Acts 27

Pauroofa káqi rumbáranaki máridanoo Roomma máqusai sípaki finau.

(Itari firaa maqusa áuqu Roomma. Miqóo kiapafa firaafá márinau. Miná áuqu Sisaafa Roomma máqannaa kiapausa úriqararafa firaafá márinau. Pauroofa Roomma máqusai Sisaa finnái fíraree qufanoo Feestusafa karabúsaki quqásee minní fímaru sipanara áfeesimarinau.)

1Sípa Itari máqusai fímaru sipafa moó fannoo aniroofanoo Feestusafa narí sundíauqara ufaqá misáuqa Pauroona faqa karabúsa akaqáusa faqa mi-sipánasaa quqánau. Saidéena áuqu Yuriusafa narí sundíauqa namufaqa mi-sipánaki Pauroona sáimbaqa nífiqee finau. Mi-saideenná áiku ásaukuara Augustoona ammí suqíra fée qímariqau.

2Maasá Pauroona faqa fuanná sípafa Adaramitiuma máqusaindaraa sípa márinau. Mi-sipáfa narí qumaara áinaina deedaqamáseenoo Asia máqa maaqandanai fíraree qufaqa dóo maasá akarámafuafananoo qífiqee finau. Faiqí moó Aristarakusafa Maseedoonia máqa maaqaindaraafa Teesaroonika máqusaindaraafa dóo maasá faqa finau. 3Fífiufaqa eendáki faqa fímariqau. Iqáqoofanoo Sidoona máqusai óonuraqau. Saidéena Yuriusafa reendeénidanoo Pauroona ámiqimasee qímaminau. Anée Sidoona máqusai aní áqoondiuqa márifana misá faqa óonu faiqáinaqa náranaina ámifana sípaki akarámafi máree fua qufanóo dóo miqímminau.

4Sidoona máqusai máriqa sípaki akarámafufaqa fufanoo úfai káqinaindari ánufanoo sípa sía andeeqásee fúaqaaufaqa Sipurusa áfuma qaannai óoru fíqumaki fiqíafana. 5Maasá Sirisia máqa maaqaikundanai fífiufaqa Risia máqa maaqaki firaa taunna áuqu Miraa miqóo óonuraqiafana. 6Óonuroofanoo Saidéena fannoo sípa moó paqúrinau. Areekasandiria máqusaindaraa sípa Itari máqa maaqai fímaru sipafa márufanoo Saidéena maasá aiqáma mara quqásoofaqa fiqau.

7Miraa máqusaindari moómoo faasaana eendáki mi-sipánaki anúqiqa fímariqau. Fídaqa Nidusa máqusa amummaqa óonuraafananoo úfai káqinaindari áimaree ánufaqa quándakufaqa ooruku námmari ámuaqumau Kareetee áfuma óoquree miná auqaánai sía úfai úqunnai mindánai fiqíafana. Miqóo Saramoonee máqa iroosá óorikiraqoo fíqummákufaqa anuqúseeqa Raseea máqusa amummaqa óonuraqau. Óonuree firaa farumma qáfamasee minakí kiatéenna fannoo narí sípa máree minakí kéeqafi márufanoo úfai faqa ooruku námmari faqa sía árinau. Míqunara mi-farummána áuqu mandaaqá fárummee qiqau.

9Úfai fannoo káqinaindari ánufaqa maasá kísaaqasaa miqóo máridaqa Itarinní fuanée qu áukuana taikánau. Ánutuna faqa moodáanaki qoomáqa suqáani qu áukuanafa dóo áinnaaqaramáfinoo sía amana fifaranoo. Pauroofa miná qáfeenoo maaqí qímasee naamúaqinau. 10Óo maa-fasiqáusa maasá maaqóoqari fúananoo mandáikammiannoo. Sípa faqa sípakinaa qumiasana faqa maasá faqa kurídi taikáanaura. 11Saidéena fannoo sía Pauroona ufa írinau sípa ákoona faqa kiatéenna faqa misá ufa kai írinau. 12Misá máru farummafa sía kísaaqasaa qaaramoo qúqoona amana márufaqee qímasee sáina maasá sípaki moo fárumma Kareetee máqa maaqaindaraa farumma moó miná áuqu Finisa miqóo amanamásee qáfaanaura. Miqóo fúaninna farummafa ámiqirafa márifaqa úfai sía ani márunnai ámiqimasee mandaáqai kísaaqasaa máriannee qiqau. Aiqámausa eedóo qufaqa moodáa moodáa maramarariqau.

