Acts 6

Dínni qísauku taikásee dínni qaaraqánda ani marasée fasiqa Yísuna faiqinámu dadaaqíqau.

1Miqóoqari káqikaaqoo kísaaqasaa máridaqa faiqí ánaasee moómoo uqanna Yísuna ufasáa atooqáqau. Misákiqari Kirisa ufa qímaru Yuda máqannaasa faqa nári Yuda máqannaasa faqa tínoo taanóo rida máriqau. Niqiqoo fásiqausa maqee maqee munnimma rainásee sárauímarusa nímidaqa Kirisa ufa írimarusa nári adeedaana ánaaseeuqa sía andeeqásee munnimma nímunara ufa qiqau. Maqee maqee munnimma rainásee nímunnara ufa qiqau. 2Qísaukuqara taikásee qíkunni óoqu qaara marasée Yísufa niqiqoo fásiqausa óoqeenaasa Yísuna ufa írimarusa aiqáma suqúsee qímannimiqa qiqau. Maasá Ánutuna ufa qímannimira saika minnísee quándaki munnimma rainá nímira saika márarafa sía andeeqánoo máriannoo. 3Óo maasá qiqoónausa ínniki qísauku dínni taikásee dínni ani qaara marasée fasiqara randáaqa. Írirana faqaasa, andeeqára fasiqausa Ánutuna náaquqara maraquna qumbíqarausá kai mara míni qímifaqa maasá munnimma rainára sáika misásaa quqáanaura. 4Maasá qeeqá Ánutuna ufa nímirana faqa innaaru qírana faqa mi-moodaa saikána maasáindi máriannoo. 5Aiqámausa mi-ufána iriséeqa ámiqira fee qímaseeqa nári rusandeesámumandeeqa qísauku dínni taikásee dínni qaara marasée fasiqa quqásaqau. Misá núqu moo fásiqa áuqu Sateefeenafa firaaqóo Yísunasaa írirana rusímari fasiqafa náaquqara andeeqara maraquna qumbiqárafa márufa márinau. Moo fásiqa áuqu Firipafa, moo fásiqa áuqu Parookoorusafa, moo fásiqa áuqu Nikanoorafa, moo fásiqa áuqu Timoonafa moo fásiqa áuqu Parameenasafa moo fásiqa áuqu Nikoorausifa Antiooka máqusaindaraafa ánaamuru fasiqa misáki animárufa márinau. 6Miqímandee fásiqa namu máree míni niqiqoo fásiqausa naaqá míni quqásoofaqa misá innaaru qímasee nísauku níkiaaqa quqáseeqa nifaaqóoqa qímasoofaqa náriqa saika munnimma rainée marú saikánai fufaqa niqiqoo fásiqausa nári saika Ánutuna ufa qímannimira saikái fiqau. 7Miqímandoofanoo dóo Ánutuna ufa aiqámai dáraaninau. Yeerusaree máqusai Ánutuna ufa írimarusa moómoo kámambiqa fímariqau. Amaana máqasaa aanáiqikirausa faqa moómoo Yísuna ufara kúqaa ánoonee qímasee minásaa atooqée maríqau.

Sateefeenana rumbóo ufana.

8Sateefeenafa náaquqara andeeqara maraquna fannoo minakí qumbíqafunara Ánutufa firaaqóo dadaaqufanoo faiqí ánaaseeki óosana óosana ámiqimánnimaqara ainaina náaquqee marú ainaina faiqí ánaaseeki áuqee márufaqa qáfeemaríqau. 9Yuda máqannaasa Yeerusaree máqusaki akaqáusa áaduma sukúraki kéeqeemariasa náriara maasá aufadára irirana faqaasee qímariqau. Misá akaqáusa Yuda máqannaasa Sireenee máqa maaqaindari mi-sukuránaki kéeqeemáriqau akaqáusa Areekasandiria máqusaindari ani kéeqeemaríqau. Akaqá Yuda máqannaasa káiqeesa Sirisia máqusaindari ánusa faqa akaqáusa Asia máqannaindari ánusa faqa moodáaqoo suqúfufaqa Sateefeenana ufara qáoo qímasee ufa rainée maríqau. 10Ánutuna maraquna fannoo Sateefeenana ufa írira dadaaqunára sía miná ufa rafáaqafirana amana. 11Mi-aufadara irira fasiqáusa miná qáfamaseeqa mináfasaasa qímaseeqa qumeé firaa munnimma áuqusee úmmuarira fasiqausa nímiqa qiqau. Sateefeenara ínnee únna ufa óosana óosana uqéeraaqa qufaqa misá Sateefeenana únna qímasee maaqí qiqau. Mifá Mooseena sándufara faqa Ánutuna ufara faqa qáoo qídaqa qifaqa maasá íridaqa.

12Míqunara faiqí ánaasee faqa faiqí firaasá faqa Mooseena sándufa írimarusa faqa níranaqoofaqa áanoomasee Sateefeena óonu qumáreeqa amaana máqa rakísirausa ufa súqimarunakina míni quqáqau. 13Quqásoofaqa únna ufa qímaru fasiqausa nífiqee aniroofaqa maaqí qímasee Sateefeenara únna qiqau. Maa-fasiqáfa maasá náaquqara amaana maqara faqa Mooseena sándufara faqa maqee maqee mandá ufa qímarifa máridanoo. 14Mifá maaqí qufaqa maasá íriafanafa máridanoo. Mifá maaqí qinau. Máa̱ Yísufa Nasareetee máqusaindaraafa maa-amaana maqána rapéepaamma áqusee Mooseena sándufa óosana óosana maasá qímu úfana maréeqee áadumai quqásainaqa maasá moomáu fuanóo qídaqa. 15Aiqámausa suqíqamárunakiqari nóori Sateefeena funnai kai ubeekámafi qáfaqau. Miná óori aiki qangiroo óoriara foora káaqa qéemarufaqa qáfaqau.

Copyright information for `BJR