1 Timothy 3

Pauroofa Yísuna ufara suqímarinausasaa rakísirausara naakápamáqoofa.

Maa-ufána ánoona ufa kai qinée Pauroosa qímannimianaura. Faiqí moó fannoo Yísuna ufara suqímariasasaa rakísiraree qímarifa ámiqira ainainámmiannoo.

Yísuna ufara suqímariasasaa rakísimari papatarafa narí nírana márirana sía áaqarafa máriannoo andeeqárafa márida andeeqásee rakísiannoo. Miqímarinna fasiqafa moodáa anaasee faqaafa kai máriannoo. Mifá óori runúsee márifa máriannoo. Narí áakiranara íri marífa máriannoo. Narí qumíasana aina faqa márirana faqa andeeqásee quqéemarifa. Mi-fasiqáfa Yísuna ufara suqímariasasaa rakísiranaiki marí fasiqafa ánaamuru maqee maqee miná maqúsaki aniraafanoo ámiqi ámiqidanoo nífiqa narí máaqaki quqásaida nárana fíridanoo. Mi-fasiqáfa Ánutuna ákarakinaa ufa andeeqásee qímannimi marífa mi-oosanáusa máree marífa Yísuna ufara suqímariasasaa rakísirafa amanaikíannoo. Mifá sía nammári námasee fúrufaridanoo márifa faiqí ánaasee sía nárí marífa máriannoo. Mifá fifíra óosanara reendeénira óosanara kai rímarifa máriannoo. Mi-fasiqáfa sía káaqa munnimmara rímari fasiqafa máriannoo. Mifá narí faiqí ánaaseera ámiqimasee rakísinnimaqee marífa máridanoo. Mi-fasiqáfa narí faiqi námuara qímannimifaqa eedóo qímasee reendeenámandee áuqee marínausa máriaqa. Mi-fasiqáfa narí faiqí ánaasee sía ámiqimasee rakísinoo náqimaseenoo fee Yísuna ufara suqímaria maqánaki kéeqee maríasasaa rakísiannoo fee.

Yísuna ufara suqímariasasaa rakísiranaiki marí fasiqafa sía fúkasaa Yísunasaa írirana rusímarina mara quqáa. Miqímari fasiqafa dauní narí óori uqéerasee narí afaaqa mara máree úridanoo amooqínoo dauní áaqaranaki áqufuandoora. Óoqai Sadannafa innaarúnai miqímarunara Ánutufa ateekánau. Maa-fuka fasiqáfa Yísuna mandaaqárana miqí kai ínoo Ánutufa ateekáandoora. Yísuna ufara suqímariasasaa rakísiranaikí marí fasiqanara Yísuna ufara sía írimariasa faqa minára ámiqira fasiqee qímariafa máriannoo. Miqí qímaria fasiqafa sía Sadannana námufaqa moodáa madikaki áqufinoo asaurúannoo. Dóo Yísuna ufara suqímariasasaa rakísimaria fasiqausa óosana dóo miqíminoo máriani.

Pauroofa amaanúfasaa rakísimarusa dadaaqímariasara qinau.

Dóo qinée Pauroosa amaana máqasaa rakísirausara qímasee dóo maqee misá óore̱eqára dadaaqírausara qianáura. Amaanúfasaa rakísirausa dadaaqímariasara misá márirana nírana andeeqásee nóori runúsee maríasa máriaqa. Misá faqa sía nammári námasee fúrufariaqa. Misá faqa sía káaqa aináinara rímarinausa máriaqa. Misá ákarakinaa Ánutuna ufa qumáreeqa mi-maú fídaqa sía nifaaqa umaararáanifeera aufadaqá máriaqeera máriaqa.

10 Dadaaqímaria fasiqausa sía káqi maréeqee dadaaqíranaki quqárafa máriaqa. Misá amanamásee qáfeenana kai maréeqee dadaaqíra saikaki quqáa. 11 Dadaaqí maría fasiqausa nínaaqmaaka faqa márirana nírana andeeqásee máridaqa sía múnuqi míniqi qímariasa márifaranoo. Mi-anaaseesá nóori runúsee máridaqa ánoona ufa kai qímariasa máriaqa. 12 Yísuna ufara suqímariasa amaanúfasaa rakísirausa dadaaqímarifa moodáa anaasee faqaafa máriani narí faiqi ánaasee ámiqimmandee rakísi marífa mi-saikánaki máriani. 13 Ámiqimasee kísaaqasaa papatara sáika áuqaqa fímariasa aiqámausa nífusaa úriqararana máraidaqa miqídaqa, misá ásauku mundírana Yísunasaa írirana rusírana atukarasée mapukírana máraidaqa.

Ánutuna kukéeqara ufa ánoona Yísufa firaafá máridanoo.

14 Qinée Pauroosa maa-papiqána ákara rídaqa qúsasaa ínni óonu níndafararee qídaqa. 15 Moo áinaina fannoo qiní rafáaqafímarifaqa máridaqa maa-papiqánakinaafa ínni Ánutuna áiku ásaukuki nírana márirana naamúaqiannoo. Ánutuna ufara suqíranaki kéeqee maríasa misá Ánutuna amaana máqara foora máridaqa. Ánutuna ánoona úfa faakána máridaqa.

16 Maasá Yísuna úfa írirana ánoona óoqaindari kukéeqara úfa márifa Yísufa idaaqírafa firaafá máridanoo, sía amana moó fannoo minára qáoo qírafa.

Yísufa maqásaa fasiqa nífiri kámmafinoo koorooináu. Ánutuna maraquna fannoo minára andeeqárafa máridanoo fee qinau. Qangiroouqá miná qáfaqau. Faiqí moómoosa máaqanna máaqanna minára qímannimiqau. Maa-maqa maaqánaki márusa minára kúqaammifoo qiqau. Ánutufa miná maréeqeenoo innaarúnai quqáqoofanoo máridanoo.

Copyright information for `BJR