Sípaki fímarufanoo úfai faqa aakú faqa nárinau.

13Misá Finisa fárummaki fuanée qufanoo úfai fannoo mitínai ubeekoofaqá misá asasamáseeqa ankáqa óoqu rarisámeeqee sípaki quqásee Kareetee máqa mámmaaqandanai fiqau. Misá fímarufanoo fímarunaindari úfai firaa tiá uqanna maqámau áninau. 15Mi-ufaifá sípa óoru árufaqa mara ubeekoofanóo sía amanaíkufanoo quqáseeqa úfai namufaqa káqi fiqau. 16Sípa fannoo káqikaa máqanamu miná áuqu Kauda miná fíquimarufaqa miná mandaáqa máridaqa káqikaa kanúqa sándannai rarisée máruna kadáapi rúmeeqee sípasaa ámuaqundari fatáafimamaqásee rumbáqau. Misá sípa nammári kási kásinoo qámbaana afooíandoora qímasee sánda firaaná qumáraida qámbaana qámbaana rumbée maríqau. Misá úfai fannoo fúaqa áminanoo Ribia máqasaa áruandoo qímasee séera sandáaqai máruna idukúeeqeeqa sípaki quqásee dóo kaqi úfai namufaqa fiqau.

18Úfai firaafá úqinoo nammári ámakaurufanoo sípa téeqi taaqufaqa rufíasee sípa ummaara máridanoo ukúqnaandoo qímasee sípakinaa ummaara aiqáma nammáriki áqusoofanoo sípa fannoo aufadanau. Iqáqoofanoo kanánaana kai sípa ummaara ráidanoo qímasee minakínaa ainaina óosana óosana aiqáma maréeqee ooruku námmariki áqusaqau. 20Moómoo eendaki fáasaana sía súani fásau qáfaqau minára misá fíranara randóosia. Úfai firaafá uqanna úqimarufaqa maasá qeeqá márirafa dóo taikéefoo qíafannana.

21Sípakinaasa moómoo éendaki fáasaana sía nárana néemariqau, náarara kai máriqau. Minára Pauroofa misá qámbaanai fíndifinoo qímanniminoo qinau. Ínnee qiní ufa íriaqaana Kareetee máqusaki kai máriaqaana. Miqímaseefau sípakinaa ainaina firaa feefauru áqimariana sía áqunaiqini káqi máriqini. Dóo maqee qinée ínni fuki faaki qídaqa dóo paasóosiaqa. Sía ínneeqa moodáa kúqifaranoo, sípa kai kúquannoo. Qinée Ánutunaindi máridaqa miná aináinira faiqi máridaqa. Eendá éendaki Ánutuna qangiroo moó fannoo qinée márunannai anirée qímaqiminoo qinau. 24Pauroo sía rufíaa, anée kúqaa Roomma máqannaa firaa kiapana óorisaa kikíqinnaranoo. Ánutufa narí ámiqira óosana uqéereeqeenoo aiqáma sípakimáriasa aní áminoo, sía moó fannoo kúquannoo. 25Dóo maa-faiqisá sía nímuqusa tíakiaqa, paasóosiaqa. Ánutufa qímaqimindee kai íannoo. Qinée miná irisée miná saqárikidaqa. 26Káqikaa qóo úfai fannoo maasá sípa maramáree káqikaa maqanamu raqúramiannoo.

