Acts 20

Pauroofa Maseedoonia máqa maaqai faqa Akaia máqa maaqai faqa finau.

1Eefeesusa máqusaki firaa tutuqirafa taikóofanoo Pauroofa Yísuna ufa írimarusa suqú quqáseenoo poodúqara ufa qímannimiseenoo nímandamáseenoo dóo quqásee Maseedoonia máqa maaqai finau.

2Maseedoonia máqa maaqaki óonuree anirée ídanoo Yísuna ufa írimarusa poodúqara ufa maqee maqee qímannimimarinau. Miqóo qaraasa poodúqamánnimaqaseenoo quqásee Kirisa máqa maaqai óoqureenoo miqóoqari moo qúqoona máranau. 3Pauroofa Kirisa máqa maaqaindari sípaki akarámafufanoo Asia máqa maaqai fíraree qufaqa Yuda máqannaasa irisée miná árirarufanoo moó fannoo iriséenoo Pauroona qímamufanoo rufíaseenoo kafáa Maseedoonia máqa maaqakinai fíqummákufanoo Tarooasa máqusai fíraree qinau. 4Soopateerafa Piriqusana ámaaku Beereea máqusaindaraafa Pauroona faqa finau. Aristarakusafa faqa Seekundurafa faqa Maseedoonia máqannaaqanda Pauroona faqa fiqau. Deerabee máqusaindaraafa Kaiusafa faqa finau. Tikikusafa faqa Taroofimusafa faqa Asia máqannaaqanda Timootifa faqa minamúsa Pauroona faqa fiqau. 5Minamúsa indaarú sípaki akarámafufaqa Tarooasa máqusai óonu márida maasára qífeesimariqau.

6Maasá Firipi máqusai ooruku síai feemu qoomáqamasee námammaree Tarooasa máqusai Pauroona faqa fiqíafana. Maasá moodáannai qísauku áfuru sípaki faiqée fífiufaqa Tarooasa máqusai óonuree maasára qífeesimarúsa óonu paqúriqiafana. Miqóo Tarooasa máqusai maasá aiqámausa qísauku dínni taikásee dínni óonu qaara marasée fáasaana máriqiafana.

Pauroofa Tarooasa máqusai eendáki Yísuna ufa qimannimimarufanoo kumaaráa áqufinau.

7Sariríqa eendáki maasá faqa Yísuna ufa írimarusa aiqámausa faqa moo máaqaki suqúfiqa Yísunara áfaarurira nárana naqau. Pauroofa kanánaana fuanée qu éendanaki kísaaqasaa qímannimimarinau. Mi-maqánaki tidá moó maqásaa márinoo kafáa tidá moó sandáaqai áuquqoofa máridanoo eeféeda mirínni ákinoo máridanoo. Mi-maqánaki suqímarunaki eendáki qóoma moómoo qéemarinau.

9Faiqí ánaasee sandáaqai tidásaa súqimarufanoo Pauroofa mi-eenda amuqusánaki ufa kísaaqasaa qímarufanoo kumaaráa moó fannoo uinduáqa párangasaa akarámafinoo óoqufaaqeeida ufa írimarinau. Mi-kumaaraaná áuqu Eeutikusafa márinau. Pauroofa kísaaqasaa ufa qímarufanoo Eeutikusafa áfu aunduarúfanoo káaqa faifínoo sía ufa íridanoo uinduáqasaaqari aunduaramákufanoo sáamurinoo maqásaa pautaqínoo áqufinau. Áqufufaqa misá óoqu miná uqéerasee qáfoofanoo dóo káaqa kúqinoo márinau.

10Pauroofa óoqurama mi-kumaaraana ámuaaqa áakufufanoo óonumafi káqaramma qumáreenoo qinau sía qísee qufoo qiaqa káqi máridanoo. 11Miqí qímasoofaqa misá qumurandée óoruree Yísunara áfaaruruma naqau. Áfaaruruma námasoofanoo Pauroofa kafáa qímanniminoo fífiufanoo iqáqoofanoo quqásee Asoosaa máqusai maqámau finau. Fufaqa misá mi-kumaaraaná dóo kási márufaqa áfiqamaree máaqaki múnu quqásoofanoo misá nifaaqa asasínoo ámiqi ámiqinau.

