Acts 15

Pauroosa Baranabasisa Yeerusareenni óoruree Yísuna áiku ásauku irámmirirara óoru fíqau.

Yudeeaa máqa maaqakinaasa Yísuna ufa írimarusa akaqáusa Antiooka máqusai óoqureeqa Yísuna ufa írimarusara maaqí qímasee únna qídaqa naamúa qiqau. Ínnee Yísuna ufamáu kai fídaqa sía Mooseena sándamau fímariafanoo sía fáinanduqirausa sía innaarúnai asumu máreefaranoo fee qiqau. Pauroosa Baranabasisa mi-Yudeea máqannaa fasiqáusara qáoo qímasee mi-ufánara firaaqóo ufa qí qísee ufa raináqau. Miqí qímaseeqa misá moodáa ufa qímaseeqa qiqau Pauroosa Baranabasisa akaqáusa maaqóoqaraasa sáimbaqa Yeerusareenni óoru fúaqa. Óorureeqa Yísuna afaaqasáa áqoondiuqa qímannimifaqa maa-ufánara náqaa náqaa fee qífaqa óorurandee qumurée qífaqa íria.

Antiooka máqusanaasa Yísuna ufa írimarusa misá niqiqámasoofaqa Yeerusareenni óoru fídaqa óoriqaree Fooeenisia máqa maaqai faqa Samaria máqa maaqai faqa Pauroosa Baranabasisa náriqa níniunara faqa ánaamuru moómoosa quándaki Ánutufinnai ubeekoonára faqa qímannimiqa fímariqau. Yísuna ufa írimarusa minára iriséeqa firaaqóo asasiqau.

Yeerusareenni minamúsa óoruroofaqa Yísuna ufa írimarusa miqóo márusa faqa nári faiqí firaasá faqa Yísuna afaaqasáa áqoondiuqa minamúsa óoqu nífiqeeqee quqásoofaqa máridaqa Baranabasisa Pauroosa nári níniuna óosana óosana aamína máqannaa moómoosa Yísunasaa atooqéeuna mi-fasaasáusa qímannimimariqau. Farisai ámaana ufa qímarusa akaqáusa Yísuna ufa irisée miná áiku ásauku faqa miqóo Yeerusareenni máriqau. Misá faqa Baranabasina faqa Pauroona faqa ufa irisée fíndifiqa maaqí qiqau. Ánaamuru máriasa Yísuna ufara eedóo qídaqa sía káqi máriaqa maasá Yuda máqannaa fáinanduquséeqa Mooseena sándamau fídaqa innaarúna aana máreefaranoo.

Yísuna faiqi námu niqiqoo fásiqausa moómoosa misá faiqí firaasá faqa minára iriséeqa moodáanaki suqúfufaqa ufa qímariqau.

Kísaaqasaa mi-ufána qída maríqau. Miqí márufanoo níndafoosia Peetooroofa fíndifi maaqí qímasee qímanniminoo mi-ufána rafáaqafinau. Qiní qíkaqaafasaa Ánutufa sía maasá kaifau, ánaamuru faqa ámiqira fasaasa ufa irisée eedóo qiaqée qímaseenoo ínnikinaana qiní qumáreenoo, anée óosana aréenana ánaamuru qímannimia qufaqa miqímmiqiafana. Ánutufa faiqí aiqáma nímuqusa naundurá írimarifa máridanoo. Mifá ánaamuruara faqa eedóo qímaseenoo náaquqara maraquna maasá undée miqíkai ínoo misá faqa níminau. Sía maasá faqa misá faqa rainéenoofau qinau, amanamana kái fee qímasee misá mandáinaina numoo náriqa Yísuna saqárikiranannai míninnisanau. 10 Ánutufa miqímmaqaifaqa ínnee nánaree firaa qumaara maréeqee fífau misá nífaariki quqáidee. Mooseena sándufa qaaraíkinoo máridanoo ámiqirafa faqa ummaara nímarifa faqa márinara maasá qikeekú qikaakú maasá faqa qumaara táfirana sía amanaikí máriafanausa máridaqa. 11 Ínnee sía miqíaqa. Maasá Yísuna saqárikamásoofanoo Karaambáiqa Yísufa narí áfaariranannai maasá útaaqeenoo. Ánaamuru miqí kai másaafanoo dóo misá faqa miqíkaimminoo útaaqamánnimaqeenoo.

