Acts 23

Saidéena fannoo Pauroona maréeqeenoo misáki quqásoofanoo misá nóori andeeqásee níndafamásee qímanniminau. Qiní máqooqooqari sía mandáinaina fannoo qiní qumáraidanoo Ánutuna áfusaa máridaqa.

Aanáiqikirausa misá úriqararafa Ananiasafa miná iriséenoo Pauroona aaqá márusara nísaukusamu óori itairí ámifanoo únna ufa taikáani qufanoo aaqá máriufa óori rukáminau. Árufanoo Pauroofa Ananiasana kafáa qímaminau. Ánutufa aní faqa áruannoo anée qaaraikí maríanafa máriananoo. Anée qiní ufa iriséenana Mooseena sándufa qaannai qiní qimaní maríananoo Mooseena sándufa faiqí sía ufa írirai sía áruannee qímarifana anée Mooseena sándufa ámmuqundari fídana mi-fasiqánara qiní dáruannee qímariananoo.

Pauroofa miqí qímasoofanoo Pauroona aaqá márusa qiqau. Anée nánaree Ánutuna aanáiqikirausa misá úriqararana mandá ufa qímamidanee qufanoo Pauroofa qinau. Óo qiní qíkaqaafasaa mifá aanáiqikirausa úriqararanara síamma íridaqa. Tamummáqara ákara fannoo maaqí qinoo máridanoo Ínnee sía ínneeqa máqannaasa úriqararausa mandá ufa qímannimaqaaqa.

Miqí qímasee qímannimidanoo miqóo suqíusa níndafaidanoo naríkai óonumafi írinau, máa̱ suqímariasa qaarasáa fímariasa naríara naríara rairai qímariaqanda, dínni máriasa Farisai ámaana ufa qímariasa máridaqa dínni máriasa Sadikai ámaana ufa qímariasa máriafanoo. Minára iriséenoo kaifáa firaa kari qímanniminoo qinau. Óo qiní qíkaqaafasaa qiní qíkoofa Farisai ámaana ufa qímarufa márifaqa qinée faqa minakí qídaqa. Faiqí moó kúqiranaki fíndifunara qinée minára kai maa-kootánaki máridaqa.

Miqí qímasoofaqa Farisai ámaana ufa qímarusa faqa Sadikai ámaana ufa qímarusa faqa ufa raináqau. Sadikai ámaana ufa qímarusa sía kúqirausa fíndifídammiafoo qímarusa qangiroorá faqa sía máridanoo fee qímarusa faiqí nimana faqa sía máridanoo fee qímariqau. Farisai amaana ufa qímarusa mi-ainainanamúnara kúqaa máridanoo fee qímarusa máriqau.

Misá Pauroofa Farisai ámaana qunára iriséeqa súqidaqa miqóo kai firaaqóo narí áqi narí áqimariqau. Farisai ámaana ufa qímarusa sándufa akoofásauqa fíndifiqa afeekaikámándee maaqí qiqau. Maasá sía moo mándainaina maa-fasiqa ánasaa márifaqa paqúriqa. Qangiroofée amanafée qímamifanoo fee maaqí qídanoo fee.

10 Miqí qímasoofaqa Sadikai ámaana ufa qímarusa faqa Farisai ámaana ufa qímarusa faqa firaaqóo ufa rainárafa kambíqanau. Miqí márufanoo Roomma máqannaa Saidéena fannoo narí sundíauqa qímanniminoo, ínnee Pauroona maréeqee ínneeqa quqúsaki quqásaaqa, misá miná qámbaana rammísiseefaara, qufaqa misá nári sundía quqúsaki quqásee rakísimariqau.

11 Miqí qímasoofanoo mi-eendánaki Karaambáiqa qangiroo moó fannoo qumuréenoo Pauroona óorisaa akooqóo kikíqinoo máridanoo ufa qímaminoo qinau. Pauroo sía rufíaa, paasóosia, anée maaqóo Yeerusareenni qiníara kooroo qíanandee Roomma máqusai miqíkai innáranoo. Qangiroo miqí qímaseenoo Pauroona qímamisoofanoo taikánau.

Yuda máqannaa akaqáusa Pauroona árirara ueeqóo ufana.

12 Iqáqoo kanánaana Yuda máqannaa akaqáusa Pauroona árira ufa narí qímami narí qímami suqíqau. Ufa andeeqáseeqa qíma afeekaikámásee nammári faqa nárana faqa áura̱másee Pauroona áruanee qiqau. Aruséeqa mi-karí kai nárana nammári naanée qiqau. 13 Qaara fasiqa níku nísauku taikásee Yuda máqannaa fásiqauqa kai nárana áura̱másee Pauroona áriraree qiqau. 14 Áura̱máseeqa misá nári amaana máqa aanáiqikirausa faqa úriqararausa faqa unnái óonuree qímannimiqa qiqau. Maasá nárana áura̱másee Pauroona aruséeqa ínnaaqiana nárana naanáuranoo. 15 Ínnee faqa kansóorauqa faqa Roomma máqannaa Saidéena maaqí qímasee uaqée iaqa anée Pauroona mara máree kansóorauqa máaqaki quqásainaqa maasá Yuda máqannaasa ámiqimasee Pauroona óosana írianaura. Ínnee miqí qífanoo Saidéena fannoo áfiqee fínaqa maasá aanái maará maqaséeqa Pauroona áruanaura.

