Ephesians 3

Pauroofa narí ánaamuruki saikíranara qídanoo.

Qinée Pauroosa minára iriséeqa ínni Eefeesusa máqannara Ánutufinnai innaaru qídaqa. Qinée ínni ánaamuruara qímannimunnana ákiaqara ásauku mundírana Yísuna rumbáranara foora Roomma máqannaasa rumbáranaki márunausa máridaqa ínniara innaaru qídaqa. Ánutufa narí áfaariranannai ínni ánaamuru dadaaqiaqée qímasee qímunara ínnee ámiqimmandee minára írimariafanoo. Ánutufa Yísunara óoqaindari kukéeqanoo márunara maqee áukuana qiní kooroomáqimaqeenoo. Qinée maa-pasánaki káqikaaqoo minára ínni qímannimiqa, ínnee miná ásaana rúmaseeqa íriqa qiníara ásauku mundírana kukéeqara írirana ámiqimmandee íridanoommifoo qifáranoo.

Óoqai narí kukéeqara írirana Ánutufa sía kooroo inau, dóo maqee narí maraqunannái ámiqira niqiqoo fásiqausa faqa tamummáqara fasiqauqasaa faqa qímanniminoo. Miná kukéeqara ufa maaqímminoo máridanoo. Yuda máqannaasa Ánutuna ámiqi ámiqiranaki máridaqa, Yísuna ámiqira fasaasa ufa fannoo ínni ánaamuru faqa óonu maréeqeenoo Yuda máqannaa ámiqi ámiqiranaki quqánnisaidanoo. Ínnee ánaamuru máriasa maqee Yuda máqannaasa sáimbaqa moodáa nifaaqara foora máridaqa ásauku mundírana Yísunakiqari Yuda máqannaasa qíma afeekaikámmaqoofa ínnee ánaamuru misá sáimbaqa minakí márida máree maríafanoo.

Ánutufa narí afeekannái naakáparana akoofásaikirana moo qímufaqa qinée minánnai Yísuna ámiqira fasaasa ufa saikíra fáiqikiqa máridaqa. Qinée Ánutuna áiku ásauku maqásaa fasiqaki óorudupirausa márunanoo Ánutufa sía minára írinoo káqi mi-naakaparána qíminoo diqiqámaqimaqeenoo ásauku mundírana, innaarúnai nímira ámiqi ámiqira ainaina moómoo ainaina sía amana ásaana rírana amana mi-ufánara ánaamuru qímannimiranaki qiní quqáqisaifaqa máridaqa. Ánutuna óoqai kukéeqara írirafa maqee kooroommásee faiqí ánaasee ámiqimmandee íriaqeera faqa qiní minakí faqa quqáqisaifaqa máridaqa. Ánutufa aiqáma ainaina áuquqoofanoo márufa miqóoqari moómoo aukuana narí kukéeqara írirana Yísunara kísaaqasaa rafáaqafuqoofanoo márinau. 10 Maqee áukuana kooroo íanifeera qímasee Yísuna ufara suqímariasa misánnai Ánutufa narí írirana quandaqáandidanoo uqannífiqaifaqa qáfaidaqa miná ámiqi ámiqiranara innaarúnai ámeemaanai máriasa misá úriqararausa faqa rakísirausa faqa maqee uqannífiqaanifeera Yísuna kooroo ídanoo.

11 Ánutufa narí náaru náaru máriranaki máridanoo mi-ainainná áuquanauree qímaqoona maqee áuqinau, narí ásauku mundírana Yísunannai mi-ainainná, narí ufara súqimariasakina narí írirana kooroo íanifeera áuqinau. 12 Maasá Yísunasaa atooáqa márianannai faqa maasá miná saqárikiranannai faqa sía maasá nisaurída rufíaanaura, paasóosamasee Ánutuna áfusaa fuannánara mi-eedoo qiráfa maasáindi máridanoo. 13 Qinée Pauroosa minára irisée ínni afeekaikámandaida qímannimidaqa. Qinée Yísuna ufa qímannimunaqa misá minára fífau qiní karabúsaki quqéeqa. Ínni Eefeesusa máqannaasa qinée karabúsaki márunna aupuraranara iriséeqa sía Yísuna ufa minníseeqa kudoosaápaaqa, ínnee minára maaqí qiaqa Pauroona karabúsaki márirana maasá Eefeesusa máqusanaasa ámiqimáqimaqaidanoo fee qímasee asasiaqa.

Ínnee naríara naríara nímuqusiranaki máriaqeera qídanoo.

14 Qinée minára íriqa maasá qíkoona Ánutunara iriséeqa qiqoori sáunarafíqa kummára máfi ínniara qeeqá qímuqusannoo innaaru qídaqa. 15 Innaarúnai máriasa faqa maqásaa máriasa faqa aiqámatia Ánutunasaaqaraana náriqa núqu uqanna máraidaqa. 16 Mi-Anutúnara ínniara innaaru qídaqa, ásauku mundírana ínnee saqárikiranannai mifá aniréenoo ínni naunduráki máaqakiara foora ani kéeqáanifeera. Mifá narí maraqunannái narí aréenarana firaanákiqari ínni naunduráki afeeka níminaqa mapukúsee máriaqa. Qinée ínniara maaqí qídaqa innaaru qídaqa, ínnee ínneeqa atukara foora faqa faakánara foora faqa naríara naríara nímuqusiranaki mapukúsaaqa, ínnee Eefeesusa máqannaasa faqa Ánutuna áiku ásauku moo máqannaa máriasa sáimbaqa afeeka márinaqa minánnai ásauku mundírana ínniara ámuqusinoo áidirana firaaná íriaqeera innaaru qídaqa. Mifá ínniara ámuqusinoo áidirana miná kísaaqasaa áidirana faqa miná qúsa kamu faqa miná meerái sandáaqaira faqa miná meemái fárumara foora márirana faqa miná firaatiará íriaqeera qinée innaaru qídaqa. 19 Eeóo ínnee miná ínniara ámuqusirana firaanára íriaqeera innaaru qídaqa, sía amana moó fannoo firaaqóo íriannoo, firaafá máridanoo, miná ámuqusirana firaafá máridanoo, ínnee miná ámuqusirana firaaná iriséeqa Ánutuna umbiqárafa ínnikina umbiqáanifeera ínniara innaaru qídaqa.

20 Ánutuna afeeka fannoo maasáki saikíranannai naunduráki ámiqi ámiqirana nímiannoo, miná naunduráki dadaaqírafa maasá sía amana minára irámasee qímiannee qianáura sía amana maasá minára írianaura firaa ainainatiá máridanoo. 21 Yísuna ufara suqímariasa náriqa ásauku mundíranasaa atooáranannai Ánutuna amooqírafa maqee kámuqoo faqa náaru náaru faqa máriani.

Copyright information for `BJR