2 Corinthians 8

Yísuna ufa írimariasa akaqáusa dadaaqíra oosanara qídanoo.

1Óo Koorinti máqusai maasá qíkaqaafasaa máriasa. Yísuna ufara suqímariasa Maseedoonia máqa maaqaki máriasa Ánutuna ámiqi ámiqirafa misáki saíkinara ínnee íriaqeera qímannimidaqa. 2Firaa ummaararárafa misá kadáapi rírana níminau. Márufanoo mi-kadaapiriráfa Yísunasaa atooqée márusa firaaqóo nimanamándee qáfanau. Misá miqíqa máridaqa minakíqari firaaqóo asasamándee náriqa munnimma áfaaramandee Yudeea máqannaasa Ánutuna ufara suqímarusa dadaaqí náida nímiqau. Misá nári kudikíranara síamma íriqau káqi nímiqau. 3Qinée maa-ainainnára ámiqimandee íridaqa qímannimidaqa, misá nári múnnimma márunna amanakái nímiqau sía miná amana kái nimiqau kai fíqarammasee aabaa faqa nímiqau. 4Misá nári íriranannai anirée áranaiqi afeekaikámasee maasá irámmiriqa qiqau. Ámanee maasá faqa Yudeea máqa maaqaki Ánutuna ufara suqímariasa náararee máriasa maasá munnimma nímiqee dadaaqianáuree. Náriqa mi-dadaaqiránara sía ummaara fée qiqau adíafaairana qímimarianara maasá nímianauree qiqau. 5Maasá mi-ufána iriséeqa asasamásee tautíqa óo sía mi-amiqira iriráfa kammbíqeefoo qúnaqa misáki kambíqeenoo. Maseedooni máqannaasa náriqa naundurá írirana faqa nári aináina faqa karaambáiqa náaree amisée quándaki Ánutuna íriranamau nári márirana maasá faqa qímiqau.

6Maseedoonia máqannaasa óosana miqínoo márinara ínnee Koorinti máqannaasa faqa miqíaqeera Titusana fuki faakí qiafanóo ínni qímannimidanoo. Óoqai Titusafa ínni faqa máridanoo Yudeea máqannaa nímianínna munnimmanara óosana arasée qímanniminau. Dóo maqee Titusafa mi-nimuqusira saikána kaifáa uqéerarara fuki faakí qídaqa. 7Ínnee Koorinti máqannaasa óosana óosana ainaina moómoo faqaasa máriafanoo. Ínnee Ánutuna saqárikirafa faqa Ánutuna ufa qímannimirana faqa írirafa faqa óosana óosana dadaaqíra saika eedóo qímasee kásida uqéeree máriana faqa maasára faqa nímuqusimariana faqa mi-ainaináusa ínnindi moómoo máridanoo. Dóo maasá ínniara Yudeea máqannaasa nímiaqeera faqa qídaqa ínni áfaararifa minakí faqa moómoo máriani, mi-nimuqusira saikáfa máriannoo.

8Qinée Pauroosa sía naamúaqira ufa ínni qímannimidaqa naakápara ufa ínni qímannimidaqa. Ánaamuru dadaaqíranara naakápaidaqa minánnai ínniqa níkaqaafassara nímuqusirana nimanamándee qáfaidaqa ínni Koorinti máqannaasa nímuqusirafa Maseedoonia máqannaasa nímuqusirana amanafée máridanoo fee qímaseeqa nimanammándee qáfaidaqa. 9Ínnee ásauku mundírana Yísuna maasá karaambáiqa ámuqusira dadaaqíranara ámiqimandee írimariafanoo mifá innaarúnai aináinafaqaafa úriqararafa márinoo ínniara irisée maa-maqánasaa qúmu ainaina síaifara foo máfinoo márinau. Yísufa narí aináina síaifara foo íranannai innaarúnai ainaina faqaasa máriaqeera miqí marínau.

