1 Thessalonians 3

Maasá ínni Teesaroonika máqannaasara kísaaqasaa múnari mínari fírariafanaisia dóo maqee minnísee rakéemasee Ateensa máqusai maasá namu káqi máridaqa maasá qíkaqa Timootifa maasá faqa Ánutuna saikáki marífa ámiqira fasaasa ufa ásauku mundíranara qímannimi noonífa maasá miná aqiqéeqa ínnee iannái ínni poodúaanífeera ínnee Yísuna saqárikirana dadaaqíanífeera, akaqáusa ínni nídafirana nímifaqa sía quándaki fuaqéera Timootina ínnee iannái aqiqéeqa. Aqiqámasee maasá káqi Ateensa máqusai máridaqa. Maasá Yísuna ufasáara nárirafa márianinnanara Ánutufa óoqai maasára minakí fuaqée qímaqoo úfafa máridanoo. Ínnee minára faqa írimariafanoo.

Maasá Teesaroonika máqusaki máridaqa ínni qímannimiqa Yísuna ufa sáara nárirafa kambíqaannoo fee qíafannana dóo mifá kambíqaidanoo ínnee minára faqa írimariafanoo. Qinée Pauroosa minára iriséeqa ínnee iannái Timootina aqiqéeqa. Qinée ínni náufakiana sía uqanna íriqa kísaaqasaa máriranara qíkooqaifaqa múnari mínariqa Timootina aqiqéeqa. Mifá óonureenoo Yísunasaa mundíranara írianífeera aqiqéeqa, Sadannafa ínni níkarimaqasee qáfaifanoo qiní saiká kadíqaannoo fee sía fee kadíqaannoo.

Dóo maqee Timootifa óonurandee aniréenoo ínni adíafaaira naufakiana qifaqa íriqa. Mifá ínnee Yísuna saqárikirana faqa naríara naríara nímuqusirana faqa qímaqiminoo. Mifá ínnee maasára maqee maqee írimariana faqa maasá ínni níqafaaqaairana amana amana kái ínnee maasá qíqafaaqaa ímarianara Timootifa qímaqimifaqa íriqa. Óoqai maasá qifaaqa rumbánoo márifaqa máriunausa. Ínnee Yísuna saqárikirafa káqi márinara maqee iriséeqa qifaaqa asasifanoo kadáapirirana faqa aupúrarana faqa dóo aufadéenoo. Ínneeqa márirana mapukúseeqa karaambáiqa áfusaa fíndififaqa maasá qifaaqa ámiqiannoo.

Dóo maqee maasá ínnee mapukúsee maríanara Ánutuna áfusaa dúfi dúfi qianáura. Maasá ínniara Ánutuna áfusaa asasídaqa minára faqa dúfi dúfi qímamaqaida. 10 Maasá fáasaana eendáki ínniara Ánutufinnai innaaru qídaqa, Ánutufa dadaaqínaqa ínni nóori níndafamasee ínneeqa Ánutuna ufamau fírana andeeqá nímifaranoo.

11 Maasá Ánutufa maasá qíkoofa narí uqanna, maasá karaambáiqa Yísufa faqa maasá aaná afisúsainaqa ínnee iannái fuanáura. 12 Karaambáiqa fannoo ínnee naríara naríara rírana firaanáikamma nímaqaani, ínni aiqámausara nídirafa faqa maqee maqee firaanáikiani. Maasá ínniara dídirafa maqee maqee firaafáikidanoo. Ínnindi faqa miqí kai ínoo maqee maqee firaafáikiani. 13 Miqífanoo Ánutufa ínni nímuqusa mapukúsee afeekaikámannimiannoo. Ínnisaimbaqa karaambáiqa Yísufa narí áiku ásauku faqa kafáa qumuréenoo ínni maréeqeenoo andeeqárausa náaquqarausaikamá nísainaqa maasá qíkoona Ánutuna áfusaa kikíqifaranoo.

Copyright information for `BJR