Exodus 10

Pándaaqauqa moómoo kambíqaqau.

1Yáaweefa kafáa Mooseena qímaminoo qinau. Anée kafáa Fáraoo finnaí fúa. Qinée Fáraoona faqa miná aináiniranasaa rakísirausa faqa kaukaataqíra írirana nimiséeqa qeeqá faiqí sía áuqaaqaa íra áinaina misá qámbaana áuqarara miqíanaura. 2Ínnee ínneeqa faiqi námu fáqa nínaiqimara faqa, qinée Isipa máqannaasa faiqí sía áuqaaqaa íra áinainannai misá mara fúrufárirausaika mánnimaqaafánnanara qímannimia. Ínnee aiqámausa qiní Yáaweesara írifaranoo. 3Mooseefa faqa Áaroonafa faqa Fáraoo funnái óonuree maaqí qímasee qímamiqa qiqau. Yáaweefa Qeeburu máqannaasa Ánutufa aníara maaqí qídanoo. Kísaaqasaa fee anee qáòo qídanee sía fee aneenná áuqu mara máree múqufisee qiní qímeemaanai márinnaree. Anée qiní faiqí ánaasee idukúsainaqa óonureeqa qiníara innaaru qiaqee qídanoo.

4Anée káqi kai qáoo qímarinaqa qinée dúna pándaaqa moómoo mara quqásaanaqa aní máqa máaqaki qumbiqáannoo fee qinoo. 5Pándáaqa moómoo uqanna kambíqafi maqá ititáfinaqa sía maqá qáfeefáranoo. Pupúsamu fánnoo nárídanoo máfìsaí ándandausa aiqáma náma taikéefaranoo. Saqári máfìsàínáuqa faqa neefáranoo. 6Mi pandaaqáusa aní ufa írira máaqaki faqa aní aináiniranasáa rakísi máriasa máaqakiaqa faqa aní máqannaasa máaqakiaqa faqa qumbiqéefaranoo. Aní akeekú akaakú máruqooqari faqa maqee anée máriannaqooqari faqa sía qáfaa áinainafa mandáinaina uqanna máriannoo. Miqí qímaseenoo Mooseefa ráudamaki finau.

7Fáraoona aináinirana sáa rakísi márusa Fáraoona qímamiqa qiqau. Maa fasiqáfa Mooseefa kísaaqasaa maasá ummaara qímidanoo. Isaraee máqannaa idukúsainaqa óonuree nári Ánutuna Yáaweenara innaaru qiaqa. Anée sía fée qáfaidanee Isipa máqa máaqa doo mandáikidanoo.

8Miqí qufaqá Mooseesa Áaroonasa nífiqee Fáraoofa máruqoo mínísoofanóo Fáraoofa qímanniminoo qinau. Ínnee óonureeqa ínni Ánutuna Yáaweenara innaaru qiaqa. Ínneeqa fíranara faqa ámiqi másee qímaqímifaqa íria. Yáuyáusee fifáranoo fee.

9Miqí qufanóo Mooseefa narí qímaminoo qinau. Maasá aiqámausa fuanáuranoo. Maasá qeeqá faiqi asooqá faqa fuanáuranoo. Maasá qeeqá sipsípauqa faqa mimmíuqa faqa burimakáuqa faqa aiqáma óonuree Yáaweeena oomáqa suqámianauranoo.

10Miqí qufanóo Fáraoofa qinau. Qinée Yáaweena áuqu rámasee qeeqá qimana aiqámásee maaqí qídaqa. Qinée sía eedóo qíànaqa ínnee ínneeqa faiqì ánaasee nífiqee fifáranoo.Ínnee akooqóo maasa mandáikamma qímaqarara típundaara máqaqee miqí máriafanoo. 11Minára qinee ínniara faiqí kai óonureeqa ínnee íri maríandee Yáaweenara innaaru qímaseeqa amooqiaqa. Miqí qímasee narí sundíauqara qufaqá Mooseesa Áaroonasa niiqoofaqa ráudee fiqau. 12Yáaweefa miná qáfamaseenoo Mooseena qímaminoo qinau. Aneenná ásauku Isipa máqa máaqa ámummaqa uqéerasáinaqa pándaaqauqa ániaqa. Aniréeqa misá Isipa máqannaasa nárana amanee aiqáma naaqa.Pupú samu áridanoo máfisooná námataikáaqa.

13Mooseefa iriséenoo narí sáunù uqéerasoofanoo Yáaweefa úfaira qufanoo súani óosanaindari mi faasaanná faqa mi eendánaki faqa úqinau. Kanánaana úfai fánnoo pándaaqauqa moómoo máree úrinau.

