Colossians 1

Ínnee Kooroosee máqannaakiqari akaqáusa Ánutuna faiqinámu máriafanoo ínnee faqa maasá faqa ásauku mundíranaki máridaqa miná úfa íridaqa moodáa fidíkara foora máridaqa ásauku mundíranasaa atooqárausa máriafanoo qinée Pauroosa qeeqá qíkaqaafasaa Timootinandíri ínni Kooroosee máqannaa nímandaidaqa.

Ánutufa qufanoo ásauku mundírana Yísufa diqiqámaqaifaqa faiqí faiqi máridaqa ínni nímandaidaqa. Maasá qíkoofa Ánutufa narí ámaaku maasára áfaarinau mi-afaarirána faqa ínni naundurá asooárana faqa ínni nímianifeera qímannimidaqa.

Pauroofa Kooroosee máqannaasara dúfi dúfi qídanoo.

Maaqandá ínniara innaaru qídaqa maqee maqee maasá karaambáiqa Yísuna ásauku mundírana ákoona maa-maqánasaaqari innaaru qunáfa Ánutuna áfusaa ínniara dúfi dúfi qídaqa innaaru qímannisaidaqa. Maaqandá ínnee Kooroosee máqanaa akaqáusa Ánutuna ásauku mundíranasaa atooqáqa márianara iriséeqa ínnee Ánutuna úfa írimaria fasiqa anaaseesa aiqámausara nídimarifaqa dadaaqí maríanara minára faqa iriséeqa Ánutuna dúfi dúfi qímamaqaidaqa. Ánutuna ánoona ufa ámiqira fasaasa ufa faiqí moó fannoo indaarú ínni maqúsai qímannimufaqa mi-ufána náaru kambíqaaninna óosanara írimariafanoo. Ínnee náaru máreefandínna ainaina Ánutufa innaarúnai quqásee afeedídanoo. Ínnee miná innaarúnai márararee qímasee asasammásee áfeesidaqa Yísuna saqárikidaqa miná áidimariafanoo.

Ínnee indaarú Ánutufa narí ámaaku maasára áfaarinoo árunara ínnee mi-afaariránara iriséeqa kai mi-fasaasa ufána aiqáma maqa maaqai daráanidanoo naundurákinaa ámiqi ámiqirana faiqí ánaaseeki kambíqaidanoo. Eepafaraasafa maasá moodáa saikímarifa ásauku mundírana ámiqira saikímarifa qiní qimanasáa ínniki fímarufa máridanoo mifá kai mi-fasaasa ufána ínni Kooroosee máqannaasa qímannimufaqa íriqau. Mifá ínniara Ánutuna maraquna fannoo aiqámausara áidirana ínni nímufanoo qímaqimifaqa íriqa.

Pauroofa Kooroosee máqannaasara Ánutuna íriranamau fuaqéera qímannimidanoo.

Maasá indaarú mi-ufána iriséeqa miqóoqari ínniara innaaru qídaqa. Maasá ínniara Ánutuna íriranamau fifándinnanara ínni naundurái qumbiqáanifeera innaaru qídaqa. Ánutuna maraquna fannoo ními írirana faqa íriranamau fíra írirana faqa ínni naundurái qumbiqáanifeera minára faqa innaaru qímannisaidaqa. 10 Ínnee miqí márifaqa Karaambáiqa undée kai ímarifaranoo mifá maqee maqee ínni márirafa ámiqira márira máridaqa ámiqisaa kambíqaaqeera Ánutuna írirafa faqa firaaqóo ínniki kambíqaannoo.