16 Miqí qímarufanoo Pauroona anauqi miná áuna faiqi fannoo qumeé iriséenoo sundía quqúsaki kéeqafinoo Pauroona qímaminau. 17 Pauroofa narí árifandinna úfana iriséenoo kubóora qímaminau. Anée maa-kumaaraaná áfiqamaree Saidéeninnai múnusainanoo ufa qímamiani. Miqí qufanoo kubóora fannoo áfiqeenoo Saidéenunnai múnu quqáseenoo qinau Pauroofa qiníara maa-kumaaraaná áfiqee múnusainanoo moo úfa qímamianifee qifaqa áfiqee ánidaqa qufanoo Saidéena fannoo mi-kumaaraaná áfiqeenoo umeenní múnuseenoo irámmirinau. Nána ufaree ánidanee.

20 Miqí qufanoo mi-kumaaraafá qímaminau. Yuda máqannaasa dúna Pauroonara ámiqimandee miná ufa óosana íriraree qía. Misá aníara áfiqee múnu quqárarammifoo qídaqa. 21 Anée sía misá ufa íria, qaara fasiqa níku nísauku taikásee fasiqa aanái maará maqafíqa Pauroona árirara qía. Misá qíma afeekaikámándeeqa dóo nárana áura̱máseeqa aruséeqa náraree qía. Dóo misá maqee deedaqídaqa aní ufarámma áfeesida mária. 22 Saidéena fannoo miná iriséenoo maaqí qímasee narí qímaminau. Anée maa-ufána qiní qímaqimiannanara sía moó qímamia sáina aníkikai máriani. Miqí qímaseenoo mi-saideennáfa mi-kumaaraaná aqiqanau.

Roomma máqannaa sundía fannoo Pauroona Seesareea máqusai aqiqanau.

23 Aqiqámáseenoo Saidéena fannoo quándakinoo qaara kubóoraqanda mara quqáseenoo qímanniminau. Ínneeqara maaqímandee sundíauqa deedaqiaqa. Sundía maqámau fífandinausa qísaukuqara fasiqa níku nísauku taikásee fásiqa (200) minamúsa deedaqiaqa. Qóosasaa akarámafi fífandinausa qaaramoo níku nísauku taikásee moo fásiqa ásaukuqara taikásee fásiqa (70) faqa qóosauqa faqa deedaqiaqa. Qísaukuqara fasiqa níku nísauku taikásee (200) faaqaana faqaasa maqámau fifandinausa faqa deedaqíaqa. Dóo maqee eendákina dóo Seesareea máqusai Pauroona áfiqee óoqu fúaqa. Qaaramoo qóosa deedáqiaqa Pauroofa fúaninnana. Ínnee andeeqásee maasá firaa kiapafa Feerisafa márinnai Seesareea máqusai Pauroona áfiqee fuaqa. Miqí qímasoofaqa misá miná iriséeqa deedaqiqau.

26 Miqí qímaseenoo Saidéena fannoo Feerisana maaqí qímasee Pauroonara pásaki ámaqanau. Óo maasá ámiqira kiapafa Feerisafa, Qinée Karaudiusasa moo dúqu Risiasasa aní ámandaidaqa. Yuda máqannaasa maa-fasiqána qumáree áriraree qiafaqa qinée minára Roomma máqannaa quqúsakinaa fee qímasee óoqu rafíaeeqee qeeqá sundíauqa quqúsaki quqéeqa. 29 Qinée misá miná amoosáu máqaana oosanara randéeqa misá kansóorakina quqásaunanoo sía rumbárafa árira ainaina márifaqa Yuda máqannaa nári óosana máridanoo miqíanannái kai miná árirara qídaqa. 30 Misá qumeé maará maqasée miná árirara qiafanóo moó fannoo qumeé qímaqimifaqa anée íanannai aqiqáidaqa. Qinée miná amoosáu máqaasara aní áfusaa ínnee faqa mifá faqa andeeqáaqeera qídaqa.

31 Saidéena fannoo mi-ufána ákara rúmaseeqa sundíauqa nimisoofaqa Pauroona áfiqeeqa qóosasaa akarámafufaqa mi-eendánaki Antipatiriasa máqusai óoqu fíqau. 32 Iqáqoofanoo kanánaana níkumau fusá óoqurandee Yeerusareenni úriqau. Qóosasaa fusá Pauroona áfiqeeqa Seesareea máqusai óoqu fíqau. 33 Misá Seesareea máqusai óoquree Saidéena papiqanámu faqa Pauroona faqa firaa Kiapana ámiqau. 34 Firaa kiapafa mi-papiqána ásaana rúmaseenoo Pauroona irámmirinau anée yáindaraa fée qufanoo mifá qinau. Qinée Sirisia máqasaa kambíqaafanausa máridaqa. 35 Firaa Kiapafa mi-ufána iriséenoo Pauroona qímaminau. Aní amoosáu máqaasa qumuráifaqa aní ufa írianaura. Miqí qímaseenoo poorísa qímaminoo qinau. Maa-fasiqána maréeqee Eeroodeena firaa maaqaki quqásaifanoo márinaqa eendáki fáasaana rakísiaqa.

Copyright information for `BJR