Acts 3

Peetooroosa Yoohaneesa áiku mandáikirana andeeqáisaqau.

Misá miqí márufanoo moo fáasaana Peetooroosa Yoohaneesa Yeerusaree náaquqara amaana maqaki innaaru qírara óoru fíqau. Yeerusaree máqannaasa eenéemarufaqa amaana máqaki kéeqafi innaaru qímariqau. Peetooroosa Yoohaneesa eenéemaru innaaru qíraree qímasee kooqíki óoru kéeqafi faiqí moó qáfaqau. Óoqai maqasoonákiqari áiku mandáikirafa sía aináinirana amana márufaqa narátiuqa aindúsumaraidaqa maqee maqee amaana máqa kooqíki quqásee márufanoo miqóo máridanoo munnimmara innaaru qímarufaqa akaqáusa moodáa moodáa ámimariqau. Qimudáoo qusá qaaraqánda amisoofanoo minánnai náranaina feefaurúmma néemarinau. Amaana máqa kóoqiuqa moómoo márinau. Núqufaqaa kóoqiuqa máriqau. Mi-fasiqána quqée marú kooqinara ámiqira kooqí fee qímariqau. Mi-aiku mandaikiráfa mi-amiqira kooqínaki óoqu marifufanoo Peetooroosa Yoohaneesa minakí kéeqafufanoo mi-fasiqáfa miqandára munnimmara qímiaqee qinau. Innaaru qufaqa miqandá mi-fasiqána óoriki qáfamaseeqa Peetooroofa qinau. Anée maaqandá dóoriki qíqafaa qufanoo mifá aináina qímidaqiaafoo qímaseenoo miqandá nóoriki níndafanau. Níndafamásoofanoo Peetooroofa kafáa qímaminoo qinau. Sía qinée munnimma márisa máridaqa. Qinée moodáa ainaina márisa miná kai aní ámianaura. Yísufa ásauku mundírafa Nasareetee máqusaindaraafa qiní qímuna miná aní ámidaqa miná áuqusaa aní qímamidaqa anée fíndimeeqee fúa.

Peetooroofa miqí qídanoo mi-fasiqána ásauku uqannai ásauku qumáreenoo dadaaqufanoo aaqee uqanna miná áiku faqa miná áiku aummeena faqa afeekaíkufanoo rútaqinoo fíndifumakufanoo óonuree anirée inau. Miqímakufanoo Peetooroosa Yoohaneesa faqa amaana máqaki kéeqaidanoo Ánutunara susúqira idi ráidanoo rafúsaki rafúsaki ídanoo nídanoo kéeqeemárinau.

Faiqí ánaasee miqóo moómoosa máriusa mi-fasiqána qáfamaseeqa miná nírana faqa Ánutunara susúqira idi rárana faqa qáfamaseeqa qiqau, Óo ámiqira kooqíki óoqufaaqee munnimmara innaaru qímari fasiqafa dóo fíndifinoo ámiqimasee nídanoo. Miqí qímasee taútufanoo náaquqoofaqa miná andeeqára oosanara randáqau.

Peetooroofa mi-fasiqána andeéqaisóo oosanara qímanniminau.

11 Mi-fasiqáfa Yoohaneesa Peetooroosa firaaqóo dúfi dúfi qímaseenoo miqandá qumáreenoo miqandá faqa máaqa tidá átimau Sooroomoonaindi fee qímaru maqana átimau ákaraqau. Faiqí ánaasee moómoosa miná qáfamasee sandéeqa óonu mi-atimaú rafúsu uqárumasee miná qáfeemarúfanoo náaquqanau.

