindi máridanoo. Ínnee taikáinna áukuana innaarúnai fíndifi óoru fíranara áfeesara maríafanoo Ánutuna afeeka fannoo ínnisaa rakísidanoo.

Máa maqee mária kamuqoo óosana óosana ínni nimanírafa aupúrarafa márianno (Ánutufa qínanoo márianno) minára ínnee káqi kaaqóo nóori runíranaki márifaranoo. Mi-nimanira ainainnáusara iriséeqa asasiaqa. Mi-nimanira ainaináusa ínni Yísuna saqárikirana nimanídanoo ánoonaikinoo márianifeera koorooídanoo. Faiqí maa-maqánasaa máriasa kóora mifá ínaaqianna kásooqaqee taikéemari ainainafa qumáreeqa idáki quqásee tasírisiri másaida apaapú aiqáma uqanna áiqarée márifanoo narí idaaqírafa kai suqúfifaqa dóo minára ámiqiranee qídaqa. Dóo ínniara Ánutufa miqíkai ínoo nimaníranaki quqéemarinara ínni Yísuna saqárikirafa sabéenara foora márianifeera ínni idákiara foora nimanídanoo. Ínni Yísuna saqárikirana mi-nimaniránaki fíqa afeekaíkiqa márinafa sía fífau kóora munnimma ínaaqianna taikée mari ainainna kíkiqa úsirafau máriannoofau káaqa uqanna úriqarara ainaina máriannoo. Ínnee Yísuna saqárikirana afeekaíkiqa márifanoo ásauku mundírafa Yísufa innaarúnaindari koorooínna faasaana ínnee amooqíra ufa faqa aréenarafa faqa uqéerarana faqa mi-karí níminaqa máreefaranoo.

Ínnee sía Yísuna qáfoosa káqi nímuqusí marífaqa minára ríriaasa. Ínnee sía Yísuna qáfoosa káqi ínneeqa írirafa minásaa rusímariasa máriafanoo miná ufamau fífiaasa. Miqímarianara ínnee firaaqóo káaqa aréenarana námufaqa asasímariafanoo. Mi-asasiránara faiqí sía amana minára ufa qifáranoo úriqararafa máridanoo. Sía fífau asasídaqa máriafanoo Ínnee ínneeqa Yísuna saqárikirana ánoona ínni nimana qumáreeqeenoo innaarúnai asumu máriranaki quqáranara asasídaqa máriafanoo.

10 Óoqai Ánutuna tamummáqara fasiqauqa máa ínni nimana asumu máriranaki mara quqáaninnanara irisée firaaqóo ámiqimasee queeqáaeeqamásee randáqau. Misáuqa káqi tamummaqasée kásooqaqee Ánutufa misá mandáinaina minnínnisee ámiqi ámiqira afeeka innaarúnai máreefandínna ainaina káqi nímianinnanara óonumafi irisée ákara rúmasee mi-ufána ánoonara randáqau. 11 Misá Ánutunara yáiree fee miqíannoo fee náqimasaifanoo fee miqíannoo fee yá fasiqanannái fee miqíannoo fee qímasee randáidaqa óonumafi íriqau. Ásauku mundírana maraquna fannoo mi-tamummaqara fasiqáusa náakufufaqa máa maqee áukuanara faqa ásauku mundírafa firaa aupurarana máraaninnanara faqa miná taikáranaki firaa areenarana máraaninnanara faqa akooroomásee ákara ríqau. Óoqai sía kambíqoo kamuqoo ákara rúmasoofanoo máridanoo.

12 Ánutufa sía mi-tamummaqara fasiqáusa máru kamuqoorau qímanniminau. Maa maqee mária kamuqoora ínniara qímannimufaqa irisée ákara rúmaqoofa máridanoo. Mi-tamummaqara fasiqáusa minára íridaqa aináiniqau. Misá máa maqee ínnee írimaría anoona ufanara minára qímasee ákara ríqau. Mi-anoonufána tamummáqara fasiqauqa óoqai ákara rúmaqoofa dóo máa maqee mária aukuana ámiqira fasaasa ufa Yísunara qímannimimariasa dóo qímannimisaafaqa írimariafanoo. Ánutuna náaquqara maraquna fannoo dadaaqifaqa ínni maqúsa maqúsa máriasa daráanimámbifaqa qímannimiafaqa írimariafanoo. Tamummáqara fasiqauqa óoqai ákara rúmaqoo ánoona ufausa miná maqee írimariafanoo innaarunaindaraa qángiroouqa mi-ufána misá íriafanoo íriaqaa kai ímarifaqa firaaqóo Ánutufa Yísuna maa-maqánasaa arusée áfiqoonara randáidaqa. Maasá faqa maa-maqánasaa márunausa faqa sía mi-ainainnána amana máridaqa.

Yísuna ufamau fímariasa káaqa andeeqásee máriaqa.