10Yudeea máqannaasa nárana feefauríra munnimma nímiranara qinée Pauroosa qiní írirafa minára maaqí qídanoo. Ínnee óoqai áiqaqóo aukuanna Yudeea máqannaasa munnimma nímiraree qímasee suqúquqóo munnimmana nárana feefaurú máraaqee qímasee suqú quqásee minnísoona maqee kaifáa uqéerasaifanoo fífi ínanoo taikáannoo. Ínnee aiqáma maqannaasakiqari ínnee náaree iriséeqa mi-saikána óosana uqéeree maríasa máriafanoo. 11Dóo maqee fíndifíqa mi-saikána áuqaifanoo taikáani. Indaarú ínnee minára ufa suqúsee nímudaanai qímasee ufa qiqá fífiaana maqee miqí kai íqa nímudaanai qímasee munnimma nímirafa taikáfuani sía kísaaqasaa máriani. Ínnee aiqáma munnimma nimiséeqa ínneeqa kurídifaara, qinée sía minárau ínni qímannimidau. Ínnee ínni munnimma aabaa márina miná nímiaqa sía márinafa sía áquaqa. 12Ínni munnimma amanaikínaqa nimisáinanoo Ánutufa naríndiara foora dúfi dúfi qíannoo. Sía amanaikínana áqusainanoo Ánutufa sía minára dúfi dúfi qíannoo. Sía amanaikínana sía áqua.

13Qinée sía moo máqannaasa aufadárana nímirara ínni Koorinti máqannaa ummaara firaaná nímidaqa, sía miqídaqa. Maqee áukuana ínni nárana firaafá mári kamuqoo nárana síaisa dadaaqiaqa, kásooqaqee moo áukuana ínnee mandáinainaki marífaqa misá ínni dadaqifáranoo. Miqídaqa aiqáma amana kái maríaqa. 15Óoqai tamummáqara fasiqauqa minára maaqí qímasee ákara ríqau,

Óoqai maqásaa nárana moómoo suqímaru fasiqausa sía rairaá iqau. Maqásaa nárana óodaa suqímaru fasiqausa sía náararee marínau, nimana kái marínau.

Pauroofa Titusana faqa narí aqoónausara faqa qídanoo.

16Qinée Pauroosa Titusana óosana qáfamasee Ánutunara dúfi dúfi qídaqa, maasá daanna ráidanoo firaaqóo ínni Koorinti máqusanaasa dadaaqíraree qídanoo. 17Maasá minára Koorinti máqusai ínni maqúsai fuannée qúnanoo mifá sía kai eedóo kai qinoo narí íriranannai asasammáseenoo ínnee iannai kafáa fúannoo. 18Maasá moo fásiqa faqa miná faqa aqiqaanáuranoo mi-moo fasiqáfa aiqámai Yísuna ámiqira fasaasa ufa qímanniminoonufa márunara Yísuna ufara suqímariasa minára ámiqira fasiqafee qídaqa. 19Sía mifá kai, aiqáma Yísuna ufara suqímariasa mi-fasiqánara ínni Yuda máqannaasa nímianínna nárana feefauríra munnimmana utáaqammasee anée Koorinti máqannaasa munnimma faqa akaqá máqannaasa munnimma faqa mara máree Pauroona sáimbaqa Yudeea máqannaasa múru nímia. Miqínna̱nannai maasá nímuqusira saika marasée karaambáiqa aréenarana faqa maasá eedóo qímasee dadaaqírana faqa kooroomámbuannoo.

20Akaqáusa raiqára ufa qifoora maasá ámiqimandee ínni moómoo áfaaramandee nímifandinna munnimmana maasá rakísianaura. 21Maasá írirafa minára maaqímminoo máridanoo. Maasá Karaambáiqa Ánutuna áfusaa faqa maqásaa fasiqa nífusaa faqa andeeqáramau fídaqa rakísianaura.

22Titusana faqa moo fásiqa faqa indaarú fuaqée qiaqa maqee maasá qíkaqa moó faqa miqandásaa mara quqáanaura miqandá faqa fúannoo, maasá moómoo kari miná amanamándee qáfaunanoo ámiqimarifa maqee maqee eedóo qímasee dadaaqímarifa máridanoo. Dóo maqee mifá ínni Koorinti máqannaasara irisée miná írirafa ínniki mundínoo márinara firaaqóo asasammásee ínni faqa dadaaqíannoo. 23Titusafa qiní faqa moodáanaki ínniara dadaaqímarifa máridanoo. Maasá qíkaqaafasaa Titusana faqa ínnee iannai fímariaqanda máridaqa Yísuna ufara suqímariasa miqandá utáaqamáqaaqanda máridaqa, ásauku mundírana aréenarana máree maríaqanda máridaqa. 24Minamúsa óonu ráifaqa ínnee misára nímuqusimarinaqa rakísinnimaqaaqa. Miqínnanara Yísuna ufara maqúsa maqusa suqímarinausa Pauroofa Koorinti máqusanaasa nimooqíranara ánoona ufa fée qiaqéera.

Copyright information for `BJR