Ephesians 6

Faiqiuqáindiara faqa nári nínaukoora faqa qídanoo.

Faiqiuqáindi ínniara qídaqa, ínneeqa nínausa níkausa ufara eedóo kai qiaqa. Ínnee Yísuna ufara suqímariasaki maríanara andeeqárafa mifá máridanoo. Mooseena sándufara ínnee írimariafanoo minakínaafa aaquqíra ufa qísaukuqara taikásee máridanoo. Minakínaana moo sándufa maasá mi-maú fúanoo Ánutufa moo áinaina maaqóo maa-maqánasaa maasá qímirara qíma afeekaikámmaqoofa maaqímminoo máridanoo, ínniqa nínausa níkausara náaquqaina misá ufamau fuaqa. Fífanoo Ánutufa ínniara kísaaqasaa ínneeqa maqa máaqaki máridaqa ámiqiranaki máriaqee qímasee maasára qímafeekaíkinau. Maasá mi-ufánara úriqarara úfee qídaqa. Dóo ínnee faiqiuáindi mi-maú fuaqa.

Faiqi níkausamara ínni qímannimidaqa sía ínneeqa faiqi fífau nírana fundákifaqa áanoo iaqa, sía miqíaqa, maaqíaqa, Yísuna ufamau ínni faiqiuqa andeeqée andeeqásaifaqa Yísuna ufasáa innooqáaqa.

Aináinímariasara faqa misá úriqararausa faqa misára qídanoo.

Qinée Pauroosa ínnee moosá ainaínímariasa qímannimidaqa. Ínneeqa feefaurú márara saikaki kéeqafinaqa ámiqimasee miná aináinammaisaaqa. Sía nifaaqa quqásee mána mána iaqa. Ínnee náaquqee marínaqa aináina ákoona anáinammaisaaqa, ínnee ásauku mundírana aináinidee qídaqa maqásaa aináina ákoona ámiqimasee nímuqusannai aináinammái̱saaqa. Sía misá eedóo qíra ufara kai irisée misá nífusaa kai aináiniaqa, ínneeqa nímuqusannai Ánutuna ufamau ásauku mundírana aináinidara foora ámiqimasee aináinamánnimaqaaqa. Sía fífau faiqí aináinamaiseera foóriaqa, karaambáiqa aináinammidee qímasee ámiqimasee aináinamaisaa. Ínnee miqídaqa maanára íriaqa, Karaambáiqa aiqáma fasiqa amana amana kái nímidanoo moosá rumbára saikaki maríasee narí aináinira saikaki máriasee nári ámiqira ainainirana ákiaqara amana amana kai innaarúnai nímiannoo.

Qinée aináinímariasara ínnee ínneeqa aináina ákoona ámiqimasee aináinammaisáa qee qímaseeqa ínnee aináina ákausa faqa qímannimidaqa ínnee faqa miqíkai mándee ínniqa aináinímariasasaa ámiqimmandee rakísiaqa, ámiqimasee aináiniaqee qímasee áanoo írana faqa nárírari máriana faqa taikáaqa. Ínnee faqa maanára íriaqa, ínnee faqa ínni aináinímariasa faqa moodáa rakísirafa innaarúnai márifa, sía mifá aináinímariasara uréeqarausee qímasee kafáa quándaki rakísi nímaqee maríasara úriqararausee qímasee qaara irirana máraidanoo, moodáa írirana marasée amana amana kai rakísi nímaqaidanoo.

Roomma máqannaa sundíara foora afaaqa ititámareena Sadannana faqa rákuaqa.

10 Maa-ufána taikára ufa maaqímminoo máridanoo, ínnee karaambáiqa faqa máridaqa moodáanaki nímarifaqa miná firaa afeekannái ínni faqa moodáanakikirana firaaqóo afeekaikámma mapukúaqa. 11 Sadannafa óosana óosana narí mandá níkaru qíranannai ínni náruannoo, ínnee minára rufíasee Ánutufa níminna saqári durú saamunannai ínneeqa nifaaqa ititáaqa. 12 Maasá Yísuna ufa írimariasa sía faiqí faqa rákidaqa maasá meerái Ánutuna innaarúna ámeemaanai mária mandá áfaanausa faqa rákidaqa, maa-asukunáki mária kamuqoo miríndari rákimariasa faqa misá úriqararausa faqa misá faiqí firaasá faqa meeráindari maasá dáruafaqa maasá misá faqa rákidaqa. 13 Ínnee minára iriséeqa Ánutufa níminna durú saamu saqariná qumáreeqa deedaqída máriaqa. Sadannafa mi-manda faasaanná nárirara aniráinaqa ínnee amanaikíqa máriafanoo narí faqa áruafaqáammasee miqóo kai éeraaramásee ititáqa máriaqa, sía amana áinnaaqaráani.

