1 Peter 2

Ánutuna ufa náamma anoona miqírafa márinara miná náqafuaqa.

Ínnee minára iriséeqa ínneeqa mandóosana aiqáma fatíka áqusaaqa. Únnaqira ufa faqa níkaru qímasee máree maríana faqa qaaraikímari ufana faqa naríara naríara rairaiqímaria ufana faqa aasaandaana qímaria ufana faqa faiqí ánaasee níqimaria ufana faqa mi-ufáusa sía maqee kámu ínniki máriani. Fúka faiqi anaaqiara foora náamma anoona kái náidanoo ínnee faqa miqíkai íqa fúka faiqi ánaaqiara foora Ánutuna andeeqára ufa náamma anoonara fooqáana minára kai káaqa ruaqa. Miná naqá fífi íqa innooqéera foora íqa asumu máriranaki óonuree márifaranoo. Miqíqa karaambáiqinnai óonuree miná aaqá máriaqa. Ínnee karaambáiqa ámiqi ámiqirana dóo námasee qáfee maríafanoo adíafaa ídanoo dadaaqírafa máridanoo.

Faiqí faiqi misá Ánutuna amaana máqa usakée maru faakánara foora Yísunara níkooqoofaqa auníriranasaa arusée minnísaqau. Minnísoofanoo Ánutufa qáfamaseenoo qinée óoqai maa-faakannára qútaaqamáqaafannana idaaqírafa máridanoo fee qímaseenoo maraséenoo amaana máqa usakáraree qímaseenoo marasée kafáa rakíqanau. Ínneeqa eedóo qímasee Ánutuna ásaukuki ínneeqa nifaaqa quqásaifanoo faakána námufaqa rakíqasee usakásainanoo faiqí naunduráki ánoona amaana maqa kambíqaani. Kambíqainaqa ínnee minakí Ánutuna aanáiqikirausaikamambi márifaranoo. Máridaqa Ánutuna áidirana tatúfirana suqá ámidara foora ámiqira írirana márirana amooqírana ámifaranoo. Ásauku mundírana Yísunannai miqífaranoo. Óoqeenáa tamummaqara fasiqa moó fannoo faakánara maaqí qímasee ákara rúmaqoofa máridanoo.

Qinée Ánutusa rusandeesámumasee útaaqamámaqaafanna
faakana idaaqírana maraséeqa Isaraee máqasaa
óosanarasée rakíqeeqa. Yá fasiqa anaasee fee irisée miná
saqárikinafa sía kadíqaannoo ánoonaikiannoo.
Tamummáqara fasiqa ufa miqínoo máridanoo.

Ínnee Yísuna saqáriki máriasa óo Ánutuna faakána ámiqira qóonda fee qínausa máriafanoo. Sía Yísuna saqáriki máriasa Ánutuna tamummáqara fasiqa ínniara maaqí qídanoo.

Ínnee máaqa usakáidaqa mandá faakanee qímasee
maréeqee áqusoofanoo fíqumaree kafáa ámiqira faakana
úriqararafai kámmambi máridanoo.
Óoqeenáa tamummaqara fasiqa ákra moó maaqímminoo máridanoo.

Maa-faakanásaa faiqí moómoosa níku qámaki
sáamurifaranoo Mi-saqarífa misá níku ámanniminaqa
sáamurifaranoo.
Tamummáqarausa ufa miqímminoo máridanoo. Minára moómoosa Ánutuna ufa irisée sía mároonara níku ámaki sáamuriqau. Ánutufa misára mi-iriránasaa sáamurifandiafoo qímaqoona miqíqau.

Ínnee sía miqí máriasa máriafanoo. Ínnee Ánutufa rusandeesámumasee máree márisa máriafanoo. Ínnee karaambáiqa Ánutuna úriqararana aanáiqiki máriasa. Ínnee náaduma káaqa andeeqára máqannaa máriafanoo. Ínnee Ánutuna narí máqannaasa máriafanoo. Mifá ínni asukunakínaana náaramasee maréeqee narí idaaqíra káaqa qára ándeeqaranaki ínni quqásaifaqa máriafanoo. Sía fífau minakí mara quqéenoo ínnee Ánutuna idaaqíra afeeka ainaina ímarianara aiqámausa nífusaa koorooiaqée qímaseenoo ínni mara narí káaqa qára ándeeqaranaki quqáidanoo. 10 Óoqai sía Ánutuna máqannaasa márusa maqee mináindi máriafanoo. Óoqai ínnee Ánutufa maasá qífauaranara qífauaranara qimudáoo qíranara ínnee sía írimariafanoo maqee ínnee miná máraafanoo ínni faqa kukéeqafinoo qumeé máridanoo.

Ínnee asaqíraafaira foora máridaqa sía mandóosana máraaqa.

11 Óo qiní qíqoondiuqa, qinée Péetooroosa qeeqá qímuqusa óokiqari naamúa qídaqa. Ínnee Yísunara írimariasa maa-maqa maaqánaki máridaqa ánaamuruara foora asaqíraafaira foora máriafanoo. Miqíqa máridaqa maaqóo faiqí faiqi mandá nídimari ainainafa ínniara qiní máraaqee qínaqa sía eedóo qímasee miná máraaqa. Mi-manda ainaináusa ínni maraquna árimarifa máridanoo ínnee moo máqannaasara foora máriafanoo sía máraaqa. 12 Ínnee aamína máqannaaki nídaqa máridaqa ínneeqa nírana márirana ámiqimasee nífaqa misá ínniara mandóosana máreemaríasee qímasee ínni níndafeeqa óo ámiqimasee maríasa qímasee misá faqa quandáfi Ánutuna amooqíqa Yísufa innaarúnaindari qumuráinaqa amooqifáranoo.

