1 Thessalonians 5

Yísufa tautúmasee qúmuaninnanara fáasaanara foora máriaqa.

1Mi-ainainná kambíqaaninna áukuanara maasá fífau ákara rúmasee qímannimianaura, óoqai dóo ínnee írimariafanoo maaqímminoo máriannoo, karaambáiqa qúmuaninna kari úmmuara fásiqara foora kukéeqakinoo qúmuannoo. 3Faiqí ánaasee maa-aukuannára ámiqiranaki asooáranaki máridee qímasee káqi mána mánida márifanoo dóo miqóo kai rakéemasee firaa narirafa tautúmannimaqáannoo. Sía moo ámeekamasaannoo, ánaasee innaamunai fímariandee íannoo sía aupúrarafa sía máriannoo, máriannoo.

4Ínnee Teesaroonika máqannaasa qiní qíkaqaafasaauqa, ínnee sía asukunakíara foora nímariasa máriafanoo. Yísufa qúmira faasaana úmmuarira fasiqara foora kambíqafi naqa ínnee sía tautúmasee nisaurífaranoo. 5Ínnee aiqámausa káaqa qáranaki nímariasa fáasaanara foora nímariasa máriafanoo sía maasá ínnisaimbaqa eendákiara foora nímarunausa sía asukunakíara foora nímariasara foora máridaqa. 6Miqúnara maasá ínnisaimbaqa sía faiqéemariasa naanna raaqa nífu maqasée máriaqa. Maasá ínnee faqa sía nammári néemariasa naanna rée fúrufariaqa káqi ámiqimasee márianaura.

7Eendáki faiqí ánaasee faiqáidaqa eendáki nammári námasee fúrufaridaqa. 8Maasá sía miqímarunausa máridaqa káaqa qáranaindi máridaqa maasá sía nammári námasee fúrufariqa núaqaana káqi máriaqaana. Maasá qeeqá Yísuna saqárikirana faqa qeeqá naríara naríara rírana faqa mi-ainainaqandánnai saqári kámmandee ukée íriqa. Maasá asumu márianafa kásooqaqee kambíqaaninnanara asasídaqa rakísida máridaqa. Mi-asasira afeesiránara pateeuqára foora qíkiaqaki afisúsee rákiranakiara foora mária.

(Óoqai níkiaqa itairírausa súani qíkiaqaki dáruandoo qímasee pateeuqá náriqa níkiaqa itairíranasaa afisímariqau. Óoqai Yísuna aukuana Roomma máqanna rákira fasiqauqa áinna qafee afisúsee rákiranaki nímariqau. Aiqáma ainaina samu sía qíkiaqa dáruani fee qímasee afisíqau.)

9Ánutufa sía maasá rusandeesámumasee narí áranaqaranaki quqárareefau qinau. Ásauku mundírana karaambáiqa Yísunannai asumu márirana máraaqee qímaseenoo maasá rusandeesámumasee máranau. 10Mi-asauku mundiráfa minásaimbaqa maasára moodáanaki máriaqeera maasá dárirana qímaaqa maqasée kúqufa fíndifinoo máridanoo narí kaifáa qumuráinaqa kúqiqee káqi máridee narí faqa máriaqeera maasá qímaaqa maqasée kúqinau. 11Ínnee mi-irirána iriséeqa soofaarí maríasa mi-iriránannai narí dadaaqí narí dadaaqídaqa narí amana narí amana mapukúaqa.

Pauroofa ufa taikáidanoo nímandaidanoo.

12Óo maasá qíkaqaafasaa maasá qeeqá qímuqusa óokiqari ínni qímannimidaqa. Ínniki Ánutuna ufa sáiki maría fasiqausa Ánutufa maréeqeenoo mi-saikánaki uqánnisóosara qídaqa, misá ínni naamúaqira ufa qímannimiafaqa ámiqira fasiqafee qímasee náaquqamasee íriaqa. 13Misá nári ámiqira saikara irisée firaaqóo nóosaa qíranara rufíaida misára nídiaqa. Ínnee naríara naríara nídimarinaqa asooáranaki máriaqa.

14Qinée ínni naamúaqi maruna fasiqausa qímannimidaqa, ínni kudi fasiqauqára afeekaikámasee naakápaifaqa misá aináiniaqa, rufíee maría fasiqa anaaseesa nimana mapukúnímaqáaqa, írirana óore̱eqárausa ínnee dadaaqiaqa, ínnee aiqámausa qámbaanai reendeénidaqa asooámasee qímannimiqa fuaqa. 15Ínnee maa-ainainnára faqa rakísiaqa, moó fannoo aní mandáikammamaqáinana ákiaqara sía narí mandáikammamaqaa sía mi-oosanáfa máriani. Ínnee aiqáma kari narínni narínni ámiqira óosana kai narí ámi narí ámiaqa sía ínneeqáki kai miqíaqa. Ínnee aiqáma máqannaasaki máridaqa miqímannimaqáaqa. Ínneeqa írirana nimana mi-amiqira oosannásaa kai quqáaqa.

16Ínnee aiqáma kari Yísuna ufa írimariasa asasída kai máriaqa, aiqáma eendaki fáasaana innaaru qiqá fuaqa. Aiqáma ainaina tiaki Ánutunara dúfi dúfi kai qiaqa. Ínnee mi-ufamaú fídaqa ásauku mundírana Yísunaki fídaqa Ánutufa ínniara fuaqée qímaqoomau fifáranoo.

19Náaquqara andeeqara maraquna fannoo ínni afeeka níminaqa sía miná rafáaqafuaqa. 20Ánutuna maraquna fannoo faiqí dadaaqínaqa sía níkoo nikaa iaqa, ámiqimasee íriaqa. 21Ínnee aiqáma amaana ufa sía káqi íriaqa aiqáma ufa aiquqummásee iriséeqa ánoona ufa kai íriaqa. 22Óosana óosana mandainainara eeráiriaqa.

23Ánutufa maasá naundurái asooárana nímimarifa ínni máriranaki náaquqara andeeqara oosana firaaqóo nímiani. Mifá kai ínni aiqáma márirana nipatasáa faqa nimana faqa maraquna faqa áaqarafa sía máriani ánukarafá kai mári mári inánoo ásauku mundírafa karaambáiqa Yísufa miqíqa márinnanaki qúmuani. 24Ínnee ínneeqa mandáinainakiqari ániaqeera náaree marífa Yísufa sía akóo akaa ímarifa maqee maqee dadaaqímarifa máridannoora ánukara óosana nímiannoo.

25Óo Teesaroonika máqannaasa maasá qíkaqaafasaa, ínnee maasára maqee maqee innaaru qiaqa. 26Ínnee aiqáma ínneeqa níkaqaafasaa nímandaidaqa moodáa fidíkara foora nímandaaqa.

27Qinée Pauroosa Karaambáiqa ufa irisée ínniara afeekaikída qímannimida ínnee maa-papiqána maraséeqa minakínaa ákara ufa aiqáma Yísuna ufa írimariasa ásaana rúmasee qímannimiaqa.

28Ásauku mundírana Karaambáiqa Yísuna áfaarirafa ínniki máriani.

Copyright information for `BJR