14 Minára qímannimidaqa. Ínnee fíndifi deedaqída máriaqa Sadannafa ínni mandóosana nimisée náruandoora. Roomma máqannaa sundía nifaaqa rafáaqafímariana kíkiqususee ínniara qianáuranoo. Ínneeqa fausánda níranaqumuki rumbée maría fára foora mifá ínni ánoona ufa kai qírafa mifá máriannoo. Ínni nímuqusasaa ititée maría afeeka ainainara foora ínni andeeqára óosana máriannoo. 15 Ínni níku ititée maríafa níku ánaamuara foora mifá Ánutufa faqa mári asooara amiqira fasaasa ufa maqee maqee aamína máqannaa qímannimirafa mifá ínni níku ánaamuara foora ititárafa máriannoo. Mi-andeeqara oosannáusa marasáifanoo Sadannafa sía amana ínni náruani.

16 Ínniqa saqári ukéeqirira fára foora Yísuna saqárikirafa máridanoo. Ínnee Roomma máqannaa sundíara foora maqee maqee mi-saqarína ukéeqirisee máraqa nífanoo Sadannafa narí feefa idá muqúru qumáree ínniara óosana óosana fúrufarira irirana minánnai ínni nifaaqa náqusee náriraree qímasee áqusainaqa ínnee Yísuna saqárikiranannai miná máfi rukí áquaqa.

17 Roomma máqannaa sundíauqa rákiranaki fídaqa qafee níkiaaqa afisúsee níkiaqa rukámifoora afisímariqau. Ínneeqa níkiaqaki ititée maría qafeenára foora Ánutufa innaarúnai asumu márirana nímufa máridanoo. Sadannafa ínni kurídiranaki maqee maqee mara quqárarinaqa ínnee mi-qafeená afisúsee asumu máriaqa. Roomma máqannaa sundíauqa rákira páipana dínni dínni áfaifaqaanannai faiqí ateekéeqa raqúru nímiqa ímariqau. Ínni raiqára páipana aseema fooqáafa márina Ánutuna ufa máridanoo miná maraquna fannoo mi-ufána nímu úfafa máridanoo. Sadannafa ínni faqa rákinaqa mi-samúna qumáree miná áruaqa. 18 Ínnee mi-ainaináusa máraidaqa innaaru qídaqa maqee maqee Ánutuna dadaaqíranara faqa innaaru qiaqa. Ánutuna maraquna afeekannái maqee maqee eendáki faqa fáasaana faqa Ánutuna maqásaa fasiqa anaaseera Ánutufa ámiqi ámiqimma nímaqaanífeera innaaruqiaqa. Sía kudoosaápaaqa afeekaikámandee innaaruqiaqa. 19 Qiní Pauroosara faqa innaaru qiaqa Ánutufa óosana qímasainaqa qinée faiqí ánaasee Yísunara qímannimianauree qímasee paasóosamandee qímannimianaura, Yísuna ámiqira fasaasa ufa oóqai kukéeqanoo márifa maqee áukuana Ánutufa faiqí ánaasee kooroománnimaqeenoo.

20 Qinée Pauroosa mi-amiqira fasaasa ufána aanáiqikirausa máridaqa. Kúqaa Roomma máqanna karabúsaki máridaqa kúqaa aanáiqikirausa máridaqa. Ánutufa qiníara paasóosamandee faiqí ánaasee qímannimiannee qifaqa ínnee qiníara innaaru qífaqa paasóosamandee qímannimianaura.

Pauroona ákara taikára ákara.

21 Qinée Tikikusana aqiqáananoo qiní dáufakiana ínni qímannimiannoo. Mifá maasá qímuqusi marí qikaqaafasaafa máridanoo, karaambáiqa saikáki ámiqi ámiqira ainainímarifa maridanoo. Mifá qiní fasáasa ufa ínni qímanniminaqa ínnee qiní máriranara íriaqeera. 22 Miná qímannimianifeera aqiqaanáura ínni nímuqusa poodúqaanífeera aqiqaanáuranoo. 23 Maasá qíkoofa Ánutufa faqa maasá karaambáiqa ásauku mundírana Yísuna faqa naunduráki asooárana faqa naríara naríara úriqarara ainainee qímasee nímuqusirana faqa Yísuna saqárikirana faqa ínni aiqáma qiní qíkaqaafasaauqa nímiani. 24 Ínnee aiqámausa maasá karaambáiqa ásauku mundírana Yísunara sía taikée maría rírana rímariasa, Ánutuna áfaarirafa ínni faqa máriani.

Copyright information for `BJR