2 Timothy 1

Ánutuna ufasáa ásauku mundírana Yísufa narí ufara diqiqoosá maqásaa fasiqa Pauroosa máridaqa. Yísufa náaru náaru márirana qíma afeekaikámmandee qímiraree qímaqoona mifá naríki ásauku mundírana Yísunaki máridanoo maasá minakí óonu máridaqa mi-naaru marirána máraanaura.

Óo Timooti anée qiní qifaaqasáa qímaakuara foora márianafa qinée maa-akarána aní rúmamaqaidaqa. Maasá aiqámausa faqa aiqáma ainaina faqa níkoofa Ánutufa faqa maasá karaambáiqa ásauku mundírafa Yísufa faqa narí áfaarirana faqa ámuqusifanoo nífauarana faqa aundurái asooárana faqa aní ámiani.

Pauroofa Timootinara dúfi dúfi qídanoo poodúamamaqánau.

Qiní qikeekú qikaakú sía moo áinaina rafáaqafínau Ánutuna sándufamau ámiqimasee fídaqa maqee maqee Ánutunara innaaru qímariqau. Qinée faqa miqí kai másee misá naanna rámasee maqee maqee innaaru qídaqa aníara Timootinara dúfi dúfi qídaqa. Óo Timooti aní ánoofa Eeunisa námmarifa faqa aní ataatóofa Rooisa námmarifa faqa miqandá nóori kándamasee Yísunasaa ámiqimasee mundíqa máriqau. Maqee anée faqa miqandá naanna rámasee mi-oosanná kai máree maríana qinée íridaqa qáfaidaqa. Mi-iriráfa káqi aníki márifaqa qinée íridaqa. Qinée aní quqásee fúafannana qiníara anée ikíráqoonnanara qinée minára íridaqa qinée faqa aníara dídimarifaqa kásooqaqee aní qáfamaseeqa firaaqóo asasianáurannoo. Qinée aníara firaaqóo eendáki faqa fáasaana faqa innaaru qímamaqaidaqa aníara dúfi dúfi qídaqa.

Minára qinée maaná qímamidaqa óoqai qinée sindímeera foora aní quqamáqaafananoo Ánutufa aní ámu afaaqooqana anée ámiqimasee rakísíinana kúqua. Ánutuna maraquna maasá qímufa sía mapáraairana rufíarana qímidanoo, miná maraquna fannoo afeekaikírana faqa faiqí ánaaseera ámuqusirana faqa qeeqá daundurái qimanasáa andeeqásee rakísirana faqa maasá qímidanoo.

Minára irisée maasá karaambáiqara sía asaurúa. Qinée Pauroosa minásaara karabúsaki márunnanara faqa sía asaurúa káqi paasóosamasee qímannimia. Anée faqa miqí kai ínana Ánutufa afeeka amiqainá anée faqa Yísuna ámiqira fasaasa ufara káqi aupúraranaki kéeqaa.

Ánutufa maasá asumu máreenoo maasá dáaramásee maí ániannee qímasee qiní faiqí ánaasee uqanna máriafaqée qídanoo. Sía maasá óosana moo áinaina ámiqirana qáfeenoofau maasá asumu máreenoofau. Narí írirana narí áfaarirana minánnai kai miqínoo. Óoqai maa-maqa maaqána faqa innaarúna faqa sía maru aukuanna narí mi-afaarirána maasára narí ásauku mundírana Yísunasaa quqáqoofanoo maqee maa-aukuanná maasá asumu máree marífa ásauku mundírafa Yísufa maa-maqánasaa kooroomáfinoo mi-afaarirána maasá faiqí faiqi qíminau. Ásauku mundírafa Yísufa kúqirana aru taikáseenoo narí ámiqira fasaasa ufannái káqi márirana faqa náaru náaru márirana faqa koorooínoo márifaqa máridaqa.

11 Qinée sía fífau óosana óosana aupurarana karabúsaki máridaqau máraidau, Ánutufa diqiqoofaqa maa-maqánasaa qinée miná ufa faiqí ánaasee naamúa qídaqa Yísuna ámiqira fasaasa ufa kooroománnimidaqa qímannimúnnanara aupúrarana qeeqá qifaaqasáa máraidaqa. Sía qinée minára qisaurídaqa. Qinée qeeqá írirana írira fasiqasaa mundúsauna máridanoo, qinée minára maaná ámiqimasee íridaqa, Yísufa narí afaaqóoqa qímuna sía kadíqaannoo mifá ámiqimasee dadaaqínoo fífi ínoo narí qúmira áukuana paqúriannoo. 13 Óo Timooti qiní kúqaa ánoona ufauqa anée karaambáiqa ufara foora miná áfaqamaree fúa. Maasá ásauku mundírana Yísunaki kéeqafi márifanoo mifá Ánutuna saqárikirana faqa faiqí ánaaseera nímuqusirana faqa maasá qímidanoo anée minakí mária. 14 Ánutufa óosana óosana ámiqira írirana anísaa quqáqoona miná náaquqara máraquna fannoo aníki márina mi-afeekánannái mi-oosana oosana irirána ámiqimasee rakísia.

15 Óo Timooti anée maanára írimariananoo. Misá qiní Roomma máqannaa ruúmbeeqee karabúsaki quqásoofaqa aiqáma Asia máqa maaqakina qiní qíqoondiuqa qiní minnísee quqásee sandámafiqau. Fikeerusafa faqa Qeeramookeeneesafa faqa miqandá faqa quqásee sandáqau. 16 Ooneesifoorusafa mifá kai sía qinée karabúsaki máriafannanara asaurínau. Roomma máqusai firaa taunna márufanoo qiní sía dauní paqúrinau aniréenoo qiníara fíqu fáiqu fumándee randáseenoo paqúrimandee moómoo kari qiní dadaaqímarinau. Qinée karaambáiqara mi-fasiqána áiku ásaukuara ámiqi ámiqi mánnisáannee qídaqa. 18 Qinée karaambáiqara narí qúmira faasaanasaa mi-fasiqánara áfauaannee qídaqa innaaru qídaqa. Qinée Eefeesusa máqusai máriafananoo mi-fasiqáfa Ooneesifoorusafa firaaqóo qiní dadaaqíufa márifana anée Timooti anée minára írimariananoo.

Copyright information for `BJR