Acts 1

Óo qiní qífasaafa Teeoofirusafa, Yísufa indaarú narí saika óosana araséenoo miqóoqari miná ufa óosana óosana faqa mifá áuqu ainaina faqa Ánutufa maréeqee innaarúnai quqóonara faqa qinée indaarúqaa papiqaki qinée Rukaasa ákara rúmamaqaafanafa máridanoo. Maqee maanáki dínnatinnai fúka akara rúmamaqaidaqa. Ánutufa Yísuna maréeqee innaarúnai quqóo kamúqoo mi-indaaruqaa akarána taikáqiafana. Yísufa káqi máridanoo Ánutuna náaquqara máraqunnannai narí rusandeesámumasee mároo fasiqausa naamúaqira ufa óosana óosana qímanniminau. Yísufa narí kúqiranakiqari fíndifinoo miqóoqari qaara fasiqa níku nísauku taikásee faasaana máridanoo narí faiqi námu máruqoo moómoo kari kooroomámbinoo misá faqa ufa qídanoo Ánutuna innaarúna ququsakinaa máriranara ufa qímannimimarinau. Miqímandeenoo narí kúqiranakiqari fíndifinoo akooqóo máriranara uqannífiqanau. Mi-fasannái mi-kamúqoo miná faiqi námu miná ufa írimarusa moodáanaki suqúfufanoo Yísufa misá faqa máridanoo maaqí qímasee ufa qímanniminau. Qinée innaarúnai óoru fúanaqa ínnee maa-maqusána Yeerusaree máqusa sía quqásee fífainiaqa káqi maríaqa. Qiní qíkoofa moó afeeka nímianinnanara qinée qímannimiafannana minára maaqóo kai márida rakísiaqa. Yoohaneefa nammári rúmannimaqee márifa káqi fífau nammari uqannaki moómoosa rúmannimaqee marínau. Ánutufa qúsasaa ánoona ainainaki narí náaquqara andeeqara máraqunnaki ínni rúmannimaqaannoo.

Yísufa innaarúnai óoru fínau.

Yísuna afaaqasáa áqoondiuqa miná faqa nímarusa misára niqiqoo fásiqausee qímariqau. (Yísufa máru aukuanna Roomma máqannaa kaamánna faqa sundíauqa faqa rakísinnimaqee márufanoo Yuda máqannaasa níkooqanau. Náqimásee Roomma máqannaa niqiqámásee fee maasá qeeqá rakísianáuree qímariqau.)

Minára Yísuna afaaqasáa aqoondiuqa Yísuna faqa suqúfiqa irámmiriqa qiqau. Óo Karaambáiqa maa-aukuannée yáiree fee anée Roomma máqannaa kaamánna aqiqámáseenee Isaraee máqannaa maasá nári kaamánna quqéennaree.
Yísufa mi-ufána iriséenoo qímanniminoo qinau. Óosana óosana ainaina náaru kambíqaaninna aukuannai sía ínnindifau máridanoo. Qiní qíkoofa narí afeeka rakísirana quqáseenoo, sía ínniara íriaqee qinau. Maanára kai íriaqee qinau, qiní qíkoona náaquqara andeeqara maraquna fannoo qumurée ínni náakufinaqa ínnee qiní qíqafara fasiqauqa qiníara aiqámai qímannimímarée fifáranoo Yeerusaree máqusaki máriasa faqa Yudeeaa máqa maaqaki máriasaki faqa Samaria máqa maaqaki máriasaki faqa níanai aiqáma atinnai máriasaki faqa qiní qíqafara fasiqauqa qiníara kooroo ífaranoo. Yísufa miqí qímaseenoo misá nífusaa miqóoqari Ánutufa kukéeqaranakiqari Yísuna akooqóo uqéerasoofanoo innaarúnai óorufimarufanoo asuru fannoo qumu dukúnimaseenoo misá nífusaa kai qumu áfiqee óoru fínau.

10 Misá miqóokai tatáaqa márufanoo qaara fasiqa éekara qamunna afisíraqanda miqóo misáki dadí fíndifufaqaqára kikíqiqau. 11 Miqandá maaqí qímasee aiqámausa qímannimiqau. Óo Kariree máqannaasa Ínnee nánaree innaarúnai nóori uqéerasee tatáaqa máridee, ínnee fífau miqí maríafanoo. Ánutufa Yísuna maqee ínni nífusaa uqéereeqeenoo innaarúnai múru quqéenoo dóo Yísufa maqee innaarúnai óoru fíndee kai miqíkai ínoo kásooqaqee kafáa qúmuannoo.

Mataiasafa Yudasina amana kambíqanau.

12 Miqandá miqí qímasoofaqa Yísuna faiqi námu quqásee Oorifa áaqanasaaqari Yeerusaree máqusai kafáa óoqu kéeqaqau. Oorifa áaqana sía níanai máridanoo.

(Moodáa kirometera maaqíraqoo máridanoo dínni Qufoórai miqíraqoo Yeerusaree máqusa máridanoo.)