14Pándaaqa moómoo núkudara foorá ururéeqa aiqáma Isipa maqá máaqaki amanaíkiqa máriqau. Moómoo indaarú ooqbíqasee úrufaqa kafaa ináaqíana akaqáusa ooqbíqasee úrufaqa, miqí kai másaida moómoosa uru maqa máaqa qumbiáqau. Óoqai sía miqírana qáfaqau, náaru faqa sía qáfeefaranoo. 15Mi pandaaqáusa aiqáma maqá rafáaqafúsoofanoo sía maqá áti faqa kooroo inau. Maqá faqa kaí kudima árinoo márinau. Pupú sámu fánnoo áridanoo máfìsoo ándándáusa faqa aiqáma saqári qaqama faqa námasaqau. Sía saqári ámanee árira áinaina, saqárisaa faqa úmmaqira áináinasáa faqa Isipa máqa máaqaki márinau.

16Fáraoofa Mooseesa Áaroonasara ániaqee qufaqá aniroofanóo qímanniminau. Qínee Yáaweena ínni Ánutuna faqa ínni faqa mandáikamma nímaqeeqa. 17Ínneeqara qiní áaqarana ákiiqara kafaa maqee kái minní qísaaqa. Minní qíseeqa Yáaweena ínneeqa Ánutufinnai innaaru qífanoo maa kuquaqaa ira aupurarána mara áqu qísaani.

18Mooseefa iriséenoo ráudamaku fánoo óonureenoo Yáawee funnai innaaru qinau. 19Yáaweefa qufanóo úfai fánnoo súani áfu óosana qáannaindari úriufa mara quandásee súani áfu kéeqée márunnaindari afeeka ufai uqanná úqinoo aiqáma pándáaqauqa fuaqá Taatuqée óoruku námmarinni áqinau. Sía uqanna moodáa pándaaqa Isipa máqa máaqaki káqi márinau. 20Yáaweefa qufanóo Fáraoofa kaukaata qímasee sía Isaraee máqannaasa idukúsoofaqá fiqau.

Asukuna firaafá nárinau.

21Yáaweefa kafáa Mooseena qímaminoo qinau. Anée aneenná ásauku innaarúnai uqéerasainanoo asukuna fannóo aiqáma Isipa máqa máaqa rafáaqafuani. Asukuna firaafá misá nifaaqaí atooqánoo máridanoorá foorá inóo máriannoo. 22Mooseefa narí ásauku innaarúnai uqéerasoofanoo Isipa máqa máaqa asukuna firaafá qaaramoó fáasaana ititánnimaqánau. 23Isipa máqannáasa mi karí sía narí qáfee narí qáfee ímariqau. Sía aaná nímariqau, máaqaki kai máriqau. Isaraee máqannaasa máruqoo kai káaqa qée márufaqa márinau.

24Fáraoofa Mooseena áaramáseenoo qímaminau. Aneenná máqannaasa faqa dóo óonureeqa Yáaweenara innaaru qímaseeqa amooqiaqa. Ínnee ínneeqa faiqì ánaasee faqa aiqáma nífiqee fuaqa. Ínneeqa aandáuqa maaqóo quqásee ínneeqá kai fuaqa. 25Miqí qímasoofanoo Mooseefa qinau. Maasá náriqa aandáuqa faqa máree óonureeqa Yáaweena maasá Ánutuna tatúfirana suqá ámianaura. 26Maasá qeeqá aandáùqa máree fuanáura. Sía moodáa maaqóo káqi máfi quqáanaura. Maasá qeeqá kaí nána áandau fee aruséeqa Yáaweena maasá Ánutuna tatúfirana suqá ámianauree. Maasá maqee sía íridaqa. Miqóo óonuree írianaura. Nána áandaunnóo fée tatúfirana suqáanaúree.

27Yáaweefa qufanóo Fáraoofa kaukaata qíra írirana maraséenoo ititammáseenoo Isaraee máqannaa sía idukínau. 28Miqí qímaseenoo Fáraoofa Mooseena qímaminau. Dóo qinée qáfee máriana qiní qífusaaqari fífua. Qinée sía kaifáa aní qáfaanaura. Aní qáfaanana kúqinnaranoo. 29Mooseefa miná ufa iriséenoo Faraoona qímaminau. Anée kúqaa qíananoo. Anée sía kafáa qiní qíqafeennaranoo.

Copyright information for `BJR