11 Ánutuna idaaqíra éeraarirafa minásaaqari áninna afeekafa aiqáma ínni faqa afeeka níminaqa ínnee óosana óosana mandáinaina ummaara fannoo ínnisaa kambíqainaqa ubiqafi reendeénidaqa asasammásee máraaqeera. 12 Ánutufa narí aréenara máqusaki innaarúnai narí nímianinna ainaina afeedímarina quqáseenoo ínnee óoru marasée miqóo máriaqeera ínni mandáinaina dóo áfaqaseenoo ínnee minára faqa iriséeqa innaarúnai níkoonara asasammásee dúfi dúfi qímamaqaaqa. 13 Maasá mandá márira asukunakí márunanoo maasá rafáaqafuqisaifaqa márunanoo Ánutufa qumáreeqeenoo narí faiqi uqanna quqúsaki quqánnisaifaqa ámiqiranaki máridaqa. 14 Mi-faiqínannai uqanna maasá mandáinaina númoo minníqiseenoo minakínaana mara idukúqiseenoo.

Yísufa Ánutunara múdukatia kooroománniminau.

15 Ánutufa kukéeqarafa márifanoo ásauku mundírafa miná ámaaku miná amammana ususéenoo máridanoo narí ákoona óori áfiri marasée miná nírana miná márirana miná maraquna maasáki dóo andeeqásee narí ákoonara kooroo ídanoo. Mi-asauku mundiráfa aiqáma ainaina Ánutufa áuquqoona úrinaaqararafa máridanoo. 16 Miná ásauku mundíranasaa Ánutufa aiqáma ainaina innaarúnai márina faqa maqásaa márina faqa akooqóo mária ainainausa faqa kukéeqara ainainauqa faqa Ánutuna ámiqira qangiroouqa faqa misá namuqáa áfaanauqa faqa nári rakísirausa faqa nári úriqararausa faqa nári faiqí firaasá faqa mi-aiqama ainaináusa ásauku mundíranannai Ánutufa áuquseenoo miná áummooki mara quqánau. Miná amooqímasee mináindikiaqeera Ánutufa minánnai áuqusee narí áminau.

17 Ásauku mundírafa sía maqee káifau márida óoqai márufa maa-maqánasaa ainaina sía máruqoo márufa márinau. Dóo maqá faqa minásaa mári ainainausa faqa innaarúna faqa minakínaa ainainauqa faqa ásauku mundíranaki kai ookáamambida máridanoo. 18 Ásauku mundírafa narí ufa írimariasasaa rakísidanoo qímannimidanoo. Mifá misára narí adakée qídanoo naríara misá níkiaqafee qídanoo rakísinnimaqaidanoo. Mifá aiqáma ainaina úriqararafaikirara kúqirausa fíndifimari aana afisúfa máridanoo narí miná ufa íri maríasara narí adakée qímarisara misá kafáa minásaaqaraana aiqáma káqi márira kásirana máraidaqa minára aiqáma ainaina úriqararafa máridanoo. 19 Ánutufa narí kai narí ámaakuara asasamáseenoo qiní daanna rámafi úrinaaqaramáfi máriannee qufanoo máridanoo. 20 Ánutufa qufanoo narí ámaaku fannoo aiqáma ainaina maqásaa qaraana faqa innaarúnaindaraana faqa maramáreenoo narí ákoona aaqá múnu moodáaqoo quqásoofanoo áqoondikamannimaqanau. Narí ámaaku ásauku mundírafa narí fidíka adíoonannai asooárana quqásoofaqa moodáanaki kiqa máridaqa. Miqúnara ásauku mundírafa aiqáma ainaina úriqararafa máridanoo.