12 Peetooroofa moómoosa níndafamásee maaqí qímasee qímanniminau. Isaraee máqannaa fasiqauqa. Ínnee maa-ainainná qáfamasee nánaree tautíqa maasá tatáqaidee. Ínnee maasára náriqa afeekannái fee náriqa andeeqáranannai fee maa-fasiqána fíndifumaseeaafoo qídee. Óo sía uqanna. 13 Abarahaamana faqa Isakeena faqa Yakooboona faqa misá Ánutufa maasá qikeekú qikaakú Ánutufa maa-fasiqána uqéereeqeenoo narí áfaaqa aréenarana narí aináinira faiqi Yísuna ámifa máridanoo. Ínnee miná maréeqee maasá faiqí firaasá nímufaqa misá maréeqee Piratoona ámufaqa ínnee miqóo áruaqee qiqau. Piratoofa idukíraree qufaqa ínnee afeekaikámasee áruaqee qiqau. Yísufa mifá áaduma ámiqimandee andeeqárafa uqanna márufaqa ínnee faiqí nárimarunara Piratoonara idukú qimiséenana Yísunara káqi kúquanifee qusá. Ínnee miqí qímasee asumu márira óosana faqaana arusaqau. Ánutufa miná kúqiranakinaana uqéera quqásoona maasá qáfeemarúnausa máridaqa. Máa̱ Yísuna áuqu afeeka fannóo kai maa-fasiqána afeeka ámifanoo fíndifinoo nídanoo. Ínnee maqee qáfeemaria ainaina Yísuna áuqu faqa narí áuqusaa írirana rusíranannai faqa kambíqeenoo. Yísunasaa írirana rusíranannai maa-fasiqána andeeqásaifanoo aiqámausa nífusaa fíndimeeqee nídanoo.

17 Qiní qiqoónausa ínnee faqa ínni faiqí firaasá faqa sía írirana íriqa Yísuna áriqau. 18 Óoqai uqanna Ánutufa narí tamummáqara fasiqauqa ufannái narí ásauku mundíranara kásooqaqee aupúraannoo fee qímaqoona dóo ínni nísaukuki quqásoofaqa miná ufa ánoonaikiqa Yísuna áriqau. 19 Ínnee minára irisée ínneeqa mandáinainara nímeesuqusee Ánutufinnai nóori ubeekáifanoo ínni mandáinaina numoo rukánnisainaqa innaarúnaindaraa asooárana Karaambáiqa áfusaaqaraana ínni nímiannoo. Óoqai Ánutufa ínniara iriséenoo narí ásauku mundírana Yísuna máreenoo kaifáa kásooqaqee ínnee iannai aqiqáinanoo qúmuannoo. 21 Mifá Yísufa ásauku mundírafa káqi innaarúnai máriannoo. Kásooqaqee Ánutufa aiqáma ainaina fúka kambíqaaninna aukuannai mi-kamúqoo Ánutuna tamummáqara fasiqauqa óoqai qímaqoomáu kai ásauku mundírafa kafáa qúmuannoo. 22 Óoqai Mooseefa maaqí qímasee qímaqoofa máridanoo.

Karaambáiqa ínni Ánutufa ínni tamummáqara fasiqa moó nímiannoo. Qiní Mooseesa daanna réenoo ínnikiqari kai moó fannoo kambíqaannoo. Kambíqainaqa ínnee miná ufara eedóo kai qiaqa.
23 Ínnikiqari moó fannoo sía mi-tamummaqara fasiqána ufa írifanoo faiqí ánaaseekinaana qumáree káqinni quqásee miqóo kuqáruannoo.
Peetooroofa Mooseena ufa miqí qímannimiseenoo naríara quandáfinoo maaqí qinau.
24 Óoqai Ánutuna tamummáqara fasiqauqa moómoo márufaqa náaru kambíqaaninna ainainara tamummaqasée ákara riqau. Misakínaana moo támummaqara fasiqa Samueerafa faqa márufanoo, narí faqa naránaaqiana kambíqoosa faqa moodáa kari ufa qunánnai máa̱ maqee kambíqeemari ainainara kooroo inau. 25 Ánutufa narí tamummáqaranauqannai maasá qikeekú qikaakú qíma afeekaikírana óosana óosana nimiqoofa máridanoo. Sía misára kaifau quqánau. Maasá faqa náida qímidanoo. Ánutufa maaqí qímaseenoo Abarahaamánasaa qíma afeekaikínoo qinau.

Aní áiku ásauku misánnai maa-maqa maaqánaki maamaqánasaaqaraasa misánnai ámiqi ámiqimánnisaanaura.
26 Miqí qímasee Ánutufa Abarahaamana faqa qímafeekaíkunara írinoo narí aináinira faiqi Yísuna mara máreenoo ínni maqanníminau. Aiqáma maqásaaqaraasakina ínniki náaree quqásee ínneeqa mandáinaina nímeesuquaqeera ámiqi ámiqirana faqa nímianifeera.

Copyright information for `BJR