Exodus 1

Isipa máqannaasa Isaraee máqannaasa mandáikamma nímaqaqau.

Yakooboona ámaaku óondamara misá faqa Isipa máqusai óoqu fúsa misá nuqu maaqímminoo máridanoo. Reeubeenáfa faqa Simeeoonáfa faqa Réefifa faqa Yúdafa faqa Isakarafa fáqa Seeburunafa fáqa Beensamináfa faqa Dánnaafa faqa Napatarifa fáqa Kadaafa faqa Áseerafa faqa minamúsa faqa misá faiqinámu faqa nárì níkoona nínaakuna faqa Isipa máqa máaqaki óoqu fiqau. Moodáanaki ruqáuiqa óoqu fúsà qaaramóo fásiqa níku nísauku taikásee moó fásiqa ásaukuqará kai taikásee 70 Isipa máqa máaqaki óoqu maríqau. Yóoseefaafa óoqai miqóo máruqoo márinau.

Miqóo máriiufaqa Yóoseefaafa faqa narí áfasausamara faqa aiqáma mi akiiqáusa kuqu taikáfufaqa misá faiqi námu níku nísauku fíndifufaqa faiqi moómoo uqanna maqasoofaqa kambíqaqau. Kambíqafiqa Isipa máqa máaqa umbiqámma áqiqa máriqau. Faraoofa Isipa máqannaa rakísirafa kuqufufanóo kísaaqasaa márinoo fúka moó Fáraoofa kambíqanau. Mifá Yóoseefaanara faqa aandaroo áukuana rakísiiunara faqa miná áiku ásaukuara faqa sía írinau. Faraoofa narí máqannaasa qímanniminoo qinau. Isaraee máqannaasa moómoo uqanna maqa máaqa umbíaqa máriafaqa maasá úridaaqaramáseeqa maasá rafáaqafu qímaqéefaara. 10 Rákirafa kambíqainaqa misá maasá namuqáa faqa moodáanaki kámmafi maasá darusée quqásee sandée foora. Ínni saimbaqa náqifee mándee óonumafi irisée misá rafáaqafúsaanaqee misá sía moómoo kambíqeefaree.

11 Miqí qímasoofaqa Isipa máqannaasa Isaraee máqannaasa karafúsa saika nímiqau. Afeeka rakisirausá misásaa rakísi maríqau. Isaraee máqannaasa karafúsaki máridaqa qaara maqusa áuqiqau. Moó máqusa áuqu Pitoona máqusa áuqusee moo máqusa áuqu Raqamaseesa máqusa áuqiqau. Mi maqusa qandá nárana afeedímaru maqusa qanda máriqau. Qafee máqannai kai máaqa usakéemaríqau. 12 Isipa máqannaasa Isaraee máqannaa kafáa kafáa ummaara nímufaqa moómoo kambíqafiqa maqa máaqa qumbiáqau. Isipa máqannaa misá níndafeeqa káaqa rufíee máriqau. 13 Miqúnara sía moómoo asumu kambíqaaqeera firaa kadaapí uqanná misá nímuaaqa quqásoofaqa misá mandá márira máriqau. 14 Isipa máqannaasa qufaqa Isaraee máqannaa qafee máqa qumáree ausírira óoniara foora moómoo áuquseeqa minánnai máaqa usakéeqa kafaa áfuqaki áinaina faqa ímaríqau. Miqí márufaqa sía Isipa máqannaasa misára qimudáòo qímariqau.

15 Faraoofa mi kadaapirirána Isaraee máqannaa nimiséenoo quandáfinoo Isareee máqannaa ánaasee qaaraqánda Sifaraa námmarisa Puaa námmarisa inaamunaí fusásaa rakísimaru anaasee qanda qímanniminau. 16 Ínneeqara innaamunaí fídaqara dadaaqíqa faiqì maqaséeqa akoonaiqí aiqáma aaqee uqanná rutúkuaqa, mánaaqa kai káqi máriaqa. 17 Mi anaaseeqandá Faraoona ufa iriséeqara Ánutuna ufara rufíaseeqa sía akoonaiqíuqa nárí maríqau, káqi máriqau. 18 Faraoofa akoonaiqí moómoo kambíqoofanoo níndafamáseenoo innaamunaí nífiqaqanu ánaaseeqanda náaramáseenoo níqinoo qinau. Ínneeqara náqaafee ifaqée sía akoonaiqí nárídee qiní ufa rukíáafanoo. 19 Miqandá miná ufa iriséeqa qiqau. Heeburu ánaasee sía Isipa ánaasee naannaráidaqa misá káqi káqi faiqi máqaidaqa. Maaqandá óonu ráunaqa fáasai faiqi maqaqaafaqá óonu níndafaidaqa.

20 Ánutufa mi anaaseeqandá óosana níndafamáseenoo ámiqi ámiqimasoofaqá Isaraee máqannaasa moómoo kambíqafiqa afeeka maqannaa máriqau. 21 Miqandá Ánutunara rufíoofanoo miná ákiiqara Ánutufa miqandá faqa faiqi asumu níminau.

22 Faraoofa misá níndafeenoo narí máqannaa Isipa máqannaa aiqámausa náaramáseenoo ufa afeeka ufa qímanniminau. Heeburu ánaasee akoonaiqí maqasáifaqa ínnee miná maréeqee nammári firaaná Niru námmariki áqusaifaqa kúquaqa. Aiqáma kúquaqeera mánaaqauqa kai káqi máriaqeera qinau. Miqí qímasoofaqa miqímmi maríqau.

Copyright information for `BJR