12 Peetooroofa miqí qímasoofaqa aiqáma dái̱mámbi írimarufanoo Baranabasisa Pauroosa nári níniunara óosana óosana qímannimufaqa íriqau. Miqandá ánaamurukiaqa nímarufanoo Ánutufa miqandánnai faiqí sía áuqaaqaa ira ainaina áuqusoofaqa faiqí ánaasee qáfoonara mi-ufána miqóo Yeerusareenni súqimariasa qímannimimariqau. 13 Baranabasisa Pauroosa ufa taikásoofanoo Yameesafa fíndifinoo ufa moó qímanniminau. Óo qiní qíkaqaafasaa qiní ufa íriaqa. 14 Ánutufa ánaamuruara ámuqusufanoo misákinaana akaqáusa maréeqeenoo naríara naríndikiaqeera máranau. Mi-ainainna óosanara Peetooroofa fáasai maasá dóo qímaqiminoo. 15 Dóo miqúnaki óoqai tamummáqara fasiqa ákara kooroo ináu. Minára maaqí qímaqoona.

16 Qinée kásooqaqee kafáa qúmuanauree qinau.
Qumuréeqa Dafidina áiku ásauku máaqa rapéeiara foo ínoo márifaqa kafáa qumurée usakáanaura.
Miná maqúsa úrisinoo márifaqa miná faqa rukíanaura.
17 Miqía̱naqa máaqanna máaqanna karaambáiqara randáaqeera.
Aiqáma máqannaasa náaraanausa qiní ufara ánifaranoo.
18 Qinée karaambáiqa óoqai maa-ufáusa kooroo qíafanausa máridaqa.
19 Yameesafa mi-tamummaqara ufána qímannimiseenoo naríara qinau. Qinée maa-ainainnára írunafa maaqímminoo máridanoo. Ánaamuru máriasa moo máqannaasa quándaki Ánutufinnai ubeekéemariasa sía kadáapi fífau ruanáura. 20 Sía misá miqífaqa maasá ákara kai rúmeeqee misá nímianaura. Akaqá ufa maa-ufáusa kai uqannífiqaanaura. Faiqí moó fannoo nárana maraséenoo moo únnaqira Ánutunara innaaru qímasee áminana miqíra nárana sía naaqa. Faiqí ánaasee narí úmmuari narí úmmuarinnanara sía miná máraaqa. Aandáu̱ moó anukakí ataakírarana fidíka káqi maaqínaki márinnana síamma naaqa. Fidíka káqinni tati áqusee amaqí kai naaqa, fidíka sía miná naaqa. Dóo miqí kai qímasee qímannimiaqa. 21 Aiqáma máaqanna maaqanna máriasa aiqáma Sariríqa Yuda máqannaa amaana máqakina Mooseena sándufa óoqaindari áukuana aukúana ánaamuru ásaana rúmasaidaqa qímannimimariafaqa Mooseena sándufa óosana óosana amaná írifaranoo. Maasá miqí kai íqa ánoona ainaina kai qímannimianaura.

Yísufa niqiqoo fásiqausa pása ákara rúmmeeqee maqúsa maqusa nímaqanau.

22 Yísuna ufa írimarusa aiqáma Yeerusaree máqusakinaasa Yísuna faiqi námu niqiqoosa faqa faiqí firaasá faqa Yameesana ufa irisée eedóo qímaseeqa qiqau. Maasá qeeqákina akaqáusa suqúmareeqa Baranabasina faqa Pauroona faqa Antiooka máqusa niqiqáifaqa óoqureeqa mi-ufána qímannimiaqeera. Miqí qímaseeqa faiqí moo áuqu Yudasifa miná moo áuqu Barasabasi miná faqa Sirasina faqa mara quqáqau. Aiqámausa miqandára ámiqira fasiqa andeeqáraqandee qímarusa máriqau. Misá miqandá maréeqee Sauroosa Baranabasisa nimiséeqa papiqa ákara rúmeeqee nímiqau.

