1 Thessalonians 4

Pauroofa Teesaroonika máqanaasara Ánutuna áidiramau fuaqéera naakápaidanoo.

1Óo Teesaroonika máqannaasa qiní qíkaqaafasaauqa qeeqá ufa maa-ufána áti qímannimianaura. Maasá ínni faqa máriafanna kámuqoo Ánutuna áidiramau fíranara qímannimiafanaqa mi-maú fífiusa dóo maqee káqi mi-maú fímariafaqa qinée íridaqa. Karaambáiqa Yísufa qímaqimiqoonara dóo maqee ínni fuki faakí qídaqa sía óoqai undée kai káqikaaqoo Ánutuna íriranamau fuaqa, moó faqa moó faqa afeekaikámasee mi-maú fuaqa. 2Ínni faqa márianna kamuqoo Karaambáiqa Yísuna ufamau fuaqéera naamúaqira ufa óosana óosana naakápaafannana ínnee írimariafanoo.

3Ánutuna írirafa ínniara maaqímminoo máridanoo ínni andeeqára náaquqarafa márinaqa faiqí ánaasee narí úmmuari narí úmmuarirafa sía ínni rumbánoo máriani mandáinainakiqari idukírausa naanna rámasee máriaqee qiaqa. 4Ánutufa ínniara maaqíaqee qídanoo. Ínnee aiqámausa ínneeqa nifaaqara náaquqara úriqarara ainainee qímasee rakísidaqa andeeqára óosana márararee qídaqa narí úmmuari narí úmmuarirana taiká uqanna fúani. 5Ínnee sía aamína máqannaasa sía Ánutunara írimariasa naanna raaqa misá mandáinaina fanandíranaki máridaqa ínnee sía misá naanna raaqa. 6Sía ínniki moó fannoo miqínoo narí aqoónausee moo máqannaasee mandáikamma nímaqaani. Óoqai maasá ínni qímannimiafannana maqee kafáa aaquqímannimaqaidaqa Karaambáiqa fannoo mi-umuarira oosannára nárírafa máridanoo. 7Ánutufa sía maasára narí úmmuari narí úmmuariranaki máriaqeera maasá dáarama narí quqúsaki quqéenoofau. Maasá káaqa andeeqáranaki máriaqeera maasá dáarama quqánau.

8Faiqí fee ánaasee fee moó fannoo máa̱ qinée qúnnufana minnísainafa sía faiqí ufafáu minníseefara Ánutufa narí náaquqara andeeqara maraquna níminna ufana rukíeefaranoo. Ínnee Teesaroonika máqannaasa Yísuna ufa írimariasa naríara naríara nídiranara ínnee írimariafaqa fífau qímannimidaqa. Ánutufa narí kai narí áidi narí áidiranara qímannimifaqa írimariafanoo. 10Ínnee Teesaroonika máqusanaasa Yísuna ufa írimariasa Maseedoonia máqa maaqaki mária nikaqaafasaasa mi-amiqira oosanná nimiqoosá máriafanoo. Sía maqee iandée kai káqikaaqoo naríara naríara nídiani moó faqa moó faqa firaaqóo naríara naríara nídiani.

11Maasá óoqai ínni faqa máridaqa qímannimíaafánandee kai qídaqa kafáa qímannimidaqa. Maa-ainaináusasaa nimana mundúsaafanoo miqóo kai fuaqa. Aiqámausa ínneeqa aináiniranasaa ínneeqa rakísiaqa, aiqámausa ínneeqa nárana ínneeqa aináina ínneeqá kai máraaqa. 12Ínnee Yísuna ufa írimariasa miqí faqa miná ufara níkooqee maríasa ínni nimooqíqa andeeqéeaafoo qifáranoo. Ínnee faqa miqídaqa sía moo áinainara sárauqinana moonásaa óonu mundúa.

Yísufa kafáa qúmuaninna úfafa.

13Qiní qíkaqaafasaauqa ánoona ufa síaisa kuqufíqa sía fíndifidammiafoo qímasee ikífaafau qímariana. Ínnee faqa misá naanna reefóo qímasee kúqirausara ánoona ufa íriaqee qímasee ínni qímannimidaqa. 14Maasá maaqí qídaqa ínni qímannimidaqa. Yísufa kuqufínoo kafáa minakíqari fíndifinau. Miqúnara maasá maaqí qídaqa Yísuna saqáriki máriasa kuqufífanoo Ánutufa Yísuna mara fíndifundée kai ínoo misá faqa marafíndifummá nímaqaannoo. Yísufa qúmuaninna aukuana Yísuna faqa moodáanaki máriaqeera Ánutufa marafíndifummá nímaqaannoo.

15Karaambáiqa naamúaqímaqoo úfafa maaqímminoo márifaqa qímannimidaqa. Karaambáiqa qúmuaninna faasaanasaa maasá káqi márianausa sía kúqirausa nóorisaa óoru fúanauranoo. 16Mi-faasaannásaa innaarúnaindari Ánutuna daambeenda firaaqóo rúannoo, qangirooqua úriqararafa ufa qíannoo, Ánutuna ukeena fuaqáannoo dóo miqóo innaarúnaindari karaambáiqa narí uqanna qúmuannoo. Qumuráinaqa kúqirausa káqi máru kamuqoo ásauku mundírana saqárikida máriusa misá náaree kúqiranakiqari fíndifífaqa dóo miqóo maasá mi-karí káqi máriasa faqa kúqirausa faqa Ánutufa moodáanaki afapíta qumáreenoo uqéerannisainaqa asurukína kéeqakinaqa aanái óoru karaambáiqa paqúrimasee mi-karí miná faqa náaru náaru márianaura. 18Miqíannanara ínnee faiqí ánaasee faiqi kuqufuafaqa nifaaqa rumbée marífaqa ikíráqee maríana mi-ufána qímannimifanoo nifaaqa aufadáani.

Copyright information for `BJR