21 Óoqai indaarú ínnee Ánutuna namuqáakama amaqaqau. Ínni óosana fannoo mandá márira márufanoo ínni írirafa mandá írirana kai írimarunara Ánutufa ínni futeé áquseenoo namuqáakámma nímaqanau. 22 Ínnee minní márufanoo Ánutufa maqee ínni maréeqeenoo narí aaqá quqáseenoo moodáanaki kinau. Narí ámaaku narí afaaqa uqanna kúqiranannai kai ínni moodáanaki áqoondikamannimaqanau. Ánutufa sía fífaufau miqínau. Ínni márirafa nírafa ámiqira márira ándeeqara nírá nuaqéera miqínau. Yísufa ínni maréeqeenoo Ánutuna áfusaa kooroomásainaqa ínniki sía moo nífasaasa ufa márianifeera núqu síaisa máriaqeera minára Ánutufa ínni áqoondikammannimaqanau. 23 Óoqai indaarú Yísuna ámiqira fasaasa ufa iriséeqa náaquqarana taikáseeqa innaarúnai fírara asasída máridaqa. Miqída mi-nimuqusa idaaqirána sía kaifáa rufíarana máraaqa. Ínni írirafa maqee maqee Yísuna mapukúsee miná faakánara foo másee mundíqa mári iaqa. Mi-amiqira fasaasa ufána aiqáma máqa maaqai qímannimisoofaqa qinée Pauroosa miná rumbára faiqi máridaqa miná saiká faiqi máridaqa.

Pauroofa naríara Yísuna áiku ásuaku aináinamánnisee marí fee qídanoo.

24 Qinée Yísuna áufakiana qímannimunnanara minára qinée Roomma máqannaa rumbáranaki máridaqa, ínnisáara faqa rumbáqa máridaqa. Qinée sía minára dóori runídaqa, dóori quqásee asasída máridaqa. Yísufa narí áiku óosana máriasara aunírira saqarisaa aupúrarana máranau. Miná aupúraranaki qinée faqa kéeqeeqa ookáamambiqa rumbáqa máridaqa aupúraidaqa Yísunaindi fee qímasee káqi asasídaqa.

25 Yísufa narí áiku óosana máriasara Ánutuna adakára foora máriaafoo qída núqu ráidanoo. Ánutufa qufaqa qinée Pauroosa mi-nidaka saikirána saikímaruna fasiqausa máridaqa ínni dadaaqiaqéera aiqáma maqannai óoqai Ánutuna ufa kukéeqara ufa ámiqimmandee kooroo iaqéera mi-saikánaki Ánutufa qiní quqáqisáifaqa máridaqa. 26 Ánutuna ufa kukéeqara ufa maaqí qínoo máridanoo. Ánutuna ásauku mundírafa Yísufa ínni faiqí faiqi naundurái máridanoo. Miná óosana maaqímminoo máridanoo kásooqaqee ínnee faqa innaarúnai óoruree Ánutuna aináina adíafaa íra ainaina miná úriqararana afaaqa aréenarana káaqa qárana máreefaranoo. Ánutuna kukéeqara ufa dóo miqínoo máridanoo. Mifá mi-ufánara maaqí qínoo. Máa̱ qiní ámiqira kukeeqara ufa úriqarara kukeeqara ufa aiqáma máqannaasa íriaqeera qiní qíku qísauku máriasa kooroománnisaanauree qínoo. Ánutuna ásauku mundírafa faiqí faiqi naundurái máriranara faqa innaarúnai miná faqa óoru máriranara faqa mi-ufaqandára óoqaindari kukéeqeeuna maqee kámuqoo dóo kooroomásee narí áiku ásauku qímanniminoo.

28 Maasá maa-namúsa ásauku mundíranara aiqámausa qímannidaqa. Maasá aiqáma fasiqa ánaasee aaquqímannimaqaidaqa naamúaqidaqa ámiqira íriranannai ásauku mundíranasaa atooqéemariasa sía faiqi ánaaqiara foora iaqéera faiqí firaasára foora máfiqa Yísunaki mapukúsee máriaqeera qímannimidaqa. 29 Maa-namúsakiqari qinée Pauroosa firaaqóo kadáapiridaqa qímudaanaiqidaqa fuki faakí qídaqa qímannimidaqa. Sía qeeqá afeekannáifau miqídaqau Yísuna afeekannái miqídaqa faiqí firaasára foora máriaqeera miqídaqa.

Copyright information for `BJR