27Maasá qísaukuqara taikásee qíkunni óoqu qaara faqa qaara faqa éendaki fáasaana Meediteeraneeana ooruku námmari ámuaqumau fímarufaqa booskúrauqa óonumafi íri iseeqa eendá ámuqusai Óo maasá moo máqa maaqa adeedí aniréeqa qímaseeqa sánda kísaaqa marasée ummaararoó áinaina miná átisaa qusúsee nammáriki áqusee qáfaqau. Nammári 120 amana meemái farúma difukúnaki márufaqa qáfaqau. Kafaa moosáa óonuree kafáa áquseeqa qáfaqau. Nammári 90 amana káqikaa faruma ausaanáikiranaki kai márinau. 29Booskúrauqa miná qáfamasee eendáki óonisaa áruani qímaseeqa sípa áraqeemusáaqari qaara faqa qaara faqa qankáqa quqásoofanoo maqá qumároofaqa misá iqáqaranara innaaru qímariqau. 30Booskúrauqa maasá sípa óorinni qankáqa quqáidee únna qímasee kanúqa maréeqeeqa nammáriki quqásee minakí áqufi quqásee sandáaneera ímarufanoo Pauroofa qáfamasee Saidéena faqa sundíauqa faqa qímanniminoo qinau booskúrauqa sía márifaqa ínnisaimbaqa aiqáma kúquanauranoo. Booskúrauqa kanúqaki quqásee fídamia qufanoo sundíauqa kanúqa sánda ateékamufanoo kanúqa nammáriki pautaqí áqufinoo káqisamu finau.

33Iqáqarara káarimaqóofanoo Pauroofa fuki faakí qídanoo qinau. Ínnee qísaukuqara taikásee qíkunni óoqu qaara faqa qaara faqa eendáki fáasaana sía née maríasa máriafanoo. Kísaaqa kamusaqa ínnee sía moodáa ainaina naafanoo. 34Qinée ínni fuki faakí qídaqa dóo nárana marasée námasee sía kúqua. Sía ínniki moó fannoo abandíakaannoo. Ínnee káqi rumbáqa márifaranoo.

35Pauroofa miqí qímaseenoo féemu maraséenoo ruqí ruqímaseenoo innaaru qímaseenoo noofaqa tautúmma qáfeeqa ámiqimmi ifoo qímaseeqa maasá faqa aiqámausa naqau. 37Maasá mi-sipánaki márusa nísaanarirafa maaqímminoo márinau 276 fasiqa moómoo uqanna máriqau. 38Aiqáma námasee nímuaqu mámbufaqa ráisa fooqáaira nárana miná áuqu uíta misá miná maréeqee ooruku námmariki téeqimasoofanoo sípa aufadanau.

Sípa fannoo Marata maqá múnu raqúru ámufanoo sípa rakéekaa inau.

39Iqáqoo kanánaana maqá áfaisaa máridaqa yámaqa maaqanai fee márida fee qída sía írimariqau. Booskúrauqu qáfoofanoo nammári múqufi rainée marúqoo óonureeqa dínni káqi óoqu fímarunna minníseeqa dínni fárumma óonu mándi marúnaki kéeqararee qímasee amanamándee qáfaanee qiqau. 40Miqí qímasee ankáqa sánda ateekásoofanoo aiqáma nammáriki áqufiqau. Sípa sitíaqa ainaina rafáaqa fímaru sandana aukúsoofanoo akaqáusa miná áti qumáróofanoo séera sípa óorisaa uqéerasoofanoo úfai fannoo miná árinoo rariséenoo óorindari fínoo mi-farummánaki kéeqafiqa maqá raqúramianee qiqau. 41Sípa fuanéera máseenoo áaqamakufanoo núkuda raqúraminoo óorindari utúsamafi kásooinoo márinau. Áraqeemu nammári fannoo firaaqóo áridanoo rukákamumásanau.

42Sundíauqa karabúsa fasiqauqara nammári ámuaqumau fímariasa quqásee sandée foo qímasee aiqáma nárú taikáaneerufanoo Saidéena fannoo Pauroonara ámuqusufanoo qáoo qímaseenoo qinau. Nammári ámuaqumau fímariasa sípasaaqari nammáriki áqufi nammári amuaqumau máqee fuaqa. Sía nammári ámuaqumau fímariasa sípa rufádaairana áti aina qumáreeqa minásaa óoqu marifi fuaqa. Dóo maasá miqímandeeqa aiqámausa maqásaa fiqau.

Copyright information for `BJR