1 Timothy 2

Pauroofa Yísuna ufara suqínnanaki maaqí qímasee innaaru qiaqée qinau.

Maa-ainainná náaree aní aamúaqímamisaanana anée faqa Yísuna ufara suqímariasa faqa suqídaqa innaaru qídaqa maaqímasee innaaru qiaqa. Maa-maqánasaa faiqí ánaaseesaa rakísinnimaqee marísara misá ámiqimasee rakísinnimaqaaqeera innaaru qiaqa. Ínnee káqiqeesa reendeénamasee asooáranaki máriaqeera misára innaaruqiaqa. Ánutuna ufamau fídaqa andeeqára máriranaki máriaqeera aupúraranaki sía máriaqeera misára innaaruqiaqa, ínnee maqee maqee aiqáma fasiqauqara faqa maa-maqánasaa firaaqóo úriqararausa faqa kaamánna úriqararausara faqa Ánutuna áfusaa Ánutufa misá dadaaqíanifeera innaaruna qiaqa. Misára faqa dúfi dúfi qírana qiaqéera qídaqa. Misára innaaru qírafa ámiqira óosana máridanoo Ánutufa maasá asumu máree marífa minára áididanoo. Mifá aiqáma fasiqa anaasee asumu máriranaki ani máriaqeera qídanoo ánoona ufamau fuaqéera qídanoo misára innaaruqíra óosannara Ánutufa áididanoo.

Moodáa Ánutufa kai máridanoo moodáa fannoo kai narí Ánutuna faqa faiqí ánaasee faqa mara moodáanakikamma nímaqaidanoo. Mi-fasiqáfa Ánutuna ásauku mundírafa Yísufa máridanoo faiqí ánaasee óonu kafáa marasée naríki quqáanifeera narí afaaqa kúqiranaki quqánau. Maasá miná qáfamaseeqa maaqí qídaqa. Óo Ánutuna narí áukuana máridanoo. Óo mifá kúqaa aiqáma fasiqa ánaaseera asumu máriranaki máriaqeera miqídanoo. Minára faqa qiní Pauroosa qeeqá maqúsaindari diqiqámasoofaqa qinée ánaamuru aiqáma uqannífiqaidaqa Yísunasaa írirana rusírana ánoona ufa faqa qímannimidaqa. Qinée sía únna qídaqa ánoona ufa kai qímannimidaqa.

Yísuna ufara suqímarianaki faiqíara qinée maaqí qímasee naamúaqidaqa. Aiqámai mária fasiqausa áanooqirana síaina, ufa rainárana síaina, nári nísauku ánukarausa uqéerasee innaaru qímariasa nári márirana nári nírana mináuqara Ánutunaindi fee qiaqéera, aiqáma fásiqara miqí maríasee innaaru qiaqéera qídaqa.

Ánaaseera qinée maaqí qídaqa. Aiqáma nári nifaaqaí mári síara qámunnana ámiqimasee nári nifaaqa ánaamususée írirana faqaasaikámambi máriaqee qídaqa. Sía káaqa firaaqóo óosana óosana ainaina nifaaqa áuquaqa. 10 Niqoónausa dadaaqírafa mifá ínni nifaaqa áuqirafara foora máriani. Ánutuna úfa írimaria anaaseesa andeeqára óosana miqíminoo máridanoo. 11 Yísuna ufara suqímaria maqanaki kéeqaifaqa ánaasee ufa síaina reendeenámandee Ánutuna ufa íriaqa. 12 Yísuna ufara suqímaría maqánaki ánaaseeuqa sía kikíqa máfiqa Ánutuna ufa qímannimiaqa. Misá sía faiqí úrinaaqaramáfi máriaqa qinée miná qáoo qídaqa misá ufa síainausa máriaqee qídaqa Yísuna ufara suqímaría maqánaki miqíaqee qídaqa. 13 Ánutufa Adamana náaree áuquseenoo dóo miná ínaaqianna Éeuana áuqinau. 14 Sadannafa sía faiqí ákaruqinau, ánaasee kai ákaru qímasoofanoo Ánutuna ufa rukíanau. 15 Dóo maqee Ánutufa sía aiqáma ánaaseeuqa miná ákiaqara nárú taikáannoo faiqi máqaranasaa márifaranoo. Misá nári nifaaqa ámiqimmandee ánaamususée máridaqa Yísunasaa írirana rusíseeqa máriaqa faiqí ánaaseera ámuqusamásee máriaqa qikairí síaisa ánukarausa máriaqa. Miqídaqa nóori kándamasee máridaqa káqi márifaranoo.

Copyright information for `BJR