1 Thessalonians 2

Pauroofa Teesaroonika máqusai máridanoo narí aináini marúnara qímanniminau.

Óo Teesaroonika máqannaasa qiní qíkaqaafasaauqa. Maasá namu ínni maqúsai fúafannakari sía kadíqamánnisaqiafana, ínnee minára írimariafanoo. Maasá namu Teesaroonika máqusai fuanéera Firipi máqusai óonuráafanaqa mandáikammannimaqeeqa mandá ufa qímunara írimariafanoo. Maasá ínni maqúsai óonuraafanaqa moómoosa áanooqimannimaqoofaqa óonumafi íriafananoo Ánutufa paasóosirana nímufaqa miná ufa ínni Teesaroonika máqannaasa qímannimiqiafana. Maasá qímannimirafa faqa sía áaqaranasaa mundínoo máridanoo sía maasá mandáinaina máraannanasaa mundínoo máridanoo, sía maasá ufa ákaruqiranasaa mundínoo máridanoo. Ánutufa maasá nimanamásee ínni qímannimiranara eedóo qímasee narí ámiqira fasaasa ufa maasásaa quqásainaqa maasá maqee maqee Ánutuna áidiramaú kai ínni qímannimidaqa. Ánutufa maasá fírana amanamásee qáfeemarifa márifaqa minára irisée andeeqásee qímannimidaqa. Sía faiqí maasá ufa irisée eedóo qiaqéerau qímannimidau. Ánutufa irisée eedóo qíaninnamau kai ínni qímannimidaqa.

Maasá Ánutuna áfusaa máridaqa sía nimooqíra ufannaifau ínni qímannimiqiafana. Maasá Yísuna ufa qímannimidaqa sía maqándanai óosana óosana ainaina úmmuariraree qímasee Yísuna ufa firaaqóo qímannimiafanausa, andeeqéemariafanausa ínnee minára faqa írimariafanoo. Maasá ínni faqa máridaqa ínni fee akaqáusee sía misá nimooqíra ufara randáqiafana. Kúqaa maasá ásauku mundírafa niqiqoo fasiqausa maqásaa fasiqauqa máridaqa, maasá minára irisée sía ínniara qimooqíranee, aináinee qímiaqee qímariqiafana. Nínausa faiqi ánaaqi íreeda rakísi maríandee maasá miqíkai mándee íreedá kai ínni faqa máridaqa qímannimiafanausa sía ínni moo áinaina máraqiafana. Maasá ínni Teesaroonika máqannaasara firaaqóo nímuqusimarunara sía Ánutunaindaraa ámiqira fasaasa ufa kai náida nímiqa, maasá qeeqá dáriranara sía rufíqarai írirana faqa qímuqusa faqa káqi márirana faqa nímiaqaaida máriqiafana.

Óo qiní qíkaqaafasaa maasá ínni maqúsai ínni faqa máriafanaqa ínnee maasá óosana qáfamasee írimariafanoo. Maasá nárana máree maría saikána kadáapiriqa tooqaamu máraafana qáfaqau. Maasá Ánutufinnaindaraa ámiqira fasaasa ufa qímannimiqa fífi ínaqa ínnisaa óonu mundúanaqa ínnee maasá náranara mámaraida miqídammiafoo qifoora fáasaana faqa eendáki faqa qeeqá kai nárana máree maría ainainirana kadáapiri máriafanaqa qáfaqau.

10 Maasá ínnee Teesaroonika máqannaa faqa máriafanna kamuqoo sía Ánutufa kai maasá márirana qáfanau, ínnee faqa qíqafoofanoo. Maasá ínni Yísunara rímarusa faqa máridaqa maasá ánukarana faqa andeeqárana faqa pisoopísooirana faqa sía áaqarana faqa máriafanaqa qíqafee marúsa máridaqa. 11 Faiqi níkausa ámiqimmandee faiqi rakísidaqa maasá miqí kai íqa ínni rakísimariqiafana. 12 Maasá ínnee mandáinaina mároofaqa reendeenámma nímaqeeaafánausa máridaqa. Ánutufa ínni náaraidanoo kásooqaqee innaarúnai óoruree narí aréenarana faqa narí quqúsara faqa miná faqa marasée narí faqa máriaqee qídanoo. Maasá ínniara minára iriséeqa ínnee maqee máriaqooqari Ánutuna áidiramaú kai fuaqa, minára fuki faakí qímariqiafana.

13 Ánutuna áufakiana maasásaa quqásoona ínni qímannimiafaqa ínnee irisée umáraqau. Ínnee minára sía faiqí ufafée qímariqau. Ánutuna ufafée qímasee umáraqau. Miqúna qáfamasee maasá Ánutunara dúfi dúfi qídaqa. Kúqaa Ánutuna ufa máridanoo ínnee miná ufa írimariasakina saikídanoo.

14 Óoqai Yuda máqannaasa nári niqoónausa ásauku mundírana Yísuna ufa írimarusa irisooná ákiaqara kadáapirirana nídafirana nímiqau. Ínnee Teesaroonika máqannaasa faqa ásauku mundírana Yísuna ufa irisoofaqa ínniqa niqoónausa níkooqoofaqa miqí undée kai íqa nídafirana aupúrarana ínni nímiqau. 15 Yuda máqannaasa óoqai Ánutuna tamummáqara fasiqauqa kuqá náriqau, kafáa maa-kamúqoo karaambáiqa Yísuna kuqámma arusaqau. Dóo kafáa maqee maasá mandáikamma qímaqaidaqa. Misá Ánutuna áfusaa firaaqóo mandáikidaqa misá káaqa faiqí nárimariasa máridaqa. 16 Maasá Ánutuna ufa faiqí asumu márararufa ánaamuru qímannimimarunaqa misá níkooqaifaqa maasá rafáaqafírara amanídaqa. Miqídaqa Yuda máqannaasa áaqarafa dóo firaafá úriqaranoo máridanoo, dóo maqee mandáinaina ákiaqara Ánutuna áranaqarafa dóo misásaa áqufinoo máridanoo.

Pauroofa kaifáa Teesaroonika máqusai fuanéerusia minnísanau.

17 Ánutufa misára miqí qímarifaqa qinée Pauroosa maasá qeeqára maaqí qídaqa. Yuda máqannaa nífaqasaifaqa qúsasaa maasá níanai rakéeiqa máridaqa, qifaaqa kái níanai rakéeiqa máridanoo. Maasá írirafa ínniki márifaqa fuanéera firaaqóo amanúnanoo sía amanaíkifaqa káqi máridaqa. 18 Qinée Pauroosa faqa qiní faqa máriasa Teesaroonika máqusai ínnee iannái fuanéera amanúnanoo sía ifaqa qinée qeeqá kai moómoo kari amanúnanoo Sadannafa qiní faqa ititáifaqa minníseeqa káqi Ateensa máqusai máridaqa. 19 Yísufa qúminna aukuana ínnee Teesaroonika máqannaasa faqa ánaamuru qímanniminausa faqa ínnee ínni andeeqáranannai márifaqa qinée ínniara Yísuna áfusaa qeeqá faiqiara foora ínniara asasianáuranoo. 20 Maasá qeeqá qifaaqa amooqírana faqa asasírana faqa ínniki márinara ínnee maqee maríanara firaaqóo íridaqa kumaaráa Timootina aqiqéeqa.

Copyright information for `BJR