13 Misá kafáa Yeerusaree máqusaki kéeqafiqa maqee maqee náriqá kai súqimaru maqanaki kéeqaqau. Maarínni sandáaqai rúmmaki suqíqau. Misá núqu Peetooroofa faqa Yoohaneefa faqa narí áfasaafa Yameesafa faqa Peetooroona ákaqa Andurufa faqa Firipifa faqa Toomasifa faqa Baratooroomeeufa faqa Mataioofa faqa Yameesana amaráfa Arafaeeusana ámaaku faqa Simoona amaráfa moó misá minára náriqa kaamánaikiaqeera sandanáinai qímaru fee qímariqau. Mifá faqa moó Yudasina amaráfa faqa mifá Yameesana ámaaku. 14 Minamúsa ánaasee namufaqa Yísuna ánoona Mariana faqa Yísuna ákaqaafasáa namufaqa maqee maqee suqúfida moodáa naundurasáa fídaqa innaaru qímarusa máriqau.

15 Qaaramoo fáasaana áiqaróofaqa Yísuna ufa írimarusa suqúfufaqa ufa suqírara qiqau. Misá nísaanarirafa maaqínoo máridanoo. Qísauku dínni taikásee dínni ani moodáa marasée fasiqa níku nísauku taikásee fasiqa ánaasee súqimariqau. Misá súqimarufanoo Peetooroofa misákiqari fíndifinoo maaqí qímasee qímanniminau. 16 Óo qiní qiqoónausa. Óoqeenaa ákara ánoona maasáki dóo ánoonaikinoo Yudasifa sundía maréeqeenoo soofaqa Yísuna árunara ánoonaikinoo. Óoqai náaquqara andeeqara maraquna fannoo Dafidina qímamifanoo Yudasinara ákara rúmaqoofa dóo maqee miná ánoona maasáki kambíqeenoo. 17 Yísufa Yudasina rusandeesámumandee maasá faqa aináinianifeera maréeqee maasáki quqásoofanoo márinau.

[
18 Yudasifa Yísuna qumáraseenoo Yuda máqannaasa nísaukuki quqásoofaqa misá miná ákiaqara feefaurú ámiqau. Ámufanoo mifá mi-feefaurúna mara máreenoo moo máqa feefaurúmandeenoo miqóo sáamurufanoo ámuaqu radíqufanoo árana kukupámafufanoo kúqinau. 19 Yeerusaree máqannaasa minára iriséeqa mi-maqánara fidíka máqa máaqee qídaqa. Yeerusaree máqannaasa nári ufakíqari mi-maqánara Akeeradama fée qídaqa.] 20 Dafidifa narí idí papiqaki maaqí qímasee Yudasinara óoqai Yudasifa sía kambíqooqoo maaqí qímasee ákara rinau.

Miná maqa máaqa káqi maríannoo
Moó fannoo sía amana minakí márinnaranoo.
Kafáa Dafidifa moosáa maaqí qímasee Yudasinara ákara rinau.

Moó fannoo miná amanasáa fíndifinafa miná ámaaqa maqafí máriannoo.
21 Peetooroofa Dafidina óoqeenaa ufa kíkiqa úsuseenoo maaqí qímasee narí aqoónausa miqóo suqíqa márusa qímannimidanoo qinau. Maasáki qísaukuqara taikásee qíku nooqu qaara marasée máriafanausa máridaqa. Yudasifa dóo kúqinoo moó fannoo miná ámaaqaki kambíqaa. Sía kai fífau fasiqa fannoo miqíannoo. Óoqai óosanaree Yoohanee nammári nímimarufa márunaki máru fasiqafa miqóoqari Yísuna faqa maasá faqa fífiufanoo Karaambáiqa Yísufa innaarúnai óoru fúna írufa miná qáfoo fasiqafá kai Yudasina ámaaqaki kambíqaannoo. 23 Peetooroofa miqí qímasoofaqa misá qaara fasiqa útaaqaqau. Miqandá núqu Yooseefaana amaráfa faqa Matiasafa faqa Yooseefaana amaráfa moo áuqu Barasabasifa kafáa moo áuqu Yustusafa márinau. 24 Miqóo súqimarusa miqandá núqurama quqáseeqa minée máraanau maanée máraanau qídaqa Ánutunara maaqí qímasee innaaru qímariqau. Óo Karaambáiqa Yudasifa aní ufa írimariasaki máriifa dóo narí mandá nammari námaseenoo narí sánda árinoo máridanoo. Óo Karaambáiqa maasá qaaraqánda maréeqee quqáseeqa, anée miqandákinaana yáfasiqa fee aní áididanoo fee Yudasina áikuki kambíqaannoo fee. Anée aiqáma fasiqa naundurái írimarianafa minára maasá uqaqífiqa. 26 Miqí qímasee innaaru qímaseeqa masísa quandéera foora ufanóo Matiasana uqannífiqanau. Uqannífiqasoofaqa Matiasana maréeqee Yudasina áikukina mara quqáqau.

Copyright information for `BJR