23 Mi-papiqánaki ufa maaqímminoo márinau.

Ínnee Antiooka máqannaa faqa Siria máqannaa faqa Sirisia máqannaa faqa sía ínnee Yuda máqannaafau máriafanoo, ánaamuru míni maqaqoosá máriafanoo maasá Yísuna faiqi námu mifá niqiqoosa faqa faiqí firaasá faqa maasá ínni níkaqaafasaa nífasausamara ínni nímandaidaqa.
24 Maasákiqari faiqí akaqáusa nári kai ínnee unnái óoqureeqa fáinanduqira ufa faqa Yuda máqannaasa sándufa óosana óosana faqa qímannimufaqa iriséeqa qaara irirana máraqau. Sía maasá niqiqáafanau óoqu fiqau. Nári íriranannai óoqu fiqau. 25 Maasá minára iriséeqa moodáanaki suqúfiqa ufa qímaseeqa Baranabasina faqa Pauroona faqa qaara fasiqa mara quqásaafaqa miqandá faqa ínnee iannai óoqufifaranoo. Minamúsa ínni ufa qímannimiaqeera. 26 Baranabasisa Pauroosa sía kúqiranara rufíeemariasa kái paasóosamasee Karaambáiqa Yísuna ásauku mundírafa miná saiká uqéeree maríasa máridaqa. 27 Maasá indaarúqaa Yudasina amarána faqa Sirasina faqa ínnee iannai niqiqáanaqa óoqureeqa papiqakinaa ufa nóokiqari qímannimifaqa íriaqa. 28 Ánutuna náaquqara maraquna fannoo maasá faqa moodáa karákaimmídanoo. Sía maasá moómoo sándufa ínnisaa quqáanaura. Maa-qaaramoo sandufána kai ínnisaa quqáanaura. Maa-qaaramoo firaa ufa namúna kai ínni nímianaura. 29 Faiqí moó fannoo nárana maraséenoo narí moo únnaqira ánutunara dúfi dúfi qímaseenoo ínni níminafa sía miná naaqa minnísaaqa. Ínnee aiqáma aandau fidíka sía naaqa. Ataakirára aandau sía miná amaqí naaqa. Faiqí ánaasee narínni narínni úmmuarirana sía máraaqa. Ínnee máa̱ qinée qúnnainaina sía máreeqa ámiqiranaki márifaranoo. Dóo maa-ufána taikéenoo.

30 Yísuna faiqi námu Yeerusaree márusa mi-akarána rúmeeqee ufa máree marúsa nímufaqa máreeqa Antiooka máqusai óoqu fíqau. Antiooka máqusai óoqureeqa Yísuna ufa írimarusa suqúseeqa papiqakinaa ufa ásaana rufaqa írufanoo ámiqikaimminau. Miná iriséeqa firaaqóo asasamáseeqa qiqau. Maa-ufáfa maasá poodúqara ufa máridanoo fee qiqau. 32 Yísuna ufa írimarusa naríara naríara qíkaqaafasaa fee kai qímariqau. Yudasina amaráfa faqa Sirasafa faqa Ánutuna tamummáqara fasiqaqara máruqanda. Miqandá kísaaqasaa nári níkaqaafasaa faqa máridaqa poodúqara ufa faqa qímannimimariqau. 33 Yeerusareendari qúmusa máriufaqa Antiooka máqannaa Yísuna ufa írimarusa susúmmasee nímandamásoofaqa Yeerusareenni kafáannai óoru fíqau. 34 (-) 35 Pauroosa Baranabasisa miqandá sía Yeerusaree máqusai óoru fíqau káqikaaqoo kísaaqasaa Antiooka máqusai máriqau. Miqandá faqa akaqáusa namufaqa karaambáiqa ufa óosana óosana ufa ásaana rúmasee naamúa qímannimimariqau.

Pauroosa Baranabasisa rainákiqa náadu náadu fiqau.

36 Máriufanoo Pauroofa Baranabasina qímaminoo qinau. Dóo fíndifinaqa aníndiri óoqai níniaafannanakinai máaqanna máaqanna nídaqa níu̱qía.

37 Baranabasifa eedóo qímaseenoo Yoohanee amarána moo áuqu Maraka kafáa áfiqararee qímasoofanoo Pauroofa qáoo qinau. 38 Óoqai maasá faqa fínoo Pamafiria máqusaindari óonurandee ánufa sáina káqi máriani. Sía maasá faqa aiqámai nínoo kasaaqaíndari óonurandee ánufa. 39 Miqí qínoo Baranabasisandíri ufa raináqau. Ufa rainásee rakéemaki náadu náadu fiqau. Baranabasifa Marakana áfiqamaree sípaki akarámafufanoo Sipurusa áfumai narí maqá máaqai finau. 40 Antiooka máqannaa níkaqaafasaa márusa Pauroosa Sirasisa mara quqásee innaaru qímasee qiqau. Ánutuna áfaarirafa ínneeqara Ánutuna saika máree márifanoo ínniqara rakísinnimaqaani.

41 Qímasoofaqa miqandá Siria máqa maaqaki faqa Sirisia máqa maaqaki faqa óonuree anirée ídaqa Yísuna ufa írimarusa afeekaiká mánnimaqee maríqau.

Copyright information for `BJR