Pauroofa Eefeesusa máqusanaasa náaroofaqa aniroofanoo naamúaqinau.

13Maasá Pauroona faqa nímarusa Pauroona mi-maqusánai áiséeqa fáasai sípaki akarámafifaqa Tarooasa máqusaindari Asoosaa máqusai nammári ámuaqumau fíquakifaqa miqóo óonureeqa Pauroona áfiqarara fíqummákufaqa fiqíafana. Pauroofa naríaraa faiqí ánaasee qímannimisee kanánaana maqámau Asoosaa máqusa óonuree ínni faqa sípaki fuanáuranoo maasára qímasoofaqa maasá miqíqau. 14Maasá sípa fannoo Asoosaa máqusai óonuroofaqa Pauroona fí afiqéeqa Mitireena máqusai fiqíafana. 15Miqóoqari fíndimeeqee sípaki fífiufaqa kanánaana Kioosa máqusai óonu raqíafana. Óonu miqóo máriqa quqáseeqa kafáa eendáki sípaki fífiufaqa kanánaana Samoosa máqusai óonu raqíafana. Dóo miqóoqari fíqaree eendáki sípaki fífiufaqa kanánaana Mireetusa máqusai óonu raqíafana. 16Pauroofa sía Asia máqa maaqai kísaaqasaa kásooiraree qinau. Sía Eefeesusa máqusai kásooqianee qímasee fíqaree Yeerusareenni káqi káqi fíraree qímasee miqóo Peendeekoosa qoomaqa náraree qímasee káqi fíqarararee qinau.

Pauroofa Eefeesusa máqannaasa naamúa qufá.

17Sípa fannoo Mireetusa máqusai óonuroofanoo Pauroofa moo fásiqasaa ufa quqáseenoo anée maqámau óonuree Eefeesusa máqusanaasa Yísuna ufa írimariasa qiní qíkaqaafasaakirausa rakísirausa maí qumu Mireetusa máqusai qumu irisáifaqa fuanáuree qufanoo finau. 18Eefeesusa máqusanaasa mi-ufána iriséeqa Mireetusa máqusai óoquroofanoo Pauroofa maaqí qímasee qímanniminoo qinau.

Óoqai indaarú qinée Asia máqa maaqai óosana arasáafannaqooqari ínnee qiní óosana qáfeemarúsa máriafanoo qinée reendeenámandee ínniki Ánutuna saika faiqi máridaqa ínniki saikímáriqiafana. Yuda máqannaasa misá qiní qímaarusiranannai qikíraqárana faqa daukunu rárana faqa ínniki saikí máriafannanara qiní qímimariqau.
20Qinée ínniqa máaqakiaqa faqa maqúsa qámbaana faqa Yísunara qímannimímaríafanausa máridaqa. Qímannimidaqa sía moo dádaaqíra ufa qeeqá daundurái sía káqi máridanoo aiqáma qímannimiqiafana. 21Qinée Yuda máqannaa faqa ánaamuru faqa amanamana kái dóori runúsee qímannimimariqiafana. Ínneeqa mandáinainara rufíasee quándakinaqa Ánutufinnai nóori ubeekámáseeqa Karaambáiqa Yísuna ásauku mundírana saqárikiaqa. Miqí qímasee aauqímánnimaqée máriqiafana. Ínnee minára faqa írimariasa máriafanoo.

22Dóo maqee qinée Yeerusareenni óorufidaqa nána ainainee qiníki kambíqaannoo fee, sía qinée miná íridaqa. 23Qinée maqúsa maqúsa nímarunanoo náaquqara maraquna fannoo miqóoqaraasa qímannimisoofaqa misá quándaki qiní qímaqimufaqa. Anée Yeerusareenni óoru ráinaqa rumbárana faqa qiní qifaaqaí ifitiqnárana faqa qímifaranoo fee qímarinau. 24Qinée minára iriséeqa qeeqá máriranara fífau ainainee qímaseeqa Karaambáiqa Yísufa qímu saikánara miná taikárara kai kúqaa ánoonee qídaqa qeeqá máriranara síamma íridaqa. Ánutuna áfaarira ámiqira fasaasa ufa faiqí ánaasee kooroománnimirana miná kai Yísufa qímu saikafa máridanoo.

