2 Thessalonians 3

Pauroofa Teesaroonika máqannaasara naríara innaaruqiaqée qinau.

Qinée ufa qímannimiseeqa maa-ufánannai taikáanaura. Ínnee Teesaroonika máqusanaasa maasára maaqí qímasee innaaru qiaqa. Maasá karaambáiqa ufa qímannimiafanaqa ínniki ánoona kambíqoondee kai aiqáma anaamurunni miqí kai máfinoo dauní daráaninoo ánoonaikiani.

Kafáa maaqí qímasee maasára innaaru qiaqa, Ánutufa maasá mandá fasiqauqa nísaukukinaana rafíqaani sía aiqáma máqannaasa Yísuna ufa íridammia.

Karaambáiqa fannoo sía miqí marífa ámiqimmasee rakísimarifa afeeka mapukirána nimiséenoo aakaaqaindáraa fasiqasaa ititánnimaqaannoo. Karaambáiqa fannoo ínniara maasá nímuna asooárana nímidanoo ínnee maqee faqa kásooqaqee faqa sía mandá íriramau fifáranoo maasá qímannimira ufamau kai andeeqásee fifáranoo. Karaambáiqa fannoo Ánutunara nídirana ínni nímuqusaki quqáani. Ánutuna ufamau nímandakúfi maqee maqee fírana Ánutuna ásauku mundírafa ínni naunduráki quqáani.

Kadáapi rúmasee ínneeqa nárainaina máraaqee qu úfafa.

Óo maasá qíkaqaafasaauqa maasá Ánutuna ásauku mundírana karaambáiqa Yísuna áuqu rámasee ínni náaquqama nímaqaidaqa, ínniki kudoosaápee maríasa ínnee sía misá naaqa máriaqa rufíasee níanai máriaqa misá sía maasá naamúaqira ufamau fímariasa máridaqammia. Ínnee maasá óosana qáfeeusa máriafanoo, maasá ínni faqa máridaqa sía kudoosaáparausa máriqiafana ínnee maasá óosanamáu kai fúaqaana ínnee minára írimariafanoo.

Maasá ínni faqa máridaqa sía mooná nárana máaqa márirana káqi máree máriqau, feefaurúmásaidaqa máree máriqiafana. Maasá ínni nárainaina káqi naanoo qímasee eendáki faqa fáasaana faqa kadáapi rímariafana tooqaamu darusoofaqá mi-narainainná ákiaqara ímariqau. Maasá ínniara iriséeqa miqí qiqíafana, ínnee mi-oosanná qáfamasee mi-maú kai fuaqéera kadáapiriqiafana, ínnee nárainaina káqi qímifanoofau amana kái andeeqánoo máriqini, maasá Yísuna ufa qímannimiafannana ákiaqara márini, ínnee maasá fúnnamau fuaqéera kadáapiriqiafana. 10 Maasá ínni faqa máridaqa maa-ufána qímannimiafannana kafáa kafáa qímannimidaqa, faiqí moó fannoo sía aináinifa nárana faqa sía náannoo.

11 Maasá sía fífau ínni qímannimidaqa ínniki fooróopi maríasa márianara iriséeqa qímannimidaqa misá sía náriqa aináina ímariasa káqi moosá aináina deedéepi maríasa márianara íridaqa. 12 Ánutuna ásauku mundírana karaambáiqa Yísuna áuqu rámasee mi-fasiqáusa fooróopi maríasa náaquqama nímaqaidaqa misá andeeqára máriramau fídaqa náriqa nárainaina kadáapirumasee máraaqa.

13 Qiní qíkaqaafasaa ínnee andeeqásee nímariasa faqa qímannimidaqa. Ínnee ínneeqa ámiqira níra márira óosana máree maríana sía níkoo nikaamásee minnísaaqa káqi kai fuaqa. 14 Ínnee maa-akarána ásaana rímarifaqa akaqáusa mi-ufána rukíee maríasa márifaqa ínnee rufíasee níanai márifaqa misá nisaurírana máraaqa. 15 Sía misá namuqáakama nímaqaaqa níkaqaafaasaara foora náaquqama nímaqaaqa.

Pauroofa dóo taikárufa qímaqoofa.

16 Karaambáiqa narí kai naundurái asooárana óosana márifa aiqáma kari óosana óosana máriranaki ínni faqa naundurá asooárana nímiannoo. Karaambáiqa ínni aiqámausa faqa máriani. 17 Faiqí moó fannoo qiní maa-ufána ákara rúmasaifaqa qinée qeeqá qísaukunnai maaqí qímasee rafáaqafídaqa. Qinée Pauroosa ínni nímandaidaqa. Ínnee maa-akaránara moonáindi fee qifoora aiqáma pápiqa ákara rúmasee qeeqá qísaukunnai rafáaqafídaqa. 18 Ánutuna ásauku mundírana karaambáiqa Yísuna áfaarirafa ínniki máriani.

Copyright information for `BJR