13 Ínneeqa nitikúrakinaa írirana deedaqammásee máriaqa. Ásauku mundírafa Yísufa koorooínna aukuanna ámiqi ámiqirana nímiannoo. Ínneeqa naundurái írirana mi-amiqi amiqiránasaa mundúqaraasamáseeqa máridaqa rakísidaqa aufarídaqa máriaqa. 14 Ínnee Ánutuna ufara eedóo kai qímasee qumáraaqa. Óoqai ínnee aamína máru kamusaqa máridaqa mandá nídimaru ainainna sía maqee kámu kafáa miná mara ootúpaaqa, ínnee aiqáma márirana andeeqásee máriaqa, Ánutufa ínni náarée marífa káaqa andeeqárafa máridanoo mifá indée kai íqa káaqa andeeáqa máriaqa. 16 Óoqeenáa Ánutuna tamummáqarausa ufa minára maaqímminoo máridanoo.

Ánutufa qínoo qinée káaqa andeeqárausa máridaqara
qíqa ínnee faqa miqí kai másee káaqa andeeqárausaikida
máriaqa.
Tamummáqarausa ufa miqíminoo márufaqa ákara rúmaqoofa máridanoo.

17 Ánutufa faiqí ánaasee aiqámausa írirana qáfee marífa máridanoo. Sía mandá írirana iriséenoo moó dádaaqammámaqeenoo moó firaaqóo mandáikamamaqaidanoo nári máraana amana kái andeeqásee nímidanoo. Miqí marí Ánutunara innaaru qídaqa maasá qíkoo fee qídaqa máa máriaqoo nóori runúsee máridaqa áaqaranara rufíaidaqa máriaqa. 18 Ínni nikeekú nikaakú fífau fáafau mandírirana maqéeuna minakínaana ínni idukúsee maréeqee quqásainara miná ákiaqara firaa ainaina máridanoo ínnee írimariafanoo. Mi-feefauriráfa sía kóora siruáa miqírafa máridanoo mifá taikée marífa máridanoo. 19 Ínni idukírana ákiaqara feefaurú firaafá fíqararafa ásauku mundírana fidíka máridanoo. Sía teeroo námuana fáina káaqa ámiqirana Ánutuna aandáu tatúfimaruna fooqáana ámiqirana miná kúqiranannai maasá idukínau. Maasá nikeekú nikaakú mandíriranakinaana idukínau. 20 Óoqai indaarú Ánutufa sía maa-maqa maaqána áuqiraqoo ásauku mundírana káqi útaaqama nímaqaqoofanoo márinoo máa maqee taikára kámu maasáki dóo kooroo ínoo maasára aunírira saqarisaa kúqufanoo 21 Ánutufa miná kúqiranakinaana uqéereeqeenoo aréenaranaki quqánau. Ínnee minánnai Yísunannai Ánutunasaa mundíqa máriafanoo kafáa minánnai kai ínneeqa írirana minásaa rusírana faqa náaru innaarúnai kambíqaaninna ainainara nídirana faqa minásaa ootúpanoo máridanoo.

22 Maqee ínnee Ánutuna ánoona ufa irisée máraafanoo mi-ufánannai ínni nínukama findaukámaseenoo. Ínnee ínneeqa niqoónausa mi-ufána írimariasara kúqaa nímuqusidanoo nídimarifaqa minára kaifáa qinée qímannimidaqa ínneeqa nímuqusa óokiqari nóori kándamasee naríara naríara nímuqusidanoo nídiani. 23 Ánutuna ákarakinaa ufa fannoo óoqai káqi márufa maqee márifa náaru náaru káqi márianinafa ínnee minánnai kafáa óorudupi máfi kafáa fúkasaa ánaaqi kámmafi máriafanoo. Sía maaqóo kúqimaria níkoona faiqi námu máriafanoo, Ánutuna kásimari ákarakinaa ufannái náaru náaru márianinna níkoona faiqi kámmafi fúkasaa ánaaqi kámmambi máriafanoo. 24 Óoqeenáa tamummaqara fasiqa miná ákara maaqímminoo márufa máridanoo.

Aiqáma faiqí faiqi taatuqée andanda miqírausa
máriafanoo, taatuqée andanda qúsau aadánusifanoo
áfufeenaarirafa kakasídanoo. Faiqí aréenarafa miqíminoo
máridanoo.
25 Ánutuna karaambáiqa ufa fannoo sía miqínoo
máridanoo náaru náaru máriannoo.
Mi-tamummaqara fasiqána ufa miqínoo márifaqa qinée Peetooroosa minára maaqí qídaqa.

Mi-amiqira fasaasa ufáfa náaru náaru márira úfa máridanoo miná qímannimimariafaqa írimariafanoo. Tamummáqara fasiqana ufa miqíminoo máridanoo.

Copyright information for `BJR