25Qinée ínnikiaqa Ánutuna quqúsaki márira firaanara qímannimiqa níniaafanausa márida. Maqee sía ínnee kafáa qiní dóori qíqafeefaranoo. 26Dóo qinée maqee maa-suanínasaa dóori runúsee ínni qímannimidaqa. Ínnikiqari moó fannoo Yísuna ufara dapikínafa naríndikai máriannoo sía qiníndi. 27Ánutuna írirana aiqáma uqanna qímannimiseeqa sía káqikaana qeeqá qumáreeqa aiqáma nimiséeqa. 28Ínnee faiqí ánaasee Yísuna ufa íri maríasasaa rakísimariasa máriafanoo. Ínnee asumu aandaurá fooqána rakísimariasa máriafanoo Ínnee ínneeqa márirana ámiqimasee rakísiinaqa ínneeqa asumu fírira aandaura foora ámiqimasee faiqí ánaasee rakísiaqa. Ánutuna náaquqara andeeqara maraquna fannoo ínni nísaukuki rakísirana quqáranara ámiqimasee rakísiaqa. Ánutufa narí ámaaku uqanna fidíkannai maqee maa maqánasaa adíaseenoo minánnai Yísuna ufa írimariasa feefaurúmmaseenoo dóo naríndikinoo, ínnee mi-asumu aandauná fíridaqa reendeenámandee rakísiaqa.

29Qinée fúanaqa káasau fainiara foora káaqa áfaidee maríasa anirée asumu aandau sía rauqí nímaqeefaranoo káqi naruneefáranoo. 30Ínneeqa rakísirausakinaana akaqáusa únnufa qímasee ínneeqa níkaqaafasaa maréeqee káqirunna ubeekeefáara. 31Ínnee ámiqimasee mi-ainainnára rakísiaqa. Qinée qaaramoo áukuana fáasaana eendáki daukunu réemarufaqa ínni aiqáma ámiqimasee naamúa qímariafanausa máridaqa.

32Dóo qinée maqee Ánutuna ásaukuki miná áfaarira ufaki mara ínni quqéeqa. Mi-ufána afeeka fannoo amaná ínnisaa rakísinnimaqaidanoo afeekaíkirana nimiséenoo ínni maréeqeenoo Yísunaindikiqa máriasaki misá sáimbaqa ookáamaseenoo Yísufa misá nímira sáqama qumiasana mirínni innaarúnai ínni faqa misá faqa nímiannoo. 33Qinée ínniki máridaqa sía qinée moóna ámiqira qamunnafée siruáa fee akaqáinainafée sía qiní qímuqusímarusa máridaqa. 34Qinée máa̱ qeeqá qísaukunnai aináina másaidaqa nárana máreemaria munnimmana marasáidaqa qiqá faqa nusá rakísinnimaqaidaqa maasá sía ínnindi máraqiafana. Ínnee minára ámiqimasee írimarifanoo. 35Qinée únandee kadáapiriranannai mandáikimarusa ámiqi ámiqiafana Yísufa minára maaqí qinau. Ámiqira ásasirafa sía aináina máree maríanakifau máridanoofau. Aináina dadaaqírana nímiranaki ánoona asasírafa minakí máridanoo. Ínnee sía aunúaqa moosá dadaaqírara kai iaqa.

36Pauroofa mi-ufána qímanniminoo maqásaa niqoori sáunaraaqee qufaqa aiqámausa miqímafufanoo Ánutunara innaaru qinau. 37Innaaru qímasoofaqa aiqámausa ikíraqeeqa Pauroona óonumafi káqaramma qumáreeqa ámooqaqau. 38Pauroofa sía qiní kafáa qíqafeefaree qunára firaaqóo nóori kándeeqa ikíraqaqau. Misá miqídaqa Pauroona áfiqeeqeeqa sípaki quqáqau.

Copyright information for `BJR