13 Qinée Peetooroosa maanára faqa qímannimidaqa. Maqásaa kaamánna firaa uriqararafa faqa máaqa máaqa úriqararausa faqa karaambáiqa Ánutufa misá quqánau, mandóosana máreemariasa nárífaqa íriaqeera faqa ámiqira óosana máree marísa nimooqíra ufa nímiaqeera faqa mi-uriqararáusa karaambáiqa maqásaa quqánau. Ínnee ínneeqara innaarúnai karaambáiqa faiqi námu máridee qímasee aiqáma maqásaa fasiqa anaaseesaa rakísi maríasa uréeaqa máridaqa misá ufara eedóo kai qiaqa.

15 Fúrufari máriasa ínni Yísuna ufa írimariasa minára mandá dapi ufa ínni nímifaqa sía áanooqirana náríranannai rafáaqafuaqa. Ánutufa ínniara ínneeqa ámiqira níra máriranannai mi-furufarirána qiqánuasa ufa rafáaqafuaqeera qídanoo. 16 Ínnee mandáinainaki rumbára fasiqara foora sía nuaqa mandáinainakiqari idukíra fasiqara foora káqi nifaaqa quqásee andeeqára óosanaki asasída fuaqa. Sía ínniqa mandóosana kaifáa máraaqee qímaseenoo únna qímasee faiqí ánaasee nífusaa máfi rafáaqafusee mandóosanakiqari idukírafara foora nuaqa. Ánutuna rumbára fasiqa naanna rámasee káqi nuaqa. 17 Ínnee sía aiqámausara qiní qimana fée qímasee fúrufariaqa, aiqámausa nári úriqararana amanasáa miná áfusaa rufíaaqa. Aiqáma Yísuna ufa írimariasa niqoónausa Yísuna ufa írimariasara nímuqusinoo nídiani. Ínnee Ánutunara náaquqaani. Kaamánna firaa uriqararanara faqa náaquqaani.

Ínnee Yísuna aanna rámaseeqa aupúrarana nímifaqa káqi máraaqa.

18 Qinée Péetooroosa kafáa qímannimidaqa. Ínnee maqásaa feefaurúara aináini maríasa ínni rakísimariasa ufara eedóo qímaseeqa misá uréeaqa máridaqa misára náaquqamasee andeeqáseeqa misá ufamau fuaqa. Sía reendeéni maría rakísirausara kai miqíaqa áanoo qímarinausara faqa miqí kai iaqa. 19 Ínnee miqífanoo Ánutuna eedóo qira ufa ínnisaa máriannoo. Ínni rakísirausa fífau áanoomasee ínni náríqee ummaara nímiqee ífaqa ínnee ínneeqara Ánutuna íriranamau fída fee qímasee reendeéniaqa. Reendeénifanoo Ánutufa ínni ámiqi ámiqimmannimaqaani.

20 Ínnee mandóosana máraifanoo ínni rakísirausa miná ákiqara nárífaqa reendeenámasee máraifanoo Ánutufa mi-reendeenirána ákiaqara sía ínni nímiannoo ínniqa mandóosana ákiaqara máridanoo. Ínnee ámiqimasee márifanoo ínni rakísirausa fífau nárífaqa fifímmandee máraifanoo Ánutufa ínniara eedóo qíannoo. Fífau nárírana fifímmandee márainnanara minára kai Ánutufa ínni náarameeqeenoo narí ufa írimariasaki quqéenoo. Ásauku mundírafa narí kai fífau aupúrarana ínniara máranau. Yísufa fífau aupúrarana máranau. Dóo ínnee miná áfaqamareeqa miná aanna rámasee miqíaqa. 22 Mifá sía moo mándoosana máranau. Sía moo únna ufa miná áfaurusaa márinau. 23 Misá áqurara ufa ámufanoo sía mifá quandáfi miná ákiaqara nári níminau. Misá aupúrarana miná apatasáa quqóofanoo sía mifá misá áanoo ufa níminau káqi narí írirana Ánutunasaa andeeqára ufa nímimarunasaa narí írirana quqásee kúqinau. 24 Ásauku mundírafa narí kai maasá mandáinaina áaqarana narí apatasáa mara quqáseenoo dóo aunírira saqarisaa kúqirana máree finau. Maasá kúqirausara foora sía mandóosana máraaqeera kúqinau, ámiqira óosana kúqiara foora iqá márida máraaqeera kúqinau. Miná afaaqa ateekáqoonannai maasá daundurá úninoo máridanoo. 25 Ínnee sipsípa aandáu̱ra foora fúrufariqa auíaqa nuafanoo dóo maqee Ánutufa ínni nimanasáa rakísimari finnai ínni aandáu̱ra foora rakísimari finnai quqásaifaqa miná áfaqee fímariafanoo